uLuuka 15 - ULufingwi uLupwa

Ishiholanyo isha ngʼonzi ye yiteezile

¹ Isiku limo, avhasonchezya musonko na vhatalamalandu avhanji avhinji, vhahapalamilaga kwa Yeesu, kumutejeelezya.

² Pe aVhafalisaayi na vhasambiilizi avha ndajizyo vhahanda kukwinkwina kuuti, “Yeenya umuntu uno! Akuvhaposheela avhatalamalandu nu kulya pooka navho.”

³ Pe uYeesu ahavhavhuuzya ishiholanyo ishi ahati,

⁴ “Ishi muli imwe, inga umuntu ali ni ngʼonzi 100, ileelo yooka yateega, angahonzya vhuli? Atangazileha ziila 99 kwi ilaala nu kusogola kuyilondola ye yiteezile, kufishila pe ayaaga?

⁵ Inga ayaaga, akuyivhegala ku luseshelo,

⁶ nu kuvhwela nayo kuhaaya. Inga aafiha kuhaaya akuvhiita avhamanyani na vhapalamani vhaakwe, akuvhavhuuzya kuuti, ‘Seshelaaji pooka niine, mwe pe ingʼonzi yaane ye yaateezile, nayaaga!’

⁷ “Nkuvhavhuuzya kuuti, vhwevhulo vwe kuliivha uluseshelo ulupiti ku mwanya, lwe umutalamalandu wooka atonta uvhutalamalandu vhwakwe. Uluseshelo ulwo, luliivha lupiti kuluusya uluseshelo ulwa kuvha na vhantu 99 vhe vhakuyilola kuuti vhagolosu, vhatakwanza kutonta.”

Ishiholanyo isha nsavhaazya ye yiteezile

⁸ UYeesu ahavhavhuuzya ishiholanyo ishamwavho ahati, “Tuti, umwantanda wumo ali ni mpiiya insavhaazya 10, inga insavhaazya yooka yateega, angahonzya vhuli? Angaahozya inyaale, nu kwusa inyumba yonti, alondole kufishila pe ayaaga.

⁹ Inga ayaaga, akuvhiita avhamanyani na vhapalamani vhaakwe, nu kuvhavhuuzya kuuti, ‘Seshelaaji pooka niine, mwe pe insavhaazya yaane ye yaateezile, nayaaga!’

¹⁰ “Nkuvhavhuuzya kuuti, vhwevhulo vwe uMulungu akuseshela pilongolela ilya vhahavhizya vhaakwe, lwe umutalamalandu wooka akutonta uvhutalamalandu vhwakwe.”

Ishiholanyo isha mwana we ateezile

¹¹ UYeesu ahavhavhuuzya ishiholanyo ishamwavho ahati, “Kwáli umuntu wumo we áamile na vhaana avhanaavuli vhavhili.

¹² Umwana umunsi ahasogola kwa taata waakwe ahati, ‘We taata, nkulaavha umpe uvhupwano vhwane.’ Pe utaata waakwe ahavhagavhanya avhaana vhaakwe uvhupwano vhwavho.

¹³ “Lwe zyatuuha insiku nyinsi, umwana umunsi uyo ahavivhungaaniha ivintu vwakwe vwonti, ahashuula kusogola ku nsi iya ku vhutali. Lwe aafiha ukwo, ahataliha kunanganya ivwuma vwakwe kufishila pe vwasila vwonti.

¹⁴ Lwe aamala vwonti, inzala yihagwa mu nsi iyo, woope atahavha ni shintu naashimo.

¹⁵ Pe ahasogola kwa muntu wumo umuhaaya uwa mu nsi iyo, ahalaavha imbombo. Umuntu uyo ahamutwala ku mugunda, ahaamupa imbombo iya kuzuvhila inguluvhe zyakwe.

¹⁶ Umwana uyo áamile ni nzala, ahanyonywa kulya amahambili ge inguluvhe zihalyanga. Ileelo atáliipo umuntu inga wooka we ámupiiye ishaakulya.

¹⁷ “Pisinda, ahasiivha mu mwoyo waakwe ahati, ‘Avhavhomvi vhonti avha taata, vhaakulya nu kuvileha, shooni she ine nkufwa ipa ni nzala!

¹⁸ Ishi kwe mbwele kwa taata nu kumuvhuuzya kuuti, “We taata, mbomvile uvhutalamalandu kwa Mulungu na kuli iwe.

¹⁹ Ishi ntahondeeye kuvha ne mwana waaho havhili, nkulaavha umbiishe imbe ne wooka mu vhavhomvi vhaaho.”’

²⁰ “Pe ahavhwela kwa taata waakwe. Lwe apalamila, utaata waakwe ahamulola apatali, ahamufwila uvhwila. Ahamushimbiilila, ahamwofwa nu kumukuukula.

²¹ Pe umwana ula, ahamuvhuuzya utaata waakwe ahati, ‘We taata, mbomvile uvhutalamalandu kwa Mulungu na kuli iwe. Ntahondeeye kuvha ne mwana waaho havhili.’

²² “Ileelo uweene utaata waakwe ahavhavhuuzya avhazya vhaakwe ahati, ‘Leeti luvhiilo amenda aminza, mumuzwalizye. Mumuzwalizye ni nsalaamu, ni vilyatu.

²³ Nyatuuli ingʼombe ingida yiila, vhooli, tulye nu kuseshela,

²⁴ mwe pe umwana waane uno aamile ngati afuuye, ishi azyuha, havhili aamile ngati ateezile, ishi aloleha!’ Pe avhantu ivho vhonti vhahataliha kudovhela ku luseshelo.

²⁵ “Ahavhaliilizyo iho, umwana waakwe usongo áamile ku mugunda. Lwe akuvhwela apalamila papiipi ni nkaaya, ahiivwa avhantu vhakwimba nu kudovhela.

²⁶ Ahamwita umuvhomvi wumo, ahamuvhuziilizya ahati, ‘Kuli shooni?’

²⁷ Ahamuvhuuzya ahati, ‘Umunine waaho avhweleeye. Utaata waaho amuvholeeye ingʼombe ingida, mwe pe amulola umwana waakwe she mupuuma havhili she ali ahinza.’

²⁸ Umwana usongo uyo ahaviitwa, ahahaana kwinjila mu nyumba. Pe utaata waakwe ahafuma panzi, ahanda kumulambiilizya kuuti ayinjile mu nyumba.

²⁹ Ileelo ahamwamula utaata waakwe ahati, ‘Yeenya, amaaha gonti iga nkuvhomba imbombo pahaaya ipa, havhili ntahasuufwa naalumo zye ukundajizya! Ileelo ine utampiiye naalumo poosye nga havhuzi, kuuti nseshele pooka na vhamanyani vhaane.

³⁰ Ileelo lwe ayinza umwana waaho uno, we anangiinye ivwuma vwaho pooka na vhamalaaya, wamuvhoolela ingʼombe ingida!’

³¹ “Utaata waakwe ahamuvhuuzya ahati, ‘Mwana waane, iwe uli niine insiku zyonti, ivintu vwonti vwe indi navwo vwaho.

³² Ishi, tukwanzilwa kuseshela nu kudovhela, mwe pe umunine waaho aamile ngati afuuye, ishi mupuuma, havhili aateezile, ishi aloleha!’”