Matayi 14 - ULufingwi uLupwa

Kufwa ukwa Yoohani uMwozyi

¹ Ahavhaliilizyo iho umwene uHeelodi ahiivwa inongwa izya Yeesu.

² Pe ahavhavhuuzya avhavhomvi vhaakwe ahati, “Uno wu Yoohani uMwozyi azyusile! Ye nongwa ali na maha aga kuvhomba amafindango.”

³ UHeelodi áyanzile vhwevhulo, mwe pe ápezile amulemile uYoohani nu kumukunga mu jeela kuzya Heloodiya we áali mushi wa munine waakwe uFiilipo.

⁴ Ávhomvile vhwevhulo, mwe pe uYoohani ahamupililaga uHeelodi kuuti, “Indajizyo izya Moose zitakwitishila kuuti iwe umunyatule umushi wa mukulu waaho.”

⁵ Pe uHeelodi ahanza kumugoga uYoohani, ileelo ahoogopa ivhungaana ilya vhantu, mwe pe vhámwitisile kuuti mukuvhwi.

⁶ Lwe isiku ilya shikulukuulu isha kupaapwa uHeelodi lyafiha, umwana umulindu uwa Heloodiya ahimba ingʼoma pa vhantu vhe vhálanjiliilwe, ahamuhondezya nkaani uHeelodi.

⁷ Pe uHeelodi ahafinga nu kulapa kuumupa umulindu uyo ishintu shonti she angamulaavha.

⁸ Lwe unyina amupanzya izya kuyanga, umulindu uyo ahamuvhuuzya uHeelodi ahati, “Nkulaavha umpe panaapa itwe ilya Yoohani uMwozyi mwi isiniya.”

⁹ Umwene ahaswimiililwa nkaani, ileelo, mwe pe álafile pilongolela ilya vhajeni, ahalajizya kuuti vhaamupe itwe ilya Yoohani uMwozyi.

¹⁰ Pe uHeelodi ahamusonteelezya umuntu wumo, kusogola kumudumula uYoohani itwe mu jeela.

¹¹ Ahalileeta mwi isiniya nu kuumupa umulindu uyo, woope ahaamupa unyina.

¹² Pe avhasundikwa avha Yoohani vhahasogola kushinyatula ishaala nu kushisyila. Pisinda, vhahasogola kumuvhuuzya uYeesu zyonti zye zyáfumiiye.

UYeesu akuvhaliisya avhantu 5,000

¹³ Lwe uYeesu ayiivwa zyonti izyo, aheepa paala ni ivhooti, ahasogola kukwilu kwe kutáamile avhantu. Ileelo lwe ivhungaana ilya vhantu lyamanya, lihamulandata ulwa pansi kufuma mu nkaaya nu kusogola kwe áamile.

¹⁴ Lwe uYeesu ayiiha mwi ivhooti, ahavhalola avhantu ivhungaana ipiti nkaani, ahavhafwila uvhwila nu kuvhaponia avhavhinu vhaavho.

¹⁵ Lwe haafiha hamazuuvha, avhasundikwa vhaakwe vhahasogola ku kwakwe, vhahamuvhuuzya vhahati, “Ipa pe pi ilaala, havhili uvhusiku vhwaakwila. Ulilaje ivhungaana ili ilya vhantu, vhasogole mu ntala, vhayikalile ishaakulya.”

¹⁶ UYeesu ahavhaamula ahati, “Vhatakwanzilwa kwepa. Vhapi mweneemwe ishaakulya.”

¹⁷ Vhahamwamula vhahati, “Iswe tutali nasho naashimo ipa, nkandi ge makaati gasaano ni nswi zivhili.”

¹⁸ UYeesu ahavhavhuuzya ahati, “Ndeeteli vwenevwo ipa.”

¹⁹ Pe ahavhalajizya avhantu ivho kuuti vhatendame pa masole. Ahanyatula amakaati gasaano igo ni nswi zivhili izyo, aheenya ku mwanya, ahamusalifwa uMulungu. Ahamensulanya, ahaavhapa avhasundikwa vhaakwe, vhoope vhahavhagavhila avhantu ivho.

²⁰ Avhantu vhonti vhahalya, vhahiikuta. Avhasundikwa vhaakwe vhahavhungaaniha ivwalila, vihiizula ivitundu 12.

²¹ Avhantu vhe vháliiye, vháali avhanaavuli 5,000 ishi ishisita kuvhaazya avhantanda na vhaana.

UYeesu akujenda pa minzi pamwanya

²² Ahavhaliilizyo hanaaho, uYeesu ahavhalajizya avhasundikwa vhaakwe kuuti vhinjile mwi ivhooti, vhalongolele kusogola kwi isyila ilya sumbi uwa Galilaaya, lwe uweene akulilaga ivhungaana ilya vhantu.

²³ Lwe alilaga ivhungaana ilya vhantu, uYeesu ahazuvha weeka pi igamba kumulaavha uMulungu. Lwe haafiha hamazuuvha, ahavha weeka pi igamba.

²⁴ Ahavhaliilizyo iho ivhooti lyápezile lyafiha pahati pa sumbi, ileelo amavhilingwa gahaliyuvhanyaaga, mwe pe inkungu yihavugulaga kulungamana nalyo.

²⁵ Ahavhaliilizyo he inkanda zikwanda kuvhilishila, uYeesu ahafuma akujenda pa minzi pa sumbi, akwinza kwe avhasundikwa vhaakwe vháali.

²⁶ Ileelo lwe vhamulola uYeesu akujenda pa minzi pamwanya, vhahatetema, vhahati, “Umuzimu!” Vhahahoola nkaani kwi lyoga.

²⁷ Ileelo uYeesu ahavhavhuuzya ahati, “Mutogopaje! Gomaaji umwoyo! Neene.”

²⁸ Pe uPeeteli ahayanga ahati, “We Mwene, inga ndinga weewe, mbuuzya, ininze kuli iwe she nkujenda pa minzi pamwanya.”

²⁹ UYeesu ahamwamula ahati, “Nzaaga.” Pe uPeeteli ahiiha mwi ivhooti liila, ahajenda pamwanya pa minzi kusogola kwa Yeesu.

³⁰ Ileelo lwe aalola inkungu impiti, ahoogopa. Ahataliha kudwivha, pe ahahoola ahati, “We Mwene, mpoha!”

³¹ Naluvhiilo, uYeesu ahagolosya inyoovhe nu kumulema, ahamuvhuuzya ahati, “We wa lwitiho ulunsi, shooni she uli na maganigani?”

³² Lwe uYeesu nu Peeteli vhinjila mwi ivhooti, inkungu yiila yihaleha kuvugula.

³³ Pe avhasundikwa vhe vháali mwi ivhooti, vhahamusugamilila uYeesu vhahati, “Nalyoli iwe we Mwana wa Mulungu!”

UYeesu akuvhaponia avhavhinu mu Jenesaleeti

³⁴ Lwe uYeesu na vhasundikwa vhaakwe vhalamba usumbi uwa Galilaaya, vhahafiha mu nkaaya iya Jenesaleeti.

³⁵ Lwe avhantu avha mu nsi iyo vhaamanya kuuti wu Yeesu, vhahavhizya inongwa zyakwe imbazu zyonti. Pe avhantu vhahavhaleeta vhonti vhe vháali vhavhinu kwa Yeesu.

³⁶ Vhahamulambiilizya uYeesu kuuti avhavhinu vhaleme poosye lye likoopi ilya mwenda waakwe vhweleele. Pe avhavhinu vhonti vhe vhálemile, vhahapona.