Ishitushizya 20 - ULufingwi uLupwa

Amaaha 1,000

¹ Pe nkamulola uhavhizya wooka akwiha kufuma ku mwanya ni shigulilo isha kwi ilivha ilya ku vhuzimu nu munyoloolo umupiti ku nyoovhe yaakwe.

² Ahalilema iyoha ilyo, injoha iya hali, ye wu Mukwalanzi, poosye wu Seetano, ahalikunga ku havhaliilizyo aha maaha 1,000.

³ Ahalisumbila kwi ilivha ilya ku vhuzimu, ahawugalila nu kuwulemezanya umulyango uwa kwinjiilila kuukwo. Ávhomvile vhwevhulo inga iyoha ilyo litahasheele havhili kuzihopenkanya insi kufishila ahavhaliilizyo aha maaha 1,000. Ileelo lwe amaaha igo gatuuha, alilyigulila havhili ku havhaliilizyo hansi vhweleele.

⁴ Pe nkalola ivitengo ivwa vhumwene na vhe vhavitendamiiye, avhantu ivho vhahapeelwa amaha aga vhulonzi. Havhili nkalola impepo izya vhaala vhe vhávholiilwe kuzya kufumwa uvhwahoome uvhwa Yeesu na kuzya kulyitiha izwi ilya Mulungu. Ivha vhatáshipuusite ishihanu shiila ni shiholanyo shaakwe, poosye kuposheela ivimanyilo pa vweni vwavho, poosye pa nyoovhe zyavho. Vhahazyuha havhili, vhahakonzya pooka nu Chilisiti ku maaha 1,000.

⁵ Ulu lwe lwa kwanda uMulungu kuvhazyusya avhantu. Avhamwavho vhonti vhe vháfuuye vhatázyusile kufishila ahavhaliilizyo aha maaha 1,000.

⁶ Vhalosiitwe nkaani, havhili vhafinjile vhonti ivho vhe vhakuvhaazilwa kuzyuha ulwa kwanda. Uvhufwe uvhwa vhuvhili te vhuhaavhe na maha kuli ivho. Vhaliivha vhapuuti avha Mulungu nu Chilisiti, havhili vhalikonzya pooka nawo ku maaha 1,000.

Isunde ilya Mukwalanzi

⁷ Lwe ahavhaliilizyo aha maaha 1,000 haasila, vhalimwigulila uMukwalanzi kufuma mu jeela yaakwe.

⁸ Pe aliifuma panzi, alitaliha kuvhahopenkanya avhantu vhonti vhe vhasaasite mu nsi zyonti, kwe kuuti iGogu ni Magogu. UMukwalanzi alivhavhungaaniha pooka aVhagogu na Vhamagogu kuzya vhulugu, vhoope vhaliivha vhinji fwe lusenga ulwa mu luvhazu ulwa sumbi.

⁹ Vhalituuha mu nsi yonti, kulizyunguula ilinga ilya vhafinjile ni nkaaya iya Mulungu ye ahayisungwa. Ileelo umwoto wuliyiiha kufuma ku mwanya nu kuvhalovwa.

¹⁰ Woope uMukwalanzi we ahavhahopenkanyaaga, alisumbilwa mwa sumbi we akwaha umwoto uwa mbaluuti. Umwo mwe shili ishihanu shiila nu mukuvhwi ula uwa ilenga, vhoope vhaliyimvilwa uvhusiku nu musanya, shiima shiima.

Uvhulonzi uvhwa kumpeleela

¹¹ Pe nkalola ishitengo ishipiti ishizelu isha vhumwene nuula we ashitendamiiye. Insi ni mwanya viheepa naluvhiilo pilongolela lyakwe, vitálolesile havhili.

¹² Pe nkavhalola avhafwe, avhapiti na vhansi, vhimiliiye pilongolela ilya shitengo isha vhumwene, amakalaata gahagubulwa. Havhili ikalaata ilyamwavho ilya vhulanzi lyope lihagubulwa. Pe uMulungu ahavhalonga avhafwe kulandatana nu lujendo lwavho, inza vwe lwásimviilwe mu makalaata igo.

¹³ Usumbi ahavhafumwa panzi avhafwe vhe vháali muumwo, uVhufwe nu Vhuzimu vhahavhafumwa panzi avhafwe vhe vháamile kuukwo. UMulungu ahavhalonga vhonti kulandatana nu lujendo lwavho.

¹⁴ Pe uVhufwe nu Vhuzimu vhahasumbilwa mwa sumbi we akwaha mwoto. Usumbi uyo we akwaha umwoto we vhufwe uvhwa vhuvhili.

¹⁵ Umuntu wonti we izina lyakwe litálolesile mwi ikalaata ilya vhulanzi, ahasumbilwa mwa sumbi we akwaha umwoto.