uLuuka 3 - ULufingwi uLupwa

UYoohani uMwozyi akulumbiilila

¹ Umwaha uwa 15 kufuma pe uKayisaali uTibeeliyo átalisile kukonzya uvhumwene uvhwa Shiluumi, uPontiyo uPilaato ahakonzyaga ishigavho isha nsi isha Yudeeya, uHeelodi ahakonzyaga ishigavho isha nsi isha Galilaaya, woope uFiilipo umunine uwa Heelodi ahakonzyaga ishigavho isha nsi isha Ituleya ni sha Tulakooniti, woope uLisaaniya áamile mupiti uwa shigavho isha nsi isha Abileene.

² Havhili uAanasi nu Kayaafa vháamile vhapuuti avhapiti. Ahavhaliilizyo iho izwi ilya Mulungu lihamwinzila uYoohani umwana wa Zakaliya, mu luugwa.

³ Pe ahasogola imbazu zyonti zye zyámile papiipi ni ijenje uYoolodaani. Umwo ahakumusyaga ahatinji avhantu vhapindushe nu kwozelwa, inga uMulungu avhaswile uvhutalamalandu vhwavho.

⁴ Izyo zye zyásimviilwe hali mwi ikalaata ilya mukuvhwi uYisaayi kuzya Yoohani kuuti, “Izwi ilya muntu we akuvhila imbila mu luugwa likwivwiha kuuti, ‘Musenganizanyi uMWENE uMulungu idala, nu kugolosya mwe kuuti atuushe.

⁵ Amahoto gafushilwe, amagamba nu tugamba twonti vitelulwe. Pe pagombiine pagoloshe, na pe pali utugugulumba palingaanywe.

⁶ Pe avhantu vhonti vhalivhulola uvhuposhi uvhwa Mulungu.’”

⁷ Avhantu ivhungaana vhahasogolaga kwa Yoohani kwozelwa, ileelo ahavhavhuzyaga ahatinji, “Mwe vhaana vha njoha imwe! Wu naanu we avhasosile kuuti mushimbile uvhuhalazu uvhwa Mulungu vhwe vhukwinza?

⁸ Ishi muvhombaje zye zikulolesya kuuti mupindusile. Muleshe kusiivha kuuti, ‘Tuponile, mwe pe utaata wiitu wu Aabulahamu.’ Nalyoli nkuvhavhuuzya kuuti, uMulungu ahondeeye kugalulanya amavhwe iga kuvha vhaana vha Aabulahamu!

⁹ Ishi, isunde ilya Mulungu lifisile inza umuntu we alemile intemo nu kuyisengaanya kudiba amakwi. Ikwi lyonti lye litakuhoma amantonongwa aminza, likudibwa nu kusumbwa mu mwoto.”

¹⁰ Pe avhantu vhaala vhahavhanga vhakumuvhuziilizya kuuti, “Ishi pe tuhonzye vhuli?”

¹¹ UYoohani ahavhaamula ahati, “We ali na menda gavhili aamupe umwenda wooka we atali nawo, woope we ali ni shaakulya aamupe we atali nasho.”

¹² Vhoope avhasonchezya musonko vhe vhínzile kuuti vhoozelwe, vhahamuvhuziilizya uYoohani vhahati, “Musambiilizi, niiswe tuhonzye vhuli?”

¹³ Ahavhaamula ahati, “Mutasonchezyaje umusonko kuluusya impiiya zye zivhisiilwe.”

¹⁴ Vhoope avhasikaali vhahamuvhuziilizya vhahati, “Niiswe tuhonzye vhuli?” Ahavhaamula ahati, “Muleshe kunyatula impiiya izya vhantu ku maha na kwi idala ilya kuvhalonjeelela izya ilenga, havhili muyayanaje na malipilo aga mbombo yiinyu.”

¹⁵ Ahavhaliilizyo iho avhantu vhahasuvhilaga kwinza ukwa Chilisiti. Pe vhahasiivhaga kuuti pamo uYoohani we wu Chilisiti.

¹⁶ Pe uYoohani ahavhavhuuzya vhonti ahati, “Nalyoli ine nkuvhoozya na minzi, ileelo akwinza we ali na maha kunduusya ine, we ine ntahondeeye poosye kuvha ne muvhomvi uwa kusatula inkusa izya vilyatu vwakwe. Uyo we alivhoozya nu Mupepo uMufinjile nu mwoto.

¹⁷ Uweene ayisengiinye kuvhasavhulanya avhagolosu na vhatalamalandu inza umuntu we alemile ulupe, inga apemente ingana pa luvhuga. Kuluzelufwa uluvhuga, aliyivhungaaniha ingana nu kuyivhiiha mu shanga shaakwe, ileelo ilyelelo na mahambili alivipemba mu mwoto we wutakuzima.”

¹⁸ UYoohani ahavhasohaga avhantu ku mazwi igo na ganji aminji, lwe akulumbiilila Izwi iLyinza.

¹⁹ Pisinda, ahamupilila umwene uHeelodi, mwe pe ámunyatuuye uHeloodiya umushi wa munine waakwe uFiilipo, havhili, mwe pe ávhomvile mbiivhi izinji inyinji.

²⁰ Pe uHeelodi ahonjezya kuvhomba imbiivhi, ahamukunga uYoohani mu jeela.

UYeesu akwozelwa

²¹ UYoohani lwe ashiili kukungwa mu jeela, ahavhaliilizyo he ahozyaga avhantu avhinji, woope uYeesu ahoozelwa. Lwe akumulaavha uMulungu, ku mwanya kuhiiguha.

²² UMupepo uMufinjile ahamwishila ku shiholanyo isha nkunda pamwanya yaakwe. Izwi ilya Mulungu lihivwiha kufuma ku mwanya, lihati, “Iwe we Mwana waane unkundwa, nahondezelwa niiwe.”

Uluho ulwa Yeesu

²³ UYeesu lwe akwanda imbombo yaakwe, áamile na maaha 30 ishi. Avhantu vhahasiivhaga kuuti áamile mwana wa Yoosefu. UYoosefu áamile mwana wa Eeli,

²⁴ uEeli áamile mwana wa Masaati, uMasaati áamile mwana wa Laawi, uLaawi áamile mwana wa Meeleki, uMeeleki áamile mwana wa Yanaayi, uYanaayi áamile mwana wa Yoosefu.

²⁵ UYoosefu áamile mwana wa Matasiya, uMatasiya áamile mwana wa Aamosi, uAamosi áamile mwana wa Naahumu, uNaahumu áamile mwana wa Eeseli, uEeseli áamile mwana wa Nagaayi.

²⁶ UNagaayi áamile mwana wa Maasi, uMaasi áamile mwana wa Matasiya, uMatasiya áamile mwana wa Semeyiini, uSemeyiini áamile mwana wa Yooseki, uYooseki áamile mwana wa Yooda.

²⁷ UYooda áamile mwana wa Yowanaani, uYowanaani áamile mwana wa Leesa, uLeesa áamile mwana wa Zelubabeeli, uZelubabeeli áamile mwana wa Sheyalitiyeeli, uSheyalitiyeeli áamile mwana wa Neeli.

²⁸ UNeeli áamile mwana wa Meeleki, uMeeleki áamile mwana wa Aadi, uAadi áamile mwana wa Koosamu, uKoosamu áamile mwana wa Elimaadamu, uElimaadamu áamile mwana wa Eeli.

²⁹ UEeli áamile mwana wa Yooshuwa, uYooshuwa áamile mwana wa Eliyezeeli, uEliyezeeli áamile mwana wa Yoolimu, uYoolimu áamile mwana wa Masaati, uMasaati áamile mwana wa Laawi.

³⁰ ULaawi áamile mwana wa Simiyooni, uSimiyooni áamile mwana wa Yuuda, uYuuda áamile mwana wa Yoosefu, uYoosefu áamile mwana wa Yoonamu, uYoonamu áamile mwana wa Eliyaakimu.

³¹ UEliyaakimu áamile mwana wa Meeleya, uMeeleya áamile mwana wa Meena, uMeena áamile mwana wa Mataasa, uMataasa áamile mwana wa Naasani, uNaasani áamile mwana wa Daavhudi.

³² UDaavhudi áamile mwana wa Yeese, uYeese áamile mwana wa Oobedi, uOobedi áamile mwana wa Boohasi, uBoohasi áamile mwana wa Salimooni, uSalimooni áamile mwana wa Naashoni.

³³ UNaashoni áamile mwana wa Aminaadabu, uAminaadabu áamile mwana wa Aadimiini, uAdimiini áamile mwana wa Aalamu, uAalamu áamile mwana wa Hezelooni, uHezelooni áamile mwana wa Peelesi, uPeelesi áamile mwana wa Yuuda.

³⁴ UYuuda áamile mwana wa Yaakobu, uYaakobu áamile mwana wa Yisaaka, uYisaaka áamile mwana wa Aabulahamu, uAabulahamu áamile mwana wa Teela, uTeela áamile mwana wa Nahooli.

³⁵ UNahooli áamile mwana wa Seluugi, uSeluugi áamile mwana wa Lagaawu, uLagaawu áamile mwana wa Peleegi, uPeleegi áamile mwana wa Aabeli, uAabeli áamile mwana wa Saala.

³⁶ USaala áamile mwana wa Keenani, uKeenani áamile mwana wa Alufakisadi, uAlufakisadi áamile mwana wa Sheemu, uSheemu áamile mwana wa Noowa, uNoowa áamile mwana wa Laameki.

³⁷ ULaameki áamile mwana wa Mesuseela, uMesuseela áamile mwana wa Eenoki, uEenoki áamile mwana wa Yaaledi, uYaaledi áamile mwana wa Mahalaleeli, uMahalaleeli áamile mwana wa Keenani.

³⁸ UKeenani áamile mwana wa Eenoshi, uEenoshi áamile mwana wa Seeti, uSeeti áamile mwana wa Aadamu, woope uAadamu áamile mwana wa Mulungu.