Kolosi 3 - ULufingwi uLupwa

Uvhulanzi uvhupwa mwa Chilisiti

¹ Ishi, mwe pe uMulungu avhazyusiizye pooka nu Chilisiti, mulondolaje izya ku mwanya, kwe uChilisiti atendiime uluvhazu ulwa nyoovhe iya kundiilo iya Mulungu, pa vhushindamu uvhupiti nkaani.

² Muzisivhililaje izya ku mwanya, mutazisivhililaje izya pa nsi ipa,

³ mwe pe mufuuye. Ishi mukulandila pooka nu Chilisiti pilongolela ilya Mulungu, ileelo uvhulanzi uvhupwa uvhwo vhutakuloleha.

⁴ Uvhulanzi vhwinyu vhukufumiilana nu Chilisiti. Ahavhaliilizyo he uweene aliloleha, he niimwe muliloleha pooka nawo na mavhili aga vhushindamu.

⁵ Pe ishi, muleshe kuvhombela amavhili giinyu imbombo izya mu nsi. Muzilovwe nziila imbombo izyo! Izyenezyo, vhulugusu nu vhuvhembu nu vhumalaaya ni mpapilo imbiivhi izya mavhiila mu mavhiila. Kupapila she shooka ni shipuuto isha viholanyo.

⁶ Inga mukuvhomba izyo, uMulungu alivhasunda nu vhuhalazu vhwakwe.

⁷ Niimwe vhuulo, hali muhavhombaga izyo, lwe muhalandilaga kulandatana niizyo.

⁸ Ileelo ishi, muleshe nziila kuvha nu mulaha nu vhuhalazu nu vhuvhiivhi nu musaamu, na mazwi amamwamu mu mili zyinyu.

⁹ Mutalumilanaje ilenga, mwe pe muzuuye amooyo giinyu aga vhutalamalandu pooka ni mbombo zyakwe.

¹⁰ Muzwaye amooyo amapwa ge uMulungu akujendeelela kugapela kuvha mapwa, inga mwonjele kumumanya, mwe pe avhapezile kuuti muholane nawo.

¹¹ Kuli izyo, kutaliipo kusugaana ukwa Muyuuda na we te Muyuuda, kwe kuuti we atahiliilwe na we atatahiliilwe, poosye ukwa mujeni nu muhaaya, poosye ukwa muzya na we te muzya. Ileelo uChilisiti we alunjisiizye zyonti, havhili ali muhati iya vhonti.

¹² Ishi, mwe pe mwe vhasaavhulwa avha Mulungu, havhili mwe vhafinjile vhe avhakunzite, muvhe nu mwoyo uwa vhwila nu mwoyo umwinza nu vhwahayiisye nu vhutonsu nu vhujimbiilizu.

¹³ Mujimbililanaje nu kuswilana, inga umuntu amunanjila uwamwavho. Mukwanzilwa kuswilana inza vwe uMwene uYeesu ávhaswiliiye imwe.

¹⁴ Ipiti kuluusya izyo zyonti mukundanaje, mwe pe ishikunzi she shikutuvhiiha swenti mu vhuliilani vhwe vhulunjisile.

¹⁵ Uvhutehamu uvhwa Chilisiti vhuvhalongozyaje mu mooyo giinyu. UMulungu ávhiisite mwenti kuuti muvhe pooka inza ivipelwa ivwa mu muvhili wooka, inga muvhe nu vhutehamu uvhwo. Mumusalifwaje uweene.

¹⁶ Izwi ilya Chilisiti livhe ku vhwinji muhati zyinyu. Musambilizanyaaje nu kusohana mu vhushindamu uvhwa njeele vhwonti. Mumwimbilaje uMulungu izabuuli ni nyimbo izya kumutiima ni nyimbo zye zikufuma kwa Mupepo uMufinjile, pooka nu kumusalifwa ku mwoyo wonti.

¹⁷ Zyonti zye mukuyanga, poosye kuvhomba, muvhombelaje mwi izina ilya Mwene uYeesu. Havhili mumusalifwaje uTaata uMulungu kutuushila ku kwakwe.

Zye zihondeeye kuvhombwa na vhiitisi

¹⁸ Imwe mwe vhantanda, muvhashindihaje avhalume vhiinyu inza vwe yikwanzilwa ku vhantu vhe vhamwitisile uMwene uYeesu.

¹⁹ Niimwe mwe vhanaavuli, muvhakundaje avhashi vhiinyu, mutavhanje mwe vhahali ku kwavho.

²⁰ Niimwe mwe vhaana, muvhashindihaje avhapaafi vhiinyu ku zyonti, mwe pe kuvhomba isho yikumuhondezya uMwene uYeesu.

²¹ Niimwe mwe vhataata, mutavhavisyaje avhaana vhiinyu, inga vhatahinze vhavunzishe amooyo.

²² Niimwe mwe vhazya, muvhashindihaje avhamwene vhiinyu avha havhaliilizyo iha ku mbombo zyonti. Mutavhombaje isho lwe vhakuvhalola vhweleele, inga muyilolesye kuuti muhondeeye. Muvhashindihaje shiima ku mwoyo wonti, mwe pe mukumunyila uMwene uYeesu.

²³ Lyonti lye mukuvhomba, muvhombaje ku mwoyo wonti, inza vhe vhakumuvhombela uMwene uYeesu, te inza vhe vhakumuvhombela umuntu.

²⁴ Mukumbushe kuuti uMwene aliivhapa ishipeelwa she vhupwano vhwinyu. UMwene we mukumuvhombela we wu Chilisiti.

²⁵ Ileelo wonti we akuvhomba uvhutalamalandu, aliposheela kulandatana nu vhutalamalandu vhwakwe, mwe pe uMulungu atakusavhulanya.