Maliko 12 - ULufingwi uLupwaIshiholanyo isha vhalimi avhavhiivhi ( uMataayi 21:33-46 ; uLuuka 20:9-19 ) 1 UYeesu ahanda kuyanga na vhantu ku viholanyo ivwamwavho ahati, “Umuntu wumo álimile umugunda uwa mampensya, ahagazenjeelela uluvhaga, ahabana inshelenje iya kufinyila amampensya. Ahazenga inganzya intali iya kwimililila umuguulizi, ahavhavhiiha avhalimi avha kuguulila nu kulimiilila amampensya igo, ahanzaga kuuti inga gaagoma vhahinze vhagavhane nawo, pe ahashuula kusogola ku nsi iya kutali. 2 Lwe ahavhaliilizyo aha kuyevhila haafiha, ahamusonteelezya umuzya waakwe ku vhalimi ivho, inga amunyatulile amampensya gamo ge vháyevhiiye mu mugunda waakwe. 3 Ileelo umuzya uyo lwe aafiha, avhalimi ivho vhahamulema, vhahamuhoma nu kumushimbizya inyoovhe zyeka. 4 Umuhaata mugunda ahamusonteelezya umuzya uwamwavho. Ileelo woope vhahamuvwalazya itwe nu kumusuupizya. 5 Ahamusonteelezya umuvhomvi uwamwavho havhili, uweene vhahamugoga. Ahavhasonteelezya avhamwavho avhinji, vhoope vhahavhahoma nu kuvhagoga vhamo. 6 “Pisinda, ahasyala we mwana waakwe unkundwa, umwanaavuli, ahamusonteelezya woope, ahati, ‘Uno kwe vhamushindishe, mwe pe mwana waane.’ 7 Ileelo avhalimi ivho lwe vhamulola umwana uyo, vhahapanzanya vhahati, ‘Uno we mupwana waakwe. Ishi nzaaji tumugoje, nu mugunda uno kwe wuvhe wiitu.’ 8 Vhahamulema nu kumugoga nu kumukwesela kunzi ku mugunda.” 9 Pe uYeesu ahavhavhuziilizya ahati, “Ishi umuhaata mugunda ula alihonzya vhuli? Aliyinza nu kuvhalovwa, nu mugunda uwo aliivhapa avhalimi avhanji. 10 Vhuli, mutahavhaazya uVhusimbe uVhufinjile? Yisimviilwe kuuti, ‘Ivhwe lye avhazenzi vhálihaanile, lye lyavha livhwe ipiti ilya pa shipembe isha nyumba. 11 UMWENE uMulungu we álivhiisile ivhwe ilyo, lyope lya kusukumizya pa minso giitu.’” 12 Avhasambiilizi avha ndajizyo na vhapiti avha vhapuuti na vhasongo avha Vhayuuda, vhahamanya kuuti ishiholanyo isho shihavhayangaga vhuuvho. Pe vhahanzaga kumulema pepaala, ileelo vhahoogopa ivhungaana ilya vhantu. Pe vhahamuleha, vhaheepa. Kusonka umusonko kwa Kayisaali ( uMataayi 22:15-22 ; uLuuka 20:20-26 ) 13 Avhalongozi avha Vhayuuda vhahavhasonteelezya aVhafalisaayi na vhatuuli avha mwene uHeelodi kuuti vhamulinje uYeesu ku mazwi. 14 Lwe vhaafiha, vhahati, “We Musambiilizi, tumanyile kuuti iwe we mugolosu, utakuvhasaajila avhantu kulandatana nu vhupiti vhwavho. Havhili ukusambiilizya idala ilya Mulungu mu vhwanalyoli. Vhuli, indajizyo izya Moose zikutwitishila kusonka umusonko kwa Kayisaali?” 15 Ileelo uYeesu ahamanya ishifumbo shaavho, ahavhavhuziilizya ahati, “Shooni she mukuntega? Ndeeteli insavhaazya iya dinaali injilole.” 16 Vhahamuleetela yooka, ahati, “Ishiholanyo ishi nu vhusimbe vhwe vhuli pa nsavhaazya ino vwa naanu?” Vhahamwamula vhahati, “Vwa Kayisaali!” 17 Pe uYeesu ahavhavhuuzya ahati, “Ishi, ivwa Kayisaali mumupanje uKayisaali, vwope ivwa Mulungu mumupanje uMulungu.” Avhantu ivho vhahasukumila nkaani vwe uYeesu áyamuuye. Kuzyuha ukwa vhafwe ( uMataayi 22:23-33 ; uLuuka 20:27-40 ) 18 Pisinda, aVhasadukaayi vhe vhahasambilizyaga kuuti avhafwe te vhahazyushe, vhahasogola kwa Yeesu. Vhahamuvhuziilizya 19 vhahati, “Musambiilizi, uMoose átusimbiiye indajizyo kuuti inga umwanaavuli aafwa, amuleha umushi waakwe ishisita umwana, yikwanzilwa kuuti umunine waakwe amupwane umuziishe uyo, inga amupaapile avhaana umuyazi. 20 Ishi, kwáli avhanaavuli 7 vhe vháamile uyise wooka. Uwa kwanda ahanyatula umwantanda, ileelo ahafwa, atahaleha umwana. 21 Uwa vhuvhili ahamupwana umuziishe uyo, ileelo woope ahafwa, atahaleha umwana, nu wa vhutatu vhwevhulo. 22 Pisinda, vhonti 7 vhahafwa, vhatahaleha umwana. Lwe vhaasila vhonti, umwantanda uyo woope ahafwa. 23 Ishi, inga kuzyuha ukwa vhafwe kuliipo, isiku ilya kuzyuha umwantanda uyo aliivha mushi wa naanu? Tukuvhuziilizya isho, mwe pe átendiime na vhonti 7.” 24 UYeesu ahavhaamula ahati, “Mupuvile nkaani, mwe pe mutavhumanyile uVhusimbe uVhufinjile na maha aga Mulungu. 25 Avhafwe lwe vhazyuha, te vhahiimale, poosye kwimalwa, mwe pe vhaliivha inza avhahavhizya ku mwanya. 26 Ileelo inongwa izya kuzyuha avhafwe, mutahavhaazya mwi ikalaata ilya Moose pe likuyanga izya mwoto we wuhaahaga pa shipindi? UMulungu ámuvhuziizye uMoose átili, ‘Ine ne Mulungu uwa Aabulahamu nu Yisaaka nu Yaakobu.’ 27 Uweene te wu Mulungu uwa vhafwe, wu Mulungu uwa vhalanzi. Nalyoli mupuvile nkaani.” Ululajizyo ulupiti kuluusya izinji zyonti ( uMataayi 22:34-40 ; uLuuka 10:25-28 ) 28 Umusambiilizi wumo uwa ndajizyo, ahiivwa vwe vhakuyanga nu Yeesu. Lwe aalola kuuti avhaamula ahinza, ahanda kumuvhuziilizya uYeesu ahati, “Mu ndajizyo zyonti, lulajizyo vhuli lwe lwa kwanda?” 29 UYeesu ahamwamula ahati, “Ululajizyo ulwa kwanda lwe luno, ‘Vhaisilayeeli tejeelezyi, uMWENE wiitu uMulungu, wu MWENE weeka. 30 Niimwe mumukundaje uMWENE wiinyu uMulungu ku mooyo giinyu gonti na ku vhulanzi vhwinyu vhwonti na ku njeele zyinyu zyonti na ku maha giinyu gonti.’ 31 Ululajizyo ulwa vhuvhili lwe luno, ‘Umukundaje umupalamani waaho inza vwe ukuyikunda weneewe.’ Lutaliipo ululajizyo ulunji ulupiti kuluusya izyo.” 32 Umusambiilizi ula ahati, “We Musambiilizi, nalyoli wayanga ahinza kuuti uMulungu ali wooka, ataliipo uwunji haa, nkandi uweene. 33 Havhili kumukunda ku mwoyo wonti na ku njeele zyonti na ku maha gonti, nu kumukunda umupalamani waaho inza vwe ukuyikunda weneewe, hinza kuvhomba zyonti izyo, kuluusya kufumwa impuutile izya kulungulizya ni zinji zyonti.” 34 UYeesu lwe aalola kuuti ayaamula ahinza ahati, “Ishi wanda kuzyaganya inza vwe zikwanzilwa kwinjila ku vhumwene uvhwa Mulungu.” Pe umuntu nuumo atahasheela kumuvhuziilizya. UChilisiti Mwana wa Daavhudi ( uMataayi 22:41-46 ; uLuuka 20:41-44 ) 35 UYeesu ahasambilizyaga pa Nyumba iMfinjile, ahati, “Avhasambiilizi avha ndajizyo izya Moose, vhakuti uChilisiti Mwana wa mwene uDaavhudi inza vhuli? 36 Umweneesho uDaavhudi ásimvile ku maha aga Mupepo uMufinjile kuuti, ‘UMWENE uMulungu ámuvhuziizye uMwene waane átili, “Tendaama ku luvhazu lwane ulwa kundiilo pa vhushindamu uvhupiti nkaani, kufishila pe navhavhiiha avhalugu vhaaho pansi pa vinama vwaho.”’ 37 Inga uDaavhudi wuuyo átili uChilisiti wu Mwene waakwe, pe woope uChilisiti angavha mwana waakwe inza vhuli?” Ivhungaana ipiti liila lihamutejelezyaga ku luseshelo ulupiti. UYeesu akuvhasoha avhasundikwa vhaakwe izya vhasambiilizi avha ndajizyo izya Moose ( uMataayi 23:1-36 ; uLuuka 20:45-47 ) 38 UYeesu ahasambilizyaga havhili ahatinji, “Muvhe minso na vhasambiilizi avha ndajizyo, vhe vhakusungwa kutandaala vhazwaye inkanzu, inga avhantu vhavhalamuhaje ku mushinzi mu madala. 39 Lwe vhali mu masinagoogi, vhakusungwa kutendama pa vitengo ivwa pilongolela. Mwope mu mulyo vhakutendama mu vitengo ivwa vhapiti. 40 Avhantu ivha vhakuvhafwula ivintu avhaziishe! Ku shifumbo shaavho vhakupuuta impuuto intali, inga avhantu vhatinji vhagolosu. Kuli izyo, uMulungu aliivhapa isunde ipiti!” Impuutile iya muziishe ( uLuuka 21:1-4 ) 41 UYeesu ahatendama pa Nyumba iMfinjile papiipi ni shiliilo isha kufumwizya impuutile kwa Mulungu. Ahenyeelezya ivhungaana ilya vhantu vwe lihafumwaga impiiya mu shiliilo. Avhadumbwe avhinji vhahavhiihaga impiiya inyinji. 42 Ahafiha umwantanda wumo umuziishe umupiina. Ahavhiiha utukoovheli tuvhili vhweleele. 43 Pe uYeesu ahavhiita avhasundikwa vhaakwe ahati, “Nalyoli nkuvhavhuuzya kuuti, umuziishe umupiina uno, we aafumwa inyinji kuluusya avhanji vhonti vhe vhavhiisile mu shiliilo. 44 Nkuvhavhuuzya isho, mwe pe avhanji vhonti, vhaafumwa ivintu ivinsi mu vintu vwavho ivwinji. Ileelo umuziishe uno mu vhupiina vhwakwe aafumwa vwonti vwe vwaamile vwa kumwavwa mu vhulanzi vhwakwe!” |
© 2021 Wycliffe Bible Translators, Inc.
Wycliffe Bible Translators, Inc.