Maliko 3 - ULufingwi uLupwa

UYeesu akumuponia umuntu isiku ilya Sabaato

¹ UYeesu ahinjila havhili mwi isinagoogi limo, umwo mwáli umuntu wumo we inyoovhe yaakwe yáhataliiye.

² AVhafalisaayi vhahalondolaga idala ilya kumulonjeelela uYeesu. Pe vhahenyaaga inga kuuti amuponie umuntu uyo isiku ilya Sabaato.

³ UYeesu ahamuvhuuzya umuntu uyo we inyoovhe yaakwe yáhataliiye ahati, “Yimiliila pahati ipa.”

⁴ Ahavhavhuziilizya aVhafalisaayi ahati, “Vhuli, kulandatana ni ndajizyo izya Moose lili kwoshi lye likwitishilwa kuvhomba pi isiku ilya Sabaato? Kuvhomba inyinza, pamo imbiivhi? Kupoha uvhupuuma, pamo kugoga?” Vhahapuuma, vhahapootwa kumwamula.

⁵ Ahavhazyamila ku vhuhali, ahaswimiililwa, mwe pe avhwenyi uvhugomu uvhwa mooyo gaavho. Ahamuvhuuzya umuntu ula ahati, “Golosya inyoovhe yaaho.” Woope ahagolosya, inyoovhe yaakwe yihapona.

⁶ AVhafalisaayi lwe vhaalola vwe uYeesu amuvhombela umuntu ula, vhahasogola kupanzanya na vhatuuli avha Heelodi vwe kwe vhamugoje uYeesu.

Impuga iya vhantu kufuma intala zyonti yikumulandata uYeesu

^7-8 UYeesu aheepa penepo pooka na vhasundikwa vhaakwe, ahasogola kwa sumbi uwa Galilaaya, ni mpuga impiti iya vhantu kufuma mu shigavho isha nsi isha Galilaaya, yihamulandata. Avhantu avhinji kufuma intala inyinji, lwe vhiivwa zyonti zye ahazivhombaga, vhahamwinzila kufuma mu Yelusaleemu na mu shigavho isha nsi isha Yudeeya shonti na mu shigavho isha nsi isha Idumaayi na mwi isyila ilya ijenje uYoolodaani na mu nkaaya iya Tiilo ni Siidoni.

⁹ Ahavhavhuuzya avhasundikwa vhaakwe kuuti vhasengaanye ivhooti inga ayiime mwenemwo, lwe akuvhasambiilizya, mwe pe ivhungaana ilya vhantu lihamuviganyaaga.

¹⁰ Ávhavhuziizye avhasundikwa isho, mwe pe ávhaponiizye avhavhinu avhinji na vhonti avha mpungo vhahabunshilanaga, vhahanzaga kumupalamansya.

¹¹ Ulwinji vhonti vhe vháamile ni mpepo inkandamanu, ponti pe vhahamulolaga, vhahagwanga pansi pilongolela lyakwe. Vhahahoolaga kuuti, “Iwe we Mwana wa Mulungu.”

¹² Ileelo ahavhasoha nkaani kuuti vhatamumanyisyaje ku vhantu.

UYeesu akusevha avhatumwa 12

¹³ UYeesu ahazuvha pi igamba, ahavhiita vhe ahavhanzaga, vhoope vhahamulandata.

¹⁴ Ahavhasevha avhantu 12, ahaavhapa izina ilya vhatumwa. Ávhasevile kuuti vhavhanje pooka nawo nu kuuti avhasonteelezye kukumusya izwi lyakwe.

¹⁵ Havhili vhiime na maha aga kwefwa impepo inkandamanu.

¹⁶ Ivha 12 amazina gaavho ge gano: uSiimoni (ahamwita izina ilya Peeteli),

¹⁷ uYaakobu nu munine waakwe uYoohani, avhaana vha Zebedaayi (uYeesu ahaavhapa izina ilya Bowanalige, kwe kuuti, “AVhaana avha Kujilima”). Avhamwavho,

¹⁸ wu Andeleeya nu Fiilipo nu Batolomaayo nu Mataayi nu Toomasi nu Yaakobu uwa Alufaayo nu Tadaayo nu Siimoni we ahayikungulaga kulwila insi yaakwe,

¹⁹ nu Yuuda uwa ku Kaalyoti, we pisinda ámwaniliiye uYeesu.

UYeesu ali na maha kuluusya amaha aga Belizabuuli

²⁰ Lwe uYeesu agaluha kuhaaya pooka na vhasundikwa, ivhungaana lihamuvhungatila havhili. Uweene na vhasundikwa vhaakwe vhahapootwa nu kulya ishaakulya, mwe pe imbombo iya kuvhavhombela avhantu yáali mpiti.

²¹ Avhanine avha Yeesu vhívuuye ku vhantu kuuti uYeesu alalusile, pe vhahati vhasogole vhamunyatule.

²² Avhasambiilizi avha ndajizyo izya Moose vháfumile ku Yelusaleemu vhahafiha kwa Yeesu, vhahati, “Alemwilwe nu Belizabuuli umupiti uwa mpepo inkandamanu. Akushimbizya impepo inkandamanu ku maha aga Belizabuuli!”

²³ UYeesu ahavhiita, ahayanga navho ku miivhi ahati, “Nalyoli uSeetano angayeefwa wuuyo weeka?

²⁴ Inga avhantu avha vhumwene vhwoka vhakulwa, uvhumwene uvhwo vhukunanjiha.

²⁵ Vhoope avhantu avha mu nyumba yooka inga vhanda kulwa vhuuvho vheeka, inyumba iyo yikunanjiha.

²⁶ Woope uSeetano inga akulwa nu Seetano, uvhumwene vhwakwe vhutangajendeelela, vhukunanjiha.

²⁷ Umuntu atanginjila kupumula ivintu mu nyumba iya muntu uwa maha ishisita kumukunga suuti. Ileelo inga amukunga suuti umuntu uwa maha uyo, pe angapumula vwe vili mu nyumba yaakwe.

²⁸ “Nalyoli nkuvhavhuuzya kuuti, avhantu vhaliswilwa uvhutalamalandu vhwonti nu musaamu wonti,

²⁹ ileelo we akumusaamula uMupepo uMufinjile te ahaswilwe naalumo, uvhutalamalandu uvhwo vhuliivha vhwa shiima.”

³⁰ Áyanzile vhwevhulo, mwe pe vhátili, “Ali ni mpepo inkandamanu.”

Unyina na vhanine avha Yeesu

³¹ Unyina na vhanine avha Yeesu vhahafiha, vhahimiilila panzi, vhahamusonteelezya umuntu kumwita.

³² Ivhungaana lye lyátendiime kumuzyunguula lihamuvhuuzya lihati, “Umaayi waaho na vhanine vhaaho vhali panzi, vhakukulondola.”

³³ Ileelo uYeesu ahavhaamula ahati, “Umaayi waane na vhanine vhaane vhe vha naanu?”

³⁴ Ahavheenya vhe vhátendiime kumuzyunguula imbazu zyonti ahati, “Ivha vhe vhamaayi vhaane na vhanine vhaane.

³⁵ Umuntu wonti we akuvhomba zye uMulungu akwanza, uyo we munine waane havhili we wu maayi waane.”