Maliko 10 - ULufingwi uLupwa

UYeesu akusambiilizya izya kulehaana

¹ UYeesu na vhasundikwa vhaakwe vhaheepa pe vhahavhanga, vhahazyunguulaga mu shigavho isha nsi isha Yudeeya, na mu nsi iya mwi isyila ilya ijenje uYoolodaani. Ivhungaana ilya vhantu lihasogolaga ku kwakwe nu kumuzyunguula. Ahataliha kuvhasambiilizya inza vwe ahavhombaga.

² Isiku limo, aVhafalisaayi vhahasogola kumulinga, vhahanda kumuvhuziilizya, vhahati, “Vhuli, indajizyo izya Moose zikwitishila umulume kumutavhula umushi waakwe?”

³ UYeesu ahamwamula ahati, “UMoose álajiziizye ishooni?”

⁴ AVhafalisaayi vhahamwamula vhahati, “UMoose ahiitiha kuuti umwanaavuli amupanje umushi ukalaata uwa kulehaana nu kumuleha.”

⁵ UYeesu ahati, “UMoose ásimvile indajizyo izyo, mwe pe ávhwenyi uvhugomu uvhwa mooyo giinyu.

⁶ Ileelo kufuma ku vhwandilo uvhwa nsi, ‘UMulungu ápezile umwanaavuli nu mwantanda.’

⁷ ‘Kuli izyo, umwanaavuli alimuleha uyise nu nyina nu kusopenkana nu mushi waakwe,

⁸ vhavhili ivho vhaliivha umuvhili wooka.’ Pe avhantu ivho vhatakuvha vhavhili havhili, vhakuvha umuvhili wooka.

⁹ Kuli izyo, she uMulungu ashisopenkiinye, umuntu atahashilehaanye.”

¹⁰ Lwe vháali mu nyumba yimo, avhasundikwa vhaakwe vhahamuvhuziilizya havhili izwi ilya kulehaana.

¹¹ Ahavhavhuuzya ahati, “Umuntu wonti we akumutavhula umushi waakwe nu kunyatula umwantanda uwunji, akuvhomba uvhuvhembu, akumunanjila umushi waakwe.

¹² Woope umwantanda inga amuleha umulume waakwe nu kwimalwa nu mwanaavuli uwunji, akuvhomba uvhuvhembu.”

UYeesu akuvhaloota avhaana avhansi

¹³ Isiku limo, avhantu vhámuleteeye uYeesu avhaana, inga avhavhiishile inyoovhe kuvhaloota, ileelo avhasundikwa vhaakwe vhahavhapilila vhe vhávhaleesite avhaana ivho.

¹⁴ Ileelo uYeesu atahasungwa lwe aalola vhakuvhadindila, ahati, “Vhaleshi avhaana ivho vhinze kuli ine, mutavhadindaje ndaali, mwe pe uvhumwene uvhwa Mulungu vhwa vhantu vhe vhali inza avhaana ivho.

¹⁵ Nalyoli nkuvhavhuuzya kuuti, umuntu wonti we atakumusuuvhila uMulungu inza umwana vwe akumusuuvhila utaata waakwe, te ahinjile naalumo mu vhumwene uvhwa Mulungu.”

¹⁶ UYeesu ahavhapahatila avhaana ivho, ahavhavhiishila inyoovhe, kuvhaloota.

UYeesu akusambiilizya izya vhulanzi uvhwa shiima

¹⁷ UYeesu ahanda kwepa paala, umuntu wumo ahamushimbiilila, ahamusugamilila, ahamuvhuziilizya ahati, “We Musambiilizi umwinza, imbombe ishooni, inga nkaposheele uvhulanzi uvhwa shiima?”

¹⁸ UYeesu ahamwamula ahati, “Shooni she ukumbuuzya kuuti ne mwinza? Ataliipo we mwinza, nkandi we Mulungu weeka!

¹⁹ Uzimanyile indajizyo izya Mulungu zye zikuti, ‘Utagogaje, utavhembuhaje, utiivhaje, utafumwaje uvhwahoome uvhwa ilenga, utahopenkanyaaje, umushindihaje utaata waaho nu maayi waaho.’”

²⁰ Woope ahamwamula, ahati, “We Musambiilizi, indajizyo zyonti izyo nkazilema kufuma kwe ku vhunsi vhwane.”

²¹ UYeesu ahamwenya, ahamukunda, ahamuvhuuzya ahati, “Usovheliilwe ishintu shooka. Sogoola ukazye ivintu vwonti vwe uli navwo, impiiya zye waposheela uuvhape avhapiina. Inga wavhomba vhwevhulo, ukuvha wayisengulila inkoma ku mwanya. Pe uyinze, undandate.”

²² Umuntu uyo lwe ayiivwa izyo, aheepa uku aswimiliilwe nkaani, mwe pe áamile ni vwuma ivwinji.

²³ UYeesu aheenya imbazu zyonti, ahavhavhuuzya avhasundikwa vhaakwe, ahati, “Shiliivha shigomu nkaani avhadumbwe kwinjila mu vhumwene uvhwa Mulungu!”

²⁴ Avhasundikwa vhaakwe vhahasukumila kwivwa amazwi gaakwe. UYeesu ahavhavhuuzya havhili ahati, “Vhaana vhaane, shigomu nkaani kwinjila mu vhumwene uvhwa Mulungu!

²⁵ Shipupuusu nkaani ingamila kutuuha pi indovhoolwi ilya nsindaani, kuluusya udumbwe kwinjila mu vhumwene uvhwa Mulungu.”

²⁶ Avhasundikwa vhaakwe vhahasukumila nkaani, vhahavhuzilizanya vhahati, “Ishi inga vwe zili vhwevhulo, pe wu naanu we angaapokwa?”

²⁷ UYeesu ahavhazyamila, ahati, “Ku vhantu zitangavhombeha, ileelo te kwa Mulungu, mwe pe kwa Mulungu zyonti zikuvhombeha.”

²⁸ UPeeteli ahanda kumuvhuuzya kuuti, “Yeenya, iswe tuvilesile ivintu vwonti, tukukulandata iwe!”

²⁹ UYeesu ahati, “Nalyoli nkuvhavhuuzya kuuti, umuntu wonti we ayilesile inyumba yaakwe, poosye avhanine avhanaavuli, poosye avhantanda, poosye utaata waakwe, poosye umaayi waakwe, poosye avhaana, poosye amagunda, ku zyane na kuzya Izwi iLyinza ilya Mulungu,

³⁰ uMulungu kwe aamupe ivwinji nkaani ahavhaliilizyo iha he ali mu nsi. Kwe avhe ni nyumba na vhanine avhanaavuli na vhantanda nu nyina na vhaana na magunda. Pooka niizyo kwe avhanje na mayimba. Ahavhaliilizyo he hakwinza, aliposheela uvhulanzi uvhwa shiima.

³¹ Ileelo avhantu vhe vhatakushindikwa ahavhaliilizyo iha vhaliivha vhantu vhe vhakushindikwa, vhoope vhe vhakushindikwa ahavhaliilizyo iha, vhaliivha vhantu vhe vhatakushindikwa.”

UYeesu akukuvhwa ulwa vhutatu izya kufwa nu kuzyuha kwakwe

³² UYeesu na vhasundikwa vhaakwe vháali mwi idala kuzuvha ku Yelusaleemu, avhantu avhanji vhahanda kuvhalandata. UYeesu ahalongolela mwilongolela, avhasundikwa vhaakwe vhahasukumila, avhantu vhe vhahamulandataga vhahiima ni lyoga. Ahavhanyatula havhili kukwilu vhaala 12, ahanda kuvhavhuuzya zye kwe zimwaje.

³³ UYeesu ahati, “Yeenyi, tukuzuvha ku Yelusaleemu. Ukwo ne Mwana wa Aadamu nkusogola kulemwa nu kutwalwa ku vhapiti avha vhapuuti na vhasambiilizi avha ndajizyo. Vhoope kwe vhandonje kuuti vhangoje. Kwe vhambiishe mu nyoovhe izya vhe te Vhayuuda

³⁴ nu kunjevhula nu kunswilila amati. Havhili kwe vhankome nu muchaapu nu kungoga. Ileelo isiku ilya vhutatu uMulungu alinzyusya.”

UYaakobu nu Yoohani vhakulaavha uvhupiti kwa Yeesu

³⁵ UYaakobu nu Yoohani, avhaana vha Zebedaayi, vhahasogola kwa Yeesu, vhahati, “Musambiilizi, tukwanza utuvhombele lyonti lye tukukulaavha.”

³⁶ UYeesu ahavhavhuziilizya ahati, “Mukwanza imbavhombele ishooni?”

³⁷ Vhahati, “Lwe wakonzya uvhumwene vhwaho tukukulaavha tuhaavhe pooka niiwe, wumo ahatendame ku luvhazu ulwa kundiilo, uwamwavho ulwa kumongo.”

³⁸ UYeesu ahati, “Mutamanyile zye mukulaavha. Vhuli, mungayimba amayimba inza ge nandi nsogole nkuyimba ine, poosye kwozelwa ulwozyo ulwa vhufwe lwe nkwozelwa ine?”

³⁹ Vhoope vhahamwamula vhahati, “Eena tungayifumwa.” UYeesu ahavhavhuuzya, ahati, “Amayimba ge kwe njimbe ine, niimwe kwe muyimbe, nu lwozyo lwe kwe noozelwe ine, niimwe vhweleele kwe mwozelwe.

⁴⁰ Ileelo kutendama ku luvhazu lwane ulwa kundiilo, poosye lwa kumongo, te mbombo yaane kuvhitishila. Uvhuzilo uvhwo, vhwa vhaala vhe vhavhasenganiziinye nziila.”

⁴¹ Lwe avhasundikwa avhamwavho vhaala 10 vhiivwa izyo, vhahanda kuvhaviitilwa avha Yaakobu nu Yoohani.

⁴² UYeesu ahavhiita, ahavhavhuuzya ahati, “Mumanyile vwe avhalongozi avha vhe te Vhayuuda vhakuvhakonzya avhantu vhaavho ku maha, havhili vwe avhapiti ivho vhakuvhavijiilizya avhantu kuvhomba.

⁴³ Ileelo kuli imwe zitahaavhe vhwevhulo. We akwanza kuvha mupiti wiinyu, avhe muvhomvi wiinyu.

⁴⁴ Havhili we akwanza kuvha mulongozi muli imwe, avhe muzya wa vhonti.

⁴⁵ Yeenya, ine ne Mwana wa Aadamu ntínzile kuvhombelwa, nkandi kuvhavhombela avhantu, nu kufumwa uvhulanzi vhwane kuvhatavhula avhinji.”

UYeesu akumuponia untonko

⁴⁶ UYeesu na vhantu vhamo vhahafiha mu nkaaya iya Yeeliko. Lwe uweene na vhasundikwa vhaakwe ni ivhungaana ilya vhantu vhakwepa mu nkaaya iyo, vhahamwaga umuntu wumo pi idala we áali wu ntonko. Izina lyakwe áali wu Balitimaayo, uyise áali wu Timaayo. UBalitimaayo ahatendamaga pa luvhazu pi idala kuvhalaavha avhantu.

⁴⁷ Lwe ayiivwa kuuti uYeesu uwa ku Naazaleeti akutuuha, ahataliha kuhoola kwi izwi ipiti, ahati, “We Yeesu, Mwana wa Daavhudi, umfwile uvhwila!”

⁴⁸ Avhantu avhinji vhahamupilila kuuti apuume. Ileelo uweene ahonjezya kuvhilishila nkaani ahati, “We Mwana wa Daavhudi, umfwile uvhwila!”

⁴⁹ UYeesu ahimiilila, ahati, “Mwite.” Pe vhahamwita untonko ula, vhahati, “Akukwita, gomaaga umwoyo! Vhuuha.”

⁵⁰ Pepaala, ahadomoha ahalileha igolole lyakwe, ahasogola kwa Yeesu.

⁵¹ UYeesu ahamuvhuziilizya ahati, “Ukwanza inkuvhombele ishooni?” Ahati, “We Musambiilizi, nkulaavha umponie, intalishe kulola havhili.”

⁵² UYeesu ahamuvhuuzya ahati, “Sogolaaga, waapona, mwe pe waniitiha.” Ahavhaliilizyo hanaaho untonko uyo ahataliha kulola havhili, pe ahataliha kumulandata uYeesu mwi idala.