Kolosi 1 - ULufingwi uLupwa

UPaavhuli akuvhalamuha aVhakolosaayi

¹ Ukalaata uno nsimvile neene ne Paavhuli, ne mutumwa uwa Chilisiti uYeesu. Násavhuliilwe kuvha ne mutumwa ku lukasamo ulwa Mulungu. Ine pooka nu wamwitu uTiimoti,

² tukuvhasimbila vhamwitu mwe mukutendama mu nkaaya iya Kolosaayi, imwe mwe vhafinjile havhili mwe vhatungamu mwa Chilisiti. UTaata wiitu uMulungu, avhafwilaje uvhwila nu kuuvhapa uvhutehamu.

Kulaavha nu kusalifwa

³ Insiku zyonti lwe tukuvhalaavhila, tukumusalifwa uMulungu, uTaata uwa Mwene wiitu uYeesu Chilisiti.

⁴ Tukuvhomba vhwevhulo, mwe pe twivuuye kuuti mukumwitiha uChilisiti uYeesu nu kuvhakunda avhafinjile vhonti.

⁵ Ulwitiho ni shikunzi isho, vikufumiilana nu lusuuvhilo ulwa vipeelwa vwe uMulungu avhavhishiiye ku mwanya. Mwívuuye inongwa izya lusuuvhilo ulwo kufuma pe mwálumbililiilwe izwi ilya nalyoli, kwe kuuti Izwi iLyinza.

⁶ Izwi ilyo lye lyálumbiliilwe kuli imwe, likumusile mu nsi zyonti. Umwo likuvhagalulanya avhantu inza vwe lyávhagaluliinye imwe, kufuma pe mwályivuuye nu kuvhumanya uvhwila uvhwa Mulungu mu vhwanalyoli vhwonti.

⁷ Mwásambiliiye Izwi iLyinza ilyo kufuma kwa Epaafula. Uweene, muvhomvi wamwitu unkundwa, akuvhavhombela imwe kwa Chilisiti ku vhutungamu.

⁸ Atuvhuziizye inongwa izya shikunzi shiinyu she shikufumiilana nu Mupepo uMufinjile.

⁹ Kuli izyo, kufuma ahavhaliilizyo he twívuuye inongwa zyinyu, tukuvhalavhilaga insiku zyonti. Tukulaavha kuuti uMulungu aavhape uvhumanyi vhwonti ku ziila zye uweene akwanza, nu vhushindamu uvhwa njeele nu vhumanyi kufuma kwa Mupepo uMufinjile.

¹⁰ Tukulaavha isho, inga muvhombaje zye zikulolesya uvhushindamu kwa Mwene uYeesu, havhili kwi idala lyonti muvhombaje zye zikumuhondezya uweene. Mufishile kuvhomba imbombo inyinza izya mavhiila mu mavhiila, nu kwonjela kumumanya uMulungu.

¹¹ Tukuvhalaavhila kuuti, uMulungu aavhape amaha kulandatana na maha gaakwe ge gali nu vhushindamu, inga muvhwezye kujimbiilila ku zyonti,

¹² uku mukumusalifwa uTaata uMulungu ku luseshelo ulupiti. Uweene avhavhiisile kuvha mwe vhantu mwe mukuposheela uvhupwano uvhwa vhumwene uvhwa mu vhuzelu, vhwe vhwa vhafinjile.

¹³ Átuposile kufuma mu maha aga mu shiisi, ahatusaamwa nu kutwinjizya mu vhumwene uvhwa Mwana waakwe unkundwa.

¹⁴ Kutuushila uMwana waakwe, uyo tutavhuliilwe, kwe kuuti tuswiliilwe uvhutalamalandu vhwitu.

Imbombo nu vhupiti uvhwa Mwana

¹⁵ Mwa Mwana, uMulungu akuloleha apazelu vwe ali, pooka nu kuuti tutangamulola uMulungu wuuyo. UMwana ali na maha ku vipelwa vwonti.

¹⁶ Kufumiilana nu weene, uMulungu ápezile ivintu vwonti, vwe vili ku mwanya na vwe vili pa nsi, vwe vikuloleha na vwe vitakuloleha, kwe kuuti impepo zye zikukonzya, poosye zye vhe vhamwene, poosye zye mpiti, poosye izya maha. UMulungu ápezile vwonti kufumiilana nu Mwana, havhili ku vhushindamu uvhwa Mwana uyo.

¹⁷ Uweene áliipo ahavhaliilizyo he vwonti vwáshiili kupelwa, havhili we akuvivhiiha ivipelwa vwonti pa vhuzilo vhwe vhukwanzilwa.

¹⁸ Havhili uweene ali inza itwe mu muvhili, kwe kuuti mupiti uwa shivhanza, uweene we vhwandilo uvhwa shivhanza, havhili mutanzi kuzyuha, inga avhe mupiti mu zyonti.

¹⁹ UMulungu wuuyo ásungwilwe kuuti uvhulunjisu vhwakwe vhwonti vhuvhe mwa Mwana.

²⁰ Havhili kwi idala ilya Mwana, uMulungu ahavikundanya ivipelwa vwonti nu weene, ivipelwa vwe vili pa nsi na vwe vili ku mwanya. Kwe kuuti ávhiisile uvhutehamu kutuushila amavhanda aga Mwana, ge gítisile pa shihovhenkanyo.

²¹ Hali, niimwe mwámile ukutali nu Mulungu, mwámile mwe vhalugu vhaakwe ku nsiivho ni mbombo zyinyu imbiivhi.

²² Ileelo ishi, uMulungu avhakundiinye nu weene kwi idala ilya muvhili uwa Chilisiti, kwe kuuti kufwa kwakwe. Avhomvile vhwevhulo inga avhaleete pilongolela lyakwe she mwe vhafinjile, ishisita amabada poosye ulukwinkwino.

²³ Nalyoli muli isho pilongolela lyakwe, inga mukujendeelela kumwitiha uChilisiti, nu kuyigomwa nu kuvha na maha, havhili inga mutakwitiha kuleha ulusuuvhilo lwe mwáposheleeye, lwe mwivwa Izwi iLyinza. Izwi ilyo, lye avhavhomvi avha Mulungu vhakumusiizye ku vhantu vhonti avha mu nsi, havhili lye ine ne Paavhuli, ne muvhomvi uwa kukumusya.

Imbombo iya Paavhuli mu vivhanza

²⁴ Ishi nkuyimba ku zyinyu. Ileelo nkuseshela amayimba igo, mwe pe tukwanzilwa kuyimba kuzya Chilisiti. Mu muvhili waane nkuyimba kuzya muvhili uwa Chilisiti, kwe kuuti ishivhanza shaakwe.

²⁵ UMulungu ansavhuuye ine kuvha ne muvhomvi uwa shivhanza isho, inga mbaleetele izwi lyakwe ku vhulunjisu.

²⁶ Izwi ilyo lya vhuzigizigi vhwe uMulungu ávhuzyisile amanda gonti aga hali ku vhantu vhonti, ishi avhuvumbuuye ku vhafinjile vhaakwe.

²⁷ Ivho vhe uMulungu asungwilwe kuvhavumbulila uvhuzigizigi uvhwo vwe vhuli nu vhudumbwe uvhwa kusukumizya ku vhantu vhe te Vhayuuda. Uvhuzigizigi uvhwo, wu Chilisiti we ali muhati yiinyu, uweene we akuvhavhiiha kuuti muvhe nu lusuuvhilo ulwa kuposheela uvhushindamu.

²⁸ UChilisiti uyo we tukuvhalumbiilila, tukuvhasoha nu kuvhasambiilizya avhantu vhonti ku vhushindamu uvhwa njeele vhwonti. Tukuvhomba isho, inga tuvhaleete vhonti pilongolela ilya Mulungu she vhagomile kwi idala ilya kusopenkana nu Chilisiti.

²⁹ Pe ishi, nkuvhomba ku mute nu kuyikungula ku maha gonti ge uChilisiti akumpa lwe akuvhomba imbombo muhati yaane.