Matayi 23 - ULufingwi uLupwa

UYeesu akuvhapilila avhalongozi avha Vhayuuda

¹ Pe uYeesu ahalivhuuzya ivhungaana ilya vhantu na vhasundikwa vhaakwe ahati,

² “Avhasambiilizi avha ndajizyo izya Moose na Vhafalisaayi vhali na maha aga kuvhasambiilizya avhantu indajizyo izya Moose.

³ Ishi muzilemaje zye vhakuvhavhuuzya nu kuzivhombela imbombo. Ileelo mutazilandataje imbombo zyavho, mwe pe avheene vhatakuvhomba nu kulandata zye vhakusambiilizya.

⁴ Avheene vhakupinya amaligo amamwamu nu kuvhavhegazya avhantu mu vipungo vwavho, ileelo avheene vhatakwanza kugolosya poosye nga lusamba ulwa nyoovhe zyavho kuvhaavwa kuvhegala.

⁵ Avheene imbombo zyavho zyonti vhakuvhomba, inga avhantu vhavhalole. Nkuyanga vhwevhulo, mwe pe avheene vhakuzwala pa vweni na mu nyoovhe utubuguulu utupiti utwa makwembe kuluusya utwa vhanji, havhili vhakutalimfwa utusampala utwa menda gaavho kuluusya avhanji.

⁶ Pa mulyo, vhakusungwa kutendama pa vitengo ivwa vhapiti na mu masinagoogi vhakusungwa kutendama pa vitengo ivwa pilongolela.

⁷ Havhili, vhakusungwa avhantu vhavhalamuhaje ku mushinzi lwe vhali mu madala nu kuuti vhavhiitaje vhatinji, ‘We musambiilizi.’

⁸ “Ileelo imwe mutitihaje lwe vhakuvhiita kuuti, ‘We musambiilizi!’ Nkuyanga vhwevhulo, mwe pe muli nu Musambiilizi wooka vhweleele, niimwe mwenti mwe vhasundikwa vhaakwe.

⁹ Havhili, mutamwitaje umuntu kuuti, ‘We taata,’ mu nsi umu, mwe pe muli nu Taata wooka vhweleele we ali ku mwanya.

¹⁰ Havhili, mutitihaje lwe avhantu vhakuvhiita kuuti, ‘Mwe vhalongozi,’ mwe pe muli nu Mulongozi wooka vhweleele we wu Chilisiti.

¹¹ Umuntu wonti we akwanza kuvha mulongozi wiinyu, avhanje muvhomvi wiinyu.

¹² Nkuvhavhuuzya vhwevhulo, mwe pe umuntu wonti we akuyizuvwa, uMulungu alimwisya. Ileelo umuntu we akuyiisya, uMulungu alimuzuvwa.

¹³ “Mwasheela imwe mwe vhasambiilizi avha ndajizyo, niimwe mwe Vhafalisaayi, mwe vhashifumbo imwe! Ku nsambiilizyo zyinyu mukuvhadindila avhantu kwinjila mu vhumwene uvhwa Mulungu. Niimwe mweneemwe mutakwinjila, havhili mutakuvhitishila vhe vhakwanza kwinjila.

¹⁴ “Mwasheela imwe mwe Vhasambiilizi avha ndajizyo, niimwe mwe Vhafalisaayi, mwe vhashifumbo imwe! Mukupuuta impuuto intali, inga avhantu vhatinji mwe vhagolosu, ileelo uku mukuvhafwula ivintu avhaziishe. Kuli izyo, uMulungu aliivhapa isunde ipiti!

¹⁵ “Mwasheela imwe mwe vhasambiilizi avha ndajizyo izya Moose, niimwe mwe Vhafalisaayi, mwe vhashifumbo imwe! Mukuzyunguula nkaani mu nsi inyuumu nu kulamba usumbi kumulondola umuntu kuuti ayinjile mu shipuuto isha Vhayuuda. Ileelo inga ayinjila, pe mukumuteezya nkaani nu kumuvhiiha kuvha wa mwi ipalaazya ilya mwoto kuvhaluusya imwe.

¹⁶ “Mwasheela imwe mwe vhalongozi avhantonko! Mukuti, ‘Inga umuntu akulapa ku Nyumba iMfinjile te nongwa, nkandi we akulapa ku sahaabu iya mu Nyumba iMfinjile we akwanzilwa kuvhomba inza vwe alafile.’

¹⁷ Mwe vhantonko, havhili mwe vhapukupuuku! Shooni she shili ni nsavho kuluusya ishamwavho? Isahaabu ye yili mu Nyumba iMfinjile, pamo Nyumba iMfinjile ye yikuyizelufwa isahaabu iyo?

¹⁸ Havhili mukuti, ‘Inga umuntu akulapa ku shifinjilo isha mu Nyumba iMfinjile te nongwa, nkandi inga akulapa ku mpuutile ye yili pamwanya pa shifinjilo we akwanzilwa kuvhomba inza vwe alafile.’

¹⁹ Mwe vhantonko imwe! Shooni she sha nsavho kuluusya ishamwavho? Mpuutile iyo, pamo shifinjilo she shikuyizelufwa impuutile iyo?

²⁰ Ishi inga umuntu akulapa ku shifinjilo isha mu Nyumba iMfinjile, akulapa ku shifinjilo isho na ku vwonti vwe vili pamwanya pa shifinjilo ipo.

²¹ Woope we akulapa ku Nyumba iMfinjile, akulapa ku Nyumba iyo na kwa Mulungu we akulandila muumwo.

²² Woope we akulapa ku mwanya, akulapa ku shitengo isha vhumwene isha Mulungu na kwa Mulungu we akutendamila shenesho.

²³ “Mwasheela imwe mwe vhasambiilizi avha ndajizyo, niimwe mwe Vhafalisaayi, mwe vhashifumbo imwe! Mukumufumwizya uMulungu ishigavho shooka pa vigavho 10 poosye ni sha vintu ivinsi inza uvhulende ni ntanga ni binzaali. Ileelo muzilesile imwamu nkaani izya ndajizyo, inza kuvha nu vhugolosu pilongolela ilya Mulungu nu vhwila nu vhutungamu. Izi zye mukwanzilwa kuzivhomba pooka ni nyinsi izyo zye mukuzivhomba.

²⁴ Mwe vhalongozi avhantonko imwe! Mukwambula utusanzi mu vintu vwe mukumwela ileelo mukumila ingamila!

²⁵ “Mwasheela imwe mwe vhasambiilizi avha ndajizyo, niimwe mwe Vhafalisaayi, mwe vhashifumbo imwe! Mukuyivhiiha mwe vhagolosu pilongolela ilya vhantu, ileelo muhati zyinyu mwizuuye uvhupumula vintu nu vhulugusu. Isho she shooka nu kwozya ulupindi nu luvhiga munzi vhweleele, nu kuleha muhati mwe mwizuuye uvhupoopo.

²⁶ Mwe Vhafalisaayi mwe vhantonko imwe! Mupindushe suuti uvhutalamalandu vhwe vhuli muhati zyinyu inza kwozya uvhupoopo vhwe vhuli mu lupindi na mu luvhiga. Pe imbombo zyinyu ziliivha nyinza inza vwe ulupindi nu luvhiga vikuzelupa, inga woozya muhati.

²⁷ “Mwasheela imwe mwe vhasambiilizi avha ndajizyo, niimwe mwe Vhafalisaayi, mwe vhashifumbo imwe! Muli fwe mbiipa zye vhasinguliiye intope inzelu, zye kunzi zikuloleha nyinza, ileelo muhati zyizuuye amafupa aga vhafwe nu vhuhandamanu uvhwa mavhiila mu mavhiila.

²⁸ Niimwe vhweleele, kunzi mukuloleha pilongolela lya vhantu mwe vhagolosu kwa Mulungu, ileelo muhati mu mooyo giinyu mwizuuye ishifumbo nu vhusambusu.

²⁹ “Mwasheela imwe mwe vhasambiilizi avha ndajizyo, niimwe mwe Vhafalisaayi, mwe vhashifumbo imwe! Mukuzenga imbiipa izya vhakuvhwi nu kuziyemvwa imbiipa izya vhantu vhe vhahavhombaga ingolosu pilongolela ilya Mulungu.

³⁰ Havhili mukuti, ‘Inga twáliipo ahavhaliilizyo he avhataata vhiitu vháliipo, nkandi tutívwine navho kuvhagoga avhakuvhwi avha Mulungu.’

³¹ Kuyanga vhwevhulo, mukuhomeshezya kuuti niimwe mwe vhavhiivhi inza avhataata vhiinyu ivho vhe vhávhagozile avhakuvhwi!

³² Ishi mulunjisye uvhuvhiivhi vhuula vhwe avhataata vhiinyu vhávhutalisile!

³³ “Mwe njoha imwe! Mwe vhaana vha njoha imwe! Muliipona vhuli isunde ilya kusumbilwa mwi ipalaazya ilya mwoto?

³⁴ Kuli izyo, yeenya, ndivhasonteelezya kuli imwe avhakuvhwi na vhashindamu avha njeele na vhasambiilizi avha ndajizyo. Ileelo vhamo muli ivho mulivhagoga nu kuvhahomeela pa shihovhenkanyo, avhamwavho mulivhahoma nu muchaapu mu masinagoogi giinyu na vhamwavho mulivhashimbizya kufuma mu nkaaya yimo kuvhala mu nkaaya iyinji.

³⁵ Ye nongwa uMulungu alivhasunda imwe kuzya kuvhagoga avhantu vhonti avhagolosu, kufuma pe uKaayini ámugozile uAabeli we áamile mugolosu, kufishila pa Zakaliya umwana wa Belekiya we vhámugozile pahati pa Nyumba iMfinjile ni shifinjilo.

³⁶ Nalyoli nkuvhavhuuzya kuuti, avhantu avha havhaliilizyo iha vhalisundwa kuli izyo zyonti.”

UYeesu akuvhaloosezya avhantu avha mu Yelusaleemu

³⁷ Pe uYeesu ahati, “Mwe vhantu vha mu Yelusaleemu imwe! Mukuvhagoga avhakuvhwi, nu kuvhahoma na mavhwe avhavhomvi vhe uMulungu avhasonteleziizye kuli imwe. Lulinga nanzaga kuvhavhungaaniha inza inkuku vwe yikwuvhatila utwana twakwe, ileelo mutanzaga?

³⁸ Yeenyi, ishi uMulungu kuuti avhaleshe imwe, ni nkaaya yiinyu kwe yisyale kuvha litongo.

³⁹ Ishi nkuvhavhuuzya kuuti, te muhandole havhili, kufishila ahavhaliilizyo he muliiti, ‘Alosiitwe we akwinza kwi izina ilya MWENE uMulungu!’”