Matayi 26 - ULufingwi uLupwa

Avhalongozi avha Vhayuuda vhakupanzanya kumugoga uYeesu

¹ Lwe uYeesu aamala kuyanga amazwi gonti igo, ahavhavhuuzya avhasundikwa vhaakwe ahati,

² “Inza vwe mumanyile, zyasyala insiku zivhili kufiha pa shikulukuulu isha Pasaaka. Ine ne Mwana wa Aadamu kwe vhananiile, inga nkomeelwe pa shihovhenkanyo.”

³ Ahavhaliilizyo iho, avhapiti avha vhapuuti na vhasongo avha Vhayuuda vhahavhungaana mu nyumba iya kukonzezya iya mupuuti umupiti we izina lyakwe vhahatinji uKayaafa.

⁴ Vhahapanzanya kumulema uYeesu ku vhushevu nu kumugoga.

⁵ Ileelo vhahapanzanya vhahati, “Tutahamuleme isiku ilya pa shikulukuulu, mwe pe avhantu vhanginza vhapele ivho.”

Umwantanda wumo akumwitiilizya uYeesu amafuta

⁶ Pisinda, uYeesu ahasogola mu nkaaya iya Besaniya, ahinjila mu nyumba iya Siimoni we ku vhwandilo áamile na mambombo.

⁷ Lwe atendiime akulya ishaakulya, umwantanda wumo ahinza ku kwakwe na mafuta ge gakununshila ge gáamile ga nsavho nkaani. Amafuta igo gáamile mu nsupa ye vhagombeeye ivhwe ilya nsavho nkaani lye vhahatinji ialabaasita. Ahamwitiilizya uYeesu pi itwe kulolesya umushinzi.

⁸ Lwe avhasundikwa vhaakwe vhazilola izyo, vhahaviitwa nkaani, vhahati, “Shooni she akuteezya amafuta iga vhweleele?

⁹ Yeenya, amafuta iga twaamile tukazyaje nu kuposheela impiiya inyinji nkaani nu kuuvhapa avhapiina zyenezyo!”

¹⁰ Lwe uYeesu azimanya zye vhahasiivhaga, ahati, “Shooni she mukumutamwa umwantanda uno? Uweene ambombela inyinza.

¹¹ Yeenya, avhapiina muli navho insiku zyonti, ileelo ine te mbe niimwe ahavhaliilizyo honti.

¹² Umwantanda uno anitiilizya amafuta pa muvhili waane, kunsengaanya pi isiku ilya kusyilwa kwane.

¹³ Nalyoli nkuvhavhuuzya kuuti, mu nsi yonti pe vhalikumusya Izwi iLyinza, niili lye avhomba umwantanda uno kwe liyangwaje kumukumbuha.”

UYuuda akwanza kumwaniila uYeesu

¹⁴ Pe uYuuda uwa ku Kaalyoti, we áamile wooka mu vhasundikwa 12 avha Yeesu, ahasogola ku vhapiti avha vhapuuti,

¹⁵ ahavhavhuziilizya ahati, “Kwe mumpe ishooni inga namwaniila uYeesu?” Pe vhahaamupa impiiya insavhaazya 30.

¹⁶ Kufuma ahavhaliilizyo iho, uYuuda uwa ku Kaalyoti ahanda kulondola idala ilya kumwaniila uYeesu.

UYeesu akulya ishaakulya isha Pasaaka na vhasundikwa vhaakwe

¹⁷ Isiku ilya kwanda ilya shikulukuulu isha makaati ge vhataluziizye, avhasundikwa avha Yeesu vhahinza ku kwakwe, vhahamuvhuziilizya vhahati, “Ukwanza tusengaanye kwoshi ukwa kuliila ishikulukuulu isha Pasaaka?”

¹⁸ UYeesu ahavhaamula ahati, “Musogole mu nkaaya iya Yelusaleemu kwa muntu wumo, mumuvhuuzye muti, ‘UMusambiilizi atusonteelezya, akuti, “Ahavhaliilizyo haane hapalamiiye. Ine na vhasundikwa vhaane kwe tulye ishaakulya isha Pasaaka mu nyumba yaaho.”’”

¹⁹ Avhasundikwa ivho vhahasogola nu kuvhomba inza vwe uYeesu ávhalajiziizye, vhahasengaanya ishaakulya isha Pasaaka.

²⁰ Lwe havha havhaliilizyo aha hamazuuvha, uYeesu ahatendama kulya ishaakulya pooka na vhasundikwa vhaakwe 12.

²¹ Lwe vhakulya, uYeesu ahavhavhuuzya ahati, “Nalyoli nkuvhavhuuzya kuuti, wumo muli imwe kwe ananiile.”

²² Avhasundikwa vhaakwe vhahaswimiililwa nkaani, vhahanda kumuvhuziilizya wooka wooka kuuti, “We Mwene, vhuli, neene?”

²³ UYeesu ahavhaamula ahati, “Ula we akusanzila ikaati pooka niine mu luvhiga, we kwe ananiile.

²⁴ Ne Mwana wa Aadamu kwe mfwe inza vwe nsimviliilwe mu Vhusimbe uVhufinjile. Ileelo asheela umuntu uyo we akunaniila. Yaamile kwashi ku kwakwe umuntu uyo, inga atápafwilwe.”

²⁵ Pe uYuuda we wa kumwaniila uYeesu, woope ahamuvhuziilizya ahati, “We Musambiilizi, vhuli, neene?” UYeesu ahamwamula ahati, “Iwe wayanga.”

Ishaakulya isha Mwene

²⁶ Lwe vhakulya, uYeesu ahanyatula ikaati, ahaliloota, ahalimensula, ahaavhapa avhasundikwa vhaakwe, ahavhavhuuzya ahati, “Nyatuuli mulye, uno we muvhili waane.”

²⁷ Havhili, ahanyatula ulupindi lwe lwáli ni divaayi, ahamusalifwa uMulungu, ahaavhapa, ahati, “Mumwele mwenti.

²⁸ Iga mavhanda gaane aga lufingwi ge gakwitiha kuzya vhantu avhinji, inga uMulungu avhaswile uvhutalamalandu vhwavho.

²⁹ Nkuvhavhuuzya imwe kuuti, te nkamwele havhili idivaayi, kufishila isiku liila pe ndimwela idivaayi impwa pooka niimwe mu vhumwene uvhwa Taata waane.”

³⁰ Pe vhahateela ulwimbo ulwa kumutiima uMulungu. Lwe vhaamala, vhaheepa paala, vhahasogola kwi igamba ilya Mazayituuni.

UYeesu akuyanga kuuti uPeeteli kwe amuhaane

³¹ Pe uYeesu ahavhavhuuzya avhasundikwa vhaakwe ahati, “Uvhusiku uvhwa ileelo imwe mwenti kwe munshimbile nu kundeha. Nkuyanga vhwevhulo, mwe pe yisimviilwe mu Vhusimbe uVhufinjile kuuti, ‘Ndimuhoma umudiimi, ni ngʼonzi izya mu mpuga iyo zilisaata.’

³² “Ileelo lwe uTaata waane anzyusya, ndivhalongolela kusogola ku Galilaaya.”

³³ Ileelo uPeeteli ahati, “Poosye inga vhakukuleha vhonti, ine te nkuleshe inga hansi.”

³⁴ UYeesu ahamwamula ahati, “We Peeteli! Nalyoli nkukuvhuuzya kuuti, uvhusiku uvhwa ileelo lwe inkanda yishiili kuvhilishila, kuuti uvhe wankaana lutatu kuuti utamanyile.”

³⁵ Ileelo uPeeteli ahamwamula ahati, “Poosye inga nkwanzilwa kufwa pooka niiwe, ine te nkuhaane iwe.” Avhasundikwa avhamwavho vhoope vhahayanga vhwevhulo.

UYeesu akumulaavha uMulungu mu shilimbika isha Getisemaani

³⁶ Pe uYeesu ahasogola na vhasundikwa vhaakwe pa shilimbika shimo she vhahatinji iGetisemaani. Lwe aafiha penepo ahavhavhuuzya avhasundikwa vhaakwe ahati, “Mutendame ipa, ine nasogola paala kumulaavha uMulungu.”

³⁷ Ahamunyatula uPeeteli pooka na vhaana vhavhili avha Zebedaayi, ahataliha kuswimiililwa nu kupulupuuta mu mwoyo.

³⁸ Pe ahati, “Umwoyo waane wuswimiliilwe nkaani, nkuvha ngati naakufwa, muvhe ipa, mudamulilaje pooka niine.”

³⁹ Ahasogola pilongolela hansi, ahagwa ishikupama, ahalaavha ahati, “We Taata, inga zingavhombeha, nkulaavha uyeefwe amayimba iga kuli ine. Ileelo utahavhombe inza vwe nkasiime ine, nkandi vwe ukasiime weneewe.”

⁴⁰ Pe uYeesu ahagaluha ku vhasundikwa vhaakwe, ahaaga vhakaasite utulo. Ahamuvhuziilizya uPeeteli ahati, “Vhuli, muposiitwe kudamulila pooka niine poosye isaala inga lyoka vhweleele?

⁴¹ Damuuli, mumulaavhaje uMulungu, kuuti aavhape amaha, inga indingo zitahinze zivhapoote. Mukusungwa kuvhomba ahinza ileelo amavhili giinyu mayeyevhazu.”

⁴² UYeesu ahasogola ulwa vhuvhili havhili kulaavha, ahati, “We Taata, inga amayimba iga gatangeepa kuli ine, pe zivhombeshe inza vwe ukasiime weneewe.”

⁴³ Ahagaluha havhili, ahaaga vhakaasite utulo, mwe pe aminso gaavho gáali mamwamu.

⁴⁴ UYeesu ahavhaleha havhili nu kusogola kulaavha ulwa vhutatu, ahavhuyiizya amazwi gegaala.

⁴⁵ Lwe agaluha havhili ku vhasundikwa vhaakwe, ahati, “Niishi mukaasite utulo nu kutuuzya? Yeenya, ahavhaliilizyo haafiha, ne Mwana wa Aadamu kwe vhambiishe mu nyoovhe izya vhatalamalandu.

⁴⁶ Vhuushi, tujendi. Yeenya, we akunaniila apalamiiye!”

UYeesu akulemwa

⁴⁷ Ahavhaliilizyo hehaala uYeesu lwe akuyanga, uYuuda, we wooka mu vhasundikwa 12 ahafiha ni ivhungaana ipiti ilya vhantu vhe vháamile na mapanga ni nduugu. Avhantu ivho vháfumile ku vhapiti avha vhapuuti na vhasongo avha Vhayuuda.

⁴⁸ UYuuda we akumwaniila uYeesu, ápezile avhapiiye ishilolesyo, ávhavhuziizye átili, “Ula we namwofwa, we muhamulemaje.”

⁴⁹ Naluvhiilo uYuuda ahasogola kwa Yeesu ahati, “We Musambiilizi, mwakaata!” Ahamwofwa.

⁵⁰ UYeesu ahamwamula ahati, “We mumanyani, vhomba zye uyinziiye.” Pe avhantu vhaala vhahamulema uYeesu nu kumukunga.

⁵¹ Wumo muli ivho vhe vháali nu Yeesu ahanyatula ipanga lyakwe, ahamudiba nu kumudumula ikutwi umuzya uwa mupuuti umupiti.

⁵² Ileelo uYeesu ahamuvhuuzya ahati, “Galusya ipanga lyaho, mwe pe vhonti vhe vhakulema ipanga kugoga avhamwavho, vhoope vhaliifwa kwi ipanga.

⁵³ Vhuli, mutamanyile kuuti ingamulambiilizya uTaata waane kuuti anaavwe, woope angandeetela shiniishi avhahavhizya vhaakwe impuga impiti 12 nu kushila?

⁵⁴ Vhuli, inga navhomba vhwevhulo, pe zingalunjiha vhuli zye zisimviilwe mu Vhusimbe uVhufinjile kuuti isho vwe zikwanzilwa kuvha?”

⁵⁵ Pe uYeesu ahavhavhuziilizya avhantu ivho ahati, “Shooni she mwaninzila na mapanga ni nduugu, ngati mwinzile kumulema umupumula vintu? Insiku zyonti navhanga niimwe nkusambiilizya pa Nyumba iMfinjile, ileelo mutandemaga!

⁵⁶ Ileelo izi zyavhombeha, inga zye avhakuvhwi vhásimvile mu Vhusimbe uVhufinjile zilunjishe.” Pe avhasundikwa vhaakwe vhonti, vhahamuleha weeka nu kushimbila.

UYeesu pilongolela ilya vhalongozi avha Vhayuuda

⁵⁷ Pe vhaala vhe vhámulemile uYeesu vhahamutwala kwa Kayaafa, umupuuti umupiti, kwe vhávhungiine avhasambiilizi avha ndajizyo izya Moose na vhasongo avha Vhayuuda.

⁵⁸ UPeeteli ahavhanga akulandata mwisinda ukutali, kufishila pa lupitu ulwa nyumba iya mupuuti umupiti. Pe ahinjila muhati, ahatendama pooka na vhavhomvi avha mupuuti umupiti, inga ayeenye amalandu aga Yeesu pe gakusilila.

⁵⁹ Pe avhapiti avha vhapuuti nu lukuvhato lwonti ulwa Vhayuuda, vhahanda kulondola avhahoome avha kuhomeshezya izya ilenga, inga vhalyaje idala ilya kumugoga uYeesu.

⁶⁰ Ileelo vhatahavhwaga uvhuhomeshezi uvhwa ilenga naavhumo, poosye she vhínzile avhahoome avha ilenga avhinji. Pisinda, vhahinza avhahoome vhavhili, vhahati,

⁶¹ “Umuntu uno átili, ‘Ine ingayimongola iNyumba iMfinjile nu kuyizenga havhili ku nsiku zitatu.’”

⁶² Pe umupuuti umupiti ahimiilila pahati yaavho, ahamuvhuziilizya uYeesu, ahati, “Vhuli, utakuvhaamula avhantu ivha kulandatana na zye vhakukulonjeelela?”

⁶³ Ileelo uYeesu ahapuuma. Pe umupuuti umupiti ahayanga havhili ahati, “Twivwe lapa kwi izina ilya Mulungu uMulanzi, utuvhuuzye inga iwe we Chilisiti, uMwana wa Mulungu.”

⁶⁴ UYeesu ahamwamula ahati, “Iwe wayanga. Ileelo nkuvhavhuuzya mwenti kuuti, kwandila ishi kwe mundole ne Mwana wa Aadamu ntendiime ku luvhazu ulwa kundiilo ulwa Mulungu uwa Maha Gonti pa vhushindamu uvhupiti nkaani. Havhili kwe mundole nkwinza mu mavhingo.”

⁶⁵ Lwe umupuuti umupiti ayiivwa izyo, ahazeepula amenda gaakwe kulolesya kuuti avisiitwe, ahati, “Mwivwa vwe akumusaamula uMulungu! Tukwanza avhahoome avhanji vhaashi? Mwivwa mweneemwe vwe akusaamula!

⁶⁶ Pe ishi, imwe mukuti vhuli?” Vhahamwamula vhahati, “Uyo akwanzilwa kufwa!”

⁶⁷ Pe vhahamuswilila amati ku minso, vhahamuhoma ni mbuli. Vhamo vhahamukanza na makoofi,

⁶⁸ nu kumuvhuuzya kuuti, “We Chilisiti, twivwe kuvhwa, wu naanu we akuhoma?”

UPeeteli akumuhaana uYeesu

⁶⁹ Ahavhaliilizyo hehaala uPeeteli átendiime panzi pa luvhungaano. Pe umuvhomvi wumo umulindu ahapalamila kwa Peeteli, ahamuvhuuzya ahati, “Niiwe waamile pooka nu Yeesu uwa ku Galilaaya.”

⁷⁰ UPeeteli ahahaana pilongolela ilya vhaala vhonti, ahati, “Ntazimanyile izyo zye ukuyanga!”

⁷¹ Pe uPeeteli aheepa paala, ahasogola pa mulyango uwa kufumila pa lupitu. Umuvhomvi uwamwavho umulindu ahamulola, ahavhavhuuzya avhantu vhe vháali paala ahati, “Umuntu uno aamile pooka nu Yeesu uMunaazaleeti.”

⁷² UPeeteli ahahaana havhili ku shilapo ahati, “Ntamumanyile umuntu uyo!”

⁷³ Lwe ahavhaliilizyo hatuuha hansi, avhantu vhe vhímiliiye paala, vhahapalamila kwa Peeteli, vhahamuvhuuzya vhahati, “Nalyoli iwe we wooka mu vhantu ivho, poosye ahayanjile haaho hakulolesya kuuti ufumile ku Galilaaya!”

⁷⁴ UPeeteli ahanda kutipa nu kulapa, ahati, “Ntamumanyile umuntu uyo!” Ahavhaliilizyo hanaaho inkanda yihavhilishila.

⁷⁵ UPeeteli ahalikumbuha izwi ilya Yeesu lye átili, “Lwe inkanda yishiili kuvhilishila, kuuti uvhe wankaana lutatu.” Pe ahafuma panzi nu kukuuta ku vhuswimiilizu nkaani.