Maliko 6 - ULufingwi uLupwa

Vhakumuhaana uYeesu ku mwavho

¹ UYeesu na vhasundikwa vhaakwe vhahafuma ukwo, vhahafiha ku nsi iya ku mwavho kwe ákuliiye.

² Lwe lyafiha isiku ilya Sabaato, ahataliha kuvhasambiilizya avhantu mwi isinagoogi. Avhantu avhinji vhe vháliipo muula, vhahasukumila nkaani nu kuvhuzilizanya kuuti, “Azyazile kwoshi insambiilizyo izi? Havhili vhushindamu vhuli uvhwa njeele uvhu, vhwe apeliilwe?” Havhili vhahati, “Mu nyoovhe zyakwe akuvhomba amafindango amapiti nkaani.

³ Uno te wu selemaala, umwana wa Maliiya? Havhili avhanine vhaakwe te vhe vha Yaakobu nu Yoose nu Yuuda nu Siimoni? Vhuli, avhanine avhalindu vhataliipo pa mwitu panaapa?” Vhahaviitwa nkaani nu kuhaana kumwitiha.

⁴ UYeesu ahati, “Umukuvhwi akushindikwa ukunji kwonti. Ileelo ku mwavho na ku luho lwakwe na ku vhantu avha mu nyumba yaakwe atakushindikwa.”

⁵ Atahavhomba havhili amafindango agamwavho, ileelo ahavhavhiishila inyoovhe avhavhinu vhansi, ahavhaponia.

⁶ Ahasukumila nkaani, mwe pe avhantu ivho vhatámwitisile. UYeesu ahazyunguulaga mu ntala zyeziila nu kusambiilizya.

UYeesu akuvhatuma avhasundikwa

⁷ UYeesu ahavhiita avhasundikwa vhaakwe 12, inga avhasonteelezye vhavhili vhavhili, ahaavhapa amaha aga kushimbizya impepo inkandamanu.

⁸ Lwe vhashiili kwepa ahati, “Nkuvhitishila kuuti munyatule indoogo, ileelo mutahanyatule ishaakulya, ni mbuguulu ni nsavhaazya izya shaaba.

⁹ Nkuvhitishila kuuti muzwale ivilyatu na menda mutahanyatule aga kugalulanya.”

¹⁰ Havhili ahavhavhuuzya ahati, “Inyumba yonti ye vhavhaposheela, mutendamaje munuumwo kufishila pe mukwepa mu nkaaya iyo.

¹¹ Ileelo ponti paala pe vhatavhaposheela, poosye kuvhatejeelezya, lwe mukwepa penepo mupupulaje nu lusuuto lwe luli mu vinama vwinyu.”

¹² Vhaheepa nu kutaliha kukumusya kuuti avhantu vhatonte nu kupinduha.

¹³ Vhaheefwa impepo inkandamanu inyinji, havhili vhahavhapaha amafuta kuvhaponia avhavhinu.

Kufwa ukwa Yoohani uMwozyi

¹⁴ Umwene uHeelodi ahiivwa inongwa izya Yeesu, mwe pe izina lyakwe lyákumusile kwonti. Vhamo vhahayangaga vhahatinji, “Wu Yoohani uMwozyi azyusile! Ye nongwa ali na maha aga kuvhomba amafindango.”

¹⁵ Vhamo vhahayangaga vhahatinji, “UYeesu wu mukuvhwi uEeliya azyusile.” Vhamo vhahatinji, “Uno mukuvhwi wamwavho mu vhakuvhwi avha hali, we azyusile.”

¹⁶ Ileelo uHeelodi lwe ayiivwa inongwa izya Yeesu na vhantu vwe vhahayangaga, ahati, “Wu Yoohani, we námudumuuye itwe, azyuha.”

^17-18 UHeelodi ámunyatuuye uHeloodiya we áali mushi wa munine waakwe uFiilipo. Kuli izyo, uYoohani ahamupililaga kuuti, “Indajizyo izya Moose zitakwitishila kuuti iwe umunyatule umushi wa mukulu waaho.” Pe uHeelodi wuuyo ahasonteelezya avhantu kumulema uYoohani nu kumukunga mu jeela, ahavhomba vhwevhulo kumuhondezya uHeloodiya.

¹⁹ Woope uHeloodiya ahamwuvhililaga uYoohani, ahanzaga kumugoga, ileelo ahapotwaga kumwaga,

²⁰ mwe pe uHeelodi ahamugulilaga. Uweene uHeelodi ahamwogopaga uYoohani, mwe pe ámanyile kuuti muntu umugolosu, havhili mufinjile. Ahasungwaga kumutejeelezya, ileelo lwe amutejeelezya ahaswimililwaga nkaani.

²¹ Pe lihaloleha isiku lye lyáhondeeye uHeloodiya kumugoga uYoohani, lyáli lisiku ilya shikulukuulu isha kupaapwa uHeelodi. UHeelodi ahavhalanjila avhatuuli vhaakwe na vhapiti avha vhasikaali na vhasongo avha mu Galilaaya.

²² Umwana umulindu uwa Heloodiya ahinjila mwe mwámile ishikulukuulu, ahimba ingʼoma nu kumuhondezya uHeelodi na vhe vhátendiime pooka mu shikulukuulu. UHeelodi ahati, “We mulindu, ndaavha shonti she ukwanza.”

²³ Havhili ahalapa ahati, “Ndaavha shonti she ukwanza, she ukulaavha shitahatuushe ishigavho shooka pa vigavho vivhili ivwa vhumwene vhwane, niine kwe nkupe.”

²⁴ Umulindu ula ahafuma, ahasogola kumuvhuziilizya unyina kuuti, “Indaavhe shintu vhuli?” Unyina ahamwamula ahati, “Itwe ilya Yoohani uMwozyi.”

²⁵ Pe umulindu ula ahagaluha naluvhiilo kwa Heelodi ahati, “Nkulaavha umpe panaapa itwe ilya Yoohani uMwozyi mwi isiniya.”

²⁶ Umwene ahaswimiililwa nkaani, ileelo atahanzaga kuhaana, mwe pe álafile pilongolela ilya vhajeni.

²⁷ Pe ahamusonteelezya umusikaali kusogola kuleeta itwe ilya Yoohani. Umusikaali ahinjila mu jeela nu kumudumula uYoohani itwe,

²⁸ ahalileeta mwi isiniya, nu kuumupa umulindu uyo, woope ahaamupa unyina.

²⁹ Pe avhasundikwa avha Yoohani lwe vhiivwa inongwa izyo, vhahasogola kushinyatula ishaala isha Yoohani nu kushisyila mu mbiipa.

UYeesu akuvhaliisya avhantu 5,000

³⁰ Avhatumwa avha Yeesu vhahagaluha kufuma kulumbiilila, vhahavhungaana kwa Yeesu. Vhahamupanjila zyonti zye vhávhomvile nu kusambiilizya.

³¹ UYeesu ahati, “Tujende kukwilu kwe kutali avhantu, tutuuzye hansi.” Ávhavhuziizye vhwevhulo, mwe pe avhantu avhinji vhahavhinzilaga nu kwepa. Kuzya kuvhavhombela avhantu, uYeesu na vhatumwa vhaakwe vháposiitwe nu kuhaaga ahavhaliilizyo aha kulya.

³² Vhahalimbila ivhooti kusogola kukwilu kwe kutáamile avhantu.

³³ Ileelo avhantu avhinji vhahavhalola, lwe vhakwepa vhahamanya kwe vhakusogola. Avhantu vhaala pooka na vhanji kufuma inkaaya zyonti, vhahashimbiilila ulwa pansi kufuma mu nkaaya, kusogola kwe uYeesu na vhatumwa vhaakwe vhahasogolaga, vhahalongolela kufiha.

³⁴ Lwe uYeesu ayiiha mwi ivhooti, ahavhalola avhantu ivhungaana ipiti nkaani, ahavhafwila uvhwila, mwe pe vháamile ngati ngʼonzi zye zitali nu mudiimi. Ahataliha kuvhasambiilizya ivintu ivwinji.

³⁵ Lwe haafiha hamazuuvha, avhasundikwa vhaakwe vhahasogola ku kwakwe, vhahamuvhuuzya vhahati, “Ipa pe pi ilaala, havhili uvhusiku vhwaakwila.

³⁶ Uvhalaje avhantu ivha, vhasogole mu nkaaya na mu ntala izya mupiipi vhayikalile ishaakulya.”

³⁷ UYeesu ahavhaamula ahati, “Vhapi mweneemwe ishaakulya.” Vhahamwamula vhahati, “Vhuli, impiiya idinaali 200, zingakwila kukalila ishaakulya isha kuvhaliisya avhantu avhinji ivha?”

³⁸ Ahavhaamula ahati, “Muli na makaati galinga?” Vhaheenya, vhahaaga gali gasaano ni nswi zivhili.

³⁹ Ahavhavhuuzya kuuti, vhavhatendamishe vhonti mu mpuga pa masole.

⁴⁰ Vhahatendama mu mpuga, zimo amashumi ishumi, izyamwavho amashumi gasaano gasaano.

⁴¹ UYeesu ahanyatula amakaati gasaano igo ni nswi zivhili izyo, aheenya ku mwanya, ahamusalifwa uMulungu. Ahamensulanya amakaati igo, ahaavhapa avhasundikwa, inga vhavhagavhile avhantu ivho. Zyope inswi zivhili izyo ahavhagavhila vhonti.

⁴² Avhantu vhonti vhahalya, vhahiikuta.

⁴³ Avhasundikwa vhaakwe vhahavhungaaniha ivwalila ivwa makaati ni nswi, vihiizula ivitundu 12.

⁴⁴ Vhe vháliiye vháali avhanaavuli 5,000 ishi.

UYeesu akujenda pa minzi pamwanya

⁴⁵ UYeesu ahavhalajizya avhasundikwa vhaakwe kuuti vhinjile mwi ivhooti, vhalongolele kusogola kwi isyila ilya sumbi uwa Galilaaya, mu nkaaya iya Betisaayida, lwe uweene akulilaga ivhungaana ilya vhantu.

⁴⁶ Lwe avhalaga avhantu, ahasogola kwi igamba kumulaavha uMulungu.

⁴⁷ Lwe paafiha pa vhusiku pahati, ivhooti lyámile pahati pa sumbi, woope uYeesu áamile weeka ku nsi inyuumu.

⁴⁸ Ahavhalola avhasundikwa vhaakwe vhakuyimba kuhoma amakasiya, mwe pe inkungu yihavugulaga kulungamana navho. Ahavhaliilizyo he inkanda zikwanda kuvhilishila, uYeesu ahafuma akujenda pa minzi pa sumbi, akwinza kwe avhasundikwa vhaakwe vháali, ahanzaga nu kuvhatuuha.

⁴⁹ Lwe vhamulola, vhahasiivha kuuti pamo muzimu. Vhahahoola inkoolo,

⁵⁰ mwe pe vhonti vhamuvhwenyi, vhahasaaga. Pe ahavhavhuuzya ahati, “Mutogopaje! Gomaaji umwoyo! Neene.”

⁵¹ Lwe ayinjila mwi ivhooti mwe vháamile, inkungu yiila yihaleha kuvugula. Vhahasukumila nkaani mu mooyo gaavho,

⁵² mwe pe vhatázyagiinye naazimo vwe uYeesu ávhomvile amafindango aga makaati. Vhatázyagiinye, mwe pe vháamile vhagomu kuzyaganya.

UYeesu akuvhaponia avhavhinu mu Jenesaleeti

⁵³ Lwe uYeesu na vhasundikwa vhaakwe vhalamba usumbi uwa Galilaaya, vhahafiha mu nkaaya iya Jenesaleeti, vhahiisya ishintu isha kwimilisizya ivhooti.

⁵⁴ Vhoope lwe vhiiha mwi ivhooti, avhantu vhahamumanya uYeesu.

⁵⁵ Vhaheepa naluvhiilo paala, vhahasogola imbazu zyonti, vhahavhaleeta avhavhinu mu mazagala, vhahamulandata uYeesu pe áamile.

⁵⁶ Kwonti kwe ahasogolaga mu nkaaya, mu ntala na mu magunda vhahavhavhiihaga avhavhinu mu nsokooni. Vhahamulambiilizya uYeesu kuuti avhavhinu vhaleme poosye lye likoopi ilya mwenda waakwe vhweleele. Pe avhavhinu vhonti vhe vhálemile, vhahapona.