Matayi 11 - ULufingwi uLupwa

UYoohani uMwozyi akuvhatuma avhasundikwa vhaakwe kwa Yeesu

¹ Lwe uYeesu aamala kuvhalajizya avhasundikwa vhaakwe 12, aheepa paala. Ahasogola kukumusya nu kuvhasambiilizya avhantu izwi ilya Mulungu mu nkaaya izya mu Galilaaya.

² Lwe uYoohani uMwozyi akunziilwe mu jeela, ahiivwa zye uChilisiti akuvhomba. Pe ahavhatumiilizya avhasundikwa vhaakwe,

³ inga vhamuvhuziilizye uYeesu kuuti, “Vhuli, iwe we we Chilisiti we avhakuvhwi vhátili aliyinza, pamo tuguliilile uwunji?”

⁴ UYeesu ahavhaamula ahati, “Sogooli mumuvhuuzye uYoohani zyonti zye mukuzilola nu kuzyivwa.

⁵ Avhantonko vhakulola havhili, na vhantendya vhakujenda na vha mambombo vhakuzelupa. Havhili vhoope avhakuutwi vhakwivwa, na vhafwe vhakuzyuha na vhapiina vhakulumbiililwa Izwi iLyinza.

⁶ Alosiitwe umuntu we akuniitiha ine ishisita amaganigani.”

⁷ Lwe avhasundikwa avha Yoohani vheepa, uYeesu ahanda kulivhuuzya ivhungaana ilya vhantu vhaala izya Yoohani uMwozyi. Ahati, “Mwásogooye kwenya ishooni kwi ilaala? Mwásogooye kwenya isole lye inkungu yikuliyinzaanya?

⁸ Inga te she shiyo, pe mwásogooye kwenya ishooni? Mwásogooye kumwenya umuntu we ázwaye amenda aga nsavho? Mumanye kuuti, avhantu vhe vhakuzwala amenda aga nsavho vhakutendama mu nyumba izya shimwene.

⁹ Ishi pe mwásogooye kwenya ishooni? Vhuli, mwásogooye kumwenya umukuvhwi? Nalyoli mwe muumwo! Nkuvhavhuuzya kuuti, uweene mupiti kuluusya umukuvhwi.

¹⁰ Uweene we ásimviliilwe mu Vhusimbe uVhufinjile kuuti, ‘Yeenya, ndimusonteelezya umuvhomvi waane, akulongolele kulingaanya idala lye ulituuha.’”

¹¹ UYeesu ahati, “Nalyoli nkuvhavhuuzya kuuti, ku vhantu vhonti atahafumila naalumo we mupiti kumuluusya uYoohani uMwozyi. Ileelo umuntu we munsi nkaani mu vhumwene uvhwa Mulungu, we mupiti kuluusya uYoohani.

¹² Kwandila insiku zye uYoohani uMwozyi átalisile kulumbiilila kufishila ileelo, uvhumwene uvhwa Mulungu vhukuyimvilwa nkaani. Vhoope vhe vhali na maha, vhakulinga kuvhugoma.

¹³ Nkuyanga vhwevhulo, mwe pe avhakuvhwi vhonti ni ndajizyo izya Moose zihakuvhwa kufishila ahavhaliilizyo aha Yoohani.

¹⁴ Ishi inga mukwitiha uvhukuvhwi vhwavho, uYoohani we wu Eeliya, ula we avhakuvhwi vháyanzile kuuti aliyinza.

¹⁵ We ali na makutwi, atejeelezye!”

¹⁶ Pe uYeesu ahajendeelela kuyanga ahati, “Imbaholanye ni shooni avhantu avha havhaliilizyo iha? Vhali inza avhaana vhe vhatendiime kupukuta pa nsokooni, vhamo vhakuvhavhilishila avhamwavho vhakuti,

¹⁷ ‘Twávhahomeeye ilonji, ileelo mutímvile! Havhili twávhateleleeye inyimbo izya vhuswimiilizu, ileelo mutálosiizye!’

¹⁸ “Nkuvhaholanya vhwevhulo, mwe pe uYoohani áyinzile, atahalyanga, poosye kumwela, avhantu vhátili, ‘Ali ni mpepo inkandamanu.’

¹⁹ Niine ne Mwana wa Aadamu ninzile, nkulya nu kumwela, avheene vhakuti, ‘Uno mupafu havhili wu shimwela. Havhili mumanyani uwa vhasonchezya musonko na vhatalamalandu avhanji!’ Ileelo uvhushindamu uvhwa njeele vhukuloleha kuuti vhwa nalyoli ku vhugolosu uvhwa mbombo zyakwe.”

UYeesu akuvhasoha avhantu avha mu nkaaya zye zikuhaana kumwitiha

²⁰ Pe uYeesu ahanda kuvhapilila avhantu avha mu nkaaya zye ávhomvile amafindango aminji, mwe pe avhantu ivho vhatápindusile.

²¹ Ahayanga ahati, “Mwasheela imwe mwe vhantu avha mu nkaaya iya Kolaziini ni ya Betisaayida! Yeenya, amafindango ge mbomvile kuli imwe, inga apele gavhombehaje mwe mu nkaaya iya Tiilo ni ya Siidoni, avhantu avha mu nkaaya izyo, nkandi vházwaye amagunila nu kuyipaha ilota kulolesya kutonta uvhutalamalandu vhwavho.

²² Nalyoli nkuvhavhuuzya kuuti, isiku ilya vhulonzi, imwe muliposheela isunde ipiti kuluusya avhantu avha mu nkaaya iya Tiilo ni ya Siidoni!

²³ Niimwe mwe vhantu avha mu nkaaya iya Kapelanawuumu, vhuli, mukusiivha kuuti muliizuvha kufishila ku mwanya? Ndaali! Te yihaavhe vhwevhulo, mulisumbwa pansi kufishila ku vhuzimu. Nkuyanga isho, mwe pe amafindango ge mbomvile kuli imwe, inga gapele gavhombehaje mwe mu nkaaya iya Sodooma, inkaaya iyo, nkandi yiliipo kufishila ileelo.

²⁴ Nalyoli nkuvhavhuuzya kuuti, isiku ilya vhulonzi, imwe muliposheela isunde ipiti kuluusya avhantu avha mu nkaaya iya Sodooma!”

Kumutwalila uYeesu amaligo

²⁵ Ahavhaliilizyo iho uYeesu ahajendeelela kuyanga kuuti, “We Taata, Mwene wa ku mwanya na pa nsi, nkukusalifwa. Nkukusalifwa, mwe pe imbombo izi uvhazyisile avhantu vhe vhakuyilola kuuti vhali nu vhushindamu uvhwa njeele nu kuuti vhasambiilile, ileelo uvhalolesiizye apazelu avhantu vhe vhakuyiisya inza avhaana avhansi.

²⁶ Nalyoli Taata, isho vwe usungwilwe.

²⁷ “UTaata waane ampiiye ivintu vwonti. Ataliipo we amumanyile uMwana, nkandi we Taata weeka. Havhili, ataliipo we amumanyile uTaata, nkandi we Mwana weeka, nu muntu wonti we uMwana asungwilwe kumulolesezya.

²⁸ “Nzaaji kuli ine imwe mwenti mwe mukuyimvilwa nu kunyatula amaligo amamwamu, ine kwe mbape ulutuuzyo.

²⁹ Mwitishe kulongolwa niine, ngati nkambaku zye zipinyiilwe ni ijooko, musambiilile kuli ine, mwe pe ine ne mutonsu havhili njisiizye mu mwoyo waane, pe niimwe kwe muvhe nu vhutehamu mu mooyo giinyu.

³⁰ Ijooko lyane litonsu, woope umuligo waane mupupuusu.”