Matayi 17 - ULufingwi uLupwa

UYeesu akwanduha

¹ Lwe zyatuuha insiku 6, uYeesu ahavhanyatula avha Peeteli nu Yaakobu nu Yoohani umunine uwa Yaakobu. Ahazuvha navho kukwilu pi igamba itali.

² Lwe vhali paala, uYeesu ahagalunkana pilongolela lyavho. Pa sheeni shaakwe pahalama ngati lizuvha na menda gaakwe gahavha mazelu nkaani ngati lizuvha.

³ Yeenya, vhahitushila uMoose nu Eeliya vhahavhaloleshela nu kuyanga nawo.

⁴ UPeeteli ahamuvhuuzya uYeesu ahati, “We Mwene, hinza iswe tusyale panaapa. Inga ukwanza, kwe nzenje ivwegwi vitatu. Shimo shivhe shaaho, ishamwavho shivhe sha Moose, ni shamwavho shivhe sha Eeliya.”

⁵ Lwe uPeeteli akuyanga izyo, yeenya ivhingo lye likulama lihavhagwinshila. Izwi lihivwiha kufuma mwi ivhingo ilyo lihati, “Uno Mwana waane unkundwa we nkuhondezelwa nawo. Mumutejelezyaje uweene!”

⁶ Lwe avhasundikwa vhaakwe vhiivwa izyo, vhahoogopa nkaani vhahagwa pansi ishikupama.

⁷ UYeesu ahapalamila papiipi navho, ahavhapalamansya, ahavhavhuuzya ahati, “Yimiliili, mutogopaje!”

⁸ Lwe vhavhuusya aminso gaavho, vhatahamulola uwunji naawumo, nkandi we Yeesu weeka.

⁹ Lwe vhakwiha mwi igamba liila, uYeesu ahavhalajizya, ahati, “Mutahinze mumuvhuuzye umuntu nuumo zye mwazilola, kufishila ahavhaliilizyo he ne Mwana wa Aadamu nazyuha.”

¹⁰ Avhasundikwa ivho, vhahamuvhuziilizya uYeesu vhahati, “Shooni she avhasambiilizi avha ndajizyo vhakuti, yikwanzilwa uEeliya amulongolele uChilisiti kwinza?”

¹¹ UYeesu ahavhaamula ahati, “Mwe muumwo, uEeliya akwanzilwa alongolele kwinza, inga asengaanye zyonti.

¹² Ileelo nkuvhavhuuzya kuuti, uEeliya ahinza, ileelo avhantu vhatámumanyile, vhahamuvhombela imbiivhi zyonti inza vwe vhahanzaga. Vhwevhulo, ne Mwana wa Aadamu kwe njimvilwe mu nyoovhe zyavho.”

¹³ Pe avhasundikwa ivho vhahamanya kuuti, uYeesu ahayangaga inongwa izya Yoohani uMwozyi.

UYeesu akumuponia umwana uwa mpepo inkandamanu

¹⁴ Lwe uYeesu na vhasundikwa vhatatu vhaala vhinza kwe ivhungaana ilya vhantu lyámile, umuntu wumo ahinza ku kwakwe, ahamusugamilila.

¹⁵ Ahamuvhuuzya uYeesu ahati, “We Mwene, umufwile uvhwila umwana waane, mwe pe ali ni shinzilisi. Uvhuvhinu uvhwo, vhukumuyimvwa nkaani. Ulwinji vhukumugwilizya mu mwoto na mu minzi.

¹⁶ Naamulesite ku vhasundikwa vhaaho ileelo vhaaposiitwe kumuponia.”

¹⁷ UYeesu ahavhavhuuzya ahati, “Mwe vhantu avha havhaliilizyo iha mwe mutali nu lwitiho, havhili mwe vhatalamalandu, kwe ntendame niimwe kufishila lyeli? Havhili kwe mbajimbiilile kufishila lyeli? Muleete umwana uyo ipa.”

¹⁸ Lwe vhamuleeta, uYeesu ahayipilila impepo inkandamanu ye yáamile muhati yaakwe, yoope yihafuma. Panaapo umulumendo uyo ahapona.

¹⁹ Pisinda, avhasundikwa vhahasogola kwa Yeesu kukwilu, vhahati, “Shooni she iswe twaaposiitwe kuyishimbizya impepo inkandamanu yiila?”

²⁰ Uweene ahavhaamula ahati, “Mwaaposiitwe, mwe pe ulwitiho lwinyu lunsi. Nalyoli nkuvhavhuuzya kuuti, inga mwaamile nu lwitiho ulunsi inza imbeyu iya haladaali ye nyinsi kuluusya imbeyu zyonti, mungalivhuuzya igamba ili kuuti, ‘Kumpuuha ipa, usogole paala,’ lyope lingakumpuha. Naashimo she shilivhapoota imwe.

²¹ Pooka niizyo, impepo inza iyo mutangayifumwa, nkandi kwi idala ilya kumulaavha uMulungu nu kuyiima kulya.”

UYeesu akukuvhwa havhili izya kufwa nu kuzyuha kwakwe

²² Lwe uYeesu ali pooka na vhasundikwa vhaakwe mu shigavho isha nsi isha Galilaaya, ahavhavhuuzya ahati, “Ne Mwana wa Aadamu kwe vhambiishe mu nyoovhe izya vhalugu,

²³ nu kungoga. Ileelo isiku ilya vhutatu, uMulungu alinzyusya.” Lwe avhasundikwa vhaakwe vhiivwa izyo, vhahaswimiililwa nkaani.

Kusonka umusonko uwa Nyumba iMfinjile

²⁴ Lwe vhaafiha ku Kapelanawuumu, avhasonchezya musonko avha Nyumba iMfinjile vhahamuvhuziilizya uPeeteli vhahati, “Vhuli, umusambiilizi wiinyu woope akufumwaga umusonko uwa Nyumba iMfinjile?”

²⁵ UPeeteli ahavhaamula ahati, “Vwe zili, akufumwaga.” Pe uPeeteli ahinjila mu nyumba ye uYeesu áamile. Ileelo lwe uPeeteli ashiili kuyanga naashimo, uYeesu ahati, “We Siimoni, ukulola vhuli? Avhamwene avha mu nsi umu vhakusonchezyaga umusonko ku vhantu vhuli? Ku vhaana vhaavho pamo ku vhanji?”

²⁶ UPeeteli ahamwamula ahati, “Vhakusonchezyaga vhe vhanji.” UYeesu ahamuvhuuzya ahati, “Inga vwe zili, pe vhavhafwiliiye uvhwila avhantu vhaavho kusonka umusonko.

²⁷ Ileelo inga tutahavhaviisye avhantu ivha, sogoola usikule mwa sumbi. Inswi iya kwanda ye waalema, uyibangatule ilomu. Umwo kwe uyaaje impiiya. Uyinyatule impiiya iyo, usogole usonche umusonko uwaane nu waaho.”