uLuuka 18 - ULufingwi uLupwa

Kumulaavha uMulungu ishisita kulita

¹ UYeesu ahavhavhuuzya avhasundikwa vhaakwe ishiholanyo kuvhasambiilizya kuuti, vhakwanzilwa vhamulaavhaje uMulungu insiku zyonti, ishisita kuvunziha amooyo.

² Ahavhavhuuzya ahati, “Kwáli umulonzi mu nkaaya yimo. Umulonzi uyo atahamunyilaga uMulungu, havhili atahavhasajilaga avhantu.

³ Mu nkaaya iyo, mwáli umwantanda wumo umuziishe. Umwantanda uyo, ahasogolaga ulwinji ku kwakwe kumulaavha kuuti, ‘Nkulaavha undonzezye inongwa yaane, inga umulugu waane atahanyatule ivintu vwane.’

⁴ “Insiku inyinji zihatuuha, umulonzi uyo ahajendelelaga kuhaana kumwavwa umuziishe uyo. Pe ku vhusililishilo, ahayisivhiilila mu mwoyo waakwe ahati, ‘Pooka nu kuuti ntakumunyila uMulungu, poosye kuvhasaajila avhantu,

⁵ ileelo, mwe pe umuziishe uno akujendeelela kuntamwa nkaani, kwe ndonzye inongwa yaakwe, inga atahajendeelele ku ndisya!’”

⁶ Pe uMwene uYeesu ahati, “Musambiilile kwa mulonzi umuvhiivhi uyo, vwe ásivhiliiye kuvhomba!

⁷ Ishi, uMulungu atangavhavhombela zye zikwanzilwa avhasaavhulwa vhaakwe vhe vhakumulaavha uvhusiku nu musanya? Angahaavha kuvhaavwa?

⁸ Nkuvhavhuuzya kuuti, uMulungu kwe avhavhombele naluvhiilo zye zikwanzilwa kuvhavhombela. Ishi ne Mwana wa Aadamu lwe nkugaluha mu nsi, ndivhaaga avhantu vhe vhakuniitiha?”

Ishiholanyo isha Mufalisaayi nu musonchezya musonko

⁹ Pe uYeesu ahavhavhuuzya ku shiholanyo avhantu vhe vhahayilolaga kuuti vhagolosu nu kuvhasuufwa avhamwavho vhonti, ahati,

¹⁰ “Avhantu vhavhili vhásogooye kupuuta pa Nyumba iMfinjile, wumo áamile Mufalisaayi, uwamwavho áamile musonchezya musonko.

¹¹ “UMufalisaayi uyo ahimiilila kulaavha. Ahalaavha mu mwoyo waakwe, ahati, ‘We Mulungu, nkukusalifwa, mwe pe ine ntali inza avhantu avhanji, avhapumula vintu na vhatalamalandu na vhavhembu, poosye inza umusonchezya musonko uno!

¹² Ine nkuyiima kulya luvhili ku mulungu wooka, kuzya kulaavha. Havhili, nkukufumwizya impuutile ishigavho shooka pa vigavho 10 mu vintu vwane vwonti.’

¹³ “Ileelo umusonchezya musonko ula áyimiliiye ukutali, atálinjiziizye poosye kwenya ku mwanya, ahayihomaga-homaga pa shifuvha shaakwe kuyiisya, ahatinji, ‘We Mulungu, umfwile uvhwila, ine ne mutalamalandu!’”

¹⁴ Pe uYeesu ahati, “Nkuvhavhuuzya kuuti, umusonchezya musonko ávhweleeye kuhaaya, avhaziliilwe kuuti mugolosu. Ileelo uMufalisaayi ula, haa! Navhavhuuzya vhwevhulo, mwe pe umuntu wonti we akuyizuvwa, uMulungu alimwisya. Ileelo umuntu we akuyiisya, uMulungu alimuzuvwa.”

UYeesu akuvhaloota avhaana avhansi

¹⁵ Isiku limo, avhantu vhámuleteeye uYeesu avhaana avhacheeche, inga avhavhiishile inyoovhe kuvhaloota. Ileelo avhasundikwa vhaakwe lwe vhaalola isho, vhahavhapilila vhe vhávhaleesite avhaana ivho.

¹⁶ Ileelo uYeesu ahavhiita avhaana kuuti vhasogole ku kwakwe, ahati, “Vhaleshi avhaana ivho vhinze kuli ine, mutavhadindaje ndaali, mwe pe uvhumwene uvhwa Mulungu vhwa vhantu vhe vhali inza avhaana ivho.

¹⁷ Nalyoli nkuvhavhuuzya kuuti, umuntu wonti we atakumusuuvhila uMulungu inza umwana vwe akumusuuvhila utaata waakwe, te ahinjile naalumo mu vhumwene uvhwa Mulungu.”

Udumbwe we akwanza uvhulanzi

¹⁸ Umupiti wumo ahamuvhuziilizya uYeesu, ahati, “We Musambiilizi umwinza, imbombe ishooni, inga nkaposheele uvhulanzi uvhwa shiima?”

¹⁹ UYeesu ahamwamula ahati, “Shooni she ukumbuuzya kuuti ne mwinza? Ataliipo we mwinza, nkandi we Mulungu weeka!

²⁰ Uzimanyile indajizyo izya Mulungu zye zikuti, ‘Utavhembuhaje, utagogaje, utiivhaje, utafumwaje uvhwahoome uvhwa ilenga, umushindihaje utaata waaho nu maayi waaho.’”

²¹ Uweene ahati, “Indajizyo zyonti izyo nkazilema kufuma kwe ku vhunsi vhwane.”

²² UYeesu lwe ayiivwa izyo, ahamuvhuuzya ahati, “Usovheliilwe ishintu shooka. Sogoola ukazye ivintu vwonti vwe uli navwo, impiiya zye waposheela uuvhape avhapiina. Inga wavhomba vhwevhulo, ukuvha wayisengulila inkoma ku mwanya. Pe uyinze, undandate.”

²³ Umupiti uyo, lwe ayiivwa izyo, ahaswimiililwa nkaani, mwe pe áamile wu dumbwe nkaani.

²⁴ UYeesu lwe amulola kuuti aswimiililwa, ahati, “Shigomu nkaani avhadumbwe kwinjila mu vhumwene uvhwa Mulungu!

²⁵ Shipupuusu nkaani ingamila kutuuha pi indovhoolwi ilya nsindaani, kuluusya udumbwe kwinjila mu vhumwene uvhwa Mulungu!”

²⁶ Avhantu vhe vhívuuye izyo, vhahati, “Ishi inga vwe zili vhwevhulo, pe wu naanu we angaapokwa?”

²⁷ UYeesu ahavhavhuuzya ahati, “Zye ku vhantu zitangavhombeha, kwa Mulungu zikuvhombeha.”

²⁸ Pe uPeeteli ahamuvhuuzya uYeesu ahati, “Yeenya, iswe tuvilesile ivintu vwonti vwe tuli navwo, tukukulandata iwe!”

²⁹ UYeesu ahati, “Nalyoli nkuvhavhuuzya kuuti, umuntu wonti we ayilesile inyumba yaakwe, poosye umushi waakwe, poosye avhanine vhaakwe, poosye avhapaafi vhaakwe, poosye avhaana vhaakwe, kuzya vhumwene uvhwa Mulungu,

³⁰ uyo ahavhaliilizyo iha he ali mu nsi umu, akuposheela ivwinji kuluusya vwe avilesile. Havhili, ahavhaliilizyo he hakwinza, aliposheela uvhulanzi uvhwa shiima.”

UYeesu akukuvhwa ulwa vhutatu izya kufwa nu kuzyuha kwakwe

³¹ UYeesu ahavhanyatula avhasundikwa vhaakwe 12, ahasogola navho kukwilu, pe ahavhavhuuzya ahati, “Yeenyi, tukuzuvha ku Yelusaleemu. Ukwo, zyonti zye avhakuvhwi vhásimvile mu Vhusimbe uVhufinjile ku zyane ne Mwana wa Aadamu, kwe zilunjishe.

³² Avhalugu vhaane kwe vhambiishe mu nyoovhe izya vhe te Vhayuuda nu kunjevhula nu kundiga nu kunswilila amati.

³³ Havhili kwe vhankome nu muchaapu nu kungoga. Ileelo isiku ilya vhutatu uMulungu alinzyusya.”

³⁴ Avhasundikwa vhaakwe vhatázimanyinsiinye inga hansi zye ahavhavhuzyaga, mwe pe zyázyisiilwe kuuti kwe kuuti vhuli. Vhatámanyile kuuti akuyanga shintu vhuli.

UYeesu akumuponia untonko

³⁵ UYeesu na vhasundikwa vhaakwe lwe vhapalamila pa nkaaya iya Yeeliko, umuntu wumo we áamile wu ntonko átendiime pa luvhazu pi idala, ahalaavhaga ivintu.

³⁶ Lwe ayiivwa avhantu ivhungaana vhakutuuha, ahavhuziilizya ahati, “Kuli shooni?”

³⁷ Vhahamuvhuuzya vhahati, “UYeesu uwa ku Naazaleeti akutuuha.”

³⁸ Pe ahahoola kwi izwi ipiti ahati, “We Yeesu, Mwana wa Daavhudi, umfwile uvhwila!”

³⁹ Avhantu vhe vháamile pilongolela pa Yeesu, vhahamupilila kuuti apuume. Ileelo uweene ahonjezya kuvhilishila nkaani ahati, “We Mwana wa Daavhudi, umfwile uvhwila!”

⁴⁰ UYeesu ahimiilila, ahalajizya kuuti vhamuleete ku kwakwe. Untonko uyo lwe apalamila pilongolela lyakwe, uYeesu ahamuvhuziilizya ahati,

⁴¹ “Ukwanza inkuvhombele ishooni?” Ahati, “We Mwene, nkulaavha umponie, intalishe kulola havhili.”

⁴² UYeesu ahamuvhuuzya ahati, “Ishi utalishe kulola havhili! Waapona, mwe pe waniitiha.”

⁴³ Ahavhaliilizyo hanaaho untonko uyo ahataliha kulola, pe ahataliha kumulandata uYeesu uku akumutiima uMulungu. Avhantu vhonti lwe vhazilola izyo, vhoope vhahamutiima uMulungu.