Maliko 14 - ULufingwi uLupwa

Avhalongozi avha Vhayuuda vhakupanzanya kumugoga uYeesu

¹ Zyasyala insiku zivhili kufiha pa shikulukuulu isha Pasaaka ni sha makaati ge vhataluziizye. Avhapiti avha vhapuuti na vhasambiilizi avha ndajizyo vhahalondolaga idala ilya kumulema uYeesu ku vhushevu nu kumugoga.

² Vhátili, “Litahiime lisiku ilya pa shikulukuulu, avhantu vhatahinze vhapele ivho.”

Umwantanda wumo akumwitiilizya uYeesu amafuta

³ Ahavhaliilizyo hehaala uYeesu áamile ku Besaniya mu nyumba iya Siimoni we ku vhwandilo áamile na mambombo. Lwe atendiime kulya ishaakulya, ahinjila umwantanda wumo na mafuta ge gakununshila ge gáamile ga nsavho nkaani. Amafuta igo gáamile mu nsupa ye vhagombeeye ivhwe ilya nsavho nkaani lye vhahatinji ialabaasita. Ahagubula insupa iyo, ahamwitiilizya uYeesu pi itwe kulolesya umushinzi.

⁴ Avhantu vhamo vhe vháali paala vhahaviitwa nu kuvhuzilizyanya kuuti, “Shooni she akuteezya amafuta iga vhweleele?

⁵ Yeenya, amafuta iga twaamile tukazyaje nu kuposheela idinaali 300 nu kutuuha, nu kuuvhapa avhapiina zyenezyo.” Vhahamupilila umwantanda ula.

⁶ Ileelo uYeesu ahati, “Muleshi, shooni she mukumutamwa? Ambombela inyinza.

⁷ Yeenya, avhapiina muli navho insiku zyonti, inga mwasungwa muhondeeye kuvhaavwa ahavhaliilizyo honti. Ileelo ine te mbe niimwe ahavhaliilizyo honti.

⁸ Uweene avhomba liila lye angalivhomba, awupaha umuvhili waane kunsengaanya kwi isiku ilya kusyilwa.

⁹ Nalyoli nkuvhavhuuzya kuuti, mu nsi yonti pe vhalikumusya Izwi iLyinza, niili lye avhomba umwantanda uno kwe liyangwaje kumukumbuha.”

UYuuda akwanza kumwaniila uYeesu

¹⁰ UYuuda uwa ku Kaalyoti, we áamile wooka mu vhasundikwa vhaala 12, ahasogola kumwaniila uYeesu ku vhapiti avha vhapuuti kuuti avhalongole kumulema uYeesu.

¹¹ Lwe vhiivwa vwe akuyanga vhahaseshela, vhahati kwe vhaamupe impiiya. Woope ahanda kulondola ahavhaliilizyo ahinza aha kumwaniila uYeesu.

Avhasundikwa avha Yeesu vhakusengaanya ishikulukuulu isha Pasaaka

¹² Isiku ilya kwanda ilya shikulukuulu isha makaati ge vhataluziizye, ahavhaliilizyo aha kuvhoola ahagonzi aha Pasaaka, avhasundikwa vhaakwe vhahamuvhuziilizya uYeesu vhahati, “Tusengaanye kwoshi ishikulukuulu isha Pasaaka?”

¹³ UYeesu ahavhasonteelezya avhasundikwa vhavhili ahati, “Musogole mu nkaaya, kwe muhomaane nu mwanaavuli wumo, ayitwinsile insonta iya minzi. Mumulandate umuntu uyo.

¹⁴ Mu nyumba mwe ayinjila, mumuvhuziilizye umuhaata nyumba iyo muti, ‘UMusambiilizi akuvhuziilizya kuuti, “Ishumba isha vhajeni shili kwoshi? Nkwanza kulya ishikulukuulu isha Pasaaka pooka na vhasundikwa vhaane.”’

¹⁵ Woope kwe avhalanje ishumba ishipiti isha pamwanya mu nyumba injelenkanu, she vhasengiinye nziila apa kutendama. Umwo mwe mutusenganizanye.”

¹⁶ Avhasundikwa ivho vhaheepa, vhahasogola mu nkaaya iyo. Lwe vhaafiha, vhahaaga zyonti zili sheshiila inza vwe uYeesu ávhavhuziizye. Pe vhahasengaanya ishaakulya isha shikulukuulu isha Pasaaka.

¹⁷ Lwe havha havhaliilizyo aha hamazuuvha, uYeesu ahafiha paala pooka na vhasundikwa vhaakwe 12.

¹⁸ Lwe vhakulya, uYeesu ahavhavhuuzya ahati, “Nalyoli nkuvhavhuuzya kuuti, wumo muli imwe we akulya pooka niine kwe ananiile.”

¹⁹ Avhasundikwa vhaakwe vhahaswimiililwa, vhahanda kumuvhuziilizya, wooka wooka kuuti, “Vhuli, neene?”

²⁰ UYeesu ahavhaamula ahati, “Ali pahati yiinyu imwe 12 we akusanzila ikaati pooka niine mu luvhiga.

²¹ Ne Mwana wa Aadamu kwe mfwe inza vwe nsimviliilwe mu Vhusimbe uVhufinjile. Ileelo asheela umuntu uyo we akunaniila. Yaamile kwashi ku kwakwe, inga atápafwilwe.”

Ishaakulya isha Mwene

²² Lwe vhakulya, uYeesu ahanyatula ikaati, ahaliloota, ahalimensula, ahaavhapa, ahati, “Nyatuuli, uno we muvhili waane.”

²³ Havhili ahanyatula ulupindi lwe lwáli ni divaayi, ahamusalifwa uMulungu, ahaavhapa, vhoope vhahamwelela vhonti.

²⁴ Ahati, “Iga mavhanda gaane aga lufingwi ge gakwitiha kuzya vhantu avhinji.

²⁵ Nalyoli nkuvhavhuuzya imwe kuuti, te nkamwele havhili idivaayi, kufishila isiku liila pe ndimwela idivaayi impwa mu vhumwene uvhwa Mulungu.”

²⁶ Pe vhahateela ulwimbo ulwa kumutiima uMulungu. Lwe vhaamala, vhaheepa paala, vhahasogola kwi igamba ilya Mazayituuni.

UYeesu akuyanga kuuti uPeeteli kwe amuhaane

²⁷ UYeesu ahavhavhuuzya avhasundikwa vhaakwe ahati, “Uvhusiku uvhwa ileelo mwenti kwe mushimbile mundeshe, mwe pe yisimviilwe mu Vhusimbe uVhufinjile kuuti, ‘Ndimuhoma umudiimi, ni ngʼonzi zilisaata.’

²⁸ “Ileelo lwe uTaata waane anzyusya, ndivhalongolela kusogola ku Galilaaya.”

²⁹ Ileelo uPeeteli ahati, “Poosye inga vhakukuleha vhonti, ine te nkuleshe inga hansi.”

³⁰ UYeesu ahamwamula ahati, “Nalyoli nkukuvhuuzya kuuti, uvhusiku uvhwa ileelo lwe inkanda yishiili kuvhilishila luvhili, kwe unkaane lutatu.”

³¹ Ileelo uPeeteli ahahaana nkaani ahati, “Poosye inga nkwanzilwa kufwa pooka niiwe, ine te nkuhaane iwe.” Avhamwavho vhoope vhahayanga vhwevhulo.

UYeesu akumulaavha uMulungu mu shilimbika isha Getisemaani

³² Pe vhahafiha pa shilimbika shimo she vhahatinji iGetisemaani. UYeesu ahavhavhuuzya avhasundikwa vhaakwe ahati, “Mutendame ipa lwe nkulaavha.”

³³ Ahamunyatula uPeeteli nu Yaakobu nu Yoohani, ahataliha kuswimiililwa nkaani nu kupulupuuta mu mwoyo.

³⁴ Ahati, “Umwoyo waane wuswimiliilwe nkaani, nkuvha ngati naakufwa, muvhe ipa, mudamulilaje.”

³⁵ Ahasogola pilongolela hansi, ahagwa ishikupama, ahalaavha kuuti, yingavha hinza ahavhaliilizyo aha mayimba igo hasegushe.

³⁶ Ahati, “Taata, ku kwaho zyonti zikuvhombeha, nkukulaavha kuuti uneefwezye amayimba iga. Ileelo te vwe nkasiime ine, nkandi vwe ukasiime weewe.”

³⁷ Pe uYeesu ahagaluha, ahaaga vhakaasite utulo, ahamuvhuziilizya uPeeteli ahati, “Siimoni, vhuli, ukaasite? Uposiitwe kudamulila isaala inga lyoka vhweleele?

³⁸ Damuuli, mumulaavhaje uMulungu, kuuti aavhape amaha, inga indingo zitahinze zivhapoote. Mukusungwa kuvhomba ahinza ileelo amavhili giinyu mayeyevhazu.”

³⁹ UYeesu ahasogola havhili kulaavha, ahavhuyizyaga kulaavha amazwi gegaala.

⁴⁰ Ahagaluha havhili, ahaaga vhakaasite utulo, mwe pe aminso gaavho gáali mamwamu. Vhahapootwa ilya kumwamula.

⁴¹ Ahinza ulwa vhutatu ahati, “Niishi mukaasite utulo nu kutuuzya? Ishi zyakwila! Yeenya, ahavhaliilizyo haafiha, ne Mwana wa Aadamu kwe vhambiishe mu nyoovhe izya vhatalamalandu.

⁴² Vhuushi, tujendi. Yeenya, we akunaniila apalamiiye.”

UYeesu akulemwa

⁴³ Ahavhaliilizyo hehaala uYeesu lwe akuyanga, uYuuda we wooka mu vhasundikwa 12 ahafiha ni ivhungaana ilya vhantu vhe vháamile na mapanga ni nduugu. Avhantu ivho, avhapiti avha vhapuuti na vhasambiilizi avha ndajizyo izya Moose na vhasongo vhávhasonteleziizye.

⁴⁴ UYuuda we akumwaniila uYeesu, ápezile avhapiiye ishilolesyo, ávhavhuziizye átili, “Ula we namwofwa, we muhamulemaje, nu kumunyatula.”

⁴⁵ UYuuda lwe aafiha vhweleele paala, ahasogola kwa Yeesu ahati, “We Musambiilizi!” Ahamwofwa.

⁴⁶ Pepaala, avhantu vhaala vhahamulema uYeesu nu kumukunga.

⁴⁷ Wumo we áali nu Yeesu ahanyatula ipanga lyakwe, ahamudiba nu kumudumula ikutwi umuzya uwa mupuuti umupiti.

⁴⁸ UYeesu ahavhavhuziilizya ahati, “Shooni she mwaninzila na mapanga ni nduugu ngati mwinzile kumulema umupumula vintu?

⁴⁹ Insiku zyonti navhanga niimwe nkusambiilizya pa Nyumba iMfinjile, ileelo mutandemaga! Ileelo izi zyavhombeha, inga zye zisimviilwe mu Vhusimbe uVhufinjile zilunjishe.”

⁵⁰ Pe avhasundikwa vhaakwe vhonti, vhahamuleha weeka nu kushimbila.

⁵¹ Áliipo umujaaha wumo ahamulandataga uYeesu, ázwaye igolole izelu lyeka vhweleele. Avhantu vhaala vhahalinga kumulema,

⁵² ileelo ahafutumuha nu kulileha igolole lyakwe, ahashimbila ishitali.

UYeesu pilongolela ilya vhalongozi avha Vhayuuda

⁵³ Avhantu ivho vhahamutwala uYeesu kwa mupuuti umupiti, vhahamuvhungaanila vhonti, avhapiti avha vhapuuti na vhasongo na vhasambiilizi avha ndajizyo izya Moose.

⁵⁴ UPeeteli ahavhanga akulandata mwisinda ukutali, ahinjila pa lupitu ulwa nyumba iya mupuuti umupiti, ahatendama pooka na vhavhomvi avha mupuuti umupiti kwota umwoto.

⁵⁵ Pe avhapiti avha vhapuuti nu lukuvhato lwonti ulwa Vhayuuda, vhahanda kulondola uvhwahoome uvhwa kumulonga uYeesu, inga vhamugoje, ileelo vhatahavhwaga.

⁵⁶ Avhantu avhinji vhahahomeshezyaga inongwa izya ilenga, ileelo zitahalingaanaga.

⁵⁷ Avhantu vhamo vhahimiilila kuhomeshezya ilenga, vhahati,

⁵⁸ “Twaamwivuuye akuyanga kuuti, ‘Ingayimongola iNyumba iMfinjile ino ye yázengwilwe ni nyoovhe izya vhantu, na ku nsiku zitatu ingazenga iyinji ye yitakuzengwa ni nyoovhe izya vhantu.’”

⁵⁹ Pooka niizyo uvhwahoome vhwavho vhutahalingaana.

⁶⁰ Pe umupuuti umupiti ahimiilila pahati yaavho, ahamuvhuziilizya uYeesu, ahati, “Shooni she utakuvhaamula vwe vhakuhomeshezya?”

⁶¹ Ileelo uYeesu ahapuuma, atahaamula naashimo. Pe umupuuti umupiti ahamuvhuziilizya havhili ahati, “Iwe we Chilisiti, uMwana wa Mulungu uMushindamu?”

⁶² UYeesu ahati, “Ine ne neene. Niimwe kwe mundole ne Mwana wa Aadamu ntendiime ku luvhazu ulwa kundiilo ulwa Mulungu uwa Maha Gonti pa vhushindamu uvhupiti nkaani, havhili kwe mundole nkwinza mu mavhingo.”

⁶³ Lwe umupuuti umupiti ayiivwa izyo, ahazeepula amenda gaakwe kulolesya kuuti avisiitwe, ahati, “Tukwanza avhahoome avhanji vhaashi?

⁶⁴ Mwivwa mweneemwe vwe akusaamula! Mukuti vhuli?” Vhonti vhahamulonga vhahati, “Uyo akwanzilwa kufwa.”

⁶⁵ Avhantu vhamo paala vhahataliha kumuswilila amati, vhahamupinya ni shitambaala ku minso, vhahataliha kumuhoma ni mbuli, vhahati, “Twivwe kuvhwa, wu naanu we akuhoma!” Avhavhomvi vhoope vhahamunyatula nu kumukanza na makoofi.

UPeeteli akumuhaana uYeesu

⁶⁶ UPeeteli lwe ali pepaala pa luvhungaano, umuvhomvi umwantanda uwa mupuuti umupiti ahinza.

⁶⁷ Ahamulola uPeeteli lwe akwota umwoto, ahamuzyamila, ahati, “Niiwe waamile pooka nu Yeesu uMunaazaleeti.”

⁶⁸ Ileelo uPeeteli ahamuhaanila ahati, “Ntakukumanyinsanya inga hansi, havhili ntakumanya zye ukuyanga!” UPeeteli aheepa paala, ahasogola pa mulyango, ahavhaliilizyo hanaaho inkanda yihavhilishila.

⁶⁹ Umuvhomvi umwantanda ula ahamulola havhili, ahanda kuvhavhuuzya avhantu vhe vhímiliiye paala ahati, “Umuntu uno ali pooka nu Yeesu.”

⁷⁰ UPeeteli ahahaana havhili. Lwe pahaavha hansi, vhe vhimiliiye paala vhahati, “Nalyoli iwe we wooka mu vhantu ivho, mwe pe niiwe we muntu uwa ku Galilaaya.”

⁷¹ UPeeteli ahataliha kutipa nu kulapa, ahati, “Ntamumanyile umuntu uyo we mukumuyanga.”

⁷² Ahavhaliilizyo hanaaho inkanda yihavhilishila ulwa vhuvhili. UPeeteli ahalikumbuha izwi liila lye uYeesu ámuvhuziizye átili, “Lwe inkanda yishiili kuvhilishila luvhili, kuuti uvhe wankaana lutatu.” UPeeteli ahaswimiililwa, ahanda kukuuta nkaani.