Ishitushizya 3 - ULufingwi uLupwa

Ukalaata uwa Yeesu ku shivhanza isha ku Saadi

¹ “Uhavhizya uwa shivhanza isha ku Saadi, musimbile uti: Iga mazwi kufuma kwa Yeesu, ula we ali ni Mpepo 7 izya Mulungu ni nzota 7: Ndumanyile ulujendo lwaho, avhantu vhakulitiima izina lyaho kuuti we mupuuma, ileelo ufuuye.

² Vhuuha! Uzigomwe ziila zye zipalamiiye kufwa, mwe pe ulujendo lwaho te lulunjisu pilongolela ilya Mulungu waane.

³ Pe ishi, ukumbushe vwe wáposheleeye na vwe wívuuye, uzileme izyo nu kupinduha. Ileelo inga utavhuuha, ndiyinza kwi idala ilya kwitushizya inza umwivha, pe te uhaamanye ahavhaliilizyo he indiyinza kuli iwe.

⁴ Ileelo uli na vhantu vhansi ku Saadi vhe vhatayihandamiinie ku mbiivhi. Ivho vhe vhalisogola pooka niine she vhazwaye amenda amazelu, mwe pe vhahondeeye.

⁵ Ula we alipoota indingo, alizwala ivizwalo ivizelu inza avheene. Havhili te nkalyefwe izina lyakwe mwi ikalaata ilya vhulanzi, nkandi ndilyitiha pilongolela ilya Taata waane na pilongolela ilya vhahavhizya vhaakwe.

⁶ We ali na makutwi, atejeelezye ziila zye uMupepo uMufinjile akuvivhuuzya ivivhanza.”

Ukalaata uwa Yeesu ku shivhanza isha ku Filadelufiya

⁷ “Uhavhizya uwa shivhanza isha ku Filadelufiya, musimbile uti: Iga mazwi kufuma kwa Yeesu, ula we mufinjile, havhili uwa nalyoli, we ali ni shigulilo isha maha isha mwene uDaavhudi. Uweene we inga ayiigula nuumo uwa kwigalila, havhili inga agalila nuumo uwa kwigula:

⁸ Ndumanyile ulujendo lwaho. Yeenya, nkuvhishiiye umulyango we wuli ukwazi kwilongolela lyaho, we uwunji nuumo atangawugalila. Imanyile kuuti uli na maha mansi, ileelo ulisunjililiiye izwi lyane, havhili utalihaanile izina lyane.

⁹ Yeenyi, ndivhaleetela imwe avha mwi isinagoogi ilya Seetano vhe vhakuyitaha kuuti Vhayuuda, ileelo lilenga. Ndivhapela vhinze kukusugamilila nu kumanya kuuti nkukunzite.

¹⁰ Mwe pe ulyitisile izwi lyane ilya kuvha nu vhujimbiilizu, niine ndikusunjiilila uheepe mu manda aga vhunanjisu ge gapalamiiye kwinza kuvhalinga avhantu avha mu nsi yonti.

¹¹ Nkwinza naluvhiilo. Uleme nkaani she uli nasho, atahinze umuntu akufwule ishipambwi shaaho.

¹² Ula we alipoota indingo, ndimuvhiiha kuvha lupanda mu Nyumba iMfinjile iya Mulungu waane, te ahaafume umwo naalumo. Kuli uyo, ndisimba izina ilya Mulungu waane ni izina ilya nkaaya iya Mulungu waane. Inkaaya iyo Yelusaleemu impwa ye yikwiha kufuma ku mwanya kwa Mulungu waane. Havhili kuli uyo ndisimba izina lyane neneene, liila lye lipwa.

¹³ We ali na makutwi, atejeelezye ziila zye uMupepo uMufinjile akuvivhuuzya ivivhanza.”

Ukalaata uwa Yeesu ku shivhanza isha ku Lawodikiya

¹⁴ “Uhavhizya uwa shivhanza isha ku Lawodikiya, musimbile uti: Iga mazwi kufuma kuli ine ne Yeesu. Ine ne Amina, havhili ne hoome umutungamu nu wa nalyoli. Nkuvikonzya ivintu vwonti vwe uMulungu ápezile.

¹⁵ Ndumanyile ulujendo lwaho kuuti iwe te we muhatazu havhili te we mupwu. Kwashi inga waamile we muhatazu, poosye inga we mupwu!

¹⁶ Ileelo, mwe pe we mutuushizu, kuuti iwe te we muhatazu havhili te we mupwu, ndikutapiha ufume mwi ilomu lyane.

¹⁷ Iwe ukuti, ‘Ne dumbwe, ndonsile nkaani, ntasovheliilwe naashimo.’ Ileelo utamanyile kuuti iwe we mudedevhazu, we wakufwilwa uvhwila, we mupiina, we ntonko havhili uli ishitali.

¹⁸ Nkukusoha kuuti, ukale ku kwane isahaabu ye vhazelufwizye mu mwoto, inga uvhe we dumbwe. Havhili hinza ukale ivizwalo ivizelu, uzwalaje nu kuzyiha ishitali shaaho, inga utahaalole insoni. Ukale umulembo uwa kudwina mu minso gaaho, inga ulolaje ahinza.

¹⁹ Vhonti vhe mbakunzite, nkuvhapilila nu kuvhasunda, pe uvhe nu mute kutonta.

²⁰ Yeenya, ine nimiliiye ku mulyango nkwiguzya! Umuntu we ayiivwa izwi lyane nu kwigula umulyango, ndiyinjila ku kwakwe, niine ndiilya pooka nawo, woope pooka niine.

²¹ Ula we alipoota indingo, ndimwitishila kutendama pooka niine pa shitengo shaane isha vhumwene. Aliyiima inza ine ne nápoosite indingo, nkatendama pooka nu Taata pa shitengo shaakwe isha vhumwene.

²² We ali na makutwi, atejeelezye ziila zye uMupepo uMufinjile akuvivhuuzya ivivhanza.”