uYuuda 1 - ULufingwi uLupwa

Umulaamu

¹ Ukalaata uno nsimvile neene ne Yuuda. Ine ne muvhomvi uwa Yeesu Chilisiti, havhili ne munine uwa Yaakobu. Nkuvhasimbila imwe mwe uTaata uMulungu ahavhiita nu kuvhakunda, havhili uYeesu Chilisiti akuvhasunjiilila.

² UMulungu avhafwilaje uvhwila nu kuuvhapa uvhutehamu ni shikunzi. Vwonti ivwo avhapanje ku vhwinji.

Avhasambiilizi avha ilenga

³ Vhankundwa, naamile nu mute nkaani kuuti mbasimbile izya vhuposhi vhwitu swenti. Ileelo naalola kuuti nkwanzilwa kuvhasimbila nu kuvhalambiilizya nkaani kuuti, mulwilaje ulwitiho lwe avhafinjile vhaposheleeye lwoka vhweleele.

⁴ Nkuvhasimbila ukalaata uno, mwe pe kuli avhantu vhamo vhe vhatakumushindiha uMulungu, vhayinjiziizye ku vhuzigizigi nu kusangaana niimwe. Avhantu ivho vhakugalulanya izwi ilya vhwila, inga livhitishilaje kuvhomba uvhumalaaya. Ivha vhantu vhe vhakumuhaana we ali weeka uMulongozi uMupiti, we wu Yeesu Chilisiti uMwene wiitu. Ileelo kufuma hali, uVhusimbe uVhufinjile vhwáyanzile kuuti vhalilongwa.

⁵ Ishi, pooka nu kuuti mumanyile, nkwanza imbakumbusye kuuti uMWENE uMulungu lwe avhapoha aVhaisilayeeli kufuma mu nsi iya Miisili, pisinda ahavhalovwa vhaala vhe vhatáali nu lwitiho.

⁶ Havhili mukumbushe kuuti, vhoope avhahavhizya vhaala vhakunziilwe na manyoloolo aga shiima mu shiisi, ku vhulonzi uvhwa isiku liila ipiti. Vhakunziilwe, mwe pe vháyisufwizye imbombo yaavho, vhahavhuleha uvhutendamo vhwavho.

⁷ Mukumbushe havhili avhantu avha mu nkaaya iya Sodooma ni ya Gomoola, pooka na vha mu nkaaya impalamani. Avhahaaya avha mu nkaaya izyo, vhávhomvile inza avhahavhizya ivho. Vhávhomvile uvhulugusu nu kulandata izya vhuntu uvhwa vhutalamalandu, zye zitakuvhalilana nu vhupezi. Kuli izyo, vhahapeelwa isunde ilya mwoto uwa shiima, inga livhe nsoshi ku vhantu vhonti.

⁸ Ishi avhantu ivha vhoope vwe vhali. Vhakuloota injozi nu kuuti zya Mulungu. Injozi izyo zye zikuhandamania amavhili gaavho. Havhili zikuvhavhiiha kuuti vhahaanaje amaha aga Mulungu, nu kuvisaamula ivipelwa ivishindamu ivwa ku mwanya.

⁹ Ileelo poosye uhavhizya umupiti uMikayeeli, lwe akutumvanya nu Mukwalanzi nu kuvhuzilizanya nawo kuzya muvhili uwa Moose, atálinzile kumulonjeelela ku lukwinkwino. Ileelo áshindisile amaha aga Mulungu, átili, “UMWENE uMulungu wuuyo akupilile!”

¹⁰ Ileelo avhantu ivha, vhakusaamula inongwa zye vhatazimanyile. Havhili inongwa zimo vhazimanyile inza ivihanu vwe vitali ni njeele. Inongwa izyo zye zikuvhalovwa.

¹¹ Vhasheela! Mwe pe vhakulandata idala ilya Kaayini ilya vhutalamalandu, havhili kuzya vhulonsi vhakutala umulandu uwa Baalamu ishisita kuyidinda. Vhoope vhakusambuha inza uKoola, nu kulovha inza uweene.

¹² Avhantu ivha vhakunanganya lwe vhakulya pooka niimwe pa mulyo uwa shikunzi, vhakulya vheeka ishisita insoni. Havhili vhali inza amavhingo ge gatali ni mvula, ge inkungu yikugapempenusya. Vhali inza amakwi ge gatali na mantonongwa ahavhaliilizyo aha mvuno, ge gafuuye nziila nu kwilulwa.

¹³ Vhakupootwa kuyidindila inza amavhilingwa amapiti aga mwa sumbi, havhili imbombo zyavho izya nsoni, zikukumuha inza umutatafula uwa mavhilingwa igo. Havhili, vhali inza inzota zye zikweleela, ivho, ishiisi ishipiti, vhwe vhutendamo vhwavho vhwe vhahavhiishilwa shiima.

¹⁴ UEenoki, utaata uwa 7 kufuma pa Aadamu, áfumwizye uvhukuvhwi ku zyavho. Átili, “Yeenyi, uMWENE uMulungu akwinza na vhahavhizya vhaakwe avhafinjile amashumi na mashumi,

¹⁵ kuvhalonga avhantu vhonti, nu kuvhasunda vhonti vhe vhatakumushindiha uMulungu. Akuvhasunda kuzya mbombo zyavho zyonti izya vhupuvi na mazwi amagomu gonti ge avhatalamalandu ivho vhamuyanzile uweene.”

¹⁶ Ivha, vhantu vhe vhakuyivhuna nu kukwinkwina shiima. Vhakulandata impapilo zyavho, havhili vhakuyanga amazwi amamwamu nkaani aga kuyitumvwa. Vhakuvhatiima avhantu inga vhalyaje ilonka.

Insoshi ni ndajizyo

¹⁷ Ileelo imwe vhankundwa, mukumbuhaje amazwi ge avhatumwa avha Mwene wiitu uYeesu Chilisiti vháyanzile.

¹⁸ Vhátili, “Amanda aga kumpeleela, kuliivha avhantu vhe vhakujevhula nu kuzilandata impapilo zyavho izya vhupuvi.”

¹⁹ Avhantu ivho vhe vhakuvhalumanya imwe, havhili vhantu vha mu nsi ino vhweleele, vhe vhatali nu Mupepo uwa Mulungu.

²⁰ Ileelo imwe vhankundwa, muyizenje mu lwitiho lwinyu ulufinjile nkaani nu kulaavha ku maha aga Mupepo uMufinjile.

²¹ Mujendeelele kuvha mu shikunzi isha Mulungu, nu kumusuuvhila uMwene wiitu uYeesu Chilisiti, kuuti avhafwile uvhwila inga avhinjizye mu vhulanzi uvhwa shiima.

²² Avha maganigani mu lwitiho, muvhafwilaje uvhwila.

²³ Havhili vhamo muvhasompolaje, kuvhapoha mu mwoto. Vhamo muvhafwilaje uvhwila, ileelo muvhanje minso, nu kuvha ukutali nu vhutalamalandu vhwavho.

UYuuda akumutiima uMulungu

²⁴ UMulungu akuvhwezya kuvhuvhatila imwe, inga mutahapunule, havhili akuvhimiilisya ishisita ulukwinkwino pilongolela ilya vhushindamu vhwakwe, she muli nu luseshelo ulupiti.

²⁵ Uweene wu Mulungu weeka, havhili Muposhi wiitu, kwi idala ilya Mwene wiitu uYeesu Chilisiti. Uvhushindamu nu vhupiti na maha amasisya na maha, vili nu weene kufuma hali, ishi, havhili poosye shiima. Amina.