Kolosi 4 - ULufingwi uLupwa

¹ Niimwe mwe vhamwene, muvhavhombelaje avhazya vhiinyu zye zikwanzilwa ni shisita kusavhulanya. Mukumbuhaje kuuti niimwe vhweleele muli nu Mwene uwa ku mwanya.

Indajizyo izyamwavho

² Mumulaavhaje uMulungu insiku zyonti, muvhanje minso ishisita kulita nu kumusalifwa uweene.

³ Mutulavhilaje niiswe, inga uMulungu atwigulile idala ilya kulumbiilila izwi lyakwe, nu kuvhuvumbula uvhuzigizigi uvhwa Chilisiti. Ine nkunziilwe kuzya kuvhulumbiilila uvhuzigizigi uvhwo.

⁴ Mulaavhaje kuuti mbe na maha aga kuvhuvumbula inza vwe yikwanzilwa.

⁵ Mutatezyaje ahavhaliilizyo shaaha he muli naho aha kulolesya ulujendo ulwinza ku vhantu vhe vhatamwitisile uChilisiti.

⁶ Amazwi giinyu gavhanje minza, havhili ge gahondeeye, mumanye kuvhaamula avhantu vhonti ahinza.

Amazwi aga kulagana

⁷ Uwamwitu unkundwa uTikiiko, umuvhomvi umutungamu we tukuvhomba pooka imbombo iya Mwene uYeesu, alivhavhuuzya inongwa zyane zyonti.

⁸ Kuli izyo, imusonteleziizye kuli imwe, inga ayinze avhavhuuzye zye zikuvhombeha kuli iswe nu kuvhasuvhaalizya.

⁹ Akwinza pooka nu Oniseemu, uwamwitu unkundwa umutungamu, havhili umuntu uwa ku mwinyu. Kwe vhavhavhuuzye zyonti zye zikuvhombeha ipa.

¹⁰ UAlisitaaliko, we akunziilwe pooka niine mu jeela, akuvhalamuha. Woope uMaaliko, umuvwala uwa Balinaaba akuvhalamuha. Uweene muposheleeye indajizyo zye zikupanga kuuti, inga aafiha kuli imwe, mumuposheelaje ahinza.

¹¹ Woope uYeesu we vhakuti uYuusito, akuvhalamuha. Mu Vhayuuda vhe vhaposheleeye ulwitiho, vhanaavho vhatatu vhweleele vhe vhakuvhomba imbombo iya vhumwene uvhwa Mulungu pooka niine. Havhili vhakunaavwa nkaani.

¹² UEpaafula umuntu uwa ku mwinyu, umuvhomvi uwa Chilisiti uYeesu, akuvhalamuha. Ahavhaliilizyo honti akuyikungula kuvhalaavhila imwe inga musimpaje mu lwitiho, havhili muvhe mwe vhalunjisu nu kuvha mwe vhadandamazu ku zyonti zye uMulungu akwanza.

¹³ Nkumulola akuyikungula ku mute kuvhaavwa imwe na vhantu avha mu nkaaya iya Lawodikiya ni ya Helapooli.

¹⁴ ULuuka umuganga wiitu unkundwa nu Deema vhakuvhalamuha.

¹⁵ Muvhalamushe avhamwitu avha ku Lawodikiya. Havhili mumulamushe uNiimufa, uwamwitu mu lwitiho umwantanda, ni shivhanza she shikuhomaana mu nyumba yaakwe.

¹⁶ Lwe mwavhaazya ukalaata uno kuli imwe, muhomesheziizye kuuti shoope ishivhanza isha ku Lawodikiya shikuvhaazya wenewo. Niimwe vhweleele muvhaazye ukalaata we avheene vhaposheleeye kuli iswe.

¹⁷ Mumuvhuuzye uAlikiipo kuuti amale ahinza imbombo ye uMwene ámupiiye.

¹⁸ Nkusimba izi ku nyoovhe yaane neneene. Ine ne Paavhuli nkuvhalamuha. Mukumbushe kuuti nkunziilwe mu jeela. UMulungu avhafwilaje uvhwila imwe mwenti.