uLuuka 19 - ULufingwi uLupwa

UYeesu akuhomaana nu Zakaayo

¹ UYeesu ahinjila mu nkaaya iya Yeeliko, ahavhanga akutuuha pahati mu nkaaya iyo.

² Mu nkaaya iyo, mwáli umuntu wumo, we vhahatinji uZakaayo. UZakaayo áamile mupiti uwa vhasonchezya musonko, havhili áamile wu dumbwe.

³ Umuntu uno ahanzaga kumulola uYeesu kuuti ali vhuli, ileelo áposiitwe kumulola, mwe pe ivhungaana ilya vhantu lyámile lipiti nkaani, woope áamile mufupi.

⁴ Pe ahashimbila kusogola kwilongolela ilya mpuga iya vhantu, ahazuvha mwi ituvhu, inga amulole uYeesu lwe akutuuha paala.

⁵ Lwe uYeesu aafiha paala, aheenya kumwanya kwi ituvhu ilyo, ahamulola uZakaayo, ahati, “Zakaayo, yiiha luvhiilo! Ileelo ili kuuti ndinde mu nyumba yaaho.”

⁶ UZakaayo ahiiha naluvhiilo, ahamuposheela uYeesu ku nkaaya yaakwe ku luseshelo.

⁷ Avhantu vhonti vhe vhámuvhwenyi uYeesu lwe akwinjila muula, vhahanda kukwinkwina, vhahati, “Shooni she asogola kutendama mwa muntu umutalamalandu!”

⁸ Ileelo uZakaayo ahimiilila, ahamuvhuuzya uMwene uYeesu ahati, “We Mwene! Ishi, ivintu vwane kuuti mvigavhanye pahati, vimo kuuti mbape avhapiina. Ileelo umuntu we imufwuye ishintu shonti ku vhwivha, kuuti imugalusizye lune ku viila vwe imufwuye.”

⁹ Pe uYeesu ahamuvhuuzya ahati, “Ileelo ili, uvhuposhi vhwinza mu vhantu avha mu nyumba ino, mwe pe umuntu uno woope wa mu luho ulwa Aabulahamu.

¹⁰ Mukumbushe kuuti, ne Mwana wa Aadamu ninzile kulondola nu kuvhapoha avhantu vhe vhateezile.”

Ishiholanyo isha vhavhomvi vhe vhápeliilwe impiiya

¹¹ Avhantu vhe vhahamutejelezyaga uYeesu vhahasiivhaga kuuti uvhumwene uvhwa Mulungu vhupalamiiye, mwe pe vhápalamiiye kufiha ku Yelusaleemu. Pe uYeesu ahavhavhuuzya ku shiholanyo ahati,

¹² “Kwáli umuntu wumo uwa mu luho ulwa shimwene, we ashuuye kusogola insi iya kutali. Ásogooye ku nsi iyo, inga aposheele amaha aga kukonzya uvhumwene, pe agalushe kuyikonzya insi yaakwe.

¹³ “Lwe ashiili kusogola, ahavhiita avhavhomvi vhaakwe 10, ahaamupa wooka wooka impiiya inyinji, ahavhavhuuzya ahati, ‘Mutananiaje impiiya izi kufishila ahavhaliilizyo he ndivhwela, inga nkaaje zyapaapa.’

¹⁴ Ileelo avhantu avha mu nsi yaakwe vhámuvitiliilwe, pe vhahasonteelezya avhantu kuuti vhamulandate ku nsi yiila iya kutali, vhasogole vhayanje vhati, ‘Tutakwanza kuuti umuntu uno avhe wu mwene wiitu!’

¹⁵ Ileelo poosye she vháyanzile izyo, ápeliilwe amaha aga kuvha wu mwene. Lwe avhwela, ahavhiita avhavhomvi vhaala vhe ávhapiiye impiiya, inga amanye zye wooka wooka ayambuliiye mu mbombo yaakwe iya kutaanania.

¹⁶ “Umuvhomvi uwa kwanda ahinza, ahayanga ahati, ‘We mwene, impiiya zye wándesheeye, zipaafile izyamwavho amabundwa 10.’

¹⁷ Umwene uyo ahamuvhuuzya ahati, ‘Uvhomvile ahinza nkaani, iwe we muvhomvi umwinza! Mwe pe waamile we mutungamu ku vintu ivinsi nkaani, kuuti nkupe amaha aga kukonzya inkaaya 10.’

¹⁸ Umuvhomvi uwa vhuvhili woope ahinza, ahayanga ahati, ‘We mwene, impiiya zye wándesheeye, zipaafile izyamwavho amabundwa gasaano.’

¹⁹ Umwene waakwe ahamuvhuuzya ahati, ‘Niiwe nkuukupa amaha aga kukonzya inkaaya zisaano.’

²⁰ “Umuvhomvi uwamwavho ahinza, ahati, ‘We mwene, nyatuula impiiya zyaho zye wándesheeye izi ipa. Názisenguuye ahinza mu shitambaala, inga zitahateeje.

²¹ Návhomvile vhwevhulo, mwe pe nkukwogopa, iwe we muntu umugomu. Ukunyatula vwe utavhiisile, havhili ukuvuna vwe utavhwaye.’

²² “Umwene ahamuvhuuzya ahati, ‘Iwe we muvhomvi umuvhiivhi! Ishi, nkuukupa isunde ku mazwi gaaho ge wayanga. Waamanyile kuuti ine ne muntu umugomu nkaani, nkunyatula vwe ntavhiisile, havhili nkuvuna vwe ntavhwaye.

²³ Ishi shooni she utavhiihaga impiiya zyane ku vhe vhakupaafwa, inga lwe navhwela inyatule pooka na zye zipafwilwe?’

²⁴ “Pe ahavhavhuuzya avhantu vhe vhímiliiye paala ahati, ‘Mufwule impiiya izyo, muumupe we apafwizye izyamwavho amabundwa 10.’

²⁵ Ileelo avheene vhahamuvhuuzya vhahati, ‘We mwene, nze uyo ali nazyo amabundwa 10!’

²⁶ “Ahati, ‘Nkuvhavhuuzya kuuti, umuntu wonti we akusaajila she ali nasho, vhalimwonjezya ivwamwavho. Ileelo we atakusaajila she ali nasho, shoope isho alifwulwa.

²⁷ Pooka niizyo vhaleeti avhalugu vhaane vhaala vhe vhatanzaga kuuti mbakonzye, muvhagoje pilongolela lyane!’”

UYeesu akwinjila mu Yelusaleemu nu ludovhelo

²⁸ UYeesu lwe ayanga izyo, ahajendeelela kusogola ku Yelusaleemu she alongoleeye ku mpuga yiila iya vhantu.

²⁹ Lwe apalamila pa lutala ulwa Besifaage nu lwa Besaniya, muntende mwi igamba lye vhahatinji igamba ilya Mazayituuni, ahavhasonteelezya avhasundikwa vhaakwe vhavhili,

³⁰ ahavhavhuuzya ahati, “Sogooli mu lutala lwe luli pilongolela lyinyu. Lwe mukwinjila mwenemwo, kwe muyilole inyaana iya ndogomi ye yitahalimbilwa nu muntu naalumo, vhayikunjiliiye. Muyisatule, muyileete ipa.

³¹ Inga umuntu avhavhuziilizya ati, ‘Shooni she mukuyisatula?’ Muhatinji, ‘UMwene uYeesu akuyanza.’”

³² Pe avhasundikwa ivho vhahaaga zili sheshiila inza vwe uYeesu ávhavhuziizye.

³³ Lwe vhakuyisatula inyaana iyo iya ndogomi, avheneesho vhahavhavhuziilizya vhahati, “Shooni she mukuyisatula inyaana ino iya ndogomi?”

³⁴ Vhahavhaamula vhahati, “UMwene uYeesu akuyanza.”

³⁵ Vhahamutwalila uYeesu, vhahaala amenda gaavho gamo pamwanya pa ndogomi iyo, pe vhahamulimbizya penepo.

³⁶ Lwe uYeesu akutuuha, avhantu vhahaalaga amenda gaavho gamo mwi idala.

³⁷ Lwe apalamila kwiha igamba ilya Mazayituuni, impuga yonti iya vhasundikwa vhaakwe yihanda kudovhela, vhahanda kumutiima uMulungu kuzya mafindango gonti ge vhágavhwenyi lwe uYeesu akuvhomba. Vhahamutiimaga nkaani

³⁸ vhahatinji, “Alosiitwe uMwene we akwinza kwi izina ilya MWENE uMulungu! Ishi kuvhe uvhutehamu nu vhushindamu ku mwanya.”

³⁹ Mwi ivhungaana ilyo, mwáli aVhafalisaayi vhamo, vhahamuvhuuzya uYeesu vhahati, “Musambiilizi, vhapilile avhasundikwa vhaaho, vhaleshe kuyanga izyo!”

⁴⁰ UYeesu ahati, “Nkuvhavhuuzya kuuti, inga ivha vhapuuma, amavhwe igo kwe gazume ahalanga nkaani!”

UYeesu akukuvhwa kumongolwa ukwa nkaaya iya Yelusaleemu

⁴¹ UYeesu lwe apalamila nu kuyilola inkaaya iya Yelusaleemu, ahanda kukuuta kuzya mayimba ge gakwinza ku nkaaya iyo.

⁴² Ahati, “Kwashi ileelo ili inga waamanyile zye ukwanzilwa kuvhomba inga uvhe nu vhutehamu! Ishi zizyihiime pa minso gaaho.

⁴³ Insiku zye zikwinza, avhalugu vhaaho vhalizenga uluvhumba ulugomu kuzyunguula inkaaya yaaho yonti, ipo pe vhalitaliha kukuvhuushila kufuma imbazu zyonti.

⁴⁴ Vhalikugwisya pansi, iwe na vhantu vhaaho vhonti. Te vhahakuleshele poosye ivhwe lye lilisyala pamwanya pa lyamwavho, mwe pe utahanzaga kumanya ahavhaliilizyo he uMulungu akukuleetela uvhuposhi!”

UYeesu akuyizelufwa iNyumba iMfinjile

⁴⁵ UYeesu ahinjila pa Nyumba iMfinjile, ahanda kuvhashimbizya vhonti vhe vhahakazyaga ivintu ipo.

⁴⁶ Ahavhavhuuzya ahati, “Yisimviilwe mu Vhusimbe uVhufinjile kuuti, ‘INyumba yaane yiliivha Nyumba iya kupuutila.’ Ileelo imwe, muyivhiisile kuvha lishembo ilya vhapumula vintu.”

⁴⁷ Pe uYeesu ahavhanga akusambiilizya avhantu insiku zyonti pa Nyumba iMfinjile. Avhapiti avha vhapuuti na vhasambiilizi avha ndajizyo izya Moose na vhasongo avha Vhayuuda, vhahavhanga vhakulondola idala ilya kumugoga,

⁴⁸ ileelo vhahapootwa, mwe pe avhantu vhonti vhahamulandataga uYeesu nu kulema ahinza amazwi gaakwe.