uTiiti 1 - ULufingwi uLupwa

UPaavhuli akumulamuha uTiiti

¹ Ukalaata uno nsimvile neene ne Paavhuli, ne muvhomvi uwa Mulungu, havhili ne mutumwa uwa Yeesu Chilisiti. Antumile kuzya vhantu avha Mulungu vhe avhasavhuuye wuuyo, kuuti vhavhe nu lwitiho. Havhili vhavhumanye uvhwanalyoli vhwonti vhwe vhukuleeta ulujendo ulwinza pilongolela ilya Mulungu.

² Kuli izyo, vhakuvha nu vhulanzi uvhwa shiima, mwe pe uMulungu áfinzile kuutupa uvhulanzi uvhwo kufuma lwe insi yishiili kupelwa, nu Mulungu atakuluma ilenga.

³ Lwe ahavhaliilizyo haakwe he áhavhatisile haafiha, ahavhamanyisya avhantu izwi lyakwe kwi idala ilya kukumusya kwane. UMulungu uMuposhi wiitu wuuyo we álajiziizye kuuti ndumbililaje.

⁴ Nkukusimbila izi iwe Tiiti, we mwana waane mu lwitiho lwe tuli nalwo pooka niiwe. UTaata uMulungu nu Muposhi wiitu uChilisiti uYeesu vhakufwilaje uvhwila, nu kuukupa uvhutehamu.

Imbombo iya Tiiti mu Kileete

⁵ Zye nákulesheeye pa Kileete ipo, zyámile zya kuuti ulingaanye zyonti zye zyásyalilishiiye nu kuvhavhiiha avhasongo mu vivhanza ivwa mu nkaaya zyonti, inza vwe nákulajiziizye.

⁶ Usongo uwa shivhanza akwanzilwa kuuti avhanje muntu we atakukwinkwinwa naashimo. Havhili akwanzilwa avhe nu mushi wooka vhweleele. Avhaana vhaakwe vhakwanzilwa kuuti vhavhanje nu lwitiho, vhatalongwaje kuuti vhali ni ivho, poosye kuuti vhatali nu mushinzi.

⁷ Mwe pe umwimiilizi akuyimililila imbombo iya Mulungu, akwanzilwa kuuti avhanje muntu we atakukwinkwinwa naashimo. Atakwanzilwa kuuti avhanje muntu we akuyitumvwa, poosye we ali nu mulaha, poosye we wu shimwela, poosye we wa ivho. Havhili atakwanzilwa kuuti avhanje nu lupapilo ulwa mpiiya.

⁸ Ileelo akwanzilwa kuuti avhanje muntu we mutesi na we akuzisungwa nyinza. Havhili akwanzilwa kuuti avhanje muntu we akuyikonzya nu kuvhomba ingolosu nu kuvha mufinjile na we akuyidinda ku mbiivhi.

⁹ Havhili akwanzilwa kuuti avhanje muntu we akugalema amazwi aga nalyoli, inza vwe asambiliiye, inga avhagomwaje avhanji ku nsambiilizyo izya nalyoli nu kuvhapoota vhe vhakuzidindanjizya.

¹⁰ Nkuti avhanje vhwevhulo, mwe pe kuli avhinji vhe vhatakushindiha insambiilizyo izyo, inkaani avhiitisi vhamo vhe vhafumile mu Vhayuuda. Vhakuhomeelezya amaata gaavho na mazwi ge gatali ni ilonka nu kuhopenkanya. Ivho vhakwanzilwa vhahaanwe kusambiilizya,

¹¹ mwe pe vhakuvhapuvwa avhantu mu nyumba inyinji, lwe vhakusambiilizya zye zitakwanzilwa. Vhakuvhomba izyo, inga vhazyaje impiiya!

¹² AVhakileete ivho, wumo mu vhakuvhwi vhaavho áyanzile átili, “AVhakileete vhakuyanga izya ilenga amanda gonti, vhali ngati vihanu ivihali ivivhiivhi, havhili vhahata, vhakulya ku vhupafu.”

¹³ Amazwi igo ge gáyanziilwe ku zyavho ga nalyoli. Kuli izyo, uvhapilile nkaani, inga vhagome mu lwitiho.

¹⁴ Havhili vhakwanzilwa kuuti vhatatejelezyaje ivwili ivwa Vhayuuda ni ndajizyo zye zisimviilwe na vhantu vhe vhakuvhuhaana uvhwanalyoli.

¹⁵ Ivho vhakusambiilizya kuuti viliipo ivintu vwe vihandamanu. Ileelo ku vhantu vhe amooyo gaavho mazelu, ivintu vwonti vizelu. Ku vhantu vhe vhahandamanu havhili vhe vhatakumwitiha uYeesu Chilisiti, ivintu vwonti ku kwavho vihandamanu. Ivho injeele zyavho na mooyo gaavho mahandamanu.

¹⁶ Vhakupemula kuuti vhamumanyile uMulungu, ileelo vhakumuhaana mu lujendo lwavho. Vhakumuviisya, havhili vhasambusu, vhatahondeeye poosye na ku mbombo inyinza zyonti.