uLuuka 14 - ULufingwi uLupwa

UYeesu akumuponia umuvhinu isiku ilya Sabaato

¹ Isiku limo ilya Sabaato, uYeesu ásogooye kulya ishaakulya mu nyumba iya mupiti wumo uwa Vhafalisaayi. Ahavhaliilizyo he áali muumwo, aVhafalisaayi na vhanji vhahamwuvhililaga kuuti vhalole vwe kwe avhombe pi isiku ilya Sabaato.

² Pilongolela pa Yeesu, páali umuntu wumo we áamile nu vhuvhinu uvhwa mvimba.

³ Pe uYeesu ahavhavhuziilizya aVhafalisaayi na vhasambiilizi avha ndajizyo ahati, “Vhuli, indajizyo izya Moose zikwitishila kuponia avhantu pi isiku ilya Sabaato?”

⁴ Avheene vhahapuuma mwaa. Pe uYeesu ahamupalamansya umuvhinu uyo, ahamuponia, ahamwitishila kuuti asogolaje.

⁵ Pe uYeesu ahavhavhuziilizya ahati, “Wu naanu muli imwe, we inga umwana waakwe, poosye ingʼombe yaakwe yagwila mu shifula isiku ilya Sabaato, atangayifumwa?”

⁶ Avhantu ivho, vhatahavha ni lya kumwamula.

Uvhutesi nu vhwahayiisye

⁷ UYeesu ahenyaaga avhajeni vhe vhávhalanjiiye ku mulyo vwe vhahasevhaga amatengo aga vhapiti. Pe ahavhavhuuzya ku miivhi ahati,

⁸ “Inga umuntu akulanjiiye ku winga, utafishilaje kutendama pa vitengo ivwa vhapiti. Nkuyanga vhwevhulo, mwe pe ungaaga umuhaaya lumo amulanjiiye umupiti uwunji kuluusya iwe.

⁹ Inga ayinza we avhalanjiiye imwe mwenti, nu kukuvhuuzya iwe kuuti, ‘Musegushile uno pe utendiime,’ pe uliilola insoni nkaani, lwe ukusogola kutendama apa vhantu avha pansi.

¹⁰ “Ileelo inga vhakulanjila, ufishilaje mu matengo aga vhantu avha pansi. Pe inga ayinza we akulanjiiye, akuvhuuzye kuuti, ‘We mumanyani waane, nzaaga utendame apinza ipa apa vhapiti.’ Ipo pe uvhupiti vhwaho vhuliloleha pilongolela pa vhonti vhe vhavhalanjiiye.

¹¹ Nkuvhavhuuzya vhwevhulo, mwe pe umuntu wonti we akuyizuvwa, uMulungu alimwisya. Ileelo umuntu we akuyiisya, uMulungu alimuzuvwa.”

¹² Pe uYeesu ahamuvhuuzya we ámulanjiiye ahati, “Lwe ukuvhalanjila avhantu ku mulyo uwa musanya, poosye uwa hamazuuvha, utavhalanjilaje avhamanyani vhaaho, poosye avhanine vhaaho, poosye avhantu avha mu luho lwaho, poosye avhapalamani vhaaho vhe vhe vhadumbwe. Utavhalanjilaje avhantu inza ivho, inga vhoope vhatahinze vhakulanjile kuzya kukugalusizya zye wávhavhombeeye.

¹³ Lwe ukusengaanya umulyo, uvhalanjilaje avhapiina na vhantendya na vhantonko.

¹⁴ Pe niiwe uliivha nu vhuloote, mwe pe ivho vhatali ni vintu ivwa kukugalusizya. UMulungu we alikugalusizya, ahavhaliilizyo he alivhazyusya avhagolosu.”

Ishiholanyo isha mulyo uwa winga

¹⁵ Wumo mu vhaala vhe vhávhalanjiiye lwe ayiivwa amazwi aga Yeesu, ahamuvhuuzya ahati, “Alosiitwe, umuntu we aliilya umulyo mu vhumwene uvhwa Mulungu!”

¹⁶ UYeesu ahamwamula ku shiholanyo ahati, “Páali umuntu wumo, we ásengiinye umulyo umupiti, ahavhalanjila avhantu avhinji.

¹⁷ Ahavhaliilizyo aha mulyo lwe haafiha, ahamusonteelezya umuvhomvi waakwe ku vhe ávhalanjiiye, kuuti avhavhuuzye ati, ‘Nzagaaji, ivintu vwonti nsengiinye!’

¹⁸ “Ileelo vhonti vhe ávhalanjiiye, vhahati te vhasogole. Wumo ahati, ‘Nkazile umugunda, nkwanzilwa insogole kuvhwenya. Umfwile uvhwila te ninze.’

¹⁹ Uwamwavho ahati, ‘Nkazile inkambaku 10 izya kulimila, nkwanzilwa insogole kuzilinga. Umfwile uvhwila te ninze.’

²⁰ Woope uwamwavho ahati, ‘Nimaaye shiniishi vhweleele, kuli izyo ntanginza.’

²¹ “Umuvhomvi uyo ahagaluha, ahamuvhuuzya zyonti umwene waakwe. Pe umwene uyo ahaviitwa, ahamuvhuuzya umuvhomvi waakwe ahati, ‘Luvhiilo sogoola mu mbalaabala na mu madala aga mu nkaaya ino, uvhaleete ipa avhapiina na vhe vhalemaaye na vhantonko na vhantendya.’

²² “Pisinda, umuvhomvi uyo ahagaluha, ahamuvhuuzya ahati, ‘We mwene, zye undajiziizye nazivhomba, ileelo uvhuzilo vhuli she vhusyaye.’

²³ “Umwene ahamuvhuuzya ahati, ‘Ishi! Sogoola kunzi ku nkaaya, mu mbalaabala na mu madala ge gakusogola mu nkaaya, na mu ntala, uvhalambiilizye avhantu vhinze, inyumba yaane yiizule.

²⁴ Nalyoli nkuvhavhuuzya imwe kuuti, muli ivho vhe naavhalanjiiye ku vhwandilo, ataliipo we kuuti alye umulyo we ine nsengiinye!’”

Uvhugomu uvhwa kuvha we mulandati uwa Yeesu

²⁵ UYeesu ahajendaga pooka ni ivhungaana ipiti ilya vhantu. Pe ahavhashevhela, ahavhavhuuzya ahati,

²⁶ “Umuntu wonti we akwanza kundandata ine, akwanzilwa kunkunda ine kuluusya kumukunda uyise nu nyina nu mushi waakwe na vhaana vhaakwe na vhanine vhaakwe avhanaavuli na vhantanda. Havhili akwanzilwa kunkunda ine kuluusya vwe akuyikunda wuuyo.

²⁷ Umuntu wonti we akwanza kundandata ine, ayikungule, ayiitishe amayimba, poosye nu kufwa. Inga atakuvhomba vhwevhulo, atangavha mulandati waane.

²⁸ “Tuti, kuli umuntu wumo kuli imwe we akwanza kuzenga inyumba. Angataliha kuhonzya vhuli suuti? Akwanzilwa kutaliha suuti kusivhiilila ivintu vwonti vwe vikwanzilwa kuzenjela nu kwenya impiiya zye ali nazyo, inga zingaamala imbombo iyo.

²⁹ Inga atavhomba vhwevhulo, anginza azenje lwe lwalo vhweleele, apootwe kumaliilizya. Pe vhe vhakutuuha mwi idala nu kwenya, vhande kumuseha

³⁰ kuuti, ‘Umuntu uno aatalisile kuzenga, ileelo aposiitwe kumaliilizya!’

³¹ “Poosye tuti kuli avhamwene vhavhili vhe vhakwanza kulwa. Wumo ali na vhasikaali 10,000 vhweleele, uwamwavho ali navho 20,000. Vhuli, uwa vhasikaali 10,000 atakutendama suuti kusivhiilila vwe kuuti alwe nu kumupoota we ali na vhasikaali 20,000?

³² Inga aalola kuuti kwe apootwe, akusonteelezya avhatuuli vhaakwe, vhasogole kutonta kwa mwene uwamwavho she ali ukutali, kuuti vhivwane.

³³ “Vwe zili na kuli imwe. Ataliipo nuumo kuli imwe we akwanzilwa kuvha mulandati waane, inga atavilesile vwonti vwe ali navwo.”

Ishiholanyo isha ivheeya

³⁴ “Ivheeya shintu shinza, ileelo inga lyasuupa, shiliipo she shingalinonia?

³⁵ Ivheeya inza ilyo, litangavha ni mbombo ku ntope iya kuvhwalila, poosye kuvha shintu isha kuvunzya umugunda. Nalyoli likuvha lya kwita vhweleele. We ali na makutwi, atejeelezye!”