Maliko 15 - ULufingwi uLupwa

Vhakumutwala uYeesu kwa Pilaato

¹ Lwe kwasha, avhapiti avha vhapuuti na vhasongo avha Vhayuuda na vhasambiilizi avha ndajizyo nu lukuvhato lwonti vhahapanzanya. Vhahamukunga uYeesu nu kumutwala kwa mupiti waavho uMuluumi we izina lyakwe vhahatinji uPilaato.

² UPilaato ahamuvhuziilizya uYeesu ahati, “Iwe we Mwene uwa Vhayuuda?” UYeesu ahati, “Iwe we wayanga.”

³ Avhapiti avha vhapuuti vhaala vhahamulonjeelela uYeesu amalandu aminji.

⁴ UPilaato ahamuvhuziilizya havhili ahati, “Vhuli, utakwamula naalimo? Yeenya zye vhakukulonjeelela vwe zya vhwinji!”

⁵ UYeesu atahaamula naalimo havhili. Pe uPilaato ahasukumila nkaani.

UYeesu akulongwa kufwa

⁶ Gáamile maata umulongozi uwa nsi, ahavhaliilizyo aha pa shikulukuulu isha Pasaaka, kumusatula umukungwa wooka we avhantu vhahalaavhaga kuuti asatulwe.

⁷ Pe kwáli umuntu wumo we izina lyakwe vhahatinji uBalaaba. UBalaaba ákunziilwe pooka na vhasambusu avhanji, mwe pe vhávhomvile uvhusambusu uvhupiti nu kugoga.

⁸ Avhantu avhinji vhahasogola kwa Pilaato, vhahanda kumulaavha kuuti avhavhombele inza vwe ahavheelela kuvhavhombela pa shikulukuulu.

⁹ UPilaato ahavhavhuziilizya ahati, “Vhuli, mukwanza kuuti mbasatulile uMwene uwa Vhayuuda uno?”

¹⁰ Ávhavhuziliziizye isho, mwe pe ámanyile kuuti avhapiti avha vhapuuti vhaala, vhámutwaye uYeesu ku kwakwe, mwe pe vháali nu mwone.

¹¹ Avhapiti avha vhapuuti vhahasonzya ivhungaana ilya vhantu kuuti, vhamulaavhe uPilaato amusatulile uBalaaba, ileelo uYeesu asyale.

¹² UPilaato ahavhavhuziilizya havhili ahati, “Ishi mukwanza imuhonzye vhuli umuntu uno we mukuti wu Mwene uwa Vhayuuda?”

¹³ Avhantu vhonti vhahonjezya kuzuma ahalanga, vhahati, “Muhomeele pa shihovhenkanyo!”

¹⁴ UPilaato ahavhuziilizya havhili ahati, “Ananzile ishooni she tumuhomeele?” Ileelo avheene vhahajendeelela kuzuma ahalanga kuuti, “Muhomeele!”

¹⁵ Mwe pe uPilaato ahanzaga kulihondezya ivhungaana ilya vhantu, ahavhasatulila uBalaaba inza vwe vhahanzaga. Ileelo ahalajizya kuuti uYeesu ahomwe nu muchaapu nu kumutwala kuhomeelwa pa shihovhenkanyo.

Avhasikaali vhakumujevhula uYeesu

¹⁶ Avhasikaali vhahamutwala uYeesu mu nyumba iya kukonzezya iya Pilaato, pe vhahiitana impuga yonti iya vhasikaali.

¹⁷ Vhahamuzwalizya umwenda uwa muhoola uwa mafwomfwo ngati wu mwene, vhahatavha ishipambwi isha mimvwa nu kumuvhiiha kwi itwe.

¹⁸ Vhahataliha kumujevhula nu kumulamuha kuuti, “Mwakaata Mwene wa Vhayuuda!”

¹⁹ Vhahamuhoma ni ilanzi kwi itwe, vhahamuswilila amati, vhahamusugamilila nu kwinama pansi ngati vhakumushindiha.

²⁰ Lwe avhasikaali ivho vhaamala kumujevhula, vhahamuzuula umwenda uwo uwa muhoola uwa mafwomfwo nu kumuzwalizya amenda gaakwe havhili. Vhahamutwala panzi, inga vhamuhomeele pa shihovhenkanyo.

UYeesu akuhomeelwa pa shihovhenkanyo

²¹ Lwe vhali mwi idala, vhahahomaana nu muntu wumo we izina lyakwe vhahatinji uSiimoni, umuhaaya uwa mu nkaaya iya Kileene. Umuntu uyo áfumile ku magunda. USiimoni uyo we áamile wu yise wa Alekizanda nu Luufo. Vhahamuvijiilizya kuuti avhegale ishihovhenkanyo isha Yeesu.

²² Vhahamuleeta uYeesu pe vhahatinji pa Goligoota, kwe kuuti pi Ipangaawe ilya Itwe.

²³ Vhahaamupa idivaayi ye vhásangiinye nu mulembo uwa kusheefwa uvhuvhaavi, ileelo ahahaana kumwela.

²⁴ Vhahamuhomeela, vhahagahomela ulutambu amenda gaakwe, inga vhamanye kuuti wu naanu anyatule mwenda vhuli.

²⁵ Yáamile saala taatu inzanshi, lwe avhantu vhaala vhakumuhomeela.

²⁶ Vhávhiisile uvhusimbe pamwanya pa Yeesu, uvhwa vhulonjeelezi vhwakwe vhwe vhukuti, “UMWENE UWA VHAYUUDA.”

²⁷ Ipo kwáli avhapumula vintu vhavhili. Vhoope vhahahomeelwa pa vihovhenkanyo vwavho pooka nu Yeesu, wumo ku luvhazu ulwa kundiilo ulwa Yeesu, uwamwavho ulwa kumongo.

²⁸ Izyo zyávhombesile, inga uVhusimbe uVhufinjile vhulunjishe, vhwe vhukuti, “Vhámuvhaziizye pooka na vhatalamalandu.”

²⁹ Avhantu vhe vhahatuuhaga mwi idala liila vhahamuligaga uYeesu nu kuyinzaanya amatwe gaavho kumusuufwa. Vhahamujevhulaga vhahatinji, “We! Te weewe we watinji ungayimongola iNyumba iMfinjile nu kuyizenga havhili ku nsiku zitatu?

³⁰ Ishi, uyiposhe weneewe, uyiishe pa shihovhenkanyo ipo!”

³¹ Vhwevhulo, vhoope avhapiti avha vhapuuti na vhasambiilizi avha ndajizyo vhahamujevhula. Vhahati, “Aavhaposile avhanji, ileelo atangayipoha wuuyo!

³² Inga uweene wu Chilisiti, havhili wu Mwene uwa Vhaisilayeeli, ayiishe pa shihovhenkanyo, niiswe tumulole, pe kwe tumwitishe.” Vhoope vhe vháhomeliilwe pooka nawo vhahamuliga.

Kufwa ukwa Yeesu

³³ Kwandila ahavhaliilizyo aha vhushenzelo kufishila saala 9, ishiisi shihagwa insi yonti.

³⁴ Lwe yaafiha saala 9, uYeesu ahavhilishila mu njango yaavho kwi izwi ipiti ahati, “Elooyi, Elooyi, laama sabakitaani!” Kwe kuuti, “We Mulungu waane! We Mulungu waane, shooni she wandeha?”

³⁵ Avhantu vhamo vhe vhímiliiye paala, lwe vhiivwa amazwi igo, vhahati, “Tejeelezyi! Akumwita umukuvhwi uEeliya.”

³⁶ Umuntu wumo ahashimbila naluvhiilo, ahatumpiha umwepe mu divaayi inkali, ahavhiiha kwi ilanzi, ahamumwensya, ahati, “Leha twenye inga umukuvhwi uEeliya akwinza kumwisya pa shihovhenkanyo!”

³⁷ Pe uYeesu ahahoola kwi izwi ipiti, ahafwa.

³⁸ Umwenda we wápituliinye iNyumba iMfinjile wuhazeepuha pahati, kufuma pamwanya kufiha pansi.

³⁹ Umupiti uwa vhasikaali we ahimililaga pilongolela paala, lwe aalola vwe uYeesu aafwa sheshiila ahati, “Nalyoli umuntu uno aamile Mwana wa Mulungu!”

⁴⁰ Kwáli avhantanda vhe vhahenyaaga ukutali, áliipo uMaliiya uwa ku Magidaala nu Saloome nu Maliiya unyina wa Yoose umuzuuna uwa Yaakobu.

⁴¹ Avhantanda ivho vhahamulandataga uYeesu nu kumuvhombela, lwe áali mu shigavho isha nsi isha Galilaaya. Avhantanda ivha na vhamwavho avhinji, vháfisile na woope ku Yelusaleemu.

Kusyilwa ukwa Yeesu

⁴² Isiku ilyo lyáli lisiku ilya kusengaanya iSabaato ye yáali isiku lye lihalandataga. Lwe haafiha hamazuuvha,

⁴³ ahinza umuntu wumo we vhahatinji uYoosefu, uwa mu nkaaya iya Alimataayi, ahayigomwa, ahasogola kwa Pilaato, ahamulaavha kuuti anyatule ishaala isha Yeesu, inga ashisyile. UYoosefu ahashindikwaga nkaani, áamile wa mu lukuvhato ulwa Vhayuuda, woope ahavhugulililaga uvhumwene uvhwa Mulungu.

⁴⁴ UPilaato ahasukumila kwivwa kuuti uYeesu aafwa naluvhiilo. Ahamwita umupiti uwa vhasikaali, ahamuvhuziilizya inga uYeesu afuuye hali.

⁴⁵ UPilaato lwe azyaganya kufuma kwa musikaali ula kuuti uYeesu afuuye, ahamwitishila uYoosefu kuuti asogole ashinyatule ishaala isha Yeesu.

⁴⁶ UYoosefu ahakala umwenda umwinza umuzelu uwa kumusyilila uYeesu. Ahashiisya ishaala pa shihovhenkanyo, ahashigwinshila nu mwenda we ákazile, ahashisyila mu mbiipa ye yábaniilwe mwi iyalaawe. Ahaligalagaasizya ivhwe ipiti pa mulyango uwa mbiipa.

⁴⁷ Woope uMaliiya uwa ku Magidaala nu Maliiya unyina wa Yoose vhahalola pe áshisyiliiye ishaala isha Yeesu.