Ishitushizya 21 - ULufingwi uLupwa

IYelusaleemu impwa

¹ Pe nkalola imwanya impwa ni nsi impwa. Imwanya yiila intanzi ni nsi yiila intanzi zyápezile zyepa, woope usumbi havhili atáliipo.

² Nkalola iNkaaya iMfinjile, iYelusaleemu impwa, yikwiha kufuma ku mwanya kwa Mulungu. Inkaaya iyo yáali ngati mwantanda we avhantu vhamuyemvwizye lwe akwimalwa.

³ Pe nkiivwa izwi ipiti kufuma ku shitengo isha vhumwene lihati, “Yeenya uvhuyo uvhwa Mulungu pooka na vhantu! Alitendama pooka navho, vhoope vhaliivha vhantu vhaakwe, woope aliivha wu Mulungu waavho.

⁴ Uweene alivhasyumula amansozi gaavho gonti. Uvhufwe te vhuhaavhe havhili, poosye uvhuvhaavi, poosye inkuuta, poosye kuloosya, mwe pe izya hali zituusile!”

⁵ Pe uMulungu, uweene we átendiime pa shitengo isha vhumwene ahati, “Yeenya, naakuzivhomba zyonti kuvha impwa.” Havhili ahati, “Simba inongwa izi, mwe pe amazwi iga ga kwitishilwa havhili ga nalyoli!”

⁶ Ahati, “Zyalunjiha! Ine ne Aalufa havhili ne Omeega, uVhwandilo nu Vhusililishilo. We ali ni shinyooto ndiimupa ishakumwela pa vhweleele kufuma mu viduda ivwa minzi ge gakufumwa uvhulanzi.

⁷ Ula we alipoota indingo, aliposheela isho, niine ndiivha ne Mulungu waakwe, woope aliivha mwana waane.

⁸ Ileelo avhantu avha ilyoga na vhe vhatakwitiha na vhapoopo na vhagozi na vhalugusu na vhalozi na vhe vhakupuuta iviholanyo na vha ilenga vhonti, uvhuyo vhwavho vhuliivha mwa sumbi ula we akwaha umwoto ni mbaluuti. Uwo we vhufwe uvhwa vhuvhili.”

⁹ Pe wooka mu vhahavhizya vhaala 7 vhe vháali ni mbiga ziila 7 zye zyízuuye imfwa 7 izya vhusililishilo, ahinza nu kumbuuzya kuuti, “Nzaaga! Niine kwe nkulolesye umwantanda we akwimalwa, umushi uwa Hagonzi aha MWENE uMulungu!”

¹⁰ UMupepo uMufinjile ahaniishila, woope uhavhizya ahantwala pi igamba itali nkaani. Ahandolesya iNkaaya iMfinjile, iYelusaleemu, yikwiha kufuma ku mwanya kwa Mulungu.

¹¹ Yihanyengʼenyelaga ku vhushindamu uvhwa Mulungu. Uvhuzelu vhwakwe vhwámile ngati wa ivhwe ilya nsavho, havhili ngati yaasipi, havhili ngati lilooli.

¹² Yáamile nu lupitu ulutali, havhili ulupiti lwe luli na malyango 12. Amalyango igo gahagulilwaga na vhahavhizya 12. Pa malyango gonti pásimviilwe izina lyoka mu gaala amazina aga nkolo 12 izya Isilayeeli.

¹³ Imbazu zyonti zyámile na malyango gatatu: uluvhazu ulwa kuvhutukulo amalyango gatatu, kulutala amalyango gatatu, kuntende amalyango gatatu na kuvhuswelo amalyango gatatu.

¹⁴ Ulupitu ulwa nkaaya iyo lwázengwilwe mu mavhwe 12 aga lwalo. Mu mavhwe igo lyásimviilwe lyoka mu gaala amazina 12 aga vhatumwa avha Hagonzi aha MWENE uMulungu.

¹⁵ Pe woope uhavhizya ula we ahayangaga niine áamile ni ndiisa iya sahaabu iya kupimila, inga ayipime inkaaya iyo, amalyango gaakwe nu lupitu lwakwe.

¹⁶ Inkaaya iyo yálingiine imbazu zyonti zine, uvhutali nu vhupaapa vhwálingiine. Pe uhavhizya ahayipima inkaaya iyo ku ndiisa yaakwe, yáamile nu vhutali nu vhupaapa nu vhutali uvhwa kusogola kumwanya, ikilomiita 2,400 ishi.

¹⁷ Ahalupima ulupitu lwakwe, ahaaga luli ni miita 60 ku shipimilo isha muntu she uhavhizya ápimiiye.

¹⁸ Ulupitu ulwo lwázengwilwe ku mavhwe aga yaasipi, iyeene inkaaya yázengwilwe ku sahaabu inyinza ye yikulolesya inza ilooli.

¹⁹ Ulwalo ulwa lupitu ulwo avhazenzi vháluyemvwizye ku mavhwe aga nsavho aga mavhiila mu mavhiila. Ivhwe itanzi ilya lwalo lyáli lya yaasipi ni lya vhuvhili lyáli lya yakuuti samawi ni lya vhutatu lyáli lya kalikedoni ni lya vhune lyáli lya zumaliidi.

²⁰ Havhili ivhwe ilya vhusaano lyáli lya sadoniki ni lya 6 lyáli lya akiiki. Ivwe ilya lya 7 lyáli lya kulisoliito ni lya 8 lyáli lya zabalajaadi. Ivhwe ilya 9 lyáli lya toopazi ni lya 10 lyáli lya kulisopulaso ni lya 11 lyáli lya yasinto ni lya 12 lyáli lya metisito.

²¹ Goope amalyango 12 gáamile luulu 12, amalyango gonti gágomviilwe ku luulu yooka. Idala ipiti ilya nkaaya lyágomviilwe ku sahaabu inyinza ye yikulolesya inza ilooli.

²² Ntávhwenyi iNyumba iMfinjile mu nkaaya iyo, mwe pe uMWENE uMulungu uwa Maha Gonti na Hagonzi haala aha MWENE uMulungu ye Nyumba yaakwe iMfinjile.

²³ Inkaaya iyo yitakwanza izuvha, poosye umwezi kuyilamila, mwe pe uvhushindamu uvhwa Mulungu vhukuyilamila ni nyaale yaakwe Hagonzi aha MWENE uMulungu.

²⁴ Avhantu avha mu nsi zyonti, vhalijenda mu vhuzelu vhwakwe na vhamwene avha mu nsi zyonti, vhaliyileetela inkaaya iyo uvhudumbwe vhwakwe.

²⁵ Amalyango aga nkaaya iyo galivhanga ukwazi musanya wonti, havhili te kuhaavhe uvhusiku muumwo.

²⁶ Avhantu avha mu nsi zyonti vhalivhutwala uvhushindamu nu mushinzi waavho mu nkaaya iyo.

²⁷ Ileelo shonti she shihandamanu te shihinjile muumwo, poosye umuntu wonti we akuvhomba izya kuviisya poosye izya ilenga te ahinjile muumwo. Vhevhaala vhweleele vhe amazina gaavho gasimviilwe mwi ikalaata ilya vhulanzi ilya Hagonzi aha MWENE uMulungu vhe vhaliyinjila.