Matayi 19 - ULufingwi uLupwa

Insambiilizyo izya kumutavhula umwantanda

¹ Lwe uYeesu aamala kuyanga amazwi igo, aheepa mu shigavho isha nsi isha Galilaaya, ahasogola mu shigavho isha nsi isha Yudeeya isyila ilyamwavho ilya ijenje uYoolodaani.

² Avhantu ivhungaana ipiti vhahamulandata ukwo, woope ahavhaponia vhe vháali vhavhinu.

³ Pe aVhafalisaayi vhamo vhahasogola kwa Yeesu kumulinga, vhahati, “Vhuli, indajizyo izya Moose zikwitishila umulume kumutavhula umushi waakwe ku nongwa yonti yiila?”

⁴ Uweene ahavhaamula ahati, “Vhuli, imwe mutavhaziizye uVhusimbe uVhufinjile vhwe vhukuti kufuma ku vhwandilo uvhwa vhupezi, ‘UMulungu ámupezile umwanaavuli nu mwantanda’?

⁵ Ahonjezya ahati, ‘Kuli izyo, umwanaavuli alimuleha uyise nu nyina, nu kusopenkana nu mushi waakwe, vhavhili ivho vhaliivha umuvhili wooka.’

⁶ Pe avhantu ivho vhatakuvha vhavhili havhili, vhakuvha umuvhili wooka. Kuli izyo, she uMulungu ashisopenkiinye, umuntu atahashilehaanye.”

⁷ AVhafalisaayi vhahamuvhuziilizya havhili vhahati, “Inga vwe zili, pe shooni she uMoose áyitishiiye mu ndajizyo zyakwe kuuti, umwanaavuli amupanje umushi ukalaata uwa kulehaana nu kumuleha?”

⁸ UYeesu ahavhaamula ahati, “UMoose ávhwenyi uvhugomu uvhwa mooyo giinyu, ye nongwa ávhitishiiye kuvhatavhula avhashi vhiinyu, ileelo kufuma ku vhwandilo uvhwa vhupezi yitáali isho.

⁹ Ileelo ine nkuvhavhuuzya kuuti, umuntu wonti we akumutavhula umushi waakwe she atamulemile mu vhulugusu, nu kwimala umwantanda uwunji, akuvhomba uvhulugusu. Woope we akumwimala umwantanda we umulume amutavhuuye, akuvhomba uvhuvhembu.”

¹⁰ Pe avhasundikwa vhaakwe vhahamuvhuuzya vhahati, “Inga vwe zili vhwevhulo kwa mwanaavuli nu mushi, pe kwashi kuvha ishita kwimala!”

¹¹ UYeesu ahavhaamula ahati, “Te vhonti vhe vhangaliposheela izwi ili, nkandi vhevhaala vhe uMulungu avhapiiye amaha aga kuliposheela.

¹² Yeenya, vhamo vhatakwimala, mwe pe vhapaase kufuma kupaapwa kwavho. Avhamwavho vhatakwimala, mwe pe avhantu vhavhapaasile. Havhili avhamwavho vhatakwimala, inga vhavhe na havhaliilizyo ahapiti aha kuvhomba imbombo iya vhumwene uvhwa Mulungu. Umuntu wonti we angaliposheela izwi ili, aliposheele.”

UYeesu akuvhaloota avhaana avhansi

¹³ Isiku limo, avhantu vhámuleteeye uYeesu avhaana, inga avhavhiishile inyoovhe, kuvhaloota nu kuvhalaavhila. Ileelo avhasundikwa vhaakwe vhahavhapilila vhe vhávhaleesite avhaana ivho.

¹⁴ Ileelo uYeesu ahati, “Vhaleshi avhaana ivho vhinze kuli ine, mutavhadindaje ndaali, mwe pe uvhumwene uvhwa Mulungu vhwa vhantu vhe vhali inza avhaana ivho.”

¹⁵ UYeesu ahavhavhiishila inyoovhe avhaana ivho, kuvhaloota, pe aheepa ipo.

Umujaaha udumbwe we akwanza uvhulanzi

¹⁶ Pe umujaaha wumo ahinza kwa Yeesu, ahamuvhuziilizya ahati, “We Musambiilizi, imbombe ishooni ishinza, inga mbwaje uvhulanzi uvhwa shiima?”

¹⁷ UYeesu ahamwamula ahati, “Shooni she ukumbuziilizya izya shintu ishinza? Yeenya, ali wooka vhweleele we mwinza. Ileelo inga ukwanza kwinjila ku vhulanzi uvhwa shiima, uzilandate indajizyo zyakwe.”

¹⁸ Uweene ahati, “Ndajizyo vhuli?” Pe uYeesu ahamwamula ahati, “Utagogaje, utavhembuhaje, utiivhaje, utahomeshezyaje izya ilenga.

¹⁹ Umushindihaje utaata waaho nu maayi waaho havhili umukundaje umupalamani waaho inza vwe ukuyikunda weneewe.”

²⁰ Umujaaha uyo ahati, “Indajizyo zyonti izyo nkazilema. Imbombe ishooni ishamwavho she nsovheliilwe?”

²¹ UYeesu ahamwamula ahati, “Inga ukwanza kuvha we mulunjisu, sogoola ukazye ivintu vwonti vwe uli navwo, impiiya zye waposheela uuvhape avhapiina. Inga wavhomba vhwevhulo, ukuvha wayisengulila inkoma ku mwanya. Pe uyinze, undandate.”

²² Lwe umujaaha uyo ayiivwa izyo, aheepa uku aswimiliilwe nkaani, mwe pe áamile ni vwuma ivwinji.

²³ Pe uYeesu ahavhavhuuzya avhasundikwa vhaakwe ahati, “Nalyoli shiliivha shigomu nkaani avhadumbwe kwinjila mu vhumwene uvhwa Mulungu.

²⁴ Havhili nkuvhavhuuzya kuuti, shipupuusu nkaani ingamila kutuuha pi indovhoolwi ilya nsindaani, kuluusya udumbwe kwinjila mu vhumwene uvhwa Mulungu.”

²⁵ Lwe avhasundikwa vhiivwa izyo, vhahasukumila nkaani, vhahati, “Ishi inga vwe zili vhwevhulo, pe wu naanu we angaapokwa?”

²⁶ UYeesu ahavheenya, ahayanga ahati, “Ilyo ku vhantu litangavhombeha, ileelo kwa Mulungu zyonti zikuvhombeha.”

²⁷ UPeeteli ahamwamula ahati, “Yeenya, iswe tuvilesile vwonti, tukukulandata iwe! Ishi pe kwe tushaaje ishooni?”

²⁸ UYeesu ahavhaamula ahati, “Nalyoli nkuvhavhuuzya kuuti, lwe ne Mwana wa Aadamu natendama pa shitengo ishishindamu isha vhumwene mu nsi impwa, niimwe mwe mundandasite, mulitendama pa vitengo ivwa vhumwene 12 kuzikonzya inkolo 12 izya Vhaisilayeeli.

²⁹ Havhili umuntu we ayilesile inyumba yaakwe, poosye avhanine vhaakwe avhanaavuli, poosye avhantanda, poosye utaata waakwe, poosye umaayi waakwe, poosye avhaana vhaakwe, poosye amagunda gaakwe kuzya izina lyane, uyo aliposheela ivwinji nu vhulanzi uvhwa shiima.

³⁰ Yeenya, avhantu vhe vhatakushindikwa ahavhaliilizyo iha, vhaliivha vhantu vhe vhakushindikwa, vhoope vhe vhakushindikwa ahavhaliilizyo iha, vhaliivha vhantu vhe vhatakushindikwa.”