uTiiti 2 - ULufingwi uLupwa

Zye zikwanzilwa ku vhantu avha shivhanza

¹ Ileelo iwe Tiiti, uvhasambilizyaje avhantu kulandatana ni nsambiilizyo izya nalyoli.

² Avhanaavuli avhagoosi, uvhasambilizyaje kuuti vhavhanje vhantu vhe vhakuyikonzya nu kushindikwa, havhili vhavhanje nu vhutimvu. Vhagomaje mu lwitiho, nu kuvha ni shikunzi nu vhujimbiilizu.

³ Vhoope avhantanda avhagoosi, uvhasambilizyaje kuuti vhavhanje nu lujendo ulugolosu. Vhatavhanje vhakwakwa, poosye kuvha vhe vhashimwela, nkandi vhavhanje vhantu vhe vhakusambiilizya inyinza,

⁴ inga vhavhasambilizyaje avhantanda avhalindu, kuuti vhavhakundaje avhalume vhaavho na vhaana vhaavho.

⁵ Havhili, vhavhanje vhantu vhe vhakuyikonzya nu kuvha na mooyo amazelu. Vhavhombaje imbombo izya mu nyumba zyavho nu kuvhomba inyinza nu kuvhashindiha avhalume vhaavho. Vhavhombaje vhwevhulo, inga izwi ilya Mulungu litayangwaje havhiivhi ku lujendo lwavho.

⁶ Vhoope avhajaaha, uvhasohaje kuuti vhayikonzyaje.

⁷ Niiwe weneewe uvhombaje ahinza mu zyonti, ufishile kuvha we shiholanyo ishinza kuli ivho. Ahavhaliilizyo he ukuvhasambiilizya avhantu, uvhasambilizyaje mu vhwanalyoli, ishisita isuufwo.

⁸ Amazwi gaaho gavhanje ga nalyoli, inga ahavhaliilizyo he avhantu vhakulinga kuuti vhakudinde, vhapotwaje izwi ilya kukuliga, pe vhasupilaje.

⁹ Avhazya, uvhasambilizyaje kuuti vhavhashindihaje avhamwene vhaavho nu kuvhahondezya mu zyonti. Lwe avhamwene vhaavho vhakuvhavhuuzya zimo, vhatadalinkanaje navho.

¹⁰ Vhatiivhaje ishintu naashimo ku vhapiti vhaavho. Vhalolesyaje ulujendo ulwa kusuuvhilwa ku zyonti, inga ku lujendo lwavho lwonti vhazivhiishe insambiilizyo izya Mulungu uMuposhi wiitu kuuti zivhe zya kuhondezya.

¹¹ Uvhasambilizyaje izyo, mwe pe uMulungu alolesiizye uvhwila uvhwa vhuposhi vhwakwe ku vhantu vhonti.

¹² Uvhwila uvhwo vhukutusambiilizya kuzihaana zyonti zye te zya Mulungu ni mpapilo izya mu nsi. Pe lwe tukutendama ahavhaliilizyo iha, tukuvha twe vhantu twe tukuyikonzya nu kuvha twe vhagolosu nu kuvhomba inyinza pilongolela ilya Mulungu.

¹³ Tukuvha vhwevhulo, lwe tukuguliilila kwinza ukwa Yeesu Chilisiti mu vhushindamu uvhupiti, we Muposhi wiitu nu Mulungu wiitu uMupiti. Ulu lwe lusuuvhilo lwitu lwe lukuutupa uluseshelo.

¹⁴ UYeesu we áyifumwizye ku zyitu, inga atutavhule kufuma mu vhutalamalandu vhwonti nu kutuzelufwa tuvhe swe vhantu vhaakwe vhe vhakuyifumwa ku mute kuvhomba inyinza.

¹⁵ Amazwi iga ge uvhasambilizyaje avhantu. Uvhagomwaje amooyo nu kuvhasoha ku vhudandamazu. Utahiitishe kuuti pavhe umuntu wonti uwa kukusuufwa.