Matayi 21 - ULufingwi uLupwa

UYeesu akuposheelwa mu Yelusaleemu ku ludovhelo

¹ Lwe uYeesu na vhasundikwa vhaakwe vhapalamila ku Yelusaleemu, vhahasogola mu lutala ulwa Besifaage mwi igamba ilya Mazayituuni. Lwe vhali ipo, uYeesu ahavhasonteelezya avhasundikwa vhaakwe vhavhili,

² ahavhavhuuzya ahati, “Sogooli mu lutala lwe luli pilongolela lyinyu. Lwe mukwinjila mwenemwo vhweleele, kwe muyilole indogomi ni nyaana yaakwe zikunziilwe. Muzisatule, mundeetele ipa.

³ Inga umuntu akuvhavhuziilizya izya ndogomi izyo, muhatinji, ‘UMwene uYeesu akuzyanza,’ woope kuuti avhitishile kwinza nazyo.”

⁴ Izyo zyávhomviilwe vhwevhulo, inga lilunjishe izwi lye umukuvhwi áyanzile kuuti,

⁵ “Muvhavhuuzye avhantu avha mu nkaaya iya Sayuuni kuuti, ‘Yeenya, uMwene wiinyu akwinza kuli imwe. Uweene mutonsu, alimbiiye pa ndogomi, indogomi inyaana.’”

⁶ Pe avhasundikwa ivho vhahasogola nu kuvhomba inza vwe uYeesu ávhalajiziizye.

⁷ Lwe vhinza kwa Yeesu ni ndogomi yiila pooka ni nyaana yaakwe, vhahaala amenda gaavho gamo pa ndogomi izyo, pe uYeesu ahalimbila nu kutendama pa ndogomi inyaana.

⁸ Avhantu ivhungaana ipiti nkaani vhahaala amenda gaavho gamo mwi idala, vhoope avhamwavho vhahapanyulaga insamba izya makwi nu kwala mwi idala kulolesya umushinzi ku kwakwe.

⁹ Avhantu ivhungaana ipiti vhe vhálongoleeye na vhe vhahalandataga mwisinda mwa Yeesu vhahavhilishilaga vhahatinji, “Ashindikwaje uMulungu kuzya Mwana wa Daavhudi! Alosiitwe we akwinza kwi izina ilya MWENE uMulungu! Ashindikwaje uMulungu uMupiti uwa ku Mwanya!”

¹⁰ Lwe uYeesu ayinjila mu nkaaya iya Yelusaleemu, inkaaya yonti yihazumbunkana. Avhantu vhahavhuzilizanya vhahati, “Wu naanu uno?”

¹¹ Ivhungaana ilyo lihati, “Uno wu Yeesu, umukuvhwi kufuma mu nkaaya iya Naazaleeti, mu shigavho isha nsi isha Galilaaya.”

UYeesu akuyizelufwa iNyumba iMfinjile

¹² Lwe uYeesu ayinjila pa Nyumba iMfinjile, ahanda kuvhashimbizya vhonti vhe vhahakazyaga nu kukala ivintu ipo. Ahazibenula imeeza izya vhe vhahatananiaga impiiya nu kuvibenula ivitengo ivwa vhe vhahakazyaga inkunda.

¹³ UYeesu ahavhavhuuzya ahati, “Yisimviilwe mu Vhusimbe uVhufinjile kuuti, ‘INyumba yaane yiliivha Nyumba iya kupuutila.’ Ileelo imwe muyivhiisile kuvha lishembo ilya vhapumula vintu.”

¹⁴ Lwe uYeesu ali pa Nyumba iMfinjile ipo, vhahinza avhantonko na vhantendya ku kwakwe, woope ahavhaponia.

¹⁵ Ileelo lwe avhapiti avha vhapuuti na vhasambiilizi avha ndajizyo izya Moose vhaalola amafindango igo ge uYeesu ávhomvile, havhili lwe vhiivwa avhaana vhakuvhilishila pa Nyumba iMfinjile kuuti, “Ashindikwaje uMwana wa Daavhudi,” vhahaviitwa.

¹⁶ Vhahamuvhuziilizya uYeesu vhahati, “Vhuli, ukwivwa zye avhaana ivha vhakuyanga?” UYeesu ahati, “Eena nkwivwa. Ishi mutavhaziizye amazwi ge gasimviilwe mu Vhusimbe uVhufinjile ge gakuti, ‘Kufuma mu mazwi aga vhaana avhacheeche na vhe vhakwonka, mwe usengiinye intiimo’?”

¹⁷ Pe uYeesu ahavhaleha avhantu ivho, aheepa mu nkaaya iyo, ahasogola kukaata mu lutala ulwa Besaniya.

UYeesu akulitipa itiini

¹⁸ Inzanshi lwe uYeesu akugaluha ku Yelusaleemu, inzala yihamuluma.

¹⁹ Ahalilola ikwi ilya itiini pa luvhazu pi idala, ahapalamila papiipi, ahaaga litali na mantonongwa naagamo, lili na ge matundu geeka vhweleele. Pe ahalivhuuzya ikwi ilyo ahati, “Kufuma ileelo na shiima utahaahome amantonongwa naalumo!” Ikwi ilyo lihuuma panaapo.

²⁰ Lwe avhasundikwa vhazilola izyo, vhahasukumila nkaani, vhahavhuzilizanya vhahati, “Itiini ili lyuma naluvhiilo inza vhuli?”

²¹ UYeesu ahavhaamula ahati, “Nalyoli nkuvhavhuuzya kuuti, inga muli nu lwitiho ishisita amaganigani, niimwe mulizivhomba inza zye zyavhombeha kwi ikwi ili. Te ziniizyo vhweleele, poosye inga mungalivhuuzya igamba ili kuuti, ‘Kumpuuha ipa, uyisumbe mwa sumbi muula,’ zyope zilivhombeha.

²² Inga muli nu lwitiho, vwonti vwe mukulaavha lwe mukupuuta, muliposheela.”

Avhalongozi vhakwanza kumanya amaha aga Yeesu

²³ UYeesu ahinjila havhili pa Nyumba iMfinjile. Lwe akusambiilizya, avhapiti avha vhapuuti na vhasongo avha Vhayuuda vhahamusogolela. Vhahamuvhuziilizya vhahati, “Tuvhuuzye, ukuvhomba izi ku maha aga naanu? Havhili wu naanu we akupiiye amaha igo?”

²⁴ UYeesu ahavhaamula ahati, “Niine imbavhuziilizye lyoka, inga mwanaamula pe kwe mbavhuuzye kuuti, maha vhuli ge nkuvhombela izi.

²⁵ Vhuli, amaha aga Yoohani aga kwozya avhantu gáfumile kwoshi? Gáfumile kwa Mulungu, pamo ku vhantu?” Pe vhahapanzanya vhahati, “Inga twati gáfumile kwa Mulungu, kwe ati, ‘Pe shooni she mutámwitisile?’

²⁶ Poosye inga twati gáfumile ku vhantu, tukwogopa ivhungaana ili ilya vhantu, mwe pe avhantu vhonti vhamanyile kuuti uYoohani áamile mukuvhwi.”

²⁷ Pe vhahamwamula vhahati, “Tutamanyile.” Woope uYeesu ahavhavhuuzya ahati, “Niine ntakuvhavhuuzya kuuti, maha ga naanu ge nkuvhombela izi.”

Ishiholanyo isha vhaana vhavhili

²⁸ UYeesu ahayanga havhili ahati, “Mukulola vhuli izya shiholanyo ishi? Kwáli umuntu wumo we áali na vhaana avhanaavuli vhavhili. Umuntu uyo ahasogola kwa mwana umutanzi, ahamuvhuuzya ahati, ‘We mwana waane, usogole ileelo kuvhomba imbombo ku mugunda uwa mampensya.’

²⁹ Umwana uyo ahamwamula ahati, ‘Ntakusogola.’ Ileelo pisinda ahagalulanya insiivho zyakwe, ahasogola kuvhomba.

³⁰ Pe uyise ahasogola kwa mwana uwa vhuvhili nu kumuvhuuzya inza vhwevhulo. Uweene ahamwamula ahati, ‘Kwe nsogole taata.’ Ileelo atahasogola.

³¹ Vhuli, muli ivho vhavhili, wu naanu we ávhomvile inza vwe uyise ahanzaga?” Vhahamwamula vhahati, “We wula umutanzi.” Pe uYeesu ahavhavhuuzya ahati, “Nalyoli nkuvhavhuuzya kuuti, avhasonchezya musonko na vhamalaaya vhalivhalongolela kwinjila mu vhumwene uvhwa Mulungu.

³² Nkuyanga vhwevhulo, mwe pe uYoohani áyinzile kuli imwe, inga avhalanje idala ilya vhugolosu, imwe mutámwitisile. Ileelo avhasonchezya musonko na vhamalaaya vhámwitisile. Poosye vhwevhulo, imwe lwe mwazilola zyonti izyo, mutátonsite uvhutalamalandu vhwinyu nu kumwitiha.”

Ishiholanyo isha vhalimi avhavhiivhi

³³ UYeesu ahajendeelela kuyanga ahati, “Tejeelezyi ishiholanyo ishamwavho. Kwáli umuntu wumo we álimile umugunda uwa mampensya, ahagazenjeelela uluvhaga, ahabana inshelenje iya kufinyila amampensya pahati. Ahazenga inganzya intali iya kwimililila umuguulizi. Ahavhavhiiha avhalimi avha kuguulila nu kulimiilila amampensya igo, ahanzaga kuuti inga gaagoma vhahinze vhagavhane nawo, pe ahashuula kusogola ku nsi iya kutali.

³⁴ “Lwe ahavhaliilizyo aha kuyevhila haafiha, ahavhasonteelezya avhazya vhaakwe ku vhalimi ivho, inga vhamunyatulile amantonongwa gaakwe.

³⁵ Ileelo avhalimi ivho vhahavhalema avhavhomvi vhaakwe, wumo vhahamuhoma, uwamwavho vhahamugoga nu wamwavho vhahamuhoma na mavhwe nu kufwa.

³⁶ Umuhaata mugunda ahavhasonteelezya havhili avhavhomvi avhamwavho avhinji kuluusya avhatanzi. Avhalimi ivho vhahavhavhombela havhiivhi avhavhomvi ivho inza vwe vhávhavhombeeye avhatanzi.

³⁷ Pisinda, ahamusonteelezya umwana waakwe umwanaavuli, ahati, ‘Uno kwe vhamushindishe, mwe pe mwana waane.’

³⁸ Ileelo avhalimi ivho lwe vhamulola umwana uyo, vhahapanzanya vhahati, ‘Uno we mupwana uwa mugunda uno. Ishi nzaaji, tumugoje inga umugunda uno wuvhe wiitu.’

³⁹ Vhahamulema, vhahamukwesela kunzi ku mugunda uwo nu kumugoga.

⁴⁰ Ishi umuhaata mugunda uyo inga avhwela, alivhavhomba ishooni avhalimi ivho?”

⁴¹ Avheene vhahamwamula vhahati, “Alivhalovwa nziila avhavhiivhi ivho nu mugunda waakwe alivhavhiiha avhalimi avhanji vhe vhaliimupa amantonongwa ahavhaliilizyo he hakwanzilwa.”

⁴² Pe uYeesu ahavhavhuuzya havhili ahati, “Vhuli, mutahavhaazya uVhusimbe uVhufinjile? Yisimviilwe kuuti, ‘Ivhwe lye avhazenzi vhálihaanile, lye lyavha livhwe ipiti ilya pa shipembe isha nyumba. UMWENE uMulungu we álivhiisile ivhwe ilyo, lyope lya kusukumizya pa minso giitu.’”

⁴³ UYeesu ahajendeelela kuyanga ahati, “Nkuvhavhuuzya kuuti, uMulungu aliyeefwa uvhumwene vhwakwe kuli imwe nu kuuvhapa avhantu avhanji vhe vhakuvhomba ahinza mu mugunda waakwe, inga wupaape amantonongwa.

⁴⁴ Umuntu wonti we agwila pi ivhwe ilyo, alivunzinkana. Havhili umuntu wonti we ivhwe ilyo lyamugwila, lilimuvinyulanya.”

⁴⁵ Lwe avhapiti avha vhapuuti na Vhafalisaayi vhiivwa iviholanyo ivwo, vhahamanya kuuti akuvhayanga vhuuvho.

⁴⁶ Pe vhahalondola idala ilya kumulema, ileelo vhahoogopa ivhungaana ilya vhantu, mwe pe avheene vhámanyile kuuti uYeesu mukuvhwi.