uTiiti 3 - ULufingwi uLupwa

Ulujendo ulwa Shichilisiti

¹ Uvhakumbusyaje avhantu kuuti vhayisyaje ku vha maha na vhapiti avha nsi nu kuvhashindiha. Vhavhanje vhayisengiinye kuvhomba imbombo zyonti inyinza.

² Patahaavhe avhantu vhe vhakuligana, poosye avha ivho, nkandi vhajimbililaje nu kulolesya uvhutonsu ku vhantu vhonti.

³ Ahavhaliilizyo he hátuusile niiswe vhweleele twámile swe vhapukupuuku, havhili tutáamile nu mushinzi. Inza vwe twáhopeliilwe, tuhalemwaga ni mpapilo izya mavhiila mu mavhiila. Tuhavitilanaga nu kulolelana umwone, havhili tuhapatwaga nu kuvhapata avhanji.

⁴ Ileelo ku vhusililishilo, “UMulungu uMuposhi wiitu álolesiizye uvhwinza vhwakwe ni shikunzi,

⁵ ahatupoha. Te kuuti iswe twámile nu lujendo ulwinza, nkandi átuposile ku vhwila vhwakwe vhweleele. Átuposile kwi idala ilya kutuzelufwa uvhutalamalandu vhwitu nu kutupaapa shipwa nu kutuvhiiha shipwa kwi idala ilya Mupepo uMufinjile.

⁶ UMulungu átwitiliziizye uMupepo uMufinjile ku vhwinji kutuushila kwa Yeesu Chilisiti, uMuposhi wiitu.

⁷ Nalyoli tukuvhaazilwa kuuti twe vhagolosu ku vhwila vhwakwe, átuvhiisile kuvha swe vhaana vhaakwe swe tukusuuvhila kuposheela uvhulanzi uvhwa shiima.”

⁸ Ilyo lizwi lya nalyoli. Nkwanza kuuti uhomelezyaje ku vhe vhakumwitiha uMulungu, kuuti vhayifumwaje nkaani kuvhomba imbombo inyinza, mwe pe amazwi igo minza, havhili gakuvhaavwa avhantu vhonti.

⁹ Pooka niizyo, uyidindaje na madali aga vhupukuuku aga kutaha amazina wooka wooka aga vhataata vhe vhahafwa. Utatumvanyaaje ku ziila zye zili mu ndajizyo, havhili utavhanje nu vhulumaluma, mwe pe izyo zyonti zitangavhaavwa naashimo, zya shaaha vhweleele!

¹⁰ Umuntu wonti we akulumanya avhantu, umusohaje, poosye luvhili lwonti. Inga atakusaajila, umwefwaje mu shivhanza.

¹¹ Umanyile ahinza kuuti umuntu inza uyo ananjisile, akuvha mutalamalandu, ayilonzile wuuyo weeka.

Amazwi aga kulagana

¹² Nkwanza kusyala mu nkaaya iya Nikopooli ahavhaliilizyo aha lupepo. Ahavhaliilizyo he ndimusonteelezya uAliteema, poosye uTikiiko ku kwaho, uhinze naluvhiilo ku Nikopooli, inga tuhomaane ukwo.

¹³ Uvhombe ku mute wonti kuvhaavwa avha Apoolo nu Zeenaasi, ula we akuvhayanjila avhantu izya kuyipoha, inga vhatahasovhelwe ishintu naashimo lwe vhakushuula.

¹⁴ Avhantu vhiitu vhasambililaje kuvhomba inyinza ahavhaliilizyo honti, inga vhavhavwaje avhantu avhanji ivintu vwe vhasovheliilwe. Ipo pe vhakuvha vhakuvhahondezya avhanji mu vhuyo vhwavho.

¹⁵ Avhamwitu vhonti vhe tuli pooka navho, vhakukulamuha. Niiwe utulamushile avhamwitu mu lwitiho avha mu Kileete vhe vhatukunzite. UMulungu avhafwilaje uvhwila imwe mwenti.