uLuuka 11 - ULufingwi uLupwa

Insambiilizyo izya kumulaavha uMulungu

¹ Isiku limo, uYeesu áali kumo kumulaavha uMulungu. Lwe aamala, umusundikwa waakwe wumo ahati, “Mwene, utusambiilizye kumulaavha uMulungu, inza vwe uYoohani ávhasambiliziizye avhasundikwa vhaakwe.”

² UYeesu ahavhavhuuzya ahati, “Lwe mukumulaavha uMulungu, mutinji: Taata wiitu uwa ku mwanya, izina lyaho lishindikwaje. Uvhumwene vhwaho vhwinze. Zye ukasiime, zivhombeshe mu nsi umu, inza vwe zikuvhombeha ku mwanya ukwo.

³ Utupanje ishaakulya shiitu insiku zyonti.

⁴ Utuswile uvhutalamalandu vhwitu, mwe pe niiswe tukuvhaswila vhonti vhe vhakutuvhombela uvhutalamalandu. Utulongole inga tutahinjile mu ndingo, havhili utuposhe nu Muvhiivhi ula.”

⁵ Pe ahavhavhuuzya ishiholanyo ahati, “Twivwe sivhiliili, muli imwe umuntu wumo akusogola kwa mumanyani waakwe pa vhusiku pahati nu kumuvhuuzya kuuti, ‘We mumanyani, nkulaavha umpavhile amakaati gatatu,

⁶ mwe pe umumanyani waane anshuliiye, ileelo ntali ni shaakulya isha kuumupa.’

⁷ Woope umumanyani uyo akumwamula akuti, ‘Leha kunjimvwa! Ngaliiye umulyango, havhili ine na vhaana vhaane tukaasite. Intangavhuuha kuuti nkupe!’

⁸ Inga umuntu uyo akujendeelela kulaavha ku vhujimbiilizu, nalyoli nkuvhavhuuzya kuuti, umumanyani waakwe akuvhuuha nu kuumupa vwe akwanza. Te kuuti akuumupa, mwe pe mumanyani waakwe, akuumupa, mwe pe atakuleha kumulaavha.

⁹ “Ishi nkuvhavhuuzya kuuti, mumulaavhaje uMulungu, pe woope kwe avhapanje, havhili mulondolaje, pe niimwe kwe muvwagaje, havhili muhonyonsyaje, pe niimwe kwe mwigulilwaje.

¹⁰ Nkuvhavhuuzya vhwevhulo, mwe pe umuntu wonti we akulaavha, akuposheela, woope we akulondola, akuvwaga, woope we akuhonyonsya, akwigulilwa.

¹¹ Vhuli, wu naanu muli imwe we inga umwana waakwe amulaavha ikaati, angaamupa ivhwe? Poosye inga amulaavha inswi, angaamupa injoha?

¹² Poosye inga amulaavha iji, angaamupa inkoonya?

¹³ Pe ishi, inga imwe mwe vhatalamalandu mumanyile kuuvhapa avhaana vhiinyu ivintu ivwinza, pe uTaata wiitu uwa ku mwanya aliivhapa uMupepo uMufinjile vhaala vhe vhakumulaavha!”

UYeesu ali na maha kuluusya amaha aga Belizabuuli

¹⁴ Isiku limo, uYeesu ahayishimbizyaga impepo inkandamanu mwa muntu wumo. Impepo iyo yámuvhiisile umuntu uyo kuvha wu shinuunu, lwe yaafuma, umuntu uyo ahanda kuyanga. Ivhungaana ilya vhantu vhe vháamile paala, lihasukumila nkaani.

¹⁵ Ileelo vhamo muli vhuuvho, vhahati, “Akushimbizya impepo inkandamanu ku maha aga Belizabuuli, umupiti uwa mpepo inkandamanu!”

¹⁶ Vhamo vhahamulinga, vhahati, avhalolesye ishilolesyo isha kuhomeshezya kuuti afumile kwa Mulungu.

¹⁷ Ileelo uYeesu ahamanya insiivho zyavho. Pe ahavhavhuuzya ahati, “Inga avhantu avha vhumwene vhwoka vhakulwa, uvhumwene uvhwo vhukunanjiha. Vhoope avhantu avha mu nyumba yooka inga vhanda kulwa vhuuvho vheeka, inyumba iyo yikunanjiha.

¹⁸ Vwe zili, woope uSeetano inga akulwa nu Seetano, uvhumwene vhwakwe vhukunanjiha. Pe ishi, uvhumwene vhwakwe vhungajendeelela vhuli? Nkuyanga vhwevhulo, mwe pe mukuti nkushimbizya impepo inkandamanu ku maha aga Belizabuuli.

¹⁹ Ishi, inga ine nkushimbizya impepo inkandamanu ku maha aga Belizabuuli, pe avhasundikwa vhiinyu vhakushimbizya ku maha aga naanu? Kuli izyo, avhasundikwa vhiinyu vhe kwe vhalolesye kuuti zye mukusiivha te zya nalyoli.

²⁰ Ileelo ine, inga nkushimbizya impepo inkandamanu ku maha aga Mulungu, pe uvhumwene uvhwa Mulungu vhwinzile kuli imwe!

²¹ “Umuntu uwa maha, inga ali ni shilwilo, akuyimililila inyumba yaakwe, ataliipo we angavipumula ivintu vwakwe.

²² Ileelo inga ayinza umuntu uwa maha kuluusya uweene, akumugoma nu kumupoota. Pe akumufwula ivilwilo vwonti vwe asuvhilaga, nu kupumula ivintu vwonti vwe vili mu nyumba nu kuvhagavhila avhanji.

²³ Umuntu wonti we atali uluvhazu lwane, mulugu waane. Havhili we atakuvhavhungaaniha avhantu pooka niine, uyo akuvhasasaanya.”

Kugaluha ukwa mpepo inkandamanu

²⁴ UYeesu ahayanga havhili ahati, “Lwe impepo inkandamanu yaafuma mwa muntu, yikutuuha pe patali aminzi, lwe yikulondola apa kutuuzya, ileelo yitakupaaga, pe yikuti, ‘Kwe ngalushe mu nyumba yaane ye naafumile.’

²⁵ Inga yaafiha nu kumulola umuntu uyo ali ngati nyumba ye vhuusile nu kuyiyemvwa ahinza,

²⁶ pe yikusogola kuzileeta impepo izyamwavho 7 zye nkandamanu kuluusya iyeene. Impepo zyonti izyo zikwinjila mwa muntu uyo, nu kutendama munuumwo, pe umuntu uyo akuvha havhiivhi nkaani, kuluusya ku vhwandilo.”

²⁷ UYeesu lwe akuyanga izyo, umwantanda wumo mwi ivhungaana liila ahayanga kwi izwi ahati, “Alosiitwe we ákupaafile nu kukwonsya!”

²⁸ Ileelo uweene uYeesu ahati, “Vhalosiitwe nkaani vhe vhakwivwa nu kulishindiha izwi ilya Mulungu!”

Avhantu vhakwanza uYeesu alolesye ishilolesyo

²⁹ Avhantu lwe vhakujendeelela kuvhungaana, uYeesu ahati, “Avhantu avha havhaliilizyo iha vhavhiivhi! Vhakwanza ishilolesyo, ileelo te mbalolesye ishilolesyo naashimo, nkandi sheshiila isha mukuvhwi uYoona.

³⁰ Inza vwe uYoona áali shilolesyo ku vhantu avha mu nkaaya iya Nineewe, niine ne Mwana wa Aadamu kwe mbe ne shilolesyo ku vhantu avha havhaliilizyo iha.

³¹ Isiku ilya vhulonzi, usamwene uwa ku Sheeba aliyimiilila nu kuvhalonga imwe mwe vhantu avha havhaliilizyo iha. Alivhalonga kuuti mwe vhavhiivhi, mwe pe uweene áshuuye kufuma mu nsi iya kutali, ahinza kutejeelezya amazwi aga vhushindamu uvhwa njeele uvhwa mwene uSolomooni. Ileelo ipa ndiipo ne mupiti kuluusya uSolomooni!

³² Havhili isiku ilya vhulonzi, avhantu avha mu Nineewe vhoope vhaliyimiilila kuvhalonga imwe mwe vhantu avha havhaliilizyo iha, kuuti mwe vhavhiivhi. Vhalivhalonga, mwe pe lwe uYoona akumusya izwi ilya Mulungu ku mwavho, vhátonsite imbiivhi zyavho. Ileelo ipa ndiipo ne mupiti kuluusya uYoona!”

Inyaale iya muvhili

³³ “Ataliipo umuntu we akuhozya inyaale nu kuyivhiiha pe pazyihiime, poosye kuyigubishila ni nsonta, nkandi akuyivhiiha pi ibeeja, inga avhantu lwe vhakwinjila, vhalolaje.

³⁴ Aminso gaaho gali inza inyaale ye yikuwuhozya umuvhili waaho. Inga aminso gaaho gali ahinza, pe umuvhili waaho wonti wukuvha nu vhuzelu. Ileelo inga gafuuye, umuvhili waaho wukuvha ni shiisi.

³⁵ Pe ishi, uvhe minso, uvhuzelu vhwe vhuli muhati yaaho vhutahinze vhuvhe shiisi.

³⁶ Ishi inga umuvhili waaho wonti wavha nu vhuzelu, ishisita kuvha ni shiisi inga pooka, pe umuvhili wonti kwe wuvhe muzelu, inza inyaale vwe yikuhozya.”

Insoshi izya Yeesu ku Vhafalisaayi

³⁷ Lwe uYeesu aamala kuyanga amazwi igo, uMufalisaayi wumo ahamulanjila kuuti asogole kulya ku kwakwe. Pe uYeesu ahasogola, ahinjila, ahatendama kulya ishaakulya.

³⁸ UMufalisaayi uyo lwe aalola uYeesu akulya ishisita kuvhomba amaata gaavho aga kugeeza mu nyoovhe, ahasukumila nkaani.

³⁹ Pe uMwene uYeesu ahamuvhuuzya ahati, “Imwe mwe Vhafalisaayi mukuyivhiiha mwe vhagolosu pilongolela ilya vhantu, ileelo muhati zyinyu mwizuuye uvhupumula vintu nu vhuvhiivhi. Isho she shooka nu kwozya ulupindi nu luvhiga munzi vhweleele.

⁴⁰ Mwe vhapukupuuku imwe! We ápezile munzi, te we ápezile na muhati vhweleele?

⁴¹ Muvhavwaje avhapiina ku mwoyo wonti, pe vwonti kuuti vizelupe kuli imwe.

⁴² “Mwasheela imwe mwe Vhafalisaayi! Yeenya, mukumufumwizya uMulungu ishigavho shooka pa vigavho 10 poosye ni sha vintu ivinsi inza uvhulende ni nzembwa ni nyanyi izyamwavho izya matundu amavhiila mu mavhiila. Ileelo mutakusaajila kuvhomba ingolosu, poosye kumukunda uMulungu. Izi zye mukwanzilwa kuzivhomba, pooka ni nyinsi izyo zye mukuzivhomba.

⁴³ Mwasheela imwe Vhafalisaayi, mwe pe mukusungwa kutendama mu vitengo ivwa pilongolela mu masinagoogi. Havhili, mukusungwa kuuti avhantu vhavhalamuhaje ku mushinzi mu madala.

⁴⁴ Mwasheela imwe! Muli fwe mbiipa zye zitali ni shivhulumwanya, avhantu vhakujenda pamwanya ishisita kumanya.”

⁴⁵ Umusambiilizi wumo uwa ndajizyo ahamuvhuuzya uYeesu ahati, “Musambiilizi, lwe ukuyanga izyo, ukutuyanga havhiivhi niiswe swe vhasambiilizi avha ndajizyo.”

⁴⁶ UYeesu ahamwamula ahati, “Niimwe mwe vhasambiilizi avha ndajizyo mwasheela, mwe pe mukuvhavhegazya avhantu amaligo amamwamu ge vhatangavhuusya. Niimwe mutakuvhaavwa kuvhuusya poosye kulinjizya na hasamba inga hooka!

⁴⁷ “Mwasheela imwe, mwe pe mukuzenga imbiipa izya vhakuvhwi vhaala vhe avhataata vhiinyu vhávhagozile!

⁴⁸ Ipo mukuhomeshezya kuuti, mukwitinkana na zye avhataata vhiinyu vhávhomvile, mwe pe avheene vhávhagozile, niimwe mukuzenga imbiipa izyo! Mukushindiha imfwa zyavho, ileelo mutakuzilandata zye vhahalumbililaga.

⁴⁹ “Izyo zye zyámuvhiisile uMulungu kuuti ayanje ku vhushindamu vhwakwe uvhwa njeele ati, ‘Ndivhasonteelezya avhakuvhwi na vhatumwa ku kwavho, ileelo vhamo vhalivhagoga na vhamwavho vhalivhayimvwa.’

⁵⁰ Ishi, avhantu avha havhaliilizyo iha vhalisundwa kuzya vhakuvhwi vhonti vhe vhávhagozile, kufuma ku vhwandilo uvhwa nsi,

⁵¹ kufuma pe uKaayini ámugozile uAabeli, kufishila pa Zakaliya, we vhámugozile pahati pa shifinjilo ni Nyumba iMfinjile. Nalyoli nkuvhavhuuzya kuuti, avhantu avha havhaliilizyo iha vhalisundwa kuli izyo zyonti.

⁵² “Mwasheela imwe mwe vhasambiilizi avha ndajizyo, mwe pe mudinzite idala ilya vhantu kumumanya uMulungu. Niimwe mweneemwe mutamumanyile, havhili muvhadindiiye vhe vhakwanza kumumanya.”

⁵³ Lwe uYeesu aamala kuyanga amazwi igo, aheepa pa nyumba iya Mufalisaayi ula. Kwandila ipo aVhafalisaayi na vhasambiilizi avha ndajizyo vhahavha vhalugu nkaani kwa Yeesu. Pe vhahanda kumuvhuziilizya inyinji,

⁵⁴ inga vhamuteje, kuuti ayanje zimo pe vhalyaje idala ilya kumulonjeelela.