Matayi 12 - ULufingwi uLupwa

UYeesu wu Mwene uwa Sabaato

¹ Isiku limo ilya Sabaato, uYeesu na vhasundikwa vhaakwe vhahatuuhaga mu magunda aga ngana. Avhasundikwa vhaakwe inzala yihavhaluma, pe vhahanda kuvwanula amatwe aga ngana nu kulya.

² Lwe aVhafalisaayi vhazilola izyo, vhahayanga vhahati, “Yeenya, avhasundikwa vhaaho vhakuvhomba zye indajizyo izya Moose zitakwitishila kuvhomba pi isiku ilya Sabaato!”

³ UYeesu ahavhaamula ahati, “Mutahavhaazya mu Vhusimbe uVhufinjile vwe uDaavhudi ávhomvile lwe inzala yamuluma pooka na vhamwavho?

⁴ Áyinjiiye mwi Iheema ilya Mulungu nu kunyatula amakaati ge gáamile mafinjile. Indajizyo izya Moose zitahitishilaga avhantu avhanji kulya amakaati igo, nkandi vhe vhapuuti vheeka. Ileelo uDaavhudi ahalya, ahaavhapa na vhamwavho.

⁵ Vhuli, mutahavhaazya mu ndajizyo izya Moose kuuti avhapuuti vhakuvhomba imbombo mu Nyumba iMfinjile pi isiku ilya Sabaato, ileelo uMulungu atakuvhavhaazya kuuti vhakuvhomba havhiivhi?

⁶ Nkuvhavhuuzya imwe kuuti, ipa ndiipo ne mupiti kuluusya iNyumba iMfinjile.

⁷ Inga mwaavhumanyile uVhusimbe uVhufinjile vhwe vhukuti, ‘Nkwanza uvhwila kuluusya kufumwa impuutile,’ nkandi mutakuvhalonga avhantu vhe vhatananzile naashimo.

⁸ Nkuyanga vhwevhulo, mwe pe ne Mwana wa Aadamu indi na maha ni Sabaato.”

UYeesu akumuponia umuntu isiku ilya Sabaato

⁹ Pe uYeesu aheepa paala, ahinjila mwi isinagoogi lyavho.

¹⁰ Umwo mwáli umuntu wumo we inyoovhe yaakwe yáhataliiye. Havhili mwáli aVhafalisaayi vhe vhahalondolaga idala ilya kumulonjeelela uYeesu. Pe vhahamuvhuziilizya vhahati, “Vhuli, indajizyo izya Moose zikwitishila kumuponia umuntu isiku ilya Sabaato?”

¹¹ UYeesu ahavhaamula ahati, “Wu naanu muli imwe we inga ingʼonzi yaakwe yooka yagwila mu shilivha isiku ilya Sabaato, atangayilema nu kuyifumwa?

¹² Umuntu wa nsavho nkaani kuluusya ingʼonzi! Pe ishi, indajizyo izya Moose zikwitishila kuvhomba inyinza isiku ilya Sabaato.”

¹³ Pe uYeesu ahamuvhuuzya umuntu ula ahati, “Golosya inyoovhe yaaho.” Woope ahagolosya, yoope yihapona nu kuvha inza iyamwavho.

¹⁴ Ileelo aVhafalisaayi vhaala vhahafuma panzi nu kupanzanya vwe vhamugoje uYeesu.

Umuvhomvi we asavhuliilwe nu Mulungu

¹⁵ Lwe uYeesu aamanya kuuti aVhafalisaayi vhakupanzanya izya kumugoga, aheepa paala. Pe avhantu ivhungaana ipiti vhahamulandata, woope ahavhaponia vhonti vhe vháamile na mavhinu.

¹⁶ Ileelo ahavhasoha kuuti vhatamumanyisyaje ku vhantu.

¹⁷ UYeesu ávhomvile vhwevhulo, inga zilunjishe zye umukuvhwi uYisaayi áyanzile kuuti,

¹⁸ “Yeenya, uno muvhomvi waane we musavhuuye, uNkundwa waane we umwoyo waane wukuhondezelwa nawo. Ndiimupa uMupepo waane, woope alikumusya uvhwanalyoli ku vhe te Vhayuuda.

¹⁹ Ataliyuumana na vhantu, poosye kuzuma ahalanga, havhili umuntu naawumo ataliyiivwa izwi lyakwe mu madala.

²⁰ Te ahaavhe muhali ku vhayeyevhazu inza vwe atangalivunza itete ilyolo. Havhili te ahaavhe muhali ku vhe vhatali nu wa kuvhaavwa inza vwe atangavhuzimanya uvhutambi vhwe vhukusuuha ilyosi. Kumpeleela alivhuvhiiha uvhwanalyoli vhupoote.

²¹ Havhili, vhe te Vhayuuda vhalilisuuvhila izina lyakwe.”

UYeesu ali na maha kuluusya amaha aga Belizabuuli

²² Pe avhantu vhamo vhahamuleeta uwa mpepo inkandamanu kwa Yeesu. Impepo iyo yámuvhiisile umuntu uyo kuvha wu ntonko nu kuvha wu shinuunu. Pe uYeesu ahamuponia umuntu uyo, woope ahataliha kuyanga nu kulola.

²³ Ivhungaana ilya vhantu lihasukumila nu kuyanga kuuti, “Vhuli, uno te Mwana wa mwene uDaavhudi?”

²⁴ Ileelo lwe aVhafalisaayi vhiivwa izyo, vhahayanga vhahati, “Umuntu uno akushimbizya impepo inkandamanu ku maha aga Belizabuuli, umupiti uwa mpepo inkandamanu!”

²⁵ Lwe uYeesu aamanya insiivho zyavho, ahavhavhuuzya ahati, “Inga avhantu avha vhumwene vhwoka vhakulwa, uvhumwene uvhwo vhukunanjiha. Vhoope avhantu avha mu nkaaya yooka, poosye avha mu nyumba yooka inga vhanda kulwa vhuuvho vheeka, inkaaya ni nyumba iyo vilinanjiha.

²⁶ Woope uSeetano inga akumushimbizya uSeetano, uvhumwene vhwakwe vhukunanjiha. Pe ishi, uvhumwene vhwakwe vhungajendeelela vhuli?

²⁷ Ishi, inga ine nkushimbizya impepo inkandamanu ku maha aga Belizabuuli, pe avhasundikwa vhiinyu vhakushimbizya ku maha aga naanu? Kuli izyo, avhasundikwa vhiinyu vhe kwe vhalolesye kuuti zye mukusiivha te zya nalyoli.

²⁸ Ileelo ine inga nkushimbizya impepo inkandamanu ku maha aga Mupepo uwa Mulungu, pe uvhumwene uvhwa Mulungu vhwinzile kuli imwe.

²⁹ Wu naanu we anginjila mu nyumba iya muntu uwa maha nu kupumula ivintu vwakwe ishisita kumukunga suuti? Ileelo inga amukunga suuti umuntu uwa maha uyo, pe angapumula vwe vili mu nyumba yaakwe.

³⁰ “Umuntu wonti we atali uluvhazu lwane, mulugu waane. Havhili, we atakuvhavhungaaniha avhantu pooka niine, uyo akuvhasasaanya.

³¹ Ishi nkuvhavhuuzya kuuti, uvhutalamalandu vhwonti nu musaamu wonti avhantu vhaliswilwa. Ileelo we akumusaamula uMupepo uMufinjile, te ahaswilwe.

³² Havhili, inga umuntu anjanjila amazwi amavhiivhi ine ne Mwana wa Aadamu, aliswilwa. Ileelo inga amuyanjila amazwi amavhiivhi uMupepo uMufinjile, te ahaswilwe ahavhaliilizyo iha, poosye he hakwinza.”

Ikwi likumanyiha ku mantonongwa gaakwe

³³ “Muvhwalaje ikwi ilyinza, goope amantonongwa gaakwe gakuvha minza. Muvhwalaje ikwi ivhiivhi, goope amantonongwa gaakwe gakuvha mavhiivhi. Ikwi likumanyiha vwe lili kufumiilana na mantonongwa gaakwe.

³⁴ Mwe vhaana vha njoha imwe! Mungayanga vhuli amazwi aminza she mwe vhavhiivhi? Nkuvhavhuuzya isho, mwe pe umuntu akuyanga zye zyizuuye mu mwoyo waakwe.

³⁵ Umuntu umwinza akuyanga nu kuvhomba inyinza, zye zikufuma mu mwoyo waakwe umwinza. Woope umuntu umuvhiivhi akuyanga nu kuvhomba imbiivhi, zye zikufuma mu mwoyo waakwe umuvhiivhi.

³⁶ Ishi nkuvhavhuuzya kuuti, amazwi gonti aga shaaha ge avhantu vhakuyanga, vhaligalondovhola isiku ilya vhulonzi.

³⁷ Yeenya, ku mazwi gaaho ulivhaazilwa kuuti we mugolosu, havhili ku mazwi gaaho ulilongwa kuuti we munanzi.”

AVhafalisaayi na vhasambiilizi vhakwanza ishilolesyo

³⁸ Pe avhasambiilizi avha ndajizyo izya Moose na Vhafalisaayi vhamo vhahamuvhuuzya uYeesu vhahati, “We Musambiilizi, tukwanza uvhombe ishilolesyo isha kuhomeshezya kuuti ufumile kwa Mulungu.”

³⁹ UYeesu ahavhaamula ahati, “Avhantu avha havhaliilizyo iha vhavhiivhi, havhili vhavhembu! Vhakwanza ishilolesyo, ileelo te mbalolesye ishilolesyo naashimo, nkandi sheshiila isha mukuvhwi uYoona.

⁴⁰ Nkuyanga vhwevhulo, mwe pe inza vwe uYoona átendiime insiku zitatu mu lwanda ulwa nswi impiti uvhusiku nu musanya, niine ne Mwana wa Aadamu kwe ntendame mu mbiipa insiku zitatu uvhusiku nu musanya.

⁴¹ Isiku ilya vhulonzi, avhantu avha mu Nineewe vhaliyimiilila kuvhalonga imwe mwe vhantu avha havhaliilizyo iha, kuuti mwe vhavhiivhi. Vhalivhalonga, mwe pe lwe uYoona akumusya izwi ilya Mulungu ku mwavho, vhátonsite imbiivhi zyavho. Ileelo ipa ndiipo ne mupiti kuluusya uYoona!

⁴² Havhili isiku ilya vhulonzi, woope usamwene uwa ku Sheeba aliyimiilila nu kuvhalonga imwe mwe vhantu avha havhaliilizyo iha. Alivhalonga kuuti mwe vhavhiivhi, mwe pe uweene áshuuye kufuma mu nsi iya kutali, ahinza kutejeelezya amazwi aga vhushindamu uvhwa njeele uvhwa mwene uSolomooni. Ileelo ipa ndiipo ne mupiti kuluusya uSolomooni!”

Kugaluha ukwa mpepo inkandamanu

⁴³ UYeesu ahajendeelela kuyanga, ahati, “Lwe impepo inkandamanu yaafuma mwa muntu, yikutuuha pe patali aminzi, lwe yikulondola apa kutuuzya, ileelo yitakupaaga.

⁴⁴ Pe yikuti, ‘Kwe ngalushe mu nyumba yaane ye naafumile.’ Inga yaafiha, nu kumulola umuntu uyo ali ngati nyumba ye yitali naashimo, ye vhuusile nu kuyiyemvwa ahinza,

⁴⁵ pe yikusogola kuzileeta impepo izyamwavho 7 zye nkandamanu kuluusya iyeene. Impepo zyonti izyo zikwinjila mwa muntu uyo, nu kutendama munuumwo. Pe umuntu uyo akuvha havhiivhi nkaani kuluusya ku vhwandilo. Vhwevhulo, vwe ziliivha na ku vhantu avhavhiivhi avha havhaliilizyo iha.”

Unyina na vhanine avha Yeesu

⁴⁶ Lwe uYeesu akuyanga ni ivhungaana ilya vhantu, unyina na vhanine vhaakwe vhahinza nu kwimiilila panzi, vhahanzaga kuyanga nawo.

⁴⁷ Pe umuntu wumo ahamuvhuuzya ahati, “Umaayi waaho na vhanine vhaaho vhimiliiye panzi, vhakukulondola, vhakwanza kuyanga niiwe.”

⁴⁸ Ileelo uYeesu ahamwamula ahati, “Umaayi waane na vhanine vhaane vhe vha naanu?”

⁴⁹ Pe ahavhasonta avhasundikwa vhaakwe ahati, “Yeenya, ivha vhe vhamaayi vhaane na vhanine vhaane!

⁵⁰ Umuntu wonti we akuvhomba zye uTaata waane uwa ku mwanya akwanza, uyo we munine waane, havhili we wu maayi waane.”