uLuuka 5 - ULufingwi uLupwa

UYeesu akuvhasaavhula avhasundikwa avha kwanda

¹ Isiku limo, uYeesu áyimiliiye pa luvhazu pa sumbi uwa Jenesaleeti, ahasambilizyaga izwi ilya Mulungu. Ivhungaana ilya vhantu lihasejelelaga kumutejeelezya, pe lihavha likumuvijiilizya.

² UYeesu ahagalola amavhooti gavhili pa luvhazu pa sumbi. Avhavuvhi avha nswi vhe vhahaata mavhooti igo vhatáliipo, mwe pe vháamile kwozya inyeelo zyavho.

³ UYeesu ahinjila mwi ivhooti limo, lye lyámile lya Siimoni. Ahamulaavha uSiimoni kuuti alisejeelezye hansi muhati mwa sumbi. Pe ahatendama mwi ivhooti, ahajendeelela kusambiilizya ivhungaana ilya vhantu.

⁴ Lwe aamala kusambiilizya, ahamuvhuuzya uSiimoni ahati, “Twala ivhooti pe pivhiiye, muteje inyeelo zyinyu, muvuvhe inswi.”

⁵ USiimoni ahamwamula uYeesu ahati, “We Mwene, tuvhomvile imbombo iyo iya kuvuvha vhusiku vhwonti, ileelo tutalemile naayimo. Ishi, mwe pe weewe wayanga, kuuti nteje ulwelo.”

⁶ USiimoni na vhamwavho vhahatega inyeelo zyavho. Lwe vhaatega, inswi inyinji nkaani zihalemwa, ni nyeelo zihanzaga kudumunkana.

⁷ Pe vhahavhapalizya avhamwavho vhe vháamile mwi ivhooti ilyamwavho, kuuti vhinze kuvhaavwa. Lwe vhinza, pe vhonti pooka vhahiizuzya inswi amavhooti gonti gavhili, inswi zyámile nyinji nkaani, na mavhooti gahanzaga kudwivha.

⁸ USiimoni we izina ilyamwavho vhahatinji uPeeteli, lwe aalola izyo, ahamusugamilila uYeesu ahati, “We Mwene, nkulaavha uyeepe pa kwane, mwe pe ine ne mutalamalandu.”

⁹ USiimoni áyanzile izyo, mwe pe uweene na vhanji vhonti vhe vháamile pooka, vhásukumiiye nkaani uvhwinji uvhwa nswi zye vhávuvile.

¹⁰ Vhoope avhaana avha Zebedaayi, uYaakobu nu Yoohani, vhe vhahavuvhaga pooka nu Siimoni, vhahasukumila nkaani. Pe uYeesu ahamuvhuuzya uSiimoni ahati, “Siimoni utogopaje! Kufuma ileelo ili kuuti uvuvhaje avhantu.”

¹¹ Pe vhahagatwala amavhooti gaavho pa luvhazu pa sumbi, vhahagaleha panaapo gonti, vhahamulandata.

UYeesu akumuzelufwa uwa mambombo

¹² Isiku limo, uYeesu ahinjila mu nkaaya yimo. Umwo mwáli umuntu uwa mambombo umuvhili wonti. Umuntu uyo lwe amulola uYeesu, ahagwa ishikupama pansi, pe ahamulambiilizya ahati, “We Mwene, imanyile kuuti uli na maha aga kunzelufwa. Inga ukwanza, nkulaavha unzelufwe.”

¹³ UYeesu ahagolosya inyoovhe yaakwe nu kumupalamansya, ahati, “Nkwanza uzelupe!” Ahavhaliilizyo hanaaho amambombo gahamwepa mu muvhili waakwe.

¹⁴ Ahamuhaana umuntu uyo ahati, “Utahamuvhuuzye umuntu wonti inongwa izi! Ileelo usogole uyilolesye kwa mupuuti nu kufumwa impuutile izya kuzelupa kwaho inza vwe uMoose álajiziizye, inga avhantu vhonti vhazilole zye uMulungu akuvhombela.”

¹⁵ Ileelo inongwa izya Yeesu zihonjela kukumuha imbazu zyonti. Avhantu amavhungaana amapiti, vhahavhungaanaga kumutejeelezya nu kuvhaponia impungo zyavho.

¹⁶ Ileelo uYeesu ahasogolaga ukutali kwe kutáali avhantu kumulaavha uMulungu.

UYeesu ali na maha aga kuvhaswila avhantu uvhutalamalandu

¹⁷ Isiku limo, uYeesu ahavhasambilizyaga avhantu mu nyumba yimo. Muli ivho vháliipo aVhafalisaayi na vhasambiilizi avha ndajizyo izya Moose, kufuma mu ntala zyonti izya mu Galilaaya ni zya mu Yudeeya, na mu nkaaya iya Yelusaleemu. Amaha aga MWENE uMulungu gáamile pooka nawo kuvhaponia avhavhinu.

¹⁸ Pe vhahinza avhantu vhamo, vhamusenziinye pi izagala umuntu we áhataliiye. Vhahalinga kumwinjizya mu nyumba, inga vhamuvhiishe pa Yeesu kuuti amuponie.

¹⁹ Ileelo vhahapootwa kumwinjizya umuvhinu uyo pa mulyango, mwe pe páali ivhungaana ilya vhantu. Pe vhahazuvha pa nyumba pamwanya, vhahadovhola. Vhahamwisya we áhataliiye she ali pi izagala lyakwe, vhahamuvhiiha pilongolela ilya Yeesu.

²⁰ Lwe uYeesu aalola ulwitiho lwavho, ahamuvhuuzya umuvhinu uyo ahati, “Mumanyani, nakuswila uvhutalamalandu vhwaho.”

²¹ Pe avhasambiilizi avha ndajizyo na Vhafalisaayi vhaala vhahanda kuvhuzilizanya kuuti, “Ishi wu naanu uno we akumusaamula uMulungu? Ataliipo umuntu we angavhaswila avhantu uvhutalamalandu, nkandi we Mulungu weeka!”

²² Ileelo uYeesu ahamanya insiivho zyavho, pe ahavhapilila ahati, “Shooni she mukusiivha izyo mu mooyo giinyu?

²³ Ishi lili kwoshi lye lipupuusu: kumuvhuuzya umuntu uno we ahataliiye kuuti, ‘Nakuswila uvhutalamalandu vhwaho,’ pamo kuuti, ‘Yimiliila ujendaje’?

²⁴ Ileelo ishi nkwanza mumanye kuuti, ne Mwana wa Aadamu indi na maha aga kuvhaswila avhantu uvhutalamalandu mu nsi.” Pe ahamuvhuuzya ula we áhataliiye ahati, “Nkukuvhuuzya kuuti, yimiliila! Nyatuula izagala lyaho, vhwelaaga kuhaaya.”

²⁵ Pepaala, umuntu uyo ahimiilila pilongolela lyavho, ahanyatula izagala lyakwe, ahavhwela kuhaaya uku akumutiima uMulungu.

²⁶ Pe vhonti vhahasukumila nu kumutiima uMulungu, vhahavha ni lyoga nkaani, vhahati, “Ileelo ili twazilola izya kusukumizya!”

UYeesu akumwita uLaawi kuuti avhe musundikwa waakwe

²⁷ Pisinda, uYeesu aheepa pa nyumba yiila, ahamulola umusonchezya musonko wumo, we izina lyakwe vhahatinji uLaawi, atendiime apa kusonchezezya umusonko. UYeesu ahamuvhuuzya ahati, “Undandate! Uvhe we musundikwa waane.”

²⁸ Pe uLaawi ahavileha vwonti, ahamulandata uYeesu.

²⁹ Ahamusenganizanya uYeesu umulyo mu nyumba yaakwe. Vhoope avhasonchezya musonko ni ivhungaana ipiti na vhantu avhanji, vhátendiime kulya ishaakulya pooka nawo.

³⁰ Avhasambiilizi avha ndajizyo izya Moose na Vhafalisaayi, vhahanda kuvhakwinkwina avhasundikwa avha Yeesu, vhahatinji, “Shooni she mukulya nu kumwela pooka na vhasonchezya musonko na vhatalamalandu?”

³¹ UYeesu ahavhaamula ahati, “Avhapuuma vhatakumwanza umuganga, nkandi vhe vhavhinile vhe vhakumwanza.

³² Ine ntinzile kuvhiita avhantu avhagolosu, nkandi kuvhiita avhatalamalandu, inga vhapindushe.”

Vhakumuvhuziilizya uYeesu izya kuyiima kulya

³³ Avhantu vhamo vhahamuvhuziilizya uYeesu vhahati, “Avhasundikwa avha Yoohani na vha Vhafalisaayi vhali na maata aga kuyiima kulya nu kulaavha insiku zimo, shooni she avhasundikwa vhaaho avheene vhaakulya nu kumwela insiku zyonti?”

³⁴ UYeesu ahavhaamula ahati, “Vhe vhalanjiliilwe pa winga, vhatakwanzilwa kuyiima, lwe we akwimala ali pooka navho,

³⁵ nkandi insiku zye vhalivheefwezya we akwimala pe vhaliyiima kulya.”

³⁶ Havhili ahavhavhuuzya ku miivhi ahati, “Ataliipo umuntu we akuzeepula ishigamba pa mwenda umupwa nu kugambiha pa mwenda umukaali. Inga avhomba vhwevhulo, akuwulazya umwenda umupwa, shoope ishigamba isha mwenda umupwa shitakuvhalilana nu mwenda umukaali.

³⁷ Havhili ataliipo umuntu we akuvhiiha idivaayi impwa mu mafuuku amakaali aga makwembe. Inga avhomba vhwevhulo, idivaayi iyo yikupunsya amafuuku nu kwitiha, goope amafuuku gakunanjiha.

³⁸ Idivaayi impwa yikwanzilwa kuyivhiiha mu mafuuku amapwa.

³⁹ Ataliipo umuntu we akusungwa kumwela idivaayi impwa, lwe amweleeye inkaali, mwe pe akusiivha kuuti idivaayi inkaali ye nyinza.”