Matayi 5 - ULufingwi uLupwa

Imbila iya Yeesu mwi igamba Uvhuloote

¹ Lwe uYeesu aalola ivhungaana ilya vhantu, ahazuvha pi igamba nu kutendama. Pe avhasundikwa vhaakwe vhahinza ku kwakwe.

² Woope ahataliha kuvhasambiilizya ahati,

³ “Vhalosiitwe vhe vhapiina mu mooyo, mwe pe uvhumwene uvhwa Mulungu vhwavho.

⁴ Vhalosiitwe avhaswimiilizu, mwe pe uMulungu alivhasuvhaalizya.

⁵ Vhalosiitwe avhatonsu, mwe pe uMulungu aliivhapa insi.

⁶ Vhalosiitwe vhe vhali ni nzala ni shinyooto isha vhugolosu, mwe pe vhaliyiikuta.

⁷ Vhalosiitwe vhe vhali nu vhwila, mwe pe uMulungu alivhafwila uvhwila.

⁸ Vhalosiitwe vhe vhali nu mwoyo umwinza, mwe pe vhalimulola uMulungu.

⁹ Vhalosiitwe vhe vhakuvhakundanya avhamwavho, mwe pe uMulungu alivhiita kuuti vhaana vhaakwe.

¹⁰ Vhalosiitwe vhe vhakuyimvilwa kuzya vhugolosu, mwe pe uvhumwene uvhwa Mulungu vhwavho.

¹¹ “Mulosiitwe imwe, inga avhantu vhakuvhaliga nu kuvhayimvwa nu kuvhayanjila imbiivhi izya mavhiila mu mavhiila ni zya ilenga, mwe pe mukuniitiha ine.

¹² Lwe zikuvhombeha izyo, museshelaje nu kudovhela, mwe pe uMulungu aliivhapa ishipeelwa ishipiti ku mwanya. Havhili vhwevhulo, vwe vhahavhayimvwaga avhakuvhwi vhe vhávhalongoleeye imwe.”

Ishiholanyo isha ivheeya nu vhuzelu

¹³ UYeesu ahajendeelela kuyanga, ahati, “Imwe mwe livheeya ilya mu nsi. Ileelo ivheeya inga lyasuupa, shiliipo she shingalinonia? Litangaahola havhili ishintu shonti, nkandi likuvha lya kwita panzi, nu kulihanyanjila.

¹⁴ “Imwe mwe vhuzelu vhwa mu nsi. Inkaaya ye yizengwilwe pi igamba pamwanya, yitangazyihama.

¹⁵ Havhili, avhantu vhatakuhozya inyaale nu kuyigubishila ni nsonta, nkandi vhakuyivhiiha pi ibeeja, inga yivhahozezye vhonti vhe vhali mu nyumba.

¹⁶ Vhwevhulo, vwe uvhuzelu vhwinyu vhukwanzilwa vhuvhahozezyaje avhantu, inga vhazilolaje imbombo zyinyu inyinza, pe vhamushindihaje uTaata wiitu uwa ku mwanya.”

Insambiilizyo izya Yeesu kuzya ndajizyo izya Moose

¹⁷ “Mutasiivhaje kuuti ninzile kuzyefwa indajizyo izya Moose, poosye insambiilizyo izya vhakuvhwi, nkandi ninzile, inga zyonti zye uMulungu áyanzile ziloleshe kuli ine.

¹⁸ Nalyoli nkuvhavhuuzya kuuti, lwe hashiili kufiha ahavhaliilizyo he imwanya ni nsi viliyeepa, yitaliipo poosye iheelufi inyinsi, poosye ahandona inga hooka aha ndajizyo izya Moose he haliyeepa lwe zyonti zye zili muumwo zishiili kulunjiha.

¹⁹ Pe ishi, umuntu wonti we akushilanya ululajizyo inga lwoka, mu nyinsi izi nu kuvhasambiilizya avhanji kuuti vhazishilanyaaje, uyo aliivha munsi mu vhumwene uvhwa Mulungu. Ileelo we akuzivhombela imbombo nu kuvhasambiilizya avhanji, uyo we aliivha mupiti mu vhumwene uvhwa Mulungu.

²⁰ Nalyoli nkuvhavhuuzya kuuti, inga uvhugolosu vhwinyu vhutakushila uvhwa vhasambiilizi avha ndajizyo izya Moose nu vhwa Vhafalisaayi, te muhinjile naalumo mu vhumwene uvhwa Mulungu.”

Insambiilizyo izya mulaha

²¹ “Mwivuuye kuuti, vhahavhavhuzyaga avhantu avha hali kuuti, ‘Utagogaje, inga umuntu wonti amugoga uwamwavho, akwanzilwa kupeelwa isunde.’

²² Ileelo ine nkuvhavhuuzya kuuti, umuntu wonti we akumuviitilwa uwamwavho, akwanzilwa kupeelwa isunde. Havhili, wonti we akumuliga uwamwavho kuuti we mupukupuuku, akwanzilwa kulongwa pa lukuvhato. Woope we akumutipa uwamwavho, akwanzilwa kusumbilwa mwi ipalaazya ilya mwoto uwa shiima!

²³ “Inga ukufumwa impuutile pa shifinjilo, ileelo wakumbuha kuuti uwamwinyu ali ni nongwa niiwe,

²⁴ uzileshe suuti impuutile izyo pilongolela pa shifinjilo, usogole ukundane suuti nu wamwinyu uyo. Pe uyinze ufumwe impuutile zyaho.

²⁵ “Havhili, inga umuntu wumo akukutwala kwi ilonjelwi, kwashi, kumulaavha naluvhiilo kuuti mwivwane nawo. Ishisita kuvhomba isho, kwe akutwale kwi ilonjelwi. Ukwo ulilongwa nu kukungwa ku maha mu jeela.

²⁶ Nalyoli nkukuvhuuzya kuuti, muhati mu jeela umwo te uhaafume naalumo ishisita kumala kulipa vwonti vwe ukwanzilwa kugalusya!”

Insambiilizyo izya vhuvhembu

²⁷ “Mwivuuye ululajizyo lwe lukuti, ‘Utavhembuhaje.’

²⁸ Ileelo ine nkuvhavhuuzya kuuti, umuntu wonti we akumwenya umwantanda kwi idala ilya kumunyonywa, akuvha avhembuha nawo mu mwoyo waakwe.

²⁹ Ishi inga ilyinso lyaho ilya kundiilo likukupelela kuuti uvhombe uvhutalamalandu, ulifwonkole nu kulisumba. Yeenya, kwashi kushiteezya ishipelwa shaaho shooka isha mu muvhili waaho, kuluusya kuuti umuvhili waaho wonti wuhasumbwe mwi ipalaazya ilya mwoto uwa shiima.

³⁰ Havhili, inga inyoovhe yaaho iya kundiilo yikukupelela kuuti uvhombe uvhutalamalandu, uyidumule. Yeenya, kwashi kushiteezya ishipelwa shaaho shooka isha mu muvhili waaho, kuluusya kuuti umuvhili waaho wonti kusumbilwa mwi ipalaazya ilya mwoto uwa shiima.”

Insambiilizyo izya kumutavhula umwantanda

³¹ “Havhili, mwivuuye ululajizyo lwe lukuti, ‘Umwanaavuli we akumutavhula umushi, amupanje ukalaata uwa kulehaana.’

³² Ileelo ine nkuvhavhuuzya kuuti, umuntu wonti we akumutavhula umushi she atamulemile mu vhulugusu, inga umushi ayiimalwa, umuntu uyo akumuvhiiha kuvha muvhembu. Havhili we amwimala umwantanda we umulume amutavhuuye, woope akuvhomba uvhuvhembu.”

Insambiilizyo izya kulapa

³³ “Mwivuuye kuuti vhahavhavhuzyaga avhantu avha hali kuuti, ‘Mutalapaje izya ilenga pilongolela ilya MWENE uMulungu, nkandi muvhombaje zyonti zye mukulapa.’

³⁴ Ileelo ine nkuvhavhuuzya kuuti, mutalapaje kwi izina ilya ku mwanya, mwe pe isho she shitengo isha vhumwene isha Mulungu,

³⁵ poosye kwi izina ilya nsi, mwe pe uMulungu akuvhiiha ivinama vwakwe. Havhili mutalapaje kwi izina ilya nkaaya iya Yelusaleemu, mwe pe ye nkaaya iya MWENE uMulungu uMupiti,

³⁶ poosye kutuushila amatwe giinyu, mwe pe mutangagalulanya ulusisi inga lwoka mu nsisi zyinyu kuvha imvwi, poosye kuvha lwilu.

³⁷ Inga mukwitiha ishintu, mutinji, ‘Eena’ vhweleele, poosye inga mukuhaana, mutinji, ‘Ndaali’ vhweleele. Zyonti zye zikwonjela muli izyo, zikufuma kwa Muvhiivhi ula.”

Insambiilizyo izya kulanduzya

³⁸ “Mwivuuye ululajizyo lwe lukuti, ‘Ilyinso kwi lyinso, ni lyino kwi lyino.’

³⁹ Ileelo ine nkuvhavhuuzya kuuti, mutalanduzyaje kwa muntu we akuvhavhombela imbiivhi. Ileelo inga umuntu akukanza uludili ulwa kundiilo kukusuufwa, muleshe akukanze nu lwamwavho.

⁴⁰ Havhili, inga umuntu akukulonjeelela ku nsiivho iya kukufwula ilaaya lyaho, muleshele ni ikooti vhweleele.

⁴¹ Umuntu wonti inga akukuvijiilizya kunyatula umuligo waakwe ikilomiita yooka, ufisye umuligo uwo ikilomiita zivhili.

⁴² Havhili, inga umuntu wonti akulaavha shimo ku kwaho, umupanje. Poosye, inga umuntu akwanza kuuti umupavhile, utahaanaje.”

Insambiilizyo izya kuvhakunda avhalugu

⁴³ “Mwivuuye amazwi ge gakuti, ‘Umukundaje umupalamani waaho, nu kumupata umulugu waaho.’

⁴⁴ Ileelo ine nkuvhavhuuzya kuuti, muvhakundaje avhalugu vhiinyu. Havhili, muvhalavhilaje uvhuloote kwa Mulungu vhonti vhe vhakuvhayimvwa.

⁴⁵ Ipo pe muliivha mwe vhaana vha Taata wiitu uwa ku mwanya. Uweene akuvhalamwizya izuvha avhantu avhavhiivhi na vhinza. Havhili, akuuvhapa imvula avhagolosu na vhe te vhagolosu.

⁴⁶ Inga mukuvhakunda vhe vhe vhakuvhakunda imwe, pe muliposheela malipilo vhuli? Avhasonchezya musonko vhoope vhakuvhakunda vhaala vhe vhakuvhakunda avheene!

⁴⁷ Havhili, inga mukuvhalamuha vhe vhamwinyu vhweleele, pe mukuvhomba ishooni isha kuluusya? Yeenya, vhe te Vhayuuda vhoope vhakuvhomba vhwevhulo!

⁴⁸ Pe ishi, niimwe muvhe mwe vhalunjisu inza uTaata wiitu uwa ku mwanya vwe mulunjisu.”