uLuuka 1 - ULufingwi uLupwa

Amazwi aga kwanda

¹ Kuli iwe uwa mushinzi nkaani Teyofiilo: Avhantu avhinji vhasimvile inongwa izya Yeesu Chilisiti inza vwe zyávhombesile muli iswe.

² Vhasimvile inongwa izi inza vwe vhátuvhuziizye avhavhomvi vhaala vhe vházivhwenyi na minso gaavho kufuma pe zyátalisile nu kuzilumbiilila.

³ Ishi niine naalola kuuti hinza kukusimbila izi zyonti inza vwe zyálandatiine, mwe pe nkomesheziizye ahinza uvhwanalyoli uvhwa nongwa izya Yeesu kufuma ku vhwandilo.

⁴ Navhomba vhwevhulo, inga umanye uvhwanalyoli uvhwa nongwa zye vhakusambiliziizye.

Uvhukuvhwi uvhwa kupaapwa ukwa Yoohani uMwozyi

⁵ Ahavhaliilizyo he umwene uHeelodi uMupiti ahakonzyaga mu nsi iya Vhayuuda, kwáli umupuuti wumo we izina lyakwe vhahatinji uZakaliya. Umupuuti uyo ahafumaga mu mpuga iya vhapuuti iya Aabiya. Umushi waakwe vhahatinji uEelizabeeti. Woope áfumile mu luho ulwa shipuuti ulwa Aaloni.

⁶ UZakaliya nu mushi vháamile vhagolosu pilongolela ilya Mulungu, vhahazilemaga ahinza indajizyo zyonti izya Mulungu ishisita ulukwinkwino.

⁷ Ileelo vhatáamile nu mwana, mwe pe uEelizabeeti áamile mugumba, havhili vhonti vhavhili vháamile vhagoosi.

⁸ Isiku limo, uZakaliya ahavhombaga imbombo iya vhupuuti mu Nyumba iMfinjile ahavhaliilizyo aha luvhambo ulwa mpuga yaakwe iya Aabiya.

⁹ Ásavhuliilwe kulandatana na maata gaavho kwinjila aPafinjile apa MWENE uMulungu, inga asuushizye pa shifinjilo ivintu vwe vikununshila umununsi umwinza.

¹⁰ Lwe ali muhati kusuushizya, avhantu impuga impiti vháamile panzi pa Nyumba iMfinjile vhahapuutaga.

¹¹ Pe uhavhizya uwa MWENE uMulungu ahamufumila uZakaliya. Uhavhizya uyo, áyimiliiye uluvhazu ulwa kundiilo ulwa shifinjilo isho.

¹² Lwe uZakaliya amulola uhavhizya, ilyoga lihamulema, ahasaaga nkaani.

¹³ Ileelo uhavhizya ula ahamuvhuuzya ahati, “Utogopaje Zakaliya! UMulungu ayivuuye impuuto zyaho, umushi waaho uEelizabeeti kwe akupaapile umwana umwanaavuli, umwana uyo ulimwita kuuti wu Yoohani.

¹⁴ Pe uliseshela nkaani, havhili avhantu avhinji vhaliseshela kupaapwa kwakwe,

¹⁵ mwe pe uMWENE uMulungu alimuvhiiha kuvha mupiti. Umwana uyo atahamwele idivaayi, poosye ishintu shonti she shikuhola. Amaha aga Mupepo uMufinjile galiivha nawo kufuma ahavhaliilizyo he ali mu lwanda mwa maayi waakwe.

¹⁶ Alivhagalusya aVhaisilayeeli avhinji kwa MWENE waavho uMulungu.

¹⁷ Havhili alimulongolela uMwene, aliivha na maha nu mwoyo uwa kumulandata uMulungu inza umukuvhwi uEeliya vwe áamile. Alivhakundanya avhapaafi na vhaana vhaavho, havhili alivhagalulanya vhe vhatakumushindiha uMulungu, kuvha ni nsiivho ingolosu. Alivhomba zyonti izyo, inga avhasengaanye avhantu kumuposheela uMwene uYeesu.”

¹⁸ Pe uZakaliya ahamuvhuziilizya uhavhizya ahati, “Ine nu mushi waane twe vhagoosi. Shintu vhuli she shingamanyisya kuuti amazwi igo ga nalyoli?”

¹⁹ Pe uhavhizya ahamwamula ahati, “Ine ne Gabiliyeeli, nkwimiilila pilongolela ilya Mulungu. Uweene we ansonteleziizye kuuti nkuvhuuzye iwe inongwa inyinza izi.

²⁰ Ishi, mwe pe utiitiha zye nakuvhuuzya kuuti, uvhe we shinuunu. Te uyangaje kufishila isiku lye zilivhombeha izyo. Zyonti zilivhombeha, lwe ahavhaliilizyo haakwe haafiha!”

²¹ Ahavhaliilizyo iho, avhantu vhaala vhe vháamile panzi, vhahamugulililaga uZakaliya. Vhahasukumila, mwe pe áhaavile nkaani kufuma aPafinjile mu Nyumba iMfinjile.

²² Lwe aafuma, ahapootwa kuyanga navho, pe avheene vhahamanya kuuti, avhwenyi injozi iya pa minso amazelu mu Nyumba iMfinjile. Uweene ahalolesyaga ni nyoovhe zye akwanza kuyanga, ahajendeelela kuvha wu shinuunu.

²³ Lwe insiku zyakwe zyasila izya kuvhomba imbombo iya vhupuuti, ahavhwela kuhaaya.

²⁴ Pisinda, umushi waakwe uEelizabeeti ahavha pa vhumwamu, ahayizyiha mu nyumba ku havhaliilizyo aha meezi gasaano. Ahayiyanjilaga wuuyo ahatinji,

²⁵ “Izi zye uMWENE uMulungu ambombeeye ine, amfwiliiye uvhwila nu kuneefwezya insoni ku vhantu.”

Uvhukuvhwi uvhwa kupaapwa ukwa Chilisiti

²⁶ Lwe waafiha umwezi uwa 6 uwa vhumwamu uvhwa Eelizabeeti, uMulungu ahamusonteelezya uhavhizya uGabiliyeeli mu nkaaya iya Naazaleeti. Inkaaya iyo yáamile mu shigavho isha nsi isha Galilaaya.

²⁷ Ahasogola kwa mulindu wumo we izina lyakwe vhahatinji uMaliiya. Umulindu uyo atámumanyile umwanaavuli. UMaliiya ázinjiliilwe nu Yoosefu uwa mu luho ulwa mwene uDaavhudi.

²⁸ Uhavhizya lwe aafiha kwa Maliiya ahati, “Mwakaata iwe we ulosiitwe nkaani, uMWENE uMulungu ali niiwe.”

²⁹ UMaliiya, lwe ayiivwa amazwi igo, ahagandushila nu kwogopa nkaani, ahavhanga akuyivhuziilizya mu mwoyo kuuti, “Shooni she akundamuha inza vhwevhulo?”

³⁰ Pe uhavhizya ahati, “Maliiya, utogopaje! UMulungu akufwiliiye uvhwila.

³¹ Yeenya, kuuti uvhe pa vhumwamu, kuuti upaape umwana umwanaavuli. Umwana uyo ulimwita kuuti wu Yeesu.

³² Umwana uyo aliivha mupiti, havhili izina lyakwe vhalitinji Mwana wa Mulungu uMupiti uwa ku Mwanya. UMWENE uMulungu aliimupa amaha aga vhumwene, inza vwe áamile utaata waakwe umwene uDaavhudi.

³³ Havhili, alivhakonzyaga aVhaisilayeeli insiku zyonti, uvhumwene vhwakwe te vhuhaavhe nu vhusililishilo.”

³⁴ UMaliiya ahamuvhuziilizya uhavhizya ahati, “Ine ntamumanyile umwanaavuli nuumo, ishi izyo kwe zivhombeshe vhuli?”

³⁵ Uhavhizya ahamwamula ahati, “UMupepo uMufinjile kuuti akwishile, na maha aga Mulungu uMupiti uwa ku Mwanya kuuti gakugwinshile inza ahanzundila. Pe umwana we ulipaapa aliivha mufinjile, havhili avhantu vhalitinji Mwana wa Mulungu.

³⁶ Yeenya, woope umujenzi waaho uEelizabeeti ali pa vhumwamu, poosye she mugoosi! Havhili uvhumwamu vhwakwe vhwa meezi 6, uweene we vhatinji mugumba!

³⁷ Naalimo lye lingamupoota uMulungu.”

³⁸ Pe uMaliiya ahati, “Ine ne muvhomvi uwa MWENE uMulungu. Zivhe vhwevhulo ku kwane inza vwe wayanga.” Pe uhavhizya aheepa.

UMaliiya akumushuulila uEelizabeeti

³⁹ Lwe zyatuuha insiku nyinsi, uMaliiya ahahalambana kusogola mu nkaaya yimo ye yáamile mu nsi iya magamba aga mu Yudeeya.

⁴⁰ Lwe aafiha, ahinjila mu nyumba iya Zakaliya, ahamulamuha uEelizabeeti.

⁴¹ UEelizabeeti lwe ayiivwa vwe uMaliiya akumulamuha, umwana ahanyangʼanya muhati yaakwe. Pe uMupepo uMufinjile ahamwishila uEelizabeeti.

⁴² Pe ahanda kuyanga kwi izwi ipiti kuuti, “Ulosiitwe iwe kuluusya avhantanda vhonti, havhili alosiitwe nu mwana we kuuti upaape.

⁴³ Ine ne naanu ne umaayi uwa Mwene waane ayinzile kunshuulila?

⁴⁴ Lwe niivwa izwi lyaho ilya kundamuha, umwana muhati yaane anyangʼanya ku luseshelo.

⁴⁵ Ulosiitwe iwe, mwe pe uyitisile zye uMWENE uMulungu akuvhuziizye, izyo kuuti zivhombeshe.”

Ulwimbo ulwa Maliiya

⁴⁶ Pe uMaliiya ahati, “Umwoyo waane wukumutiima uMWENE uMulungu.

⁴⁷ Havhili wukumudovhela uMulungu uMuposhi waane,

⁴⁸ mwe pe ankumbuha ine ne muvhomvi waakwe, poosye she ne muyeyevhazu. Yeenya, kufuma ishi avhantu avha manda gonti, vhalitinji ine ne mulootwa.

⁴⁹ UMWENE uMulungu uwa Maha Gonti ambombeeye izya kusukumizya, uweene mufinjile.

⁵⁰ Akuvhafwila uvhwila avhantu avha manda gonti, vhonti vhe vhakumunyila.

⁵¹ Alolesiizye uvhupiti vhwakwe ku maha gaakwe. Avhasasiizye avha mabaado mu mooyo gaavho.

⁵² Avhamwene avhefwizye mu mbombo yaavho iya kukonzya, nu kuvhavhiiha avhayeyevhazu.

⁵³ Vhe vhali ni nzala, avhapiiye ivintu ivwinza ku vhwinji, ileelo avha vwuma ivwinji avhashimbiziizye inyoovhe zyeka.

⁵⁴ Avhavwizye avhavhomvi vhaakwe aVhaisilayeeli. Akumbusile ulufingwi lwake ulwa kuvhafwila uvhwila,

⁵⁵ inza vwe ávhavhuziizye avhataata vhiitu, avha Aabulahamu nu luho lwakwe lwonti shiima shiima.”

⁵⁶ UMaliiya ahatendama nu Eelizabeeti ameezi gatatu ishi, pe ahavhwela ku mwavho.

Kupaapwa ukwa Yoohani uMwozyi

⁵⁷ Lwe haafiha ahavhaliilizyo aha Eelizabeeti kupaapa, ahapaapa umwana umwanaavuli.

⁵⁸ Avhapalamani na vhajenzi vhaakwe vhahiivwa kuuti uMWENE uMulungu amufwiliiye uEelizabeeti uvhwila nkaani, pe vhahaseshela pooka nawo.

⁵⁹ Lwe isiku ilya 8 lyafiha kufuma umwana apaapwe, vhahinza kumutahiili. Vhahanzaga kuumupa umwana izina ilya yise, uZakaliya.

⁶⁰ Ileelo umaayi waakwe ahavhavhuuzya ahati, “Ndaali! Izina lyakwe kuuti avhe wu Yoohani.”

⁶¹ Avheene vhahamwamula vhahati, “Mu luho lwinyu ataliipo umuntu we ali ni izina inza ilyo.”

⁶² Pe vhahamuvhuziilizya uyise ku shilolesyo, inga vhamanye kuuti uweene akwanza kuumupa umwana lizina vhuli.

⁶³ UZakaliya ahalaavha apa kusimbila, ahasimba ahati, “Izina lyakwe avhe wu Yoohani.” Pe avhantu vhonti vhahasukumila.

⁶⁴ Ahavhaliilizyo hanaaho uZakaliya ahiiguha, ahanda kuyanga kumutiima uMulungu.

⁶⁵ Pe avhapalamani vhonti avha Zakaliya, vhahoogopa nkaani. Inongwa izi zihajendeelela kukumuha mu nsi yonti iya mu magamba aga mu Yudeeya.

⁶⁶ Avhantu vhonti vhe vhívuuye inongwa izyo, vhahasukumila mu mooyo gaavho, vhahati, “Amwe umwana uno aliivha inza vhuli?” Vhahasukumila vhwevhulo, mwe pe uMWENE uMulungu áali pooka nawo.

Ulwimbo ulwa Zakaliya

⁶⁷ Pe amaha aga Mupepo uMufinjile gahamwishila uZakaliya, utaata uwa mwana, pe ahanda kukuvhwa kuuti,

⁶⁸ “Ashindikwaje uMWENE uMulungu uwa Vhaisilayeeli, mwe pe ayinzile kuvhapoha avhantu vhaakwe.

⁶⁹ Atupiiye uMuposhi uwa Maha, kufuma mu luho ulwa muvhomvi waakwe uDaavhudi.

⁷⁰ Avhomvile inza vwe áyanzile kufuma hali kutuushila ku vhakuvhwi vhaakwe avhafinjile.

⁷¹ Áyanzile kuuti alitupoha kufuma mu vhalugu vhiitu, mu vhantu vhonti vhe vhatupasite.

⁷² Átili, alivhafwila uvhwila avhataata vhiitu, nu kulunjisya ulufingwi lwake ulufinjile.

⁷³ Áfinzile nu taata wiitu uAabulahamu,

⁷⁴ kuuti alitupoha mu vhalugu vhiitu, inga tumuvhombelaje uweene ishisita ilyoga.

⁷⁵ Tuvhe swe vhafinjile, havhili swe vha nalyoli insiku zyonti zye tukulandila.

⁷⁶ Ishi iwe mwana waane, kwe vhakwitaje kuuti umukuvhwi uwa Mulungu uMupiti uwa ku Mwanya. Kwe vhakwitaje vhwevhulo, mwe pe kuuti umulongolele uMwene uYeesu, inga umupelele uweene idala.

⁷⁷ Kwe uvhamanyisyaje avhantu vhaakwe kuuti, vhakupokwa kwi idala ilya kuswilwa uvhutalamalandu vhwavho,

⁷⁸ mwe pe uMulungu wiitu ali nu vhwila nkaani ku kwitu. Ku vhwila uvhwo, uvhuzelu kufuma ku mwanya vhulituhozezya,

⁷⁹ swenti swe tuli mu shiisi nu kupalamila kufwa, nu kutulongola mwi idala ilya vhutehamu.”

⁸⁰ Pe uYoohani ahajendeelela kukula, nu kwonjela kuvha na maha mwa Mupepo uMufinjile. Lwe aakula, ahatendama mu luugwa kufishila ahavhaliilizyo he ahaloleha ku Vhaisilayeeli.