Matayi 27 - ULufingwi uLupwa

Vhakumutwala uYeesu kwa Pilaato

¹ Lwe kwasha inzanshi, avhapiti avha vhapuuti vhonti pooka na vhasongo avha Vhayuuda vhahapanzanya vwe vhamugoje uYeesu.

² Vhahamukunga nu kumutwala kwa mupiti waavho uMuluumi we izina lyakwe vhahatinji uPilaato.

Kufwa ukwa Yuuda

³ Pe uYuuda, we ámwaniliiye uYeesu, lwe aalola kuuti uYeesu alongwa kumugoga, umwoyo wuhamuvhavha. Ahanyatula insavhaazya ziila 30 nu kuzigalusya ku vhapiti avha vhapuuti na vhasongo avha Vhayuuda.

⁴ Ahavhavhuuzya ahati, “Mbomvile uvhutalamalandu uvhwa kumuvhiiha mu nyoovhe zyinyu umuntu we atananzile naashimo.” Ileelo avheene vhahati, “Izyo zitakutwavwa naashimo, zyaho weneewe.”

⁵ Pe uYuuda ahazisumba insavhaazya izyo pa Nyumba iMfinjile, aheepa, ahasogola ahayinyonga.

⁶ Avhapiti avha vhapuuti vhahasevha insavhaazya izyo, vhahayanga vhahati, “Indajizyo izya Mulungu zitakwitishila kusangaanya impiiya izi ni zya mu Nyumba iMfinjile, mwe pe izi zyaamile zya malipilo aga kumugoga umuntu.”

⁷ Pe vhahapanzanya kunyatula impiiya izyo nu kukalila umugunda uwa hamata, inga vhavhasyilaje avhajeni mwenemwo.

⁸ Ye nongwa umugunda uwo vhakuwiita kuuti uMugunda uwa Mavhanda kufishila ileelo ili.

⁹ Isho vwe lyálunjisile izwi lye umukuvhwi uYelemiya ásimvile átili, “Vhányatuuye insavhaazya 30, ishipimilo she aVhaisilayeeli vhítinkiine kumulipa.

¹⁰ Vhahakala umugunda uwa hamata inza vwe uMWENE uMulungu ándajiziizye.”

UYeesu pilongolela ilya Pilaato

¹¹ Pe uYeesu ahimiilila pilongolela ilya mupiti uMuluumi. Umupiti uyo ahamuvhuziilizya ahati, “Vhuli, iwe we Mwene uwa Vhayuuda?” UYeesu ahamwamula ahati, “Iwe we wayanga.”

¹² Pe avhapiti avha vhapuuti na vhasongo avha Vhayuuda vhahanda kumulonjeelela uYeesu, ileelo uweene atahavhaamula naashimo.

¹³ Pe uPilaato ahamuvhuuzya ahati, “Yeenya zye vhakukulonjeelela vwe zya vhwinji!”

¹⁴ Ileelo uYeesu atahaamula izwi inga lyoka. Pe uPilaato ahasukumila nkaani.

¹⁵ Gáamile maata umulongozi uwa nsi, ahavhaliilizyo aha pa shikulukuulu isha Pasaaka, kumusatula umukungwa wooka we ivhungaana ilya vhantu vhahanzaga kuuti asatulwe.

¹⁶ Ishi ahavhaliilizyo iho, kwáli umukungwa wumo we izina lyakwe vhahatinji uBalaaba. Umukungwa uyo ámanyisile nkaani ku mbiivhi zye ahavhombaga.

¹⁷ Lwe avhantu vhavhungiine, uPilaato ahavhavhuziilizya ahati, “Mukwanza imbasatulile unaanu mu vhakungwa ivha vhavhili? Vhuli, mukwanza imbasatulile uBalaaba, pamo uYeesu we vhakuti uChilisiti?”

¹⁸ Ávhavhuziliziizye isho, mwe pe ámanyile kuuti avhalongozi vhaala, vhámutwaye uYeesu ku kwakwe, mwe pe vháali nu mwone.

¹⁹ Lwe uPilaato atendiime pa shitengo isha vhulonzi, umushi ahatumiilizya intumi ahati, “Utahamuvhombele ivhiivhi naalimo umuntu uyo we mugolosu, mwe pe uvhusiku uvhwa ileelo njimvile nkaani mu njozi ku zyakwe.”

²⁰ Avhapiti avha vhapuuti na vhasongo avha Vhayuuda vhahasonzya ivhungaana ilya vhantu, vhoope vhahamulaavha uPilaato avhasatulile uBalaaba, nu kumulonga uYeesu kuuti vhamugoje.

²¹ UPilaato ahavhavhuziilizya havhili ahati, “Mukwanza imbasatulile unaanu mu vhakungwa ivha vhavhili?” Vhahamwamula vhahati, “Tukwanza utusatulile uBalaaba.”

²² UPilaato ahavhavhuziilizya havhili ahati, “Ishi imuhonzye vhuli uYeesu we vhakumwita kuuti uChilisiti?” Vhahazuma ahalanga vhahati, “Ahomeelwe pa shihovhenkanyo!”

²³ UPilaato ahavhuziilizya havhili ahati, “Ananzile ishooni she tumuhomeele?” Ileelo avheene vhahajendeelela kuzuma ahalanga kuuti, “Ahomeelwe!”

²⁴ Lwe uPilaato aalola kuuti atangagalulanya insiivho izya vhantu ivho nu kuuti vhatalisile ivho, ahanyatula aminzi nu kugeeza mu nyoovhe zyakwe pilongolela lyavho kulolesya kuuti atali nu vhunanzi naavhumo. Pe ahavhavhuuzya ahati, “Ine ntali nu vhunanzi naavhumo ku vhufwe uvhwa muntu uno umugolosu. Izi zili mu nyoovhe zyinyu mweneemwe!”

²⁵ Avhantu vhonti vhahamwamula vhahati, “Uvhunanzi uvhwo uvhwa kumugoga uYeesu, vhuvhe vhwitu na vhaana vhiitu!”

²⁶ Pe uPilaato ahavhasatulila uBalaaba inza vwe vhahanzaga, ileelo ahalajizya kuuti uYeesu ahomwe nu muchaapu nu kumutwala kuhomeelwa pa shihovhenkanyo.

Avhasikaali vhakumujevhula uYeesu

²⁷ Pe avhasikaali avha mupiti uMuluumi ula vhahamutwala uYeesu mu nyumba yaakwe iya kukonzezya. Vhahavhavhungaaniha avhasikaali avhamwavho vhonti nu kumuzyunguula uYeesu.

²⁸ Vhahamuzuula amenda gaakwe nu kumuzwalizya inkanzu ye yáali nu muhoola uwa mafwomfwo ngati wu mwene.

²⁹ Vhahatavha ishipambwi isha mimvwa, vhahamuzwalizya kwi itwe nu kumulemeha indiisa ku nyoovhe yaakwe iya kundiilo, inga aloleshe inza umwene. Vhahamusugamilila ngati vhakumupuuta nu kwanda kumujevhula kuuti, “Mwakaata, we Mwene wa Vhayuuda!”

³⁰ Pe vhahamuswilila amati, vhahanyatula indiisa ku nyoovhe yaakwe nu kumuhoma nayo pi itwe.

³¹ Lwe avhasikaali ivho vhaamala kumujevhula, vhahamuzuula inkanzu iyo nu kumuzwalizya amenda gaakwe havhili. Pisinda, vhahamutwala kumuhomeela pa shihovhenkanyo.

UYeesu akuhomeelwa pa shihovhenkanyo

³² Lwe vhakufuma mu nkaaya iya Yelusaleemu, mwi idala vhahahomaana nu muntu wumo we izina lyakwe vhahatinji uSiimoni, umuhaaya uwa mu nkaaya iya Kileene. Avhasikaali vhahamuvijiilizya umuntu uyo kuuti avhegale ishihovhenkanyo isha Yeesu.

³³ Pisinda, vhahafiha nu Yeesu pamo pe vhahatinji pa Goligoota, kwe kuuti pi Ipangaawe ilya Itwe.

³⁴ Vhahaamupa idivaayi ye vhásangiinye nu mulembo uwa kusheefwa uvhuvhaavi, ileelo lwe alinga, ahahaana kumwela.

³⁵ Lwe vhamuhomeela pa shihovhenkanyo, vhahagavhana amenda gaakwe kwi idala ilya kugahomela ulutambu. Pe lihalunjiha izwi lye umukuvhwi áyanzile kuuti, “Vhágavhiine amenda gaane, ni nkanzu yaane vháyihomeeye ulutambu.”

³⁶ Pe vhahatendama paala kumuguulila.

³⁷ Pa mwanya kwi itwe lya Yeesu vhahavhiiha amazwi aga kumulonjeelela ge gásimviilwe kuuti, “UNO WU YEESU, UMWENE UWA VHAYUUDA.”

³⁸ Ahavhaliilizyo hanaaho kwáli avhapumula vintu vhavhili. Vhoope vhahahomeelwa pa vihovhenkanyo vwavho pooka nu Yeesu, wumo ku luvhazu ulwa kundiilo ulwa Yeesu, uwamwavho ulwa kumongo.

³⁹ Avhantu vhe vhahatuuhaga mwi idala liila vhahamuligaga uYeesu nu kuyinzaanya amatwe gaavho kumusuufwa.

⁴⁰ Vhahamujevhulaga vhahatinji, “Te weewe we watinji ungayimongola iNyumba iMfinjile nu kuyizenga havhili ku nsiku zitatu? Ishi, inga nalyoli iwe we Mwana wa Mulungu, uyiposhe weneewe, uyiishe pa shihovhenkanyo ipo!”

⁴¹ Vhwevhulo, vhoope avhapiti avha vhapuuti na vhasambiilizi avha ndajizyo na vhasongo avha Vhayuuda vhahamujevhula, vhahati,

⁴² “Aavhaposile avhanji, ileelo atangayipoha wuuyo! Inga wu Mwene uwa Vhaisilayeeli, ayiishe pa shihovhenkanyo, pe niiswe kwe tumwitishe.

⁴³ Uweene akumusuuvhila uMulungu, pe uMulungu amuposhe shiniishi inga amukunzite, mwe pe aayanzile aatili, ‘Ine ne Mwana wa Mulungu.’”

⁴⁴ Vhoope avhapumula vintu vhe vháhomeliilwe pooka nawo, vhahamuliga inza vwe avhanji.

Kufwa ukwa Yeesu

⁴⁵ Kwandila ahavhaliilizyo aha vhushenzelo ishiisi shihagwa insi yonti kufishila saala 9.

⁴⁶ Lwe yaafiha saala 9, uYeesu ahavhilishila mu njango yaavho kwi izwi ipiti ahati, “Elooyi! Elooyi! Laama sabakitaani?” Amazwi igo kwe kuuti, “We Mulungu waane! We Mulungu waane! Shooni she wandeha?”

⁴⁷ Avhantu vhamo vhe vhímiliiye paala, lwe vhiivwa amazwi igo, vhahati, “Uno akumwita umukuvhwi uEeliya.”

⁴⁸ Ahavhaliilizyo hanaaho, umuntu wumo mu vhasikaali vhaala ahashimbila uluvhilo, ahanyatula umwepe, ahawutumpiha mu divaayi inkali, ahawuvhiiha kwi ilanzi, ahamumwensya.

⁴⁹ Ileelo avhasikaali avhamwavho vhahati, “Leha twenye inga umukuvhwi uEeliya akwinza kumupoha!”

⁵⁰ Pe uYeesu ahavhilishila havhili kwi izwi ipiti, ahafwa.

⁵¹ Yeenya, umwenda we wápituliinye iNyumba iMfinjile wuhazeepuha pahati kufuma pamwanya kufiha pansi. Insi yihayingaana na mayalaawe gahabazunkana.

⁵² Pe imbiipa zihagubuha na vhafinjile avhinji vhe vháfuuye vhahazyuha.

⁵³ Lwe uYeesu azyuha, vhoope vhahafuma mu mbiipa zyavho, vhahinjila mu nkaaya imfinjile iya Yelusaleemu nu kuvhaloleshela avhantu avhinji.

⁵⁴ Lwe umupiti uwa vhasikaali pooka na vhe vhahamuguulaga uYeesu vhaalola ishisumbi, ni zinji inyinji zye zyálolesile vhahoogopa nkaani, vhahayanga vhahati, “Nalyoli umuntu uno aamile Mwana wa Mulungu!”

⁵⁵ Kwáli avhantanda avhinji paala vhe vhahamulandataga uYeesu kufuma mu shigavho isha nsi isha Galilaaya nu kumuvhombela. Avhantanda ivho vhímiliiye ukutali nu kwenya zyonti zye zihavhombehaga.

⁵⁶ Muli ivho, áliipo uMaliiya uwa mu nkaaya iya Magidaala nu Maliiya unyina uwa vha Yaakobu nu Yoosefu nu nyina uwa vhaana vha Zebedaayi.

Kusyilwa ukwa Yeesu

⁵⁷ Lwe haafiha hamazuuvha, ahinza umuntu wumo udumbwe we vhahatinji uYoosefu, uwa mu nkaaya iya Alimataayi, woope áali musundikwa wa Yeesu.

⁵⁸ UYoosefu ahasogola kwa Pilaato, ahamulaavha kuuti anyatule ishaala isha Yeesu, inga ashisyile. Pe uPilaato ahavhalajizya avhasikaali vhaakwe kuuti vhaamupe shenesho.

⁵⁹ UYoosefu ahanyatula ishaala isho nu kushizinga mu mwenda umwinza umuzelu.

⁶⁰ Ahashisyila mu mbiipa yaakwe impwa ye ábanile nziila mwi iyalaawe. Pe ahaligalagaasizya ivhwe ipiti pa mulyango uwa mbiipa iyo nu kwepa.

⁶¹ Ahavhaliilizyo iho, uMaliiya uwa ku Magidaala nu Maliiya uwunji vhátendiime kulungamana ni mbiipa.

Avhasikaali vhakuguulila imbiipa

⁶² Isiku lye likulandata, lye lyáli lya Sabaato, avhapiti avha vhapuuti na Vhafalisaayi vhahavhungaana kwa Pilaato.

⁶³ Pe vhahamuvhuuzya vhahati, “We mwene, tukukumbuha kuuti lwe we akuhopenkanya ula mupuuma, áyanzile átili, ‘Lwe zyatuuha insiku zitatu, ndizyuha.’

⁶⁴ Ishi tukulaavha uvhalajizye avhasikaali vhaaho kuuti, vhayiguulile imbiipa kufishila isiku ilya vhutatu. Inga utavhavhiiha avhantu avha kuguulila, avhasundikwa vhaakwe vhanginza vhiivhe ishaala shaakwe nu kuvhahopenkanya avhantu kuuti azyusile. Inga izyo zyavhombeha, ilenga ilyo liliivha lipiti nkaani kuluusya ilya kwanda.”

⁶⁵ UPilaato ahavhaamula ahati, “Nyatuuli avhasikaali. Musogole muguulile imbiipa ku maha gonti.”

⁶⁶ Pe vhahasogola ku mbiipa, vhahavhiiha ishimanyilo pi ivhwe, inga atahaavhe umuntu uwa kulisegusya. Pe avhalongozi ivho vhahavhaleha avhasikaali pepaala, inga vhayigulilaje imbiipa.