Matayi 18 - ULufingwi uLupwa

Umupiti mu vhumwene uvhwa Mulungu

¹ Ahavhaliilizyo hanaaho avhasundikwa vhahasogola kwa Yeesu nu kumuvhuziilizya kuuti, “Mu vhumwene uvhwa Mulungu wu naanu we mupiti kuluusya vhonti?”

² UYeesu ahamwita umwana umunsi, ahamuvhiiha pahati yaavho.

³ Ahayanga ahati, “Nalyoli nkuvhavhuuzya kuuti, inga mutakwanduha nu kuvha inza avhaana avhansi, te muhinjile naalumo mu vhumwene uvhwa Mulungu.

⁴ Pe ishi, wonti we akuyiisya inza umwana umunsi uno, we mupiti mu vhumwene uvhwa Mulungu.

⁵ Havhili, umuntu wonti we akumuposheela umwana umunsi inza uno kwi izina lyane, akumposheela neene.”

Insoshi kuzya ndingo

⁶ “Ileelo inga umuntu wonti akumupelela kuvhomba uvhutalamalandu wumo mu vhansi ivha vhe vhakuniitiha ine, yaamile kwashi ku kwakwe kupinyiilwa ulwala ulupiti mu nsingo nu kusumbilwa pe pivhiiye nkaani mwa sumbi, kuluusya amayimba ge galimwaga.

⁷ “Mwasheela mwe vhantu mwe vha mu nsi umu, ku ndingo zye zikupelela avhantu kuvhomba uvhutalamalandu! Indingo izyo zikwanzilwa kwinza, ileelo asheela umuntu we akuzileeta indingo izyo!

⁸ Inga inyoovhe yaaho, poosye ishinama shaaho shikukupelela kuuti uvhombe uvhutalamalandu, ushidumule nu kushisumba ukutali! Yeenya, kwashi kwinjila mu vhulanzi uvhwa shiima ni shinkuntu poosye she we kwesu, kuluusya kusumbilwa mwi ipalaazya ilya mwoto uwa shiima ni nyoovhe zyonti zivhili poosye ni vinama vwonti vivhili.

⁹ Havhili, inga ilyinso lyaho likukupelela kuuti uvhombe uvhutalamalandu, ulifwonkole nu kulisumba ukutali! Yeenya, kwashi kwinjila mu vhulanzi uvhwa shiima ni lyinso lyoka, kuluusya kusumbilwa mwi ipalaazya ilya mwoto uwa shiima na minso gonti gavhili.”

Ishiholanyo isha ngʼonzi ye yiteezile

¹⁰ “Muvhanje minso, mutamusufwaje wumo mu vhansi ivha! Nkuvhavhuuzya kuuti, avhahavhizya vhaavho ku mwanya, ahavhaliilizyo honti vhali pilongolela ilya Taata waane uwa ku mwanya.

¹¹ Yeenya, ne Mwana wa Aadamu ninzile mu nsi kuvhapoha vhe vhateezile.

¹² Ishi mukulola vhuli? Muli imwe, inga umuntu ali ni ngʼonzi 100, ileelo yooka yateega, angahonzya vhuli? Atangazileha ziila 99 mu magamba nu kusogola kuyilondola ye yiteezile?

¹³ Inga ayaaga, nalyoli nkuvhavhuuzya kuuti, akuseshela nkaani ingʼonzi iyo yooka, kuluusya ingʼonzi ziila 99 zye zitateezile.

¹⁴ Vhwevhulo, woope uTaata wiitu uwa ku mwanya atakwanza kuuti wumo mu vhansi ivha ateeje.”

Uluvhaatiho ulwa kumusoha we ateezile

¹⁵ “Inga uwamwinyu akuvhombela uvhutalamalandu, usogole umusoshe lwe muli mweka vhavhili. Inga akutejeelezya, pe ukuvha wamwaga havhili uwamwinyu.

¹⁶ Ileelo inga atakutejeelezya, usogole umunyatule umuntu uwamwavho wooka poosye vhavhili, inga muvhulandate uVhusimbe uVhufinjile vhwe vhukuti, ‘Uvhunanzi vhwonti vhulongwaje lwe vhaafumwa uvhwahoome avhantu vhavhili, poosye vhatatu.’

¹⁷ Inga atavhatejeelezya vhoope ivho, usogole ushivhuuzye ishivhanza. Inga atashitejeelezya ni shivhanza, pe shimuvhiishe inza we atamwitisile uMulungu, poosye inza umusonchezya musonko.”

Amaha aga vhasundikwa aga kugalila nu kwigula

¹⁸ “Nalyoli nkuvhavhuuzya kuuti, zyonti zye mwazigalila kwi izina lyane mu nsi umu, woope uMulungu akuzigalila ku mwanya. Havhili, zyonti zye mwazyigula kwi izina lyane mu nsi umu, woope uMulungu akuzyigula ku mwanya.

¹⁹ Havhili nalyoli nkwonjezya kuvhavhuuzya kuuti, inga vhavhili muli imwe mu nsi umu vhitinkana kulaavha zimo, uTaata waane uwa ku mwanya alivhavhombela zyenezyo.

²⁰ Yeenya, inga vhaliipo avhantu vhavhili, poosye vhatatu vhe vhavhungiine kwi izina lyane, niine nkuvha pooka navho.”

Ishiholanyo isha muntu we atakuswila avhanji

²¹ Pe uPeeteli ahasogola kwa Yeesu, ahamuvhuziilizya ahati, “We Mwene, inga uwamwitu ambombela uvhutalamalandu, nkwanzilwa imuswilaje lulinga? Vhuli, poosye mala 7?”

²² UYeesu ahamwamula ahati, “Ntakukuvhuuzya kuuti, mala 7 vhweleele, nkandi umuswilaje uwamwinyu ahavhaliilizyo honti ishisita kuvhaazya.

²³ “Kuli izyo, uvhumwene uvhwa Mulungu vhuholiine ni shiholanyo isha mwene we ahanzaga kuhoma imbaazyo izya mpiiya zye ahavhadaayaga avhavhomvi vhaakwe.

²⁴ Lwe umwene akwanda kuvhaazya, vhahamuleeta umuntu wumo ku kwakwe we ahadayilwaga italanta 10,000.

²⁵ Umuvhomvi uyo ahapootwa kulipa impiiya zye ahadayilwaga. Pe umwene waakwe ahalajizya ahati, vhamukazye uweene pooka nu mushi na vhaana vhaakwe ni vintu vwonti vwe áamile navwo inga amulipe.

²⁶ “Pe umuvhomvi uyo ahamusugamilila, ahamulaavha ahati, ‘Nkulaavha unguliilile hansi, kwe nkulipe ivintu vwaho vwonti.’

²⁷ Umwene uyo ahamufwila uvhwila umuvhomvi waakwe, ahamuswila kuuti atahaalipe, ahamwitishila kuuti asogolaje.

²⁸ “Ileelo lwe umuvhomvi uyo akufuma panzi, ahahomaana nu muvhomvi uwamwavho we ámupavhiiye idinaali 100. Naluvhiilo ahamulema, ahamufina ku nsingo, ahamuvhuuzya ahati, ‘Ndipa vwe naakupavhiiye.’

²⁹ Umuvhomvi uwamwavho uyo ahamusugamilila, ahamulambiilizya ahati, ‘Unguliilile hansi, kwe nkulipe ivintu vwaho.’

³⁰ Ileelo uweene ahahaana, ahasogola kumukunga uwamwavho mu jeela kufishila pe aliilipa ivintu ivwo.

³¹ “Lwe avhavhomvi avhamwavho vhaalola izyo, vhahavwalala nkaani mu mooyo gaavho. Pe vhahasogola kwa mwene waavho nu kumuvhuuzya zyonti zye zyávhomviilwe.

³² Pe umwene ahamwita umuvhomvi ula, ahati, ‘We muvhomvi umuvhiivhi iwe! Yeenya, lwe wandambiilizya kuuti nkuswile vwe nákupavhiiye, nkuswiliiye vwonti!

³³ Vhuli, utanzilwaga kumufwila uvhwila umuvhomvi uwamwinyu inza vwe niine nkufwiliiye uvhwila iwe?’

³⁴ “Pe umwene ahaviitwa nkaani, ahavhalajizya avhasikaali kuuti vhamuleme nu kumukunga mu jeela kufishila pe aliilipa ivintu vwonti.”

³⁵ Pe uYeesu ahati, “Niimwe uTaata waane uwa ku mwanya alivhavhombela vhwevhulo, inga mutakuvhaswila mu mooyo giinyu avhamwinyu amalandu gaavho.”