Kolosi 2 - ULufingwi uLupwa

¹ Nkwanza mumanye kuuti, nkuyikungula ku maha gonti kuvhaavwa imwe na vhiitisi avha ku Lawodikiya na vhanji vhonti vhe tutahalolana naalumo.

² Nkuvhomba ishi, inga mwenti amooyo giinyu gagome. Havhili musopenkane pooka ku shikunzi, nu kuvha nu vhumanyi vhwe vhukuuvhapa uvhwanalyoli. Pe mulivhumanya uvhuzigizigi uvhwa Mulungu, kwe kuuti uChilisiti wuuyo.

³ Muhati iya Chilisiti mwe zizyisiilwe inkoma zyonti izya vhushindamu uvhwa njeele nu vhumanyi.

⁴ Nkuvhasimbila izyo, inga mutahiitishe kuuti umuntu wonti avhahopenkanye ku mazwi aga kuvhakundiilizya.

⁵ Pooka nu kuuti ntali pooka niimwe, nkuvhasivhiilila ahavhaliilizyo honti. Nkuseshela, mwe pe nivuuye uvhuliilani vhwinyu na vwe mukusimpa mu lwitiho lwinyu kwa Chilisiti.

Uvhutendamo uvhwinza mwa Chilisiti

⁶ Ishi, inza vwe mumwitisile uChilisiti uYeesu kuuti wu Mwene, mujendeelele kumulandata.

⁷ Musimpaje nu kuyizenga mu kwakwe, havhili mugomaje mu lwitiho inza vwe mwásambiliiye. Mumusalifwaje uMulungu nkaani.

⁸ Muvhe minso, umuntu wonti atahavhavhiishe kuvha mwe vhagomwa ku nsambiilizyo izya ilenga zye zitangavhaavwa. Insambiilizyo izyo, maata aga vhantu, havhili nsiivho zyavho izya mu nsi. Zitakufuma kwa Chilisiti.

⁹ Mutahiitishe umuntu kuvhahopenkanya, mwe pe uvhulunjisu uvhwa Mulungu vhuli mu muvhili uwa Chilisiti.

¹⁰ Niimwe muposheleeye uvhulunjisu vhwonti kwi idala ilya kusopenkana nu Chilisiti, uweene inza itwe mu muvhili, akuvikonzya ivipelwa vwe vili na maha amasisya na vwe vili na maha vwonti.

¹¹ Lwe mwasopenkana nu Chilisiti, mwátahiliilwe. Mutátahiliilwe na vhantu, nkandi nu Chilisiti wuuyo, kwe kuuti ávhefwizye uvhuntu vhwinyu uvhwa vhutalamalandu.

¹² Kwi idala ilya kwozelwa, mwáfuuye nu kusyilwa pooka nu Chilisiti. Havhili kwi idala ilyo, mwázyusile pooka nu weene, kutuushila kugiitiha amaha aga Mulungu we ámuzyusiizye.

¹³ Hali imwe mwámile mwe vhafwe, mwe pe muhashilanyaaga indajizyo izya Mulungu, havhili amavhili giinyu aga vhutalamalandu gáshiili kutahiililwa. Ileelo uMulungu ahaavhapa uvhulanzi pooka nu Chilisiti, lwe atuswila uvhutalamalandu vhwitu vhwonti.

¹⁴ UMulungu ávhomvile fwe kwe kuvhuzimanya uvhusimbe vhwe vhuhatulonjelelaga iswe mwi ikalaata ilya malandu giitu. UMulungu azivhomvile fwe kwe kuvhuzimanya uvhusimbe uvhwo, lwe uChilisiti akuhomeelwa pa shihovhenkanyo nu kufwa.

¹⁵ UMulungu ahazifwula amaha impepo zye zili na maha amasisya na zye zikukonzya. Ahazisuupizya apazelu. Ahazilongozya ngati vhagomwa, lwe akuseshela uvhupooti pa shihovhenkanyo.

Uvhusatushe kufuma mu miiho

¹⁶ Kuli izyo, umuntu wonti atahavhalonje kuzya miiho aga vwakulya, poosye aga vwakumwela. Havhili atahavhalonje poosye kuzya miiho aga shikulukuulu isha shipuuto, poosye isha mwezi kutukula poosye isha Sabaato.

¹⁷ Amiiho igo, shiholanyo isha zye aVhayuuda vhásuvhiiye kuuti zikwinza. Ileelo izya nalyoli zikuloleha mwa Chilisiti.

¹⁸ Mutahiitishe umuntu wonti we akuhomeelezya izya vhwahayiisye uvhwa ilenga nu kuvhapuuta avhahavhizya. Umuntu inza uyo atahavhafwule ishipambwi isha shiima. Akuti ali na maha aga kusambiilizya, mwe pe avhwenyi injozi iya pa minso amazelu. Akuyitumvwa ku njeele izya vhuntu vhwakwe uvhwa vhutalamalandu.

¹⁹ Uyo ayefwizye kwa Chilisiti we akulongozya avhantu vhaakwe inza itwe vwe likulongozya umuvhili. Itwe lisopenkiine nu muvhili kutuushila impinga ni nkole. Kufuma kwi itwe kwe umuvhili wonti wukuposheela ishaakulya nu kukula inza vwe uMulungu akwanza.

²⁰ Imwe mwáfuuye pooka nu Chilisiti, muhazileha insambiilizyo izya miiho aga vhantu. Ishi shooni she mukulandila ngati mwe vhantu avha mu nsi umu? Mukuyikunga na miiho aga kuuti,

²¹ “Mutalemaje ishi, mutapalamansyaje, poosye kulinga shenesho!”

²² Amiiho igo, ndajizyo, havhili nsambiilizyo zya vhantu vhweleele. Gakuhomeelezya kulema indajizyo ku vintu vwe vikunanjiha, lwe vwavhombelwa imbombo.

²³ Nalyoli, vhe vhakulandata amiiho igo, vhakuloleha kuuti vhali nu vhushindamu uvhwa njeele. Vhakulandata ishipuuto she vhayivhishiiye vhuuvho, uvhwahayiisye uvhwa ilenga nu kugakonzya amavhili ku vhuhali. Ileelo amiiho igo gatangadinda impapilo izya vhuntu uvhwa vhutalamalandu.