Matayi 10 - ULufingwi uLupwa

UYeesu akuvhatuma avhasundikwa 12

¹ Pisinda, uYeesu ahavhiita avhasundikwa vhaakwe 12, ahaavhapa amaha aga kushimbizya impepo inkandamanu nu kuponia amavhinu gonti nu vhuyeyevhazu uvhwa mavhiila mu mavhiila.

² Amazina aga vhatumwa ivho 12 ge gano: uwa kwanda wu Siimoni (we izina ilyamwavho vhahatinji uPeeteli), nu Andeleeya umuzuuna waakwe nu Yaakobu umwana wa Zebedaayi nu Yoohani umunine waakwe.

³ Avhamwavho wu Fiilipo nu Batolomaayo nu Toomasi nu Mataayi umusonchezya musonko nu Yaakobu umwana uwa Alufaayo nu Tadaayo nu

⁴ Siimoni we ahayikungulaga kulwila insi yaakwe nu Yuuda uwa ku Kaalyoti, we pisinda ámwaniliiye uYeesu.

⁵ UYeesu ahavhatumiilizya ivho 12, ahavhalajizya ahati, “Mutahasogole ku vhe te Vhaisilayeeli, poosye kwinjila mu nkaaya yonti iya mu Samaliya,

⁶ nkandi musogole mu Vhaisilayeeli vhe vhali inza ingʼonzi zye ziteezile.

⁷ Lwe mukujenda, mukumusyaje mutinji, ‘Uvhumwene uvhwa Mulungu vhupalamiiye.’

⁸ Muvhaponiaje avhavhinu nu kuvhazyusya avhafwe nu kuvhazelufwa avha mambombo nu kushimbizya impepo inkandamanu. UMulungu avhapiiye pa vhweleele, pe ishi, niimwe mufumwaje pa vhweleele.

⁹ Mutahanyatule insavhaazya izya sahaabu, poosye izya mpiiya, poosye izya shaaba mu mfuuku zyinyu.

¹⁰ Mutahanyatule imbuguulu, poosye amenda aga kugalulanya, poosye ivilyatu, poosye indoogo, mwe pe umuvhomvi akwanzilwa kuposheela ishaakulya kufuma mu mbombo yaakwe.

¹¹ Inkaaya yonti, poosye ulutala lwonti lwe vhavhaposheela, mulondolaje umuntu we angavhaposheela. Pe mutendamaje munuumwo kufishila pe mukwepa.

¹² Lwe mwinjila mu nyumba, muvhalamuhaje avhahaaya.

¹³ Inga avhantu avha mu nyumba iyo vhavhaposheela ku vhutehamu, muvhalavhilaje kwa Mulungu kuuti avhaloote. Ileelo inga vhatavhaposheela, uvhuloote uvhwa Mulungu kwe vhusyalaje kuli imwe.

¹⁴ Inga umuntu wonti mu nkaaya yonti, poosye mu nyumba yonti atavhaposheela, poosye atatejeelezya amazwi giinyu, lwe mukufuma mupupulaje nu lusuuto lwe luli mu vinama vwinyu.

¹⁵ Nalyoli nkuvhavhuuzya kuuti, isiku ilya vhulonzi, avhantu avha mu nkaaya iyo vhaliposheela isunde ipiti kuluusya avhantu avha mu nkaaya iya Sodooma ni ya Gomoola!”

Amayimba ge gakwinza

¹⁶ “Yeenyi, nkuvhatumiilizya ngati ngʼonzi pahati pa mpumpi! Pe ishi, muvhanje nu vhushindamu uvhwa njeele inza injoha, havhili muvhanje mwe vhatonsu inza inkunda.

¹⁷ Muvhe minso na vhantu, mwe pe vhalivhatwalaga kulongwa pa lukuvhato nu kuhomwa mu masinagoogi gaavho.

¹⁸ Vhalivhatwalaga ku vhamwene na ku vhantu avhanji vhe vhali na maha, mwe pe imwe mwe vhasundikwa vhaane. Ileelo kuli imwe, iho he haliivha havhaliilizyo aha kufumwa uvhwahoome uvhwa lwitiho lwinyu ku kwavho, na ku vhe te Vhayuuda.

¹⁹ Lwe vhakuvhatwala ku vhapiti, mutahogopaje kuuti muliyanga ishooni, poosye kuuti muliyangaga vhuli, mwe pe uTaata uMulungu alivhapanga izya kuyanga ahavhaliilizyo hehaala.

²⁰ Nkuyanga vhwevhulo, mwe pe te mwemwe muliyangaga, nkandi uMupepo uwa Taata wiitu uMulungu we aliyangaga kutuushila muli imwe.

²¹ “Umunine alimwaniila uwamwavho, inga amugoje. Woope utaata alimwaniila umwana waakwe, inga amugoje. Vhoope avhaana vhalisambuha ku vhapaafi vhaavho nu kuvhagoga.

²² Avhantu vhonti vhalivhavitilwaga, mwe pe mukundandata ine. Ileelo we alijimbiilila kufishila ku vhusililishilo we aliipokwa.

²³ Inga vhakuvhayimvwa mu nkaaya yimo, mushimbililaje mu nkaaya iyamwavho. Nalyoli nkuvhavhuuzya kuuti, te muhaamale kusogola mu nkaaya zyonti izya Isilayeeli she ne Mwana wa Aadamu nshiili kugaluha.

²⁴ “Umusundikwa atangamuluusya umusambiilizi waakwe. Havhili, woope umuzya atangamuluusya umwene waakwe.

²⁵ Umusundikwa akwanzilwa kuvha inza umusambiilizi waakwe, woope umuzya akwanzilwa kuvha inza umwene waakwe. Inga vhakumwita umuhaata nyumba kuuti wu Belizabuuli, vhuli, te vhahavhiite avhantu avha mu nyumba yaakwe izina ivhiivhi nkaani?”

UMulungu weeka we akwanzilwa kumwogopa

²⁶ “Pe ishi, mutavhogopaje avhantu ivho. Zyonti zye zizyihiime ziliivha apazelu, havhili zyonti zye zili kukwilu zilivumbuha.

²⁷ Zyonti zye nkuvhavhuuzya mu shiisi, muziyangaje mu vhuzelu. Havhili, zyonti zye mukuzyivwa kukwilu, muzikumusyaje apazelu.

²⁸ Mutavhogopaje vhe vhakugoga we muvhili vhweleele, nkandi mumwogopaje uMulungu we akulovwa nziila mwi ipalaazya ilya mwoto!

²⁹ Vhuli, utudunduulu tuvhili vhatakukazya ku mpiiya nyinsi vhweleele? Ileelo poosye vhwevhulo, naahamo ahadunduulu he hakugwa pansi ishisita ulukasamo ulwa Taata wiitu uMulungu.

³⁰ Ileelo imwe uMulungu azivhaziizye poosye ni nsisi izya mu matwe giinyu.

³¹ Pe ishi, mutogopaje, mwe pe imwe mwe vha nsavho kuluusya indunduulu inyinji.

³² Umuntu wonti we akuvhavhuuzya avhantu, kuuti akundandata ine, niine ndimuvhuuzya uTaata waane uwa ku mwanya, kuuti uyo mulandati waane.

³³ Ileelo umuntu wonti we akuhaana kuniitiha pilongolela ilya vhantu, niine ndimuhaana pilongolela ilya Taata uwa ku mwanya.”

Uvhulugu kufumiilana nu lwitiho

³⁴ “Mutasiivhaje kuuti ninzile kuleeta uvhutehamu mu nsi. Ndaali! Ninzile kuleeta uvhulugu.

³⁵ Nkuyanga isho, mwe pe ninzile kuvhalwisya umwana umwanaavuli nu taata waakwe, woope umwana umwantanda nu maayi waakwe, woope umuha mwana nu nyinavwala kuuti vhativwanaje.

³⁶ Havhili, avhalugu avha muntu vhaliivha vhantu vha mu nyumba yaakwe.

³⁷ Umuntu wonti we akumukunda uyise, poosye unyina kuluusya kunkunda ine, uyo atankondeeye. Havhili, wonti we akumukunda umwana waakwe umwanaavuli, poosye umwantanda, kuluusya kunkunda ine, woope atankondeeye.

³⁸ Umuntu wonti we akwanza kundandata ine, ayikungule, ayiitishe amayimba, poosye nu kufwa. Inga atakuvhomba vhwevhulo, atankondeeye.

³⁹ Umuntu wonti we akwanza kuvhupoha uvhulanzi vhwakwe, alivhulovwa. Ileelo umuntu wonti we akuvhulovwa uvhulanzi vhwakwe ku zyane, alivhupoha.”

Avhantu vhe vhaliposheela ivipeelwa

⁴⁰ “Umuntu wonti we akuvhaposheela imwe, akumposheela neene. Woope we akumposheela ine, akuvha akumuposheela ula we antumiliziizye.

⁴¹ Umuntu wonti we akumuposheela umukuvhwi, mwe pe mukuvhwi, uMulungu aliimupa ishipeelwa inza isha mukuvhwi. Havhili, wonti we akumuposheela umuntu umugolosu, mwe pe mugolosu, uMulungu aliimupa woope ishipeelwa inza isha mugolosu.

⁴² Nalyoli nkuvhavhuuzya kuuti, umuntu wonti we akuumupa aminzi aga kumwela, wooka muli ivha vhe vhakuloleha vhatahondeeye, mwe pe mulandati waane, uMulungu aliimupa amalipilo gaakwe.”