uLuuka 16 - ULufingwi uLupwa

Ishiholanyo isha mwimiilizi umushevu

¹ UYeesu ahavhavhuuzya avhasundikwa vhaakwe ahati, “Kwáli udumbwe wumo, we áamile nu mwimiilizi uwa vwuma vwakwe. Udumbwe uyo ahiivwa kuuti umwimiilizi waakwe uyo akunanganya ivwuma vwakwe.

² Pe ahamwita ahamuvhuuzya ahati, ‘Nongwa vhuli izi zye nkwivwa ku mbombo yaaho? Lolesya uvhusimbe vhwe vhukulolesya vwe uvhombeeye ivwuma vwane, mwe pe utakwanzilwa kuvha we mwimiilizi havhili!’

³ “Umwimiilizi uyo ahayivhuziilizya mu mwoyo ahati, ‘Umupiti waane akuneefwa pa mbombo, ishi imbombe ishooni? Kulima, ntali na maha. Havhili kulaavha, nkulola insoni.

⁴ Ishi, naamanya she kuuti mbombe, inga lwe aneefwa pa mbombo ino, avhantu vhahamposheele mu nyumba zyavho.’

⁵ “Pe umwimiilizi uyo ahavhiita vhonti vhe vhápavile kwa mupiti waakwe. Ahamuvhuziilizya umutanzi ahati, ‘Umupiti waane akupavhiiye ishooni?’

⁶ Ahamwamula ahati, ‘Ampavhiiye ivipimilo 100 ivwa mafuta aga mazayituuni.’ Umwimiilizi uyo ahamuvhuuzya ahati, ‘Nyatuula italataasi ili ilya vhusimbe uvhwa vwe akupavhiiye, simba luvhiilo uti, ivipimilo 50.’

⁷ Pe ahamuvhuziilizya uwa vhuvhili ahati, ‘Iwe akupavhiiye ishooni?’ Ahamwamula ahati, ‘Amagunila 100 aga ngana.’ Umwimiilizi uyo ahati, ‘Nyatuula italataasi ili ilya vhusimbe uvhwa vwe akupavhiiye, simba uti, amagunila 80.’

⁸ “Pe udumbwe ula ahamutiima umwimiilizi we te mutungamu uyo, vwe ávhomvile ku njeele. Navhavhuuzya ishiholanyo ishi, mwe pe avhantu avha mu nsi umu, vhakuvhomba imbombo zyavho na vhamwavho ku njeele kuluusya vhe vhamwitisile uMulungu.

⁹ Ishi ine nkuvhavhuuzya kuuti, muvhavwaje avhamwinyu ni vwuma vwinyu ivwa mu nsi umu, inga lwe vwasila, muhaposheelwe mu vhuyo uvhwa shiima shiima.

¹⁰ “Umuntu wonti we mutungamu ku vintu ivinsi, akuvha mutungamu na ku vintu ivwinji. Woope we te mutungamu ku vintu ivinsi, atakuvha mutungamu na ku vintu ivwinji.

¹¹ Ishi, inga te mwe vhatungamu ku vwuma ivwa mu nsi umu, wu naanu we angaavhapa ivwuma ivwa nalyoli!

¹² Havhili inga te mwe vhatungamu ku vwuma ivwa wunji, wu naanu we angaavhapa ivwuma ivwa kuvha vwinyu mweneemwe?

¹³ Ataliipo umuzya we angavhavhombela avhamwene vhavhili ku havhaliilizyo hooka. Yeenya, lwe akumukunda umwene wooka, akuvha akumuviitilwa uwamwavho, havhili lwe akuyifumwa nkaani kumuvhombela umwene wooka akuvha akumusuufwa uwamwavho. Inga ivwuma vikuvhakonzya, mutangamuvhombela uMulungu.”

¹⁴ AVhafalisaayi lwe vhiivwa amazwi igo, vhahanda kumusuufwa uYeesu, mwe pe vházisungwilwe nkaani impiiya.

¹⁵ UYeesu ahavhavhuuzya ahati, “Imwe mukuyivhiiha mwe vhagolosu pilongolela ilya vhantu, ileelo uMulungu azimanyile zye zili mu mooyo giinyu. Ivintu vwe avhantu vhakuvimwamiha, uMulungu akuviviitilwa!”

Insambiilizyo izya ndajizyo izya Moose

¹⁶ “Indajizyo izya Moose nu vhusimbe uvhwa vhakuvhwi vwávhalongooye avhantu kufishila ahavhaliilizyo aha Yoohani uMwozyi. Kufuma ahavhaliilizyo iho, Izwi iLyinza ilya vhumwene uvhwa Mulungu likulumbiililwa, avhantu avhinji vhakuyifumwa nkaani kwinjila mu vhumwene uvhwo.

¹⁷ Ileelo shipupuusu nkaani imwanya ni nsi kwepa, kuluusya kwepa poosye ahandona inga hooka aha ndajizyo izya Moose.

¹⁸ “Umuntu wonti we akumutavhula umushi waakwe nu kunyatula umwantanda uwunji, akuvhomba uvhuvhembu. Woope we akumwimala umwantanda we umulume waakwe amutavhuuye, akuvhomba uvhuvhembu.”

Udumbwe nu mupiina uLaazalo

¹⁹ “Kwáli udumbwe wumo, we ahazwalaga amenda aminza aga nsavho impiti aga muhoola uwa mafwomfwo. Insiku zyonti, ahalyanga ishaakulya isha nsavho impiti.

²⁰ Pa mulyango uwa dumbwe uyo, insiku zyonti vhahamuvhiihaga umupiina wumo, we vhahatinji uLaazalo. ULaazalo áamile na malonda umuvhili wonti,

²¹ ni mbwa zihamumwantaga genego. Inzala yihamulumaga nkaani, pe ahanyonywaga kulya utulagala twe tuhalagalaga kufuma pa meeza pe ahalyanga udumbwe uyo.

²² “Pisinda, umupiina uLaazalo ahafwa. Avhahavhizya vhahamunyatula, vhahamuvhiiha papiipi nu Aabulahamu ku mwanya. Udumbwe ula, woope ahafwa, vhahamusyila.

²³ Pe udumbwe uyo lwe akuyimba nkaani ku vhuzimu, ahavhuusya itwe, ahamulola uAabulahamu ukutali ali nu Laazalo.

²⁴ Ahamwita ahati, ‘We taata Aabulahamu, umfwile uvhwila! Nkuyimba nkaani mu mwoto uno! Nkukulaavha umusonteelezye uLaazalo, atumpishe ahafingwi mu minzi, ayinze anzwilizye pa lumili lwane, inga luhatale.’

²⁵ “Ileelo uAabulahamu ahamwamula ahati, ‘Mwana waane, ukumbushe kuuti ahavhaliilizyo he wáamile we mupuuma, wáamile ni vintu ivwinza vwe uhavisuvhilaga, ileelo uLaazalo áamile mu mayimba. Ishi, uweene akusuvhalizilwa ipa, iwe ukuyimba.

²⁶ Pooka niizyo, pahati yiitu niimwe, pali ilivha ipiti nkaani. Ilivha ilyo livhisiilwe, inga avha uku vhe vhakwanza kwinza kuli imwe, vhapotwaje kufumiila, poosye avha ukwo vhapotwaje kwinza kuli iswe.’

²⁷ “Udumbwe uyo ahamuvhuuzya ahati, ‘Ishi taata, nkukulaavha umusonteelezye uLaazalo kuuti asogole kuhaaya kwa taata waane.

²⁸ Ukwo indi na vhanine vhaane vhasaano. Asogole avhasoshe kuuti vhazileshe imbiivhi zyavho, inga vhoope vhatahinze ku mayimba amapiti uku.’

²⁹ UAabulahamu ahamwamula ahati, ‘Avhanine vhaaho vhali nu vhusimbe vhwe vhwásimviilwe nu Moose na vhakuvhwi, vhavhutejelezyaje vhwenevhwo!’

³⁰ “Udumbwe uyo havhili ahati, ‘Ndaali, taata Aabulahamu! Ileelo inga umuntu aafuma ku vhafwe, asogola ku kwavho, pe kwe vhatonte imbiivhi zyavho.’

³¹ UAabulahamu ahamwamula ahati, ‘Inga vhatakuzyitiha zye zisimviilwe nu Moose na vhakuvhwi, poosye umuntu azyushe kufuma ku vhafwe, vhatangamwitiha.’”