Matayi 1 - ULufingwi uLupwa

Uluho ulwa Yeesu

¹ Iga ge mazina aga mu luho ulwa Yeesu Chilisiti, we áfumile mu luho ulwa mwene uDaavhudi na mu luho ulwa Aabulahamu.

² UAabulahamu ámupaafile uYisaaka, uYisaaka ahamupaapa uYaakobu, woope uYaakobu ahamupaapa uYuuda na vhanine vhaakwe.

³ UYuuda ahamupaapa uPeelesi nu Zeela kwa Tamaali. UPeelesi ahamupaapa uHezelooni, uHezelooni ahamupaapa uAalamu,

⁴ uAalamu ahamupaapa uAminaadabu, uAminaadabu ahamupaapa uNaashoni, uNaashoni ahamupaapa uSalimooni,

⁵ uSalimooni ahamupaapa uBoohasi kwa Laahabu, uBoohasi ahamupaapa uOobedi kwa Luti, uOobedi ahamupaapa uYeese,

⁶ woope uYeese ahamupaapa umwene uDaavhudi. Umwene uDaavhudi ahamupaapa uSolomooni kwa mwantanda we áamile mushi wa Uliya.

⁷ USolomooni ahamupaapa uLehobowaamu, uLehobowaamu ahamupaapa uAabiya, uAabiya ahamupaapa uAasa,

⁸ uAasa ahamupaapa uYehoshafaati. UYehoshafaati ahamupaapa uYoolamu, uYoolamu ahamupaapa uUziya,

⁹ uUziya ahamupaapa uYootamu, uYootamu ahamupaapa uAahazi, uAahazi ahamupaapa uHezekiya,

¹⁰ uHezekiya ahamupaapa uManaase, uManaase ahamupaapa uAamoni, woope uAamoni ahamupaapa uYoosiya.

¹¹ UYoosiya ahamupaapa uYekoniya na vhanine vhaakwe, ahavhaliilizyo he avhantu avha mu nsi iya Babeeli vhávhagomile aVhaisilayeeli nu kuvhatwala mu nsi yaavho.

¹² Lwe vhaafiha navho ku Babeeli, uYekoniya ahamupaapa uSheyalitiyeeli, uSheyalitiyeeli ahamupaapa uZelubabeeli,

¹³ uZelubabeeli ahamupaapa uAbihuudi, uAbihuudi ahamupaapa uEliyaakimu, uEliyaakimu ahamupaapa uAzooli.

¹⁴ Woope uAzooli ahamupaapa uSaadoki, uSaadoki ahamupaapa uHaakimu, uHaakimu ahamupaapa uEliyuudi,

¹⁵ uEliyuudi ahamupaapa uEliyezaali, uEliyezaali ahamupaapa uMaatani, woope uMaatani ahamupaapa uYaakobu.

¹⁶ UYaakobu ahamupaapa uYoosefu, umulume wa Maliiya. UMaliiya we ámupaafile uYeesu we wu Chilisiti.

¹⁷ Pe ishi, kufuma kwa Aabulahamu kufishila kwa mwene uDaavhudi kwáli impaapo 14. Havhili, kufuma kwa mwene uDaavhudi kufishila ahavhaliilizyo he avhantu avha mu nsi iya Babeeli vhávhagomile aVhaisilayeeli nu kuvhasaamwa mu nsi yaavho, kwáli impaapo izyamwavho 14. Havhili, kufuma ahavhaliilizyo he vhávhagomile nu kuvhasaamwa kufishila kupaapwa ukwa Chilisiti, kwáli impaapo izyamwavho 14.

Kupaapwa ukwa Yeesu Chilisiti

¹⁸ Kupaapwa ukwa Yeesu Chilisiti kwáli ishi. UMaliiya unyina waakwe ázinjiliilwe nu Yoosefu. Ileelo lwe vhashiili kwimalana, uMaliiya álolesile ali pa vhumwamu. Uvhumwamu uvhwo ávhwazile kwi idala ilya Mupepo uMufinjile.

¹⁹ Ileelo, mwe pe uYoosefu, umulume waakwe áamile muntu mugolosu, atahanza kumupezya insoni uMaliiya. Pe ahasiivha kuuti amuleshe ku vhuzigizigi.

²⁰ Lwe asiivha izyo, uhavhizya uwa MWENE uMulungu ahamuloleshela mu njozi. Uhavhizya uyo ahamuvhuuzya ahati, “We Yoosefu, mwana wa Daavhudi, utahoogope kumwimala uMaliiya, mwe pe uvhumwamu vhwe ali navhwo avhwazile kwi idala ilya Mupepo uMufinjile.

²¹ Kwe apaape umwana umwanaavuli, niiwe kwe umwite izina ilya Yeesu, mwe pe umwana uyo alivhapoha avhantu vhaakwe mu vhutalamalandu vhwavho.”

²² Zyonti izyo zyávhombesile vhwevhulo, inga izwi liila lye uMWENE uMulungu áyanzile kwi idala ilya mukuvhwi uYisaayi lilunjishe. Átili,

²³ “Yeenya! Umulindu we atamumanyile umwanaavuli, aliivha pa vhumwamu. Havhili alipaapa umwana umwanaavuli! Pe umwana uyo vhalimwita izina ilya Maanweli.” Izina ilyo kwe kuuti, “UMulungu ali pooka niiswe.”

²⁴ Lwe uYoosefu adaamula mu tulo, ahavhomba inza vwe uhavhizya uwa MWENE ámuvhuziizye, ahamunyatula uMaliiya.

²⁵ Ileelo vhatámanyiine fwe vhantu vhe vhimaliine kufishila ahavhaliilizyo he uMaliiya ahapaapa umwana uyo. Pe uYoosefu ahamwita izina ilya Yeesu.