Matayi 3 - ULufingwi uLupwa

UYoohani uMwozyi akulumbiilila

¹ Amaaha aminji gahatuuha. Pisinda, ahafumila umuntu wumo we vhahatinji uYoohani uMwozyi. Umuntu uyo áali mu luugwa ku Yudeeya ukwo, ahakumusyaga

² ahatinji, “Mupindushe uvhutalamalandu vhwinyu, mwe pe uvhumwene uvhwa Mulungu vhupalamiiye!”

³ UYoohani uyo we umukuvhwi uYisaayi ámuyanzile átili, “Izwi ilya muntu we akuvhila imbila mu luugwa likwivwiha kuuti, ‘Musenganizanyi uMWENE uMulungu idala, nu kugolosya mwe kuuti atuushe.’”

⁴ UYoohani ahazwalaga amenda ge gásoniilwe na masepe aga ngamila, nu kuyipinya ni ilamba ilya ikwembe mu musana. Havhili ishaakulya shaakwe sháali vhe vhamakanta nu vhwushi.

⁵ Avhantu avhinji kufuma mu nkaaya iya Yelusaleemu, na mu shigavho isha nsi isha Yudeeya na mu mbazu zyonti izya ijenje uYoolodaani, vhahasogolaga kwa Yoohani kumutejeelezya.

⁶ Vhahapemulaga uvhutalamalandu vhwavho, woope ahavhozyaga mwi ijenje uYoolodaani.

⁷ Ileelo uYoohani lwe avhalola aVhafalisaayi na Vhasadukaayi vhakwinza ku vhwinji, inga avhoozye, ahavhavhuuzya ahati, “Mwe vhaana vha njoha imwe! Wu naanu we avhasosile kuuti mushimbile uvhuhalazu uvhwa Mulungu vhwe vhukwinza?

⁸ Ishi muvhombaje zye zikulolesya kuuti mupindusile.

⁹ Muleshe kusiivha kuuti, ‘Tuponile, mwe pe utaata wiitu wu Aabulahamu.’ Nalyoli nkuvhavhuuzya kuuti, uMulungu ahondeeye kugalulanya amavhwe iga kuvha vhaana vha Aabulahamu!

¹⁰ Ishi, isunde ilya Mulungu lifisile inza umuntu we alemile intemo nu kuyisengaanya kudiba amakwi. Ikwi lyonti lye litakuhoma amantonongwa aminza, likudibwa nu kusumbwa mu mwoto.

¹¹ “Nalyoli ine nkuvhoozya na minzi kulolesya kuuti mwatonta uvhutalamalandu vhwinyu. Ileelo akwinza mwisinda lyane we ali na maha kunduusya ine, we ine ntahondeeye poosye kuvha ne muvhomvi uwa kuvhuusya ivilyatu vwake. Uyo we kwe avhoozye nu Mupepo uMufinjile nu mwoto.

¹² Uweene ayisengiinye kuvhasavhulanya avhagolosu na vhatalamalandu inza umuntu we alemile ulupe, inga apemente ingana pa luvhuga. Kuluzelufwa uluvhuga, aliyivhungaaniha ingana yaakwe nu kuyivhiiha mu shanga, ileelo ilyelelo na mahambili alivipemba mu mwoto we wutakuzima.”

UYeesu akwozelwa

¹³ Pe ahavhaliilizyo iho, uYeesu ahafuma mu shigavho isha nsi isha Galilaaya, ahinza kwa Yoohani, kwi ijenje uYoolodaani, inga uYoohani amwozye.

¹⁴ Ileelo uYoohani ahalinga kuhaana, ahamuvhuuzya uYeesu ahati, “Shooni she ukwinza kuli ine kuuti nkwozye? Iwe we ukwanzilwa kuuti unoozye.”

¹⁵ UYeesu ahamwamula ahati, “Uvhombe isho, mwe pe tukwanzilwa tuvhombe zyonti zye uMulungu akwanza.” Pe uYoohani ahiitiha, ahamwozya.

¹⁶ Lwe uYeesu ayoozelwa, ahatumpuha mu minzi nu kwimiilila. Yeenya, naluvhiilo ku mwanya kuhiiguha, ahamulola uMupepo uwa Mulungu akwiha pamwanya yaakwe ku shiholanyo isha nkunda.

¹⁷ Izwi ilya Mulungu lihivwiha kufuma ku mwanya lihati, “Uno we Mwana waane unkundwa we nkuhondezelwa nawo.”