Matayi 28 - ULufingwi uLupwa

Kuzyuha ukwa Yeesu

¹ Lwe isiku ilya Sabaato lyatuuha, inzanshi lwe kukuvhambunkana Pamulungu, uMaliiya uwa ku Magidaala nu Maliiya uwamwavho, vhahasogola kwenya imbiipa yiila.

² Yeenya, ishisumbi ishipiti shihafumila, mwe pe uhavhizya uwa MWENE uMulungu áyiisile kufuma ku mwanya, ahapalamila pa mbiipa, ahaligalagaasizya ivhwe liila ku luvhazu nu kulitendamila.

³ Uhavhizya uyo ahalamaga ngati lumesyo ulwa mvula na menda gaakwe gáali mazelu inza inganda.

⁴ Lwe avhasikaali vhaala vhamulola, vhahoogopa nkaani, vhahatetema nu kuvha ngati vhantu vhe vhafuuye.

⁵ Ileelo uhavhizya uyo ahavhavhuuzya avhantanda ivho ahati, “Mutogopaje! Imanyile kuuti mwinzile kumulondola uYeesu we aahomeliilwe.

⁶ Ataliipo ipa! UMulungu amuzyusiizye, inza vwe ávhavhuziizye! Yeenyi pe vhaamukasiizye.

⁷ Ishi musogole naluvhiilo, muvhavhuuzye avhasundikwa vhaakwe muti, ‘Azyusile, avhalongoleeye kusogola ku shigavho isha nsi isha Galilaaya. Ukwo kwe kwe mumulole.’ Yeenya, izi zye ninzile kuvhavhuuzya.”

⁸ Pe avhantanda vhaala vhaheepa naluvhiilo pa mbiipa kwi lyoga nu luseshelo ulupiti. Vhahashimbila kusogola kuvhavhuuzya avhasundikwa avha Yeesu inza vwe uhavhizya uyo ávhavhuziizye.

⁹ Lwe vhakusogola, naluvhiilo uYeesu ahahomaana na vhantanda ivho, ahavhalamuha ahati, “Mwakaata!” Pe vhahapalamila vhahamulema ivinama nu kumusugamilila.

¹⁰ Pe ahati, “Mutogopaje, musogole muvhavhuuzye avhamwitu kuuti vhasogole ku Galilaaya, ukwo kwe kuuti vhanaaje.”

Avhasikaali vhakuluma ilenga

¹¹ Lwe avhantanda vhaala vhali mwi idala vhakusogola, vhamo mu vhasikaali vhe vhahaguulaga imbiipa iya Yeesu, vhaheepa nu kusogola mu nkaaya iya Yelusaleemu. Vhahavhapanjila avhapiti avha vhapuuti zyonti zye zyávhombesile.

¹² Pe avhapiti avha vhapuuti na vhasongo avha Vhayuuda vhahavhungaana, vhahapanzanya kuvhahonga avhasikaali ivho impiiya inyinji.

¹³ Vhahavhavhuuzya vhahati, “Inga umuntu wonti avhavhuziilizya zye zifumiiye, mutinji, ‘Avhasundikwa vhaakwe vhinzile uvhusiku nu kumwivha lwe tukaasite utulo.’

¹⁴ Inga uPilaato ayiivwa izi, kwe tuyanje nawo, inga mutahinjile mu mayimba.”

¹⁵ Pe avhasikaali vhahaposheela impiiya izyo nu kuyanga ku vhantu inza vwe avhalongozi ivho avha Vhayuuda vhávhavhuziizye. Inongwa izyo zihakumuha nkaani ku Vhayuuda kufishila ileelo.

UYeesu akuvhatumiilizya avhasundikwa vhaakwe

¹⁶ Avhasundikwa avha Yeesu 11 vhahasogola ku Galilaaya, kwi igamba kwe uYeesu ávhalajiziizye.

¹⁷ Lwe vhamulola, vhahamusugamilila, ileelo vhamo vhahavha na maganigani kuuti pamo te wuuyo.

¹⁸ Pe uYeesu ahapalamila ku kwavho, ahavhavhuuzya ahati, “UMulungu ampiiye amaha gonti ku mwanya na pa nsi.

¹⁹ Ishi musogole ku vhantu avha mu nsi zyonti nu kuvhapela kuvha vhasundikwa vhaane. Muvhombaje isho, kwi idala ilya kuvhoozya kwi izina ilya Taata ni lya Mwana ni lya Mupepo uMufinjile,

²⁰ nu kuvhasambiilizya kulandata zyonti zye mbalajiziizye imwe. Niine kwe mbe pooka niimwe amanda gonti, kufishila ku vhusililishilo uvhwa nsi.”