Ishitushizya 8 - ULufingwi uLupwa

Ishilemezanyo isha 7 nu luvhiga ulwa sahaabu

¹ AHagonzi aha MWENE uMulungu lwe havunza ishilemezanyo isha 7 kuhavha mwaa ku mwanya ku havhaliilizyo aha shigavho shooka ishi pa vigavho vivhili ivwa isaala.

² Nkavhalola avhahavhizya 7 vhe vhakwimiilila pilongolela ilya Mulungu, vhoope vhahapeelwa amasaji 7.

³ Woope uhavhizya uwamwavho ahinza ahimiilila pilongolela ilya shifinjilo she alemile ku nyoovhe uluvhiga ulwa sahaabu ulwa kusushizizya. Ahapeelwa ivwa kusuushizya ivwinji, inga avhiishe pooka ni mpuuto izya vhafinjile vhonti pa shifinjilo isha sahaabu, she shili pilongolela ilya shitengo isha vhumwene.

⁴ Ilyosi ilya vintu ivwa kusuushizya lihasuushila kwilongolela ilya Mulungu pooka ni mpuuto izya vhafinjile, kufuma ku nyoovhe ya havhizya.

⁵ Pe uhavhizya uyo ahanyatula uluvhiga, ahaponya umwoto uwa pa shifinjilo, ahawiitila pa nsi. Kuhavha ulumesyo ni izwi lye likujilima ni shisumbi.

Amasaji 7

⁶ Pe avhahavhizya vhaala 7 vhe vháali na masaji 7 vhahayisengaanya kuuti vhagahome.

⁷ Pe uhavhizya umutanzi ahahoma isaji lyakwe, kuhavha imvula iya mavhwe nu mwoto vwe visangiine na mavhanda, vihasumbwa pa nsi. Pe ishigavho shooka pa vigavho vitatu ivwa nsi shihananjiha, ishigavho shooka pa vigavho vitatu ivwa makwi shihananjiha na masole amoolo gonti gahananjiha.

⁸ Woope uhavhizya uwa vhuvhili ahahoma isaji lyakwe, ishintu she shili fwe ligamba ipiti lye likwaha umwoto, shihasumbilwa mwa sumbi. Pe ishigavho shooka pa vigavho vitatu ivwa sumbi shihavha mavhanda.

⁹ Vihafwa ishigavho shooka pa vigavho vitatu mu vipelwa vwe vili nu vhupuuma, vwe vili mwa sumbi, havhili ishigavho shooka pa vigavho vitatu ivwa meeli izya mwa sumbi shihananjiha.

¹⁰ Woope uhavhizya uwa vhutatu ahahoma isaji lyakwe. Panaapo uluzota ulupiti luhagwa kufuma kumwanya. Luhaahaga inza inyaale, luhagwila ishigavho shooka pa vigavho vitatu ivwa majenje, ni shigavho shooka pa vigavho vitatu ivwa viduda ivwa minzi.

¹¹ Izina ilya luzota ulwo vhahatinji, “ULuhali.” Pe ishigavho shooka pa vigavho vitatu ivwa minzi shihagalunkana kuvha shihali. Avhantu avhinji vhahafwa ku minzi igo, mwe pe gínzile gavha mahali nkaani.

¹² Woope uhavhizya uwa vhune ahahoma isaji lyakwe, ishigavho shooka pa vigavho vitatu ivwa mwezi ni shigavho shooka pa vigavho vitatu ivwa nzota vihahomwa, inga ivigavho ivwo vivhiishe ishiisi. Pe umusanya wutálamwizye ku shigavho shooka pa vigavho vitatu pooka nu vhusiku vhweleele.

¹³ Nkeenya kumwanya, nkiivwa izwi ilya ipuula lye likubuluha pahati pamwanya, lihayanga kwi izwi ipiti kuuti, “Vhaafwa! Vhaafwa! Vhaafwa! Vhe vhakuvha pa nsi! Kuzya izwi ilya masaji ge gasyaye aga vhahavhizya vhatatu, vhe vhayisengiinye kuhoma.”