Matayi 22 - ULufingwi uLupwa

Ishiholanyo isha mulyo uwa winga

¹ UYeesu ahajendeelela kuyanga havhili na vhapiti avha vhapuuti na Vhafalisaayi ku viholanyo ivwamwavho ahati,

² “Uvhumwene uvhwa Mulungu vhuholiine nu mwene wumo we ámusenganiziinye umwana waakwe umulyo uwa winga.

³ Umwene uyo ahavhasonteelezya avhavhomvi vhaakwe kuvhiita avhantu vhe ávhalanjiiye kuuti vhinze ku winga, ileelo avheene vhahahaana kwinza.

⁴ “Pe ahavhasonteelezya havhili avhavhomvi avhamwavho ahati, ‘Musogole muvhavhuuzye vhaala vhe naavhalanjiiye muti, “Nsengiinye ivintu vwonti ivwa winga. Mbooye inkambaku ni ngida zyane inyinza. Mwinze ku winga!”’

⁵ Ileelo avheene vhatahasaajila. Vhahasogola ku mbombo zyavho, wumo ahasogola ku mugunda waakwe, uwamwavho ahasogola ku mbombo yaakwe iya kutaanania.

⁶ Vhamo vhahavhalema avhavhomvi ivho, vhahavhahoma nkaani nu kuvhagoga.

⁷ Lwe umwene ayiivwa zye zyávhombesile ku vhavhomvi vhaakwe, ahaviitwa nkaani. Ahavhasonteelezya avhasikaali vhaakwe, vhahavhagoga avhagozi ivho nu kuyipemba inkaaya yaavho.

⁸ Pe umwene ahavhavhuuzya avhavhomvi vhaakwe avhamwavho ahati, ‘Ivintu ivwa winga nsengiinye, ileelo vhe naavhalanjiiye vhatahondeeye kwinza.

⁹ Ishi musogole mu madala amalehaana, muvhavhuuzye vhonti vhe mukuhomaana navho kuuti vhinze ku winga.’

¹⁰ Pe avhavhomvi ivho vhahasogola mu madala amalehaana. Vhahavhavhungaaniha vhonti vhe vhávhaazile, avhavhiivhi na vhagolosu. Pe avhajeni vhahiizula mu nyumba iya winga.

¹¹ “Ileelo lwe umwene ayinjila mu nyumba, inga ayeenye avhajeni, ahamulola wumo atazwaye ishizwalo she shikwanzilwa pa winga.

¹² Pe ahamuvhuziilizya ahati, ‘We mumanyani, uyinjiiye vhuli umu ishisita kuzwala ishizwalo she shikwanzilwa pa winga?’ Ileelo uweene ahapuuma mwaa.

¹³ Pe umwene ahavhavhuuzya avhavhomvi vhaakwe ahati, ‘Mukunji umuntu uno ivinama ni nyoovhe, mumusumbe kunzi ku shiisi, ukwo kwe vhalikuutaga nu kuyimba nkaani.’

¹⁴ Nkuyanga vhwevhulo, mwe pe uMulungu akuvhiita avhantu avhinji kwinjila mu vhumwene vhwakwe, ileelo vhe vhakusaavhulwa kwinjila vhansi.”

Kusonka umusonko kwa Kayisaali

¹⁵ Pe aVhafalisaayi vhaheepa paala, vhahavhungaana kupanzanya vwe vhamuteje uYeesu ku mazwi gaakwe.

¹⁶ Pe vhahavhasonteelezya avhasundikwa vhaavho na vhatuuli avha mwene uHeelodi kwa Yeesu, vhahamuvhuziilizya vhahati, “We Musambiilizi, tumanyile kuuti iwe we mugolosu, ukusambiilizya idala ilya Mulungu mu vhwanalyoli. Havhili utakuvhasaajila avhantu kulandatana nu vhupiti vhwavho.

¹⁷ Ishi tuvhuuzye vwe ukulola, vhuli, indajizyo izya Moose zikutwitishila kusonka umusonko kwa Kayisaali?”

¹⁸ Ileelo uYeesu, mwe pe ámanyile insiivho zyavho imbiivhi, ahati, “Mwe vhashifumbo, shooni she mukuntega?

¹⁹ Ndanji insavhaazya ye mukusonchela umusonko.” Vhahamuleetela idinaali yooka.

²⁰ Pe uYeesu ahavhavhuziilizya ahati, “Ishiholanyo ishi nu vhusimbe vhwe vhuli pa nsavhaazya ino vwa naanu?”

²¹ Vhahamwamula vhahati, “Vwa Kayisaali.” Pe uYeesu ahavhavhuuzya ahati, “Ishi ivwa Kayisaali mumupanje uKayisaali, vwope ivwa Mulungu mumupanje uMulungu.”

²² Lwe vhiivwa kwamula kwakwe, vhahasukumila nkaani. Pe vhahamuleha nu kwepa.

Kuzyuha ukwa vhafwe

²³ Isiku lyeliila, aVhasadukaayi vhamo vhahasogola kwa Yeesu. AVhasadukaayi vhahasambilizyaga kuuti, avhafwe te vhahazyushe. Pe vhahavhuziilizya vhahati,

²⁴ “We Musambiilizi, uMoose átusimbiiye indajizyo kuuti inga umwanaavuli aafwa, amuleha umushi waakwe ishisita umwana, yikwanzilwa kuuti umunine waakwe amupwane umuziishe uyo, inga amupaapile avhaana umuyazi.

²⁵ Ishi, ahavhaliilizyo hamo kwáli avhanaavuli 7 vhe vháamile uyise wooka. Uwa kwanda ahanyatula umwantanda, ileelo ahafwa, atahaleha umwana, pe uwa vhuvhili ahamupwana umuziishe uyo.

²⁶ Ileelo woope ahafwa ishisita kuleha umwana. Pisinda, uwa vhutatu woope ahamupwana, ileelo woope ahafwa. Yihavha shiniisho ku vhonti 7.

²⁷ Pisinda, umwantanda uyo woope ahafwa.

²⁸ Ishi inga kuzyuha ukwa vhafwe kuliipo, isiku ilya kuzyuha umwantanda uyo aliivha mushi wa naanu? Tukuvhuziilizya isho, mwe pe átendiime na vhonti 7.”

²⁹ UYeesu ahavhaamula ahati, “Mupuvile nkaani, mwe pe mutavhumanyile uVhusimbe uVhufinjile na maha aga Mulungu.

³⁰ Avhafwe lwe vhazyuha, te vhahiimale, poosye kwimalwa, vhaliivha inza avhahavhizya ku mwanya.

³¹ Ileelo izya kuzyuha avhafwe, mutavhaziizye mu Vhusimbe uVhufinjile izwi lye uMulungu áyanzile kuuti,

³² ‘Ine ne Mulungu uwa Aabulahamu nu Yisaaka nu Yaakobu’? Uweene te wu Mulungu uwa vhafwe, wu Mulungu uwa vhalanzi.”

³³ Lwe ivhungaana ilya vhantu vhiivwa izyo, vhahasukumila nkaani insambiilizyo zyakwe.

Ululajizyo ulupiti kuluusya izinji zyonti

³⁴ Lwe aVhafalisaayi vhiivwa kuuti uYeesu avhapoota aVhasadukaayi ku mazwi, vhahavhungaana pooka nu kusogola kwa Yeesu.

³⁵ Wumo mu Vhafalisaayi ivho we áamile musambiilizi uwa ndajizyo, ahamuvhuziilizya uYeesu kumutega ahati,

³⁶ “We Musambiilizi, mu ndajizyo zyonti, lulajizyo vhuli lwe lupiti kuluusya indajizyo izinji zyonti?”

³⁷ UYeesu ahamwamula ahati, “Umukundaje uMWENE uMulungu waaho ku mwoyo waaho wonti, na ku vhulanzi vhwaho vhwonti na ku njeele zyaho zyonti.

³⁸ Ululajizyo ulu lwe lupiti kuluusya izinji zyonti, havhili lwe lwa kwanda.

³⁹ Ululajizyo ulwa vhuvhili luholiine nu lwa kwanda, lukuti, ‘Umukundaje umupalamani waaho inza vwe ukuyikunda weneewe.’

⁴⁰ Indajizyo zyonti izya Moose pooka ni nsambiilizyo izya vhakuvhwi zili mu ndajizyo izi zivhili.”

UChilisiti Mwana wa Daavhudi

⁴¹ Lwe aVhafalisaayi vhaala vhali she vhavhungiine pooka, uYeesu ahavhavhuziilizya ahati,

⁴² “Mukusiivha vhuli izya Chilisiti? Amwe Mwana wa naanu?” Vhahamwamula vhahati, “Mwana wa mwene uDaavhudi.”

⁴³ UYeesu ahavhavhuziilizya ahati, “Inga vwe zili, zili vhuli uDaavhudi lwe akulongolwa nu Mupepo, akumwita uChilisiti kuuti wu Mwene? Nkuvhavhuziilizya vhwevhulo, mwe pe umwene uDaavhudi átili,

⁴⁴ ‘UMWENE uMulungu ámuvhuziizye uMwene waane átili, “Tendaama ku luvhazu lwane ulwa kundiilo pa vhushindamu uvhupiti nkaani, kufishila pe navhavhiiha avhalugu vhaaho pansi pa vinama vwaho.”’

⁴⁵ Inga uDaavhudi wuuyo átili uChilisiti wu Mwene waakwe, pe woope uChilisiti angavha mwana waakwe inza vhuli?”

⁴⁶ Umuntu nuumo atahasheela kumwamula. Havhili, kufuma ahavhaliilizyo iho, atáliipo umuntu we ásheleeye kumuvhuziilizya uYeesu zimo.