Ishitushizya 22 - ULufingwi uLupwa

Ijenje ilya minzi ge gakufumwa uvhulanzi

¹ Pe uhavhizya ahandanga ijenje ilya minzi ge gakufumwa uvhulanzi, amazelu ngati lilooli, gahafumaga ku shitengo isha vhumwene isha Mulungu na Hagonzi aha MWENE uMulungu.

² Ijenje ilyo lihiihaga kutuushila mwi idala ipiti ilya nkaaya. Mu mbazu zyonti izya ijenje ilyo mwámile amakwi ge gakufumwa uvhulanzi ge gakuhoma mala 12 ku mwaha. Kwe kuuti ku mwezi gakuhoma lwoka, amatundu gaakwe mulembo uwa kuponia avhantu avha mu nsi zyonti.

³ Shitaliipo ishintu naashimo she vhashitifile she shiliivha mu nkaaya iyo. Ishitengo isha vhumwene isha Mulungu ni sha Hagonzi aha MWENE uMulungu shiliivha mu nkaaya iyo na vhavhomvi avha Mulungu vhalimupuutaga.

⁴ Vhalipalola pa minso gaakwe ni izina lyakwe lilisimbwa pa vweni vwavho.

⁵ Uvhusiku te vhuhaavhe havhili, te vhahanze uvhuzelu uvhwa nyaale, poosye uvhwa izuvha, mwe pe uMWENE uMulungu alivhalamwizya, vhoope vhalikonzya shiima shiima.

⁶ Uhavhizya ahambuuzya ahati, “Amazwi iga ga nalyoli havhili ga kwitishilwa. UMWENE uMulungu we akuuvhapa avhakuvhwi uMupepo waakwe uMufinjile, amusonteleziizye uhavhizya waakwe avhalolesye avhavhomvi vhaakwe zye kuuti zivhombeshe ishisita kuhaavha.”

Kugaluha ukwa Yeesu Chilisiti

⁷ UYeesu akuti, “Yeenya, nkwinza naluvhiilo. Alosiitwe uweene we akugashindiha amazwi aga vhukuvhwi ge gali mwi ikalaata ili.”

⁸ Ine ne Yoohani, názivhwenyi nu kuzyivwa izi zyonti. Lwe niivwa nu kulola nkakupama pansi pa vinama ivwa havhizya ula we ándanzile izi, inga imupuute.

⁹ Ileelo uweene ahambuuzya ahati, “Leha! Ine ne muvhomvi vhweleele inza iwe na vhamwinyu avhakuvhwi na vhonti vhe vhakuzyitiha indajizyo zye zili mwi ikalaata ili. Mupuute uMulungu!”

¹⁰ Havhili ahati, “Utahazyishe fwe vhuzigizigi amazwi aga vhukuvhwi ge gali mwi ikalaata ili, mwe pe ahavhaliilizyo he kuuti galunjishe hapalamiiye.

¹¹ Pe we akuvhomba imbiivhi ajendeelele kuvhomba imbiivhi, we muhandamanu ajendeelele kuvha muhandamanu. We mugolosu ajendeelele kuvhomba ingolosu, havhili we mufinjile ajendeelele kuvha mufinjile.”

¹² UYeesu akuyanga akuti, “Yeenya, nkwinza naluvhiilo pooka na malipilo ge ndivhalipa vhonti kulandatana nu lujendo lwavho.

¹³ Ine ne Aalufa havhili ne Omeega, uMutanzi nu Vhusililishilo, uVhwandilo nu Vhusililishilo.

¹⁴ Vhalosiitwe ivho vhe vhakuhanda amenda gaavho, inga vhitishilwe kwinjila mu nkaaya kutuushila mu malyango gaakwe, nu kulya amantonongwa aga makwi ge gakufumwa uvhulanzi.

¹⁵ Ileelo kunzi ukwo kuli imbwa na vhalozi na vhalugusu na vhagozi na vhaala vhe vhakupuuta iviholanyo na vhonti vhe vhakusungwa ilenga nu kuliyanga.

¹⁶ “Ine ne Yeesu, imusonteleziizye uhavhizya waane kuvhahomeshezya imwe inongwa izi kuzya vivhanza. Ine ne lizi, havhili ne wa mu mpaapo izya mwene uDaavhudi, uluzota luula lwe lukulama nkaani inzanshi.”

¹⁷ UMupepo uMufinjile na we akunyatulwa vhakuti, “Nzaaga!” Woope we akwivwa ati, “Nzaaga!” Woope we ali ni shinyooto ayinze, we akwanza, anyatule aminzi ge gakufumwa uvhulanzi pa vhweleele.

Amazwi aga vhusililishilo

¹⁸ Nkuvhahomeshezya avhantu vhonti vhe vhakugiivwa amazwi aga vhukuvhwi ge gali mwi ikalaata ili: Inga umuntu wonti ayonjezya izwi lyonti, uMulungu woope alimwonjezezya imfwa izyo zye zisimviilwe mwi ikalaata ili.

¹⁹ Havhili umuntu wonti inga ayeefwa amazwi gamo aga vhukuvhwi ge gali mwi ikalaata ili, uMulungu woope aliyeefwa uvhuyo vhwakwe mu Nkaaya iMfinjile. Umuntu uyo te ahaalye amantonongwa aga mwi ikwi liila lye likufumwa uvhulanzi. Inongwa izya nkaaya iyo ni ikwi ilyo zisimviilwe mwi ikalaata ili.

²⁰ We akuhomeshezya kuli izi, akuti, “Nalyoli nkwinza naluvhiilo.” Amina. Uyinze Mwene Yeesu!

²¹ UMwene uYeesu, avhafwilaje uvhwila imwe mwenti.