Matayi 6 - ULufingwi uLupwa

Insambiilizyo izya kuvhaavwa avhapiina

¹ “Yeenya, mutavhombaje inyinza pilongolela ilya vhantu, inga vhavhalole, mwe pe inga mukuvhomba vhwevhulo, te muhaposheele ishipeelwa kufuma kwa Taata wiitu uwa ku mwanya.

² Ishi lwe mukuvhaavwa avhapiina, mutakumusyaje ku vhantu inza vwe avhashifumbo vhakuvhomba mu masinagoogi na mu madala, inga avhantu vhavhatiime. Nalyoli nkuvhavhuuzya kuuti, vhaposheleeye ivipeelwa vwavho.

³ Ileelo lwe ukuvhaavwa avhapiina, poosye umumanyani waaho uwa papiipi nkaani atamanyaje vwe ukuvhomba,

⁴ inga ishipeelwa shaaho shivhanje sha kukwilu. Pe uTaata waaho uwa ku mwanya we akulola zye zikuvhombeha kukwilu, alikulipa.”

Insambiilizyo izya kumulaavha uMulungu

⁵ “Lwe mukumulaavha uMulungu, mutavhanje ngati vhashifumbo. Avheene vhakusungwa kuyilolesya ku vhantu lwe vhakumulaavha uMulungu mu masinagoogi na mu madala amalehaana, inga avhantu vhavhatiimaje. Nalyoli nkuvhavhuuzya kuuti, vhaposheleeye ivipeelwa vwavho.

⁶ Ileelo iwe lwe ukumulaavha uMulungu, uyinjilaje kwi iziiho lyaho nu kwigalila umulyango. Pe ulaavhaje kwa Taata waaho we atakuloleha. Pe uTaata waaho uwa ku mwanya we akulola zye zikuvhombeha kukwilu, aliikupa ishipeelwa.

⁷ “Havhili, lwe mukumulaavha uMulungu, mutavhuyilizyaje amazwi aminji aga shaaha inza vwe vhe te Vhayuuda vhakuvhomba. Avheene vhakusiivha kuuti impuuto zyavho kwe ziposheelwe ku mazwi gaavho aminji.

⁸ Mutalaavhaje inza vwe avheene vhakulaavha, mwe pe uTaata wiitu amanyile vwe musovheliilwe, poosye she mushiili kumulaavha.

⁹ “Ishi imwe lwe mukumulaavha uMulungu, mutinji, ‘Taata wiitu uwa ku mwanya, izina lyaho lishindikwaje. Uvhumwene vhwaho vhwinze.

¹⁰ Zye ukasiime, zivhombeshe mu nsi umu, inza vwe zikuvhombeha ku mwanya ukwo.

¹¹ Utupe ileelo ishaakulya shiitu isha kutuyaayana insiku zyonti.

¹² Utuswile uvhutalamalandu vhwitu, inza vwe niiswe tuvhaswiliiye vhe vhakutuvhombela uvhutalamalandu.

¹³ Utulongole inga tutahinjile mu ndingo, havhili utuposhe nu Muvhiivhi ula, mwe pe uvhumwene na maha nu vhushindamu vwaho shiima! Amina!’”

¹⁴ UYeesu ahayanga havhili ahati, “Inga mukuvhaswila avhamwinyu uvhupuvi vhwavho, woope uTaata wiitu uwa ku mwanya alivhaswila uvhupuvi vhwinyu.

¹⁵ Ileelo inga mutakuvhaswila avhamwinyu uvhupuvi vhwavho, woope uTaata wiitu uwa ku mwanya te ahavhaswile niimwe uvhupuvi vhwinyu.”

Insambiilizyo izya kuyiima kulya

¹⁶ “Lwe mukuyiima kulya, pa minso giinyu patalolesyaje uvhuswimiilizu inza vwe avhashifumbo vhakuvhomba. Avheene vhakulolesya uvhuswimiilizu pa minso gaavho, inga avhantu vhavhalole kuuti vhakuyiima kulya. Nalyoli nkuvhavhuuzya kuuti, vhaposheleeye ivipeelwa vwavho.

¹⁷ Ileelo iwe inga ukuyiima kulya, ugeezaje ku minso nu kupahala amafuta,

¹⁸ inga avhantu vhatamanyaje kuuti ukuyiima kulya. Pe uTaata waaho uwa ku mwanya we akulola zye zikuvhombeha kukwilu, aliikupa ishipeelwa.”

Insambiilizyo izya vhudumbwe

¹⁹ “Mutasengulaje inkoma mu nsi umu, mwe uluswa nu vhusimu vikunanganya, havhili avhiivha vhakupankula nu kwivha.

²⁰ Nkandi musengulaje inkoma zyinyu ku mwanya kwe uluswa nu vhusimu vitangananganya, havhili kwe avhiivha vhatangapankula nu kwivha.

²¹ Kwe ukusengula ivwuma vwaho, kwe umwoyo waaho wulisivhililaga ahavhaliilizyo honti.

²² “Aminso gaaho gali inza inyaale ye yikuwuhozya umuvhili waaho. Inga aminso gaaho gali ahinza, pe umuvhili waaho wonti wukuvha nu vhuzelu.

²³ Ileelo inga aminso gaaho gafuuye, pe umuvhili waaho wonti vhukuvha ni shiisi. Inga uvhuzelu vhwe vhuli muhati yaaho vhwavha shiisi, pe ishiisi isho shikuvha shipiti nkaani!

²⁴ “Ataliipo we angavhavhombela avhamwene vhavhili ku havhaliilizyo hooka. Yeenya, lwe akumukunda umwene wooka, akuvha akumuviitilwa uwamwavho, havhili lwe akuyifumwa nkaani kumuvhombela umwene wooka akuvha akumusuufwa uwamwavho. Inga ivwuma vikuvhakonzya, mutangamuvhombela uMulungu.”

Kumusuuvhila uMulungu

²⁵ “Pe ishi, nkuvhavhuuzya kuuti, mutayitamwaje ni zya vhulanzi vhwinyu kuuti, kwe mulye ishooni, poosye kuuti kwe mumwele ishooni, poosye ni zya mavhili giinyu kuuti kwe muzwale ishooni. Nkuvhavhuuzya vhwevhulo, mwe pe uvhulanzi vhuli ni nsavho kuluusya ishaakulya, woope umuvhili wuli ni nsavho kuluusya amenda.

²⁶ Yeenyi inyunyi, zitakuvhwala, poosye kuvuna nu kusengula ishaakulya mu nkoma, ileelo poosye vhwevhulo uTaata wiitu uwa ku mwanya, akuziliisya. Vhuli, imwe mutali ni nsavho nkaani pilongolela ilya Mulungu kuluusya inyunyi izyo?

²⁷ Wu naanu muli imwe we kuyitamwa kwakwe kungonjezya uvhulanzi vhwakwe poosye isaala inga lyoka?

²⁸ “Shooni she mukuyitamwa kuuti kwe muzwale ishooni? Yeenyi uvhwezya uvhwa mwi ilaala vwe vhukubaalula, vhutakuvhomba imbombo, poosye kusona amenda aga kuzwala.

²⁹ Ileelo nkuvhavhuuzya kuuti, poosye umwene uSolomooni nu vhushindamu vhwakwe vhwonti, atázwaye ahinza naalumo amenda nu kuhondela inza uvhwezya uvhwo!

³⁰ Ishi inga uMulungu akugazwalizya amatundu aga mwi ilaala inza isho, poosye she gakuhondela ku havhaliilizyo hansi vhweleele, indaavhi gakusumbwa mu mwoto, vhuli, atangavhazwalizya ahinza nkaani imwe? Mukusukumizya ku lwitiho lwinyu ulunsi.

³¹ “Pe ishi, mutayitamwaje kuuti, ‘Kwe tulye ishooni,’ poosye kuuti, ‘Kwe tumwele ishooni,’ poosye nu kuuti, ‘Kwe tuzwale ishooni.’

³² Nkuvhavhuuzya isho, mwe pe vhe te Vhayuuda vhakulondola nkaani ivintu vwonti ivwo, ileelo imwe uTaata wiitu uwa ku mwanya amanyile kuuti mukuvwanza.

³³ Imwe muvhulondole suuti uvhumwene uvhwa Mulungu nu vhugolosu vhwakwe, pe ivwo vwonti mulipeelwa.

³⁴ “Ishi mutayitamwaje ni zya ndaavhi, mwe pe izya ndaavhi ziliyiyimbila zyeka. Insiku zyonti zili ni ntamwo zyakwe.”