Maliko 16 - ULufingwi uLupwa

Kuzyuha ukwa Yeesu

¹ Isiku ilya Sabaato ahavhaliilizyo aha hamazuuvha Pachiyeeluka, uMaliiya uwa ku Magidaala nu Saloome nu Maliiya unyina wa Yaakobu, vhahakala amafuta ge gakununshila nu mulembo uwa kudinda kuuti ishaala shitahanunshe, inga vhawupashe umuvhili uwa Yeesu.

² Isiku ilya Pamulungu, inzanshi nkaani, vhahasogola ku mbiipa, vhahafiha lwe izuvha lyatukula.

³ Vhahavhuzilizanyaaga vhahatinji, “Wu naanu we kwe atugalagaasizye ivhwe liila lye lili pa mulyango uwa mbiipa?”

⁴ Ileelo lwe vheenya pa mbiipa, vhahalola ivhwe liila ipiti nkaani vhaligalagasiizye, lili pa luvhazu pa mbiipa.

⁵ Lwe vhinjila mu mbiipa, vhahaaga umujaaha atendiime ku luvhazu ulwa kundiilo, azwaye umwenda umuzelu, vhoope vhahahasamala.

⁶ Ileelo umujaaha ula ahati, “Mutahasamalaje. Imanyile kuuti mukumulondola uYeesu uwa ku Naazaleeti we aahomeliilwe. Ataliipo ipa! UMulungu amuzyusiizye! Yeenyi pe vhaamukasiizye.

⁷ Ishi sogooli, mumuvhuuzye uPeeteli na vhasundikwa avhamwavho vhonti, muti avhalongoleeye kusogola ku Galilaaya. Ukwo kwe kwe mumulole, inza vwe ávhavhuziizye.”

⁸ Pe avhantanda vhaala vhaheepa naluvhiilo pa mbiipa, vhahatetema nu kuhasamala. Vhatahamuvhuuzya umuntu nuumo, mwe pe vháamile ni lyoga.

UYeesu akumuloleshela uMaliiya na vhasundikwa vhavhili

⁹ Lwe azyuha inzanshi Pamulungu, uYeesu ahamuloleshela ulwa kwanda uMaliiya uwa ku Magidaala we ámwefwizye impepo inkandamanu 7.

¹⁰ Woope uMaliiya ula, ahasogola kuvhavhuuzya vhe vhahavhanga nu Yeesu. Ahavhaliilizyo iho vhahavhanga vhakuloosya nu kukuuta.

¹¹ Ileelo vhoope lwe vhiivwa kuuti uYeesu mupuuma, havhili kuuti uMaliiya uwa ku Magidaala amuvhwenyi, vhatahiitiha.

¹² Pisinda, uYeesu ahavhaloleshela avhasundikwa vhavhili vhe vháfumile mu nkaaya kusogola ku mwavho, áali ni sheeni ishinji.

¹³ Vhoope vhahasogola kuvhavhuuzya avhasundikwa avhamwavho, ileelo vhatahiitiha.

UYeesu akuvhatumiilizya avhasundikwa vhaakwe

¹⁴ Isiku ilyamwavho uYeesu ahavhaloleshela vhaala 11, lwe vhakulya ishaakulya. Ahavhapilila, mwe pe amooyo gaavho gáamile magomu, havhili, mwe pe vháhaanile kuvhiitiha vhe vhámuvhwenyi lwe azyuha.

¹⁵ UYeesu ahavhavhuuzya ahati, “Musogole mu nsi yonti, mukumusye Izwi iLyinza ku vhantu vhonti.

¹⁶ Umuntu wonti we ayiitiha nu kwozelwa we aliipokwa, ileelo we atakwitiha alilongwa.

¹⁷ Ivilolesyo ivi, kwe vivhombwaje na vhantu vhe vhakuniitiha. Kwe vhefwaje impepo inkandamanu kwi izina lyane, havhili kwe vhayangaje injango injeni.

¹⁸ Inga vhaalema injoha, poosye inga vhangamwela vwe vikuhola, te vivhavhombaje naashimo. Havhili kwe vhavhavhishilaje inyoovhe avhavhinu, vhoope kwe vhaponaje.”

UYeesu akunyatulwa kusogola ku mwanya

¹⁹ Pe lwe ayanga navho, uMwene Yeesu ahanyatulwa kusogola ku mwanya, ahatendama ku luvhazu ulwa kundiilo ulwa Mulungu pa vhushindamu uvhupiti nkaani.

²⁰ Avhasundikwa vhaheepa, vhahasogola kukumusya kwonti. UMwene ahavhombaga imbombo pooka navho, ahahomeshezyaga izwi lyakwe ku vilolesyo vwe vhahavhombaga.