Maliko 1 - ULufingwi uLupwa

UYoohani uMwozyi akulumbiilila

¹ Uvhu vhwe vhwandilo uvhwa Izwi iLyinza lye likulondovhola izya Yeesu Chilisiti uMwana wa Mulungu.

² Lyátalisile inza vwe ásimvile umukuvhwi uYisaayi kuuti, “Yeenya, ndimusonteelezya umuvhomvi waane, akulongolele kulingaanya idala lye ulituuha.

³ Umuvhomvi uyo alitaliha kuvhila imbila mu luugwa kuuti, ‘Musenganizanyi uMWENE uMulungu idala, nu kugolosya mwe kuuti atuushe.’”

⁴ Uhoome uyo áali wu Yoohani we ahavhanga mwi ilaala, ahakumusyaga ahatinji avhantu vhapindushe nu kwozelwa, inga uMulungu avhaswile uvhutalamalandu vhwavho.

⁵ Avhantu kufuma mu nkaaya iya Yelusaleemu na mu shigavho isha nsi shonti isha Yudeeya vhahasogolaga kwa Yoohani kumutejeelezya. Vhahapemulaga uvhutalamalandu vhwavho, woope ahavhozyaga mwi ijenje uYoolodaani.

⁶ UYoohani ahazwalaga amenda ge gásoniilwe na masepe aga ngamila, nu kuyipinya ni ilamba ilya ikwembe mu musana. Havhili ahalyanga avhamakanta nu vhwushi.

⁷ Ahakumusyaga ahatinji, “We akwinza mwisinda lyane ali na maha kunduusya ine, ine ntahondeeye poosye kuvha ne muvhomvi waakwe uwa kuzevwa nu kusatula inkusa izya vilyatu vwakwe.

⁸ Ine nkuvhoozya na minzi, ileelo uweene alivhoozya nu Mupepo uMufinjile.”

UYeesu akwozelwa nu kulingwa

⁹ Ahavhaliilizyo hehaala uYeesu ahafuma mu nkaaya iya Naazaleeti mu shigavho isha nsi isha Galilaaya, ahafiha kwa Yoohani, woope ahamwozya mwi ijenje uYoolodaani.

¹⁰ UYeesu lwe akutumpuha mu minzi, naluvhiilo ahalola ku mwanya kukwiguha nu Mupepo uMufinjile we ali ngati nkunda ahamwishila pamwanya yaakwe.

¹¹ Izwi ilya Mulungu lihivwiha kufuma ku mwanya, lihati, “Iwe we Mwana waane unkundwa, nahondezelwa niiwe.”

¹² Pe uMupepo uMufinjile ahamutwala uYeesu mu luugwa.

¹³ Ahiima mu luugwa insiku 40 pooka ni vihanu ivwa umwo. Ahavhaliilizyo honti iho uSeetano ahavhanga akumulinga. Lwe zyatuuha izyo, avhahavhizya avha Mulungu vhahinza kumuvhombela.

UYeesu akutaliha kuvhiita avhantu kuvha vhasundikwa vhaakwe

¹⁴ Pisinda, uYoohani ahakungwa mu jeela, pe uYeesu ahasogola mu shigavho isha nsi isha Galilaaya, ahataliha kukumusya Izwi iLyinza ilya Mulungu.

¹⁵ Ahati, “Ahavhaliilizyo aha vhumwene uvhwa Mulungu haafiha nu vhumwene uvhwa Mulungu vhupalamiiye! Mupindushe, mulyitishe Izwi iLyinza ilya Mulungu.”

¹⁶ Isiku limo, uYeesu ahajendaga mu luvhazu mwa sumbi uwa Galilaaya. Ahavhalola avhavuvhi avha nswi vhavhili, uSiimoni nu munine waakwe uAndeleeya. Vhahasumbilaga inyeelo zyavho mwa sumbi.

¹⁷ UYeesu ahavhavhuuzya ahati, “Mundandate! Niine kwe mbavhiishe kuvha mwe vhavuvhi vha vhantu.”

¹⁸ Pepaala, vhahazileha inyeelo zyavho, vhahamulandata.

¹⁹ Lwe uYeesu asogola pilongolela hansi ahavhalola avhanine avhamwavho vhavhili, uYaakobu nu munine waakwe uYoohani, avhaana vha Zebedaayi. Vháali mwi ivhooti, vhahalinganyaaga inyeelo zyavho.

²⁰ Lwe avhalola vhweleele, ahavhiita, vhoope vhahamuleha utaata waavho uZebedaayi muhati iya ivhooti pooka na vhavhomvi vhaakwe, vhahamulandata uYeesu.

UYeesu akushimbizya impepo inkandamanu

²¹ UYeesu na vhasundikwa vhaakwe vhahasogola mu nkaaya iya Kapelanawuumu. Lwe lyafiha isiku ilya Sabaato, ahinjila mwi isinagoogi pooka na vhasundikwa vhaakwe, ahanda kusambiilizya.

²² Avhantu vhahasukumila nkaani insambiilizyo zyakwe, mwe pe ahasambilizyaga ngati muntu we ali na maha, atahasambilizyaga ngati vhasambiilizi vhaavho avha ndajizyo izya Moose.

²³ Mwi isinagoogi ilyo mwáli umuntu wumo, we álemwilwe ni mpepo inkandamanu.

²⁴ Ahahoola inkoolo ahati, “Shooni she ukutwinjiilila, iwe Yeesu wa ku Naazaleeti? Uyinzile kutulovwa? Imanyile kuuti iwe we Mufinjile uwa Mulungu.”

²⁵ UYeesu ahayipilila impepo yiila ahati, “Ahalanga! Fuma mwa muntu uno!”

²⁶ Impepo iyo yihamutetemesya umuntu ula, ahahoola nkaani, yihafuma.

²⁷ Vhonti vhahasukumila nkaani nu kuvhuzilizanya kuuti, “Nsambiilizyo vhuli injeni izi, havhili izya maha? Umuntu uno ali na maha amapiti, mwe pe kwi izwi akuzipilila impepo inkandamanu, zyope zikumushindiha!”

²⁸ Pe inongwa izya mbombo izya Yeesu zihakumuha naluvhiilo mu shigavho isha nsi shonti isha Galilaaya.

UYeesu akuvhaponia avhavhinu avhinji

²⁹ Lwe vhaafuma mwi isinagoogi, uSiimoni nu Andeleeya vhahamuposheela uYeesu nu Yaakobu nu Yoohani ku nyumba yaavho.

³⁰ Mu nyumba muula, unyinavwala uwa Siimoni ákaasite, ávhinile inzegema. Lwe uYeesu aafiha paala, vhahamuvhuuzya izya vhuvhinu uvhwa maayi ula.

³¹ UYeesu ahamupalamila umuvhinu, ahamulema inyoovhe yaakwe, inzegema yihapona, ahamuvhuusya. Woope ahataliha kuvhavhombela.

³² Lwe haafiha hamazuuvha, izuvha lyaswa, avhantu avha mu nkaaya yiila vhahamuleetela uYeesu avhavhinu vhonti na vhe vhálemwilwe ni mpepo inkandamanu.

³³ Avhantu avhinji nkaani avha mu nkaaya yiila vhávhungiine pilongolela ilya nyumba yiila.

³⁴ Ahavhaponia avhantu vhonti avha mavhinu aga mavhiila mu mavhiila. Havhili, ahazyefwa impepo inyinji, ileelo ahazihaana kuuti zitamutahaje, mwe pe zyámumanyile kuuti wu naanu.

UYeesu akulumbiilila mu Galilaaya

³⁵ Indaavhi yaakwe inzanshi lwe kushiili kusha uYeesu ahadaamula, aheepa mu nyumba, ahasogola pe patáali avhantu kulaavha.

³⁶ Lwe hatuuha ahavhaliilizyo hamo, uSiimoni na vhamwavho vhahasogola kumulondola.

³⁷ Lwe vhamulola vhahamuvhuuzya vhahati, “Avhantu vhonti vhakukulondola.”

³⁸ UYeesu ahati, “Tujende ukunji mu nkaaya izinji izya mupiipi, insogole inkumusye mwope, mwe pe ninzile ku vhantu vhonti.”

³⁹ Pe ahasogola mu shigavho isha nsi isha Galilaaya shonti, ahakumusyaga mu masinagoogi gaavho nu kwefwa impepo inkandamanu.

UYeesu akumuzelufwa uwa mambombo

⁴⁰ Umuntu wumo uwa mambombo ahinza kwa Yeesu, ahamusugamilila, ahamulambiilizya ahati, “Imanyile kuuti uli na maha aga kunzelufwa. Inga ukwanza, nkulaavha unzelufwe.”

⁴¹ UYeesu ahamufwila uvhwila, ahagolosya inyoovhe yaakwe nu kumupalamansya, ahati, “Nkwanza uzelupe!”

⁴² Pepaala, umuntu ula, uvhuvhinu vhuhamwepa, ahazelupa.

⁴³ UYeesu ahamuvhuuzya kuuti asogole, ahamulajizya ahati,

⁴⁴ “Utahamuvhuuzye umuntu wonti inongwa izi! Ileelo usogole uyilolesye kwa mupuuti nu kufumwa impuutile izya kuzelupa kwaho inza vwe uMoose álajiziizye, inga avhantu vhonti vhazilole zye uMulungu akuvhombela.”

⁴⁵ Ileelo umuntu ula atahapuuma, ahajendeelela kukumusya zye uYeesu amuvhombela zyonti. Pe mu nkaaya yonti yihavha shigomu kwa Yeesu, poosye kwinjila apazelu, mwe pe avhantu vhahamuvhunganilaga, ahiima kukwilu kwe kutáali avhantu. Ileelo avhantu kufuma intala zyonti vhahamulandata kwekuula kwe áamile.