Ishitushizya 7 - ULufingwi uLupwa

Uvhwinji uvhwa vhantu ku mwanya

¹ Lwe zyatuuha izyo, nkalola avhahavhizya vhane, vhimiliiye mu mbazu zine izya nsi. Avhahavhizya ivho vhahadindaga inkungu zine izya nsi, inga inkungu yitahavugule pa nsi, poosye pa sumbi, poosye mwi ikwi lyonti.

² Nkalola uhavhizya uwamwavho akuzuvha kufuma kuvhutukulo, áali ni shilemezanyo isha Mulungu uweene we mulanzi. Ahavhavhuuzya kwi izwi ipiti avhahavhizya vhaala vhane, vhe vhápeliilwe amaha aga kuyinanganya insi nu sumbi,

³ ahati, “Mutahayinanganye insi, poosye usumbi, poosye amakwi, kufishila lwe twavhalemezanya ishilemezanyo avhavhomvi avha Mulungu wiitu pa vweni vwavho.”

⁴ Pe nkiivwa uvhwinji vhwavho vhe vhávhalemeziinye kufuma mu nkolo zyonti izya Vhaisilayeeli, avhantu 144,000.

⁵ Avha nkolo ya Yuuda 12,000, avha nkolo ya Lubeni 12,000, avha nkolo ya Gaadi 12,000,

⁶ avha nkolo ya Aasheli 12,000, avha nkolo ya Naafutaali 12,000, avha nkolo ya Manaase 12,000,

⁷ avha nkolo ya Simiyooni 12,000, avha nkolo ya Laawi 12,000, avha nkolo ya Yisaakali 12,000,

⁸ avha nkolo ya Zaabulooni 12,000, avha nkolo ya Yoosefu 12,000, havhili avha nkolo ya Benjamiini 12,000.

Impuga iya vhantu avha mu nsi zyonti

⁹ Lwe zyatuuha izyo, nkalola ivhungaana ipiti nkaani ilya vhantu lye nuumo atangavhaazya. Avhantu kufuma mu nsi zyonti ni nkolo zyonti na mu mpuga zyonti na mu njango zyonti, vhimiliiye pilongolela ilya shitengo isha vhumwene na pilongolela ilya Hagonzi aha MWENE uMulungu. Vhazwaye amenda amazelu havhili vhalemile amatundu aga matende.

¹⁰ Vhahayanga kwi izwi ipiti, vhahati, “Uvhuposhi vhukufuma kwa Mulungu wiitu, uweene we akutendama pa shitengo shaakwe isha vhumwene, na ku Hagonzi aha MWENE uMulungu.”

¹¹ Avhahavhizya vhonti vhímiliiye imbazu zyonti izya shitengo isha vhumwene ni zya vhasongo ni zya vipelwa vine. Vhahakupama pilongolela ilya shitengo isha vhumwene nu kumupuuta uMulungu,

¹² vhahati, “Amina! Intiimo nu vhushindamu nu vhushindamu uvhwa njeele, havhili insalifwo nu mushinzi na maha amasisya na maha, vili nu Mulungu wiitu shiima shiima. Amina!”

¹³ Mu vhasongo ivho, wooka ahambuziilizya, ahati, “Avhantu ivha vhe vhazwaye amenda amazelu vhe vha naanu? Vhafumile kwoshi?”

¹⁴ Nkamwamula nkati, “We mwene, iwe umanyile.” Pe woope ahati, “Ivha vhantu, vhe vhafumile mu mayimba amapiti, vhoope vhahanzite amenda gaavho nu kugavhiiha kuvha mazelu mu mavhanda aga Hagonzi aha MWENE uMulungu.

¹⁵ ‘Ye nongwa vhali pilongolela ilya shitengo isha vhumwene isha Mulungu. Vhakumuvhombela uMulungu uvhusiku nu musanya mu Nyumba yaakwe iMfinjile, woope we atendiime pa shitengo isha vhumwene aliivha pooka navho kuvhadiima.

¹⁶ Te vhahaalole inzala naalumo poosye ishinyooto, havhili izuvha te lihavhooshe poosye ilunguula.

¹⁷ Mwe pe aHagonzi aha MWENE uMulungu he hali pamwanya pa shitengo isha vhumwene halivhadiima. Hoope halivhatwala ku viduda ivwa minzi ge gakufumwa uvhulanzi. Havhili uMulungu woope alivhasyumula amansozi gonti ku minso gaavho.’”