uLuuka 10 - ULufingwi uLupwa

UYeesu akuvhasonteelezya avhasundikwa 72

¹ Pisinda, uMwene uYeesu ahasevha avhasundikwa avhamwavho 72. Ahavhasonteelezya vhavhili vhavhili, inga vhalongolele mu nkaaya na mu mbazu zyonti mwe ahasiivhaga kusogola.

² UYeesu ahavhavhuuzya ahati, “Nalyoli iviyavho ivwinji vweleeye, ileelo avhahavuna vhali vhansi. Ishi mumulaavhe uMwene umuhaata viyavho, avhatume avhahavuna avha viyavho vwakwe.

³ Ishi sogolaaji, yeenyi, nkuvhatumiilizya ngati tugonzi pahati pa mpumpi!

⁴ Mutahaapaye impiiya, poosye imbuguulu, poosye ivilyatu ivwa kugalulanya. Havhili mutatezyaje ahavhaliilizyo mwi idala kuzya kulamunkana.

⁵ “Inyumba yonti ye vhavhaposheela, muvhalamuhaje avhahaaya suuti, mutinji, ‘UMulungu aavhape uvhutehamu mu nyumba ino.’

⁶ Inga uwa nyumba avhaposheela ku vhutehamu, pe inyumba iyo kwe yivhanje nu vhutehamu. Ileelo inga atavhaposheela, pe uvhutehamu kwe vhusyalaje niimwe.

⁷ Mutasaamaje-saamaje, inyumba ye vhavhaposheela mutendamaje munuumwo, mumwelaje nu kulya ishaakulya she vhakuuvhapa, mwe pe umuvhomvi akwanzilwa kuposheela amalipilo kufuma mu mbombo yaakwe.

⁸ “Mu nkaaya yonti ye mwinjila, na vhahaaya vhavhaposheela ku luseshelo, ishaakulya shonti she vhaavhapa, mulyanje.

⁹ Muvhaponiaje avhavhinu vhe vhali mu nkaaya iyo. Muvhavhuzyaje avhantu vhonti kuuti, ‘Uvhumwene uvhwa Mulungu vhupalamiiye kuli imwe!’

¹⁰ Ileelo mu nkaaya yonti ye mwinjila na vhahaaya vhatavhaposheela, mwepaje mwenemwo. Lwe mukutuuha mu madala gaakwe, mutinji,

¹¹ ‘Poosye ulusuuto ulwa mu nkaaya yiinyu lwe luli mu vinama vwitu, tukupuupula, inga vhuvhe vhwe vhwahoome uvhwa kuvhasoha. Ileelo mumanye kuuti uvhumwene uvhwa Mulungu vhupalamiiye!’

¹² Nalyoli nkuvhavhuuzya kuuti, isiku ilya vhulonzi, avhantu avha mu nkaaya iyo vhaliposheela isunde ipiti kuluusya avhantu avha mu nkaaya iya Sodooma!”

UYeesu akuvhasoha avhantu avha mu nkaaya zye zikuhaana kumwitiha

¹³ Ahayanga ahati, “Mwasheela imwe mwe vhantu avha mu nkaaya iya Kolaziini ni ya Betisaayida! Yeenya, amafindango ge mbomvile kuli imwe, inga apele gavhombehaje mwe mu nkaaya iya Tiilo ni ya Siidoni, avhantu avha mu nkaaya izyo, nkandi vházwaye amagunila nu kuyipaha ilota kulolesya kutonta uvhutalamalandu vhwavho.

¹⁴ Nalyoli isiku ilya vhulonzi, imwe muliposheela isunde ipiti kuluusya avhantu avha mu nkaaya iya Tiilo ni ya Siidoni!

¹⁵ Niimwe mwe vhantu avha mu nkaaya iya Kapelanawuumu, vhuli, mukusiivha kuuti muliizuvha kufishila ku mwanya? Ndaali! Te yihaavhe vhwevhulo, mulisumbwa pansi kufishila ku vhuzimu!”

¹⁶ UYeesu ahavhavhuuzya avhasundikwa vhaakwe ahati, “Umuntu we akuvhiivwa imwe, akuniivwa neene, woope we akuvhahaana imwe, akunkaana neene. Havhili we akunkaana ine, akumuhaana ula we antumiliziizye.”

Avhasundikwa 72 vhakugaluha kwa Yeesu ku luseshelo

¹⁷ Pisinda, avhasundikwa avha Yeesu 72 vhahagaluha kwa Yeesu uku vhakuseshela, vhahamuvhuuzya vhahati, “We Mwene, zyope impepo inkandamanu zyatushindihaga, lwe tukuzishimbizya kwi izina lyaho!”

¹⁸ UYeesu ahavhavhuuzya ahati, “Namulolaga uSeetano akugwa ngati lumesyo ulwa mvula intalala kufuma ku mwanya.

¹⁹ Yeenya, mbapiiye amaha aga kumupoota umulugu mu zyonti. Ku maha igo kuuti muhanyaje injoha ni nkoonya, havhili shitaliipo ishintu isha kuvhavwalazya.

²⁰ Ileelo inga mukuseshela, mwe pe impepo inkandamanu zikuvhashindiha, muleshe kuseshela kuli izyo vhweleele, nkandi museshelaje, mwe pe amazina giinyu gasimviilwe nu Mulungu ku mwanya.”

UYeesu akuseshela

²¹ Ahavhaliilizyo hanaaho, uMupepo uMufinjile ahaamupa uYeesu kuseshela nkaani, ahati, “We Taata, MWENE wa ku mwanya na pa nsi, nkukusalifwa. Nkukusalifwa, mwe pe imbombo izi uvhazyisile avhantu vhe vhakuyilola kuuti vhali nu vhushindamu uvhwa njeele nu kuuti vhasambiilile, ileelo uvhalolesiizye apazelu vhe vhakuyiisya inza avhaana avhansi. Nalyoli Taata, isho vwe usungwilwe.”

²² Havhili ahati, “UTaata waane ampiiye ivintu vwonti. Ataliipo we amumanyile uMwana, nkandi we Taata weeka. Havhili, ataliipo we amumanyile uTaata, nkandi we Mwana weeka, nu muntu wonti we uMwana asungwilwe kumulolesezya.”

²³ Pe uYeesu ahagalunkana, ahavheenya avhasundikwa vhaakwe, ahavhavhuuzya ahati, “Mulosiitwe imwe mwe mukuzilola izi!

²⁴ Nalyoli nkuvhavhuuzya kuuti, vháliipo avhakuvhwi avhinji na vhamwene vhe vhahanzaga kuzilola zye mukuzilola imwe, ileelo vhatázivhwenyi. Havhili vhahanzaga kuzyivwa zye mukuzyivwa imwe, ileelo vhatázyivuuye.”

Ishiholanyo isha Musamaliya umwinza

²⁵ Isiku limo, umusambiilizi wumo uwa ndajizyo ásogooye kwa Yeesu. Umusambiilizi uyo ahanzaga kumulinga uYeesu, pe ahamuvhuziilizya ahati, “We Musambiilizi, imbombe ishooni, inga nkaposheele uvhulanzi uvhwa shiima?”

²⁶ UYeesu ahamwamula ahati, “Indajizyo izya Moose zikuti vhuli? Vhuli, umanyile zye zikuyangwa muumwo?”

²⁷ Ahamwamula ahati, “Zikuti, ‘Umukundaje uMWENE waaho uMulungu ku mwoyo waaho wonti, na ku vhulanzi vhwaho vhwonti, na ku maha gaaho gonti, na ku njeele zyaho zyonti.’ Havhili, ‘Umukundaje umupalamani waaho inza vwe ukuyikunda weneewe.’”

²⁸ UYeesu ahati, “Waamula ahinza! Uvhombaje vhwevhulo, pe kuuti uvhe nu vhulanzi uvhwa shiima.”

²⁹ Ileelo umusambiilizi uwa ndajizyo uyo ahanzaga kuyivhiiha kuuti mugolosu pilongolela ilya Mulungu, pe ahamuvhuziilizya havhili uYeesu ahati, “Ishi, umupalamani waane wu naanu?”

³⁰ UYeesu ahamwamula ku shiholanyo ahati, “Páali umuntu wumo, we áfumile ku Yelusaleemu, ahasogolaga mu nkaaya iya Yeeliko. Ileelo mwi idala, ahalemwa na vhapumula vintu, vhahamuzuula amenda nu kumuhoma nkaani, vhahamuleha asyaye hansi kufwa.

³¹ Yihafumila, umupuuti wumo ahajendaga mwi idala liniilyo, lwe amulola umuntu uyo, ahamupambata, ahatuuha ku luvhazu.

³² Woope uMulaawi ahafiha paala, lwe amulola umuntu uyo, ahamupambata, ahatuuha ku luvhazu.

³³ Pisinda, ahinza uMusamaliya wumo, we ahashuulaga kutuushila mwi idala liniilyo. Ileelo uweene lwe amulola umuntu uyo, ahamufwila uvhwila,

³⁴ ahamupalamila, ahamupaha idivaayi na mafuta mu malonda gaakwe, pe ahamupinya genego. Ahamulimbizya pa mfwalaasi yaakwe, ahamutwala mu nyumba iya vhajeni, mwe ahavha akumuvhinia.

³⁵ “Lwe kwasha, ahafumwa idinaali zivhili, ahaamupa umwimiilizi uwa nyumba iyo, ahamuvhuuzya ahati, ‘Umuvhinie umuntu uno. Inga impiiya izi zyasila, waafumwa izyaho kumwavwa, lwe nagaluha, ndikulipa zye wonjezya.’”

³⁶ Pe uYeesu ahamuvhuziilizya umusambiilizi uwa ndajizyo ula ahati, “Vhuli, ishi muli ivha vhatatu, wu naanu we ukusiivha kuuti áali mupalamani uwa nalyoli uwa ula we avhapumula vintu vhámulemile?”

³⁷ Ahaamula ahati, “We wula we ámufwiliiye uvhwila.” UYeesu ahamuvhuuzya ahati, “Niiwe sogoola uvhombaje inza vhwevhulo!”

UYeesu mu nyumba ya Maalita nu Maliiya

³⁸ UYeesu na vhasundikwa vhaakwe lwe vhali mwi idala kusogola ku Yelusaleemu, vhahafiha mu lutala lumo. Umwo umwantanda wumo, we vhahatinji uMaalita, ahamukalibisya uYeesu mu nyumba yaakwe.

³⁹ UMaalita áamile nu munine waakwe we vhahatinji uMaliiya. Ahavhaliilizyo he uYeesu áali mu nyumba yaavho, uMaliiya átendiime pa luvhazu pa vinama ivwa Mwene uYeesu, ahatejelezyaga insambiilizyo zyakwe.

⁴⁰ Ileelo uMaalita ahapwungaga ni mbombo inyinji izya kumutetela uYeesu. Pe ahamuvhuuzya uYeesu ahati, “We Mwene, utakulola kuuti havhiivhi lwe umunine waane andesheeye imbombo zyonti neeka? Muvhuuzye anaavwe!”

⁴¹ UMwene uYeesu ahamwamula ahati, “Maalita, shooni she ukupwunga nu kuyimba ni nyinji?

⁴² Ileelo shikwanzilwa ishintu shooka vhweleele she shinza, isho she uMaliiya asavhuuye, naawumo we angasheefwa ku kwakwe.”