Ishitushizya 4 - ULufingwi uLupwa

Ishitengo isha vhumwene ku mwanya

¹ Lwe zyatuuha izyo, nkalola umulyango wigusile ku mwanya ni izwi liila itanzi lye nályivuuye inza izwi ilya isaji lihayanga niine, lihati, “Zuvha kwope uku, niine kwe nkulolesye zye kuuti zifumile mu havhaliilizyo he hakwinza.”

² Naluvhiilo, uMupepo uMufinjile ahaniishila, nkalola ishitengo isha vhumwene shivhisiilwe ku mwanya she wumo atendamiiye.

³ Ula we áali pa shitengo ahamekuhaga ngati livhwe ilya yaasipi ni lya akiiki. Igombogombo lye lihamekuhaga inza izumaliidi, lyáshizyunguluuye ishitengo shiila.

⁴ Havhili ivitengo 24 vwáshizyunguluuye ishitengo shiila isha vhumwene. Mu vitengo ivwo vhátendiime avhasongo vhe vházwaye ivizwalo ivizelu ni vipambwi ivwa kukonzezya ivwa sahaabu mu matwe gaavho.

⁵ Ku shitengo shiila isha vhumwene kuhafumaga ulumesyo nu kujilima inza ukwa mvula intalala. Pilongolela ilya shitengo isho zihaahaga inyaale 7 izya mwoto, izyo zye Mpepo 7 izya Mulungu.

⁶ Havhili páamile fwe wu sumbi uwa ilooli, we áamile fwe livhwe lye likumekuha nkaani. Imbazu zyonti izya shitengo shiila isha vhumwene, páamile ivipelwa vine vwe vili nu vhupuuma havhili vwáli minso geeka kwilongolela na kwisinda.

⁷ Ishipelwa ishitanzi sháholiine ni nsama, isha vhuvhili sháholiine ni ngwada, isha vhutatu ku minso sháholiine nu muntu ni sha vhune sháholiine ni ipuula lye likubuluha.

⁸ Vwope ivipelwa vine ivwo vwáli ni vwapa umutanda mutanda, havhili ivwapa ivwo vwámile na minso mu mbazu zyonti na muhati zyavho. Ivipelwa ivwo uvhusiku nu musanya vitakutuzyaga kuyanga kuuti, “Mufinjile, Mufinjile, Mufinjile, wu MWENE uMulungu uwa Maha Gonti, uweene we áliipo, we aliipo, havhili we aliyinza.”

⁹ Uweene we atendiime pa shitengo isha vhumwene, we wu Mulungu we mulanzi shiima shiima. Ivipelwa ivwo, ahavhaliilizyo honti lwe vikumushindiha nu kumumwamiha nu kumusalifwa,

¹⁰ pe vhoope avhasongo vhaala 24 vhakukupama. Vhakukupama pilongolela lyakwe uweene we atendiime pa shitengo isha vhumwene. Vhoope vhakumupuuta uweene we mulanzi shiima shiima, havhili vhakusumba ivipambwi vwavho pilongolela ilya shitengo isha vhumwene. Vhakuti,

¹¹ “Uhondeeye iwe, MWENE wiitu Mulungu, kuposheela uvhushindamu, nu mushinzi na maha. Mwe pe wápezile ivintu vwonti, na ku lukasamo lwaho vihapelwa, havhili viliipo.”